Yu Save Harem Gud Taem Yu Mekem Ol Samting We Jeova i Wantem

“Yufala i mas putum yok blong mi long solda blong yufala, . . . nao bambae yufala i faenem we tingting blong yufala i gat spel.”—MAT. 11:29, Nyutesteman wetem Ol Sam long Bislama.

1. ?Wanem loa i stap insaed long Loa we Jeova i givim long Moses long Hil ya Sinae, mo from wanem Hem i givim loa ya?

LONG Loa we Jeova i givim long Moses long Hil ya Sinae, i gat loa ya we i talem se ol man Isrel oli mas tingbaot Sabat dei se i tabu. Jeova i talem long Moses blong talem long ol man Isrel se: “Oltaem bambae yufala i mas wok sikis dei, be long namba seven dei, bambae yufala i no mas wok. Nao long fasin ya, bambae ol slef blong yufala wetem ol strenja we oli stap wok blong yufala oli save spel, mo ol anamol blong yufala tu oli save spel.” (Eks. 23:12) Yes, Jeova i tingbaot ol man blong hem we oli stap aninit long ol loa ya we hem i givim. From we hem i lavem olgeta, hem i mekem plan ya blong oli save gat wan dei blong “spel” blong bambae oli save harem gud bakegen.

2. ?Taem Isrel i holem Sabat dei i tabu, samting ya i givhan long olgeta olsem wanem?

² ?Olsem wanem? ?Sabat dei i wan dei blong spel nomo mo no mekem wan samting? Nogat. Hem i wan impoten dei long wosip we ol man Isrel oli mekem long Jeova. Sabat dei i givim taem long ol hed blong famle blong tijim famle blong olgeta blong oli ‘obei long Jeova mo oli mekem ol fasin we oli stret.’ (Jen. 18:19) Mo tu, Sabat dei i givim janis long ol famle mo ol fren we oli joen wanples, blong tingbaot ol bigfala wok blong Jeova mo blong harem gud tugeta. (Aes. 58:13, 14) Samting we i moa impoten se, Sabat dei i pija blong wan taem long fiuja we bambae olgeta man oli rili save harem gud bakegen. Taem ya hemia Wan Taosen Yia Rul blong Kraes. (Rom 8:21) ?Be olsem wanem long taem blong yumi tede? ?Ol tru Kristin we oli wantem obei long Jeova, oli save mekem wanem mo oli save go wea blong spel mo harem gud bakegen?

Fasin Joen Blong Ol Kristin i Mekem Yumi Harem Gud Bakegen

3. ?Olsem wanem ol Kristin long faswan handred yia oli givgivhan long olgeta, mo wanem gudfala samting i kamaot from?

³ Aposol Pol i tokbaot Kristin kongregesen olsem “wan bigfala pos blong mekem trutok i stap strong.” (1 Tim. 3:15, NW) Wan samting we i givhan plante blong mekem ol Kristin long faswan handred yia oli stap strong, hemia taem oli leftemap tingting blong olgeta mo oli givgivhan long olgeta wetem lav. (Efes. 4:11, 12, 16) Taem Pol i stap long Efesas, sam memba blong kongregesen blong Korin oli kam luk hem mo oli mekem tingting blong hem i strong. ?Samting ya i mekem wanem long hem? Pol i talem se: “Mi mi glad tumas from we Stefanas mo Fotunatas mo Akaekas, trifala i kamtru finis long mi. . . . Trifala i mekem tingting blong mi i stap kwaet.” (1 Kor. 16:17, 18) I sem mak long saed blong Taetas. Taem Taetas i go blong givhan long ol brata long Korin, Pol i raetem leta long kongregesen mo i talem se: “Yufala i bin leftemap tingting blong hem, nao hem i stap harem gud.” (2 Kor. 7:13) Tede tu, ol Witnes blong Jeova oli harem gud taem oli joen wetem ol narafala Kristin we oli givhan long olgeta.

4. ?Olsem wanem ol miting blong kongregesen oli mekem yumi harem gud bakegen?

⁴ Yu yu save finis we ol miting blong kongregesen oli stamba ples blong kasem bigfala glad. Long ol miting, yumi luk we ‘bilif blong narafala i save givhan long yumi, olsem we bilif blong yumi tu i save givhan long olgeta.’ (Rom 1:12) Ol Kristin brata sista blong yumi oli no jes ol fren we yumi mitim olgeta wanwan taem nomo. Oli ol tru fren. Oli ol man we yumi lavem olgeta mo we yumi respektem olgeta tu. Taem yumi joen wanples wetem olgeta  long ol miting blong yumi, samting ya i leftemap tingting blong yumi mo i mekem yumi harem gud.—Flm. 7.

5. ?Olsem wanem yumi save mekem se yumi evriwan we i kam long ol asembli, yumi harem gud?

⁵ Wan narafala ples we yumi rili save harem gud long hem, hemia long ol asembli we yumi gat evri yia. Ol asembli oli givim wota blong trutok we i kamaot long Tok blong God, be i no hemia nomo. Oli givim janis long yumi blong ‘mekem lav blong yumi i bigwan moa’ taem yumi joen wetem ol narafala. (2 Kor. 6:12, 13, NW) ?Be olsem wanem sipos yumi sem mo yumi faenem i had blong talem halo long ol narafala? Wan rod blong mekem se yumi save gud ol brata sista blong yumi, hemia blong joen long ol wok long ol asembli. Wan sista we i glad blong givhan long ol brata sista we oli kam long wan intenasnal asembli, hem i joen tu long wok blong klinim ples blong asembli. Biaen hem i talem se: “Mi no save plante brata sista we oli kam long asembli ya. Mi save nomo ol famle mo ol fren blong mi. !Be taem mi givhan blong klinim ples blong asembli, mi mitim plante brata sista! !Mifala i gat gudtaem tugeta!”

6. ?Wanem wan rod we yumi save harem gud taem we yumi go spel samples?

⁶ Evri yia, ol man Isrel oli stap go long Jerusalem blong joen long trifala lafet ya we oli mekem blong wosip long God. (Eks. 34:23) Plante taem, oli mas livim garen mo ol bisnes blong olgeta mo oli mas wokbaot plante dei long rod we i nogud. Nating se i olsem, taem oli go long haos tempol mo oli luk olgeta we oli stap long ples ya oli stap “presem Hae God [Jeova],” oli “glad we i glad.” (2 Kron. 30:21) Long sem fasin, plante man blong Jeova tede oli harem gud tumas taem oli wokbaot wetem famle blong olgeta blong go visitim ol Betel long ples blong olgeta. Nekis taem we yu go spel samples, i gud yu mekem plan blong visitim ol ples olsem.

7. (a) ?Olsem wanem blong mekem se yumi harem gud taem yumi joen wetem narafala blong kakae tugeta? (b) ?Wanem i save mekem se yumi tingtingbak long ol gudfala taem we yumi gat wetem ol brata sista blong yumi?

⁷ Yumi save harem gud tu, taem yumi joen wetem famle mo ol fren blong kakae tugeta. Waes King Solomon i talem se: “I no gat samting we i gud moa bitim we wan man i mas kakae mo i mas dring mo mekem bodi blong hem i harem gud from ol hadwok blong hem.” (Pri. 2:24, NW) Taem yumi joen tugeta blong kakae, samting ya i no blong mekem yumi spel nomo. Be, hem i save mekem se lav we i joenem yumi, i kam strong moa tu from we yumi stap save ol Kristin brata sista moa. Yumi glad blong tingtingbak long ol gudfala taem we yumi bin gat wetem ol brata sista blong yumi. Taswe i moa gud se yumi no invