Stap Sef Long Medel Blong Ol Man Blong God

“Bambae mi talem tangkiu long yu long fes blong olgeta man blong yu.”—SAM 35:18.

1-3. (a) ?Wanem samting i save mekem se sam Kristin oli no moa frengud wetem Jeova? (b) ?Ol man blong God oli save stap sef long weples?

TAEM Joe mo waef blong hem tufala i stap spel, tufala i go daeva blong lukluk ol rif we i gat fulap kalakala fis long olgeta, ol smosmol wan kasem ol bigbigwan. Tufala i daeva i go afsaed moa blong lukluk ol rif we oli stap daon. Taem tufala i kasem en blong rif, long ples we i dip tumas, waef blong Joe i talem se: “Mi ting se yumitu stap longwe tumas long so.” Joe i ansa se: “Yu no fraet. Mi mi save samting we mi stap mekem.” Smoltaem nomo afta we Joe i talem olsem, hem i sek se i no moa gat fis long rif. Taem hem i lukluk i go long dip ples, hem i kasem save from wanem ol fis oli haed. !Wan sak i stap long dip ples ya, mo i stap kam stret long hem! Joe i fraet we i fraet. I no gat wan samting we hem i save mekem blong blokem sak ya. Be taem sak ya i kam samwe long wan mita long Joe, hem i tanraon mo i gowe.

² Long wol ya blong Setan, i gat plante samting we oli save pulum tingting blong man, olsem ol pleplei, wok, mo olting. Sipos wan Kristin i no lukaot gud, ol samting ya oli save pulum tingting blong hem gogo hem i no luksave se hem i stap long rod blong trabol. Joe we i wan elda, i talem se: “Samting we i hapen long mi, i mekem mi mi tingbaot ol fren we yumi kampani wetem olgeta. !I moagud we yumi swim long ples we i sef mo we yumi haremgud long hem, hemia i min se yumi stap nomo insaed long kongregesen!” Ol samting blong wol ya we oli pulum man, oli olsem solwota we i dip we i dip. Yumi no mas letem ol samting ya oli pulum yumi, nao yumi no moa joen long kongregesen mo yumi stap long denja. Sipos wan dei yu luk se samting ya i stap hapen long yu, yu mas tekem aksen kwiktaem blong joen bakegen wetem kongregesen, hemia i olsem we ‘yumi swim i kambak long ples we i sef.’ Sipos yu no mekem olsem, bambae yu no moa fren wetem Jeova.

³ Wol ya i wan ples we i denja tumas long ol Kristin. (2 Tim. 3:1-5) Setan i save se hem i gat smol taem nomo i stap, mo hem i olsem wan laeon we i wantem kakae olgeta we oli no wekap gud. (1 Pita 5:8; Rev. 12:12, 17) Be i gat wan ples we yumi save haed long hem. Jeova i putum ol man blong hem long wan sefples, hemia Kristin kongregesen.

4, 5. ?Plante man oli harem olsem wanem long saed blong fiuja blong olgeta? ?From wanem?

⁴ Fasin blong laef long wol ya i no givhan long man blong harem se hem i sefgud, mo i no mekem we tingting blong hem i stap kwaet. Plante man oli harem se oli no sef nating from fasin blong brekem loa, raf fasin, praes blong ol samting oli go antap bitim mak, mo from ol samting we oli spolem graon, win, mo solwota. Olgeta man oli kasem trabol taem oli kam olfala mo oli sik. Mo samfala we oli gat wok, haos, mane, mo gudfala helt, oli wari se wan dei bambae oli lusum olgeta samting ya.

⁵ Plante man oli no harem gud tu long filing blong olgeta. Oli ting se sipos oli mared mo gat pikinini, bambae oli faenem pis mo harem gud long laef blong olgeta, be sore tumas, oli no kasem ol samting ya nating. Sam man oli wantem frengud wetem God, ale oli go long jos, be oli harem se tingting blong olgeta i fasfas nomo. Nao oli gat tu tingting long saed blong tijing we oli kasem, mowas nao taem oli luk we ol lida blong skul oli mekem samting we i nogud, mo oli tijim tok we i no stap long Baebol. From samting ya, plante man oli harem se i moagud we oli trastem save blong ol saentis. Sipos no, oli trastem ol narafala man nomo se bambae oli gat gudfala tingting mo fasin, ale oli save mekem laef long wol ya i kamgud bakegen. Taswe, yumi no sapraes se ol man raonabaot long yumi oli no harem nating se oli sef, mo oli no wantem tingbaot fiuja blong olgeta.

6, 7. (a) ?Wanem samting i defren long saed blong ol man we oli mekem wok blong God, mo ol man we oli no mekem wok blong hem? (b) ?Bambae yumi tokbaot wanem?

 ⁶ !Taem yumi skelem ol man we oli joen long Kristin kongregesen, wetem ol man afsaed, yumi luk se oli no sem mak nating! I tru, yumi ol man blong Jeova, yumi kasem ol semfala trabol mo wari we ol man raonabaot long yumi oli stap kasem. Be tingting blong yumi long saed blong ol trabol ya, i defren long tingting blong olgeta. (Ridim Aesea 65:13, 14; Malakae 3:18.) ?From wanem? From we yumi gat save blong Baebol. Yes, Baebol i eksplenem long yumi from wanem yumi stap kasem ol trabol. Mo tu, Baebol i givhan long yumi blong winim ol hadtaem mo trabol we yumi fesem long laef blong yumi. Taswe, yumi no wari bitim mak long saed blong fiuja. Taem yumi wosipim Jeova, yumi sakemaot ol tingting we oli no waes mo we oli no stanap long Baebol, mo yumi no mekem ol fasin we oli nogud. Samting ya i blokem yumi blong yumi no kasem ol rabis frut we oli kamaot from ol fasin ya. Taswe, ol memba blong Kristin kongregesen, tingting blong olgeta i kwaet, i no olsem ol narafala man raonabaot long olgeta.—Aes. 48:17, 18; Fil. 4:6, 7.

⁷ Bambae yumi tokbaot stori blong sam man we oli mekem wok blong Jeova, mo bambae yumi luk olsem wanem oli stap sefgud, be ol man we oli no mekem wok blong Jeova, oli no sefgud. Ol stori ya oli mas pulum yumi blong jekem gud ol tingting mo aksen blong yumi. Mo oli mas pulum yumi blong tingbaot olsem wanem yumi save go moa blong folem advaes blong God, we hem i givim blong lukaot gud long yumi.—Aes. 30:21.

‘Klosap Tingting Blong Mi i No Moa Stap Long God’

8. ?Longtaem finis i kam, Jeova i wantem se ol man blong hem oli mekem wanem?

⁸ Long taem bifo, olgeta we oli jusum blong obei mo mekem wok blong Jeova, oli no kampani wetem ol man we oli no mekem wok blong hem. Jeova i talem finis se ol man blong Setan bambae oli badfren wetem ol man we oli wosipim Hem. (Jen. 3:15) Ol man blong God oli holemstrong long ol rul blong hem, taswe fasin blong olgeta i no sem mak long ol man raonabaot long olgeta. (Jon 17:15, 16; 1 Jon 2:15-17) Be samtaem i no isi long ol Kristin ya blong stap defren. Oli mas lego sam samting we olgeta nomo oli wantem, blong oli save  mekem wok blong God. Be sam long olgeta bifo oli gat tingting ya se i no waes blong mekem olsem.

9. Tokbaot olsem wanem tingting blong man we i raetem Sam 73, i trabol.

⁹ Man we i raetem Sam 73, we maet hem i wan smol bubu blong Asaf, i gat tu tingting. Hem i wan man blong Jeova, be hem i gat tingting ya se maet rod we hem i jusum i rong. Man ya i wantem save from wanem i luk olsem se ol samting long laef blong ol man nogud oli rongud, oli hapi, mo oli gat plante samting, be samfala we oli traehad blong mekem wok blong God, oli kasem hadtaem mo trabol.—Ridim Ol Sam 73:1-13.

10. ?From wanem yu yu ting se kwestin we man blong raetem Sam i askem, i impoten?

¹⁰ ?Olsem wanem long yu? ?Samtaem yu tu yu gat semfala tingting olsem man ya blong raetem Sam? Sipos yes, yu no mas wari bitim mak se yu mekem samting we i rong, mo yu no mas ting se bilif blong yu i stap lus. Blong talem stret, plante man blong Jeova, wetem samfala tu we Jeova i yusum olgeta blong raetem Baebol, oli gat ol tingting olsem. (Job 21:7-13; Sam 37:1; Jer. 12:1; Hab. 1:1-4, 13) Tru ya, i gat wan kwestin we olgeta man we oli wantem mekem wok blong Jeova, oli mas tingting gud long hem mo oli mas luksave ansa blong hem. Kwestin ya se: ?Sipos yumi obei long God mo mekem wok blong hem, hemia nao beswan samting blong mekem long laef blong yumi? Kwestin ya i laenap wetem tingting we Setan i stanemap long garen blong Iden. Setan i agensem Jeova, se hem i no gat raet blong rulum heven mo wol. (Jen. 3:4, 5) Taswe, i gud we yumi evriwan yumi tingting gud long ol tok we man blong raetem Sam i talem. ?I stret blong jalus long ol man nogud we oli flas, we ol samting long laef blong olgeta oli rongud? ?I stret we “tingting blong yumi i no moa stap” long wok blong Jeova mo yumi folem fasin blong ol man nogud ya? Hemia nao samting we Setan i wantem yumi blong mekem.

11, 12. (a) ?Wanem i mekem se man blong raetem Sam i no moa gat tu tingting? ?Mo samting ya i tijim yumi long wanem? (b) ?Wanem samting i save givhan long yu blong gat sem tingting olsem hem?

¹¹ ?Wanem i givhan long man blong raetem Sam ya, blong hem i no moa gat tu tingting? Hem i talem se klosap hem i lego rod blong stret fasin. Be hem i jenisim tingting blong hem taem hem i go ‘long haos blong God.’ Hemia i min se hem i joen wetem ol narafala man blong God we oli putum wosip blong God long fasples long laef blong olgeta, mo hem i tingting gud long stamba tingting blong God. Long taem ya nao, tingting blong hem i kam klia gud se hem i no wantem kasem trabol we ol man nogud ya bambae oli kasem. Hem i jes luksave se laef blong olgeta mo ol samting we oli jusum blong mekem long laef blong olgeta, i pulum olgeta i go “long ol ples we i glis.” Man blong raetem Sam ya i kasem save se ol man we oli lego Jeova blong kasem ol rabis samting we tingting blong olgeta i wantem, bambae Jeova i spolem olgeta “kwiktaem nomo.” Be Jeova bambae i givhan long olgeta we oli mekem wok blong hem. (Ridim Ol Sam 73:16-19, 27, 28.) Ating yu yu luk finis se toktok ya i tru we i tru. Maet plante oli laekem mekem samting we olgeta nomo oli wantem, ale oli no folem ol loa blong God. Be man we i mekem olsem i no save ronwe long ol rabis frut we bambae hem i kasem.—Gal. 6:7-9.

¹² ?Stori blong man blong raetem Sam ya i tijim yumi long wanem narafala samting bakegen? Man ya i faenem sefples mo waes taem hem i joen wetem ol man blong God. Taem hem i go long ples we ol man oli go long hem blong wosipim Jeova, hem i stat blong tingting gud bakegen mo tingting stret. Long sem fasin, taem yumi go long ol miting blong kongregesen tede, yumi save kasem ol waes advaes mo harem gud long ol tijing blong Baebol. Taswe Jeova i talem long ol man blong hem se oli mas kam long ol Kristin miting. Long ples ya, bambae oli harem ol tok we oli save leftemap tingting blong olgeta, mo we oli save pulum olgeta blong kam waes.—Aes. 32:1, 2; Hib. 10:24, 25.

Yu Mas Waes Taem Yu Jusum Ol Fren

13-15. (a) ?Wanem trabol we Daena i kasem? ?Samting ya i soemaot wanem? (b) ?From wanem yu yu sef taem yu joen wetem ol narafala Kristin?

¹³ Taem yumi ridim stori blong Daena, gel blong Jekob, yumi luksave se man i save kasem bigfala trabol taem i joen wetem ol fren blong wol. Buk blong Jenesis i talem se hem i stap joen wetem ol yangfala woman Kenan we oli stap raonabaot long hem. Ol man we oli wosipim Jeova oli folem ol rul we Hem i givim long saed blong ol fasin we oli gud mo ol fasin we oli nogud, be ol man Kenan oli no  folem ol rul ya. Ol man we oli stap digim graon blong faenem ol samting blong bifo, oli luk sam samting we oli soemaot se ol man Kenan oli mekem rabis fasin bitim mak. Oli wosipim ol aedol, oli slip olbaot, oli joenem ol rabis fasin wetem wosip blong olgeta, mo oli faet. (Eks. 23:23; Lev. 18:2-25; Dut. 18:9-12) Tingbaot trabol we Daena i kasem from we hem i kampani wetem ol man ya.

¹⁴ Baebol i talem se wan boe long ples ya, nem blong hem Sekem, i “wan gudfala yang man, we ol man oli stap tinghae moa long hem, i winim ol narafala boe long haos blong papa blong hem.” Sekem i luk Daena mo “i go tekem hem, i fosem hem blong i slip wetem hem.” (Jen. 34:1, 2, 19) !Hemia wan bigfala trabol! Daena i no tingbaot nating se hem i save kasem wan trabol olsem. Hem i ting se ol yangfala ya oli gud nomo, mo maet hem i harem se i jes wantem sam fren. Be sore tumas, tingting blong hem i trikim hem.

¹⁵ ?Stori ya i tijim yumi long wanem samting? I tijim yumi se sipos yumi joen wetem ol man we oli no gat sem bilif olsem yumi, bambae yumi kasem trabol. Baebol i talem se: “Ol stret man nomo, be ol fren blong olgeta we oli no stret, oli save spolem fasin blong olgeta.” (1 Kor. 15:33) Be sipos yu joen wetem ol man we oli gat sem bilif olsem yu, oli folem ol rul blong God long saed blong stret fasin, mo oli lavem Jeova tu, bambae yu stap sefgud. Sipos yu joen wetem ol gudfala fren olsem, bambae oli save pulum yu blong yu kam waes.—Prov. 13:20.

‘God i Mekem Yufala i Klin’

16. ?Aposol Pol i talem wanem long saed blong samfala long Kristin kongregesen?

¹⁶ Kristin kongregesen i givhan finis long plante man we oli mekem doti fasin, blong oli kam klin. Taem aposol Pol i raetem faswan leta blong hem i go long kongregesen blong Korin, hem i talem ol gudfala tok long ol Kristin ya from we oli jenisim fasin blong laef blong olgeta, blong mekem i laenap wetem ol rul blong God. Fastaem, sam long ol man ya oli mekem nogud wetem woman, oli wosipim ol aedol, oli slip wetem woman blong narafala man, oli slip wetem man bakegen, oli stil, oli drong, mo oli mekem ol narafala nogud fasin bakegen. Pol i talem long olgeta se: “Be naoia, . . . God i wasemaot ol sin blong yufala finis blong mekem yufala i klin.”—Ridim 1 Korin 6:9-11.

17. ?Olsem wanem ol rul blong Baebol oli jenisim laef blong plante man?

¹⁷ Ol man we oli no bilif, oli no gat ol gudfala rul blong lidim laef blong olgeta. Olgeta nomo oli jusum prapa rod blong olgeta. Sipos no, oli jes folem ol nogud fasin blong ol man raonabaot long olgeta, oli olsem wan kenu we solwota i sakem i go olbaot. Hemia nao samting we sam man Korin oli mekem, bifo we oli kam Kristin. (Efes. 4:14) Be stret save long Tok blong God mo ol stamba tingting blong hem, i gat paoa blong jenisim laef blong man. Sipos man i mekem stret save ya i wok long laef blong hem, bambae laef blong hem i kam moa gud. (Kol. 3:5-10; Hib. 4:12) Plante memba blong Kristin kongregesen tede, oli save talem long yu se bifo we oli lanem mo folem ol stret rul blong Jeova, oli no bin folem wan rul nating long laef blong olgeta. Be oli no harem gud, mo oli no glad. Oli faenem pis nomo taem oli stat blong joen wetem ol man blong God mo mekem laef blong olgeta i laenap wetem ol rul blong Baebol.

18. ?Wanem i hapen long wan yangfala? ?Samting ya i soemaot wanem?

¹⁸ Kristin kongregesen i wan sefples, olsem ‘ples we i sef blong man i swim long hem.’ Be i gat samfala we oli jusum blong lego ples ya, mo naoia oli harem nogud tumas from desisen ya blong olgeta. Wan sista we nem blong hem Tanya, * i talem se hem i “gruap long trutok.” Be taem hem i gat 16 yia blong hem, hem i lego kongregesen blong “go ronem ol pleplei blong wol.” Hem i kasem plante rabis frut, mo wan long olgeta se hem i gat bel mo i kilim pikinini ya long bel blong hem. Hem i talem se: “Mi stap longwe long kongregesen blong tri yia. Long taem ya, mi kasem bigfala trabol long filing blong mi, mo trabol ya i no save gowe. Mo wan  samting we i gohed blong spolem tingting blong mi, hemia se mi kilim pikinini blong mi long bel. . . . Sam yangfala oli wantem go smoltaem long wol blong save se i olsem wanem, be mi wantem talem long olgeta ya se, ‘!Yufala i no mas mekem olsem!’ Maet fastaem i luk olsem se laef blong ol man blong wol i gud, be long en blong hem i gat trabol nomo. Wol ya i no save givim wan gudfala samting be i givim trabol nomo. Mi mi save. Mi save finis se laef long wol i olsem wanem. !I moagud blong stap long ogenaesesen blong Jeova! Hemia wan rod nomo blong laef we i save givim glad.”

19, 20. ?Kristin kongregesen i blokem yu long wanem samting? ?Mo olsem wanem hem i wan sefples?

¹⁹ Traem tingbaot samting we bambae i hapen long yu sipos yu lego Kristin kongregesen, we i olsem sefples blong yu. Plante man we oli folem fasin blong wol bifo we oli kam long trutok, oli no wantem nating blong tingtingbak long laef blong olgeta bifo. (Jon 6:68, 69) I gud we yu stap klosap long ol Kristin brata sista blong yu mo yu joengud wetem olgeta. Hemia i olsem wan sefples we i blokem yu long ol trabol we i stap kamaot long wol ya blong Setan. Taem yu kampani wetem ol brata sista ya mo yu joen oltaem long ol miting blong kongregesen, bambae yu gohed blong tingbaot se ol stret rul blong Jeova oli waes. Mo samting ya bambae i givhan long yu blong folem ol rul ya long laef blong yu. Yu gat plante risen blong ‘talem tangkiu long Jeova long fes blong olgeta man blong hem,’ olsem man blong raetem Sam ya i mekem.—Sam 35:18.

²⁰ I tru, olgeta Kristin oli gotru long sam hadtaem we i no isi long olgeta blong holemstrong long God. Long taem olsem, maet oli nidim nomo we wan narafala i soem stret rod long olgeta. ?Wanem samting we yu, mo ol narafala memba blong kongregesen, yufala i save mekem blong givhan long ol brata sista ya? Long nekis stadi, bambae yumi tokbaot olsem wanem yu save ‘toktok gud long ol brata sista blong yu, blong mekem tingting blong olgeta i strong.’—1 Tes. 5:11.

[Futnot]

?Bambae Yu Yu Ansa Olsem Wanem?

• ?Samting we i hapen long man blong raetem Sam 73, i tijim yumi long wanem samting?

• ?Yumi lanem wanem long stori blong Daena?

• ?From wanem Kristin kongregesen i wan sefples?

[Kwestin]

[Tok blong pija long pej 9]

!Swim long ples we i sef, i min se yumi stap insaed long kongregesen!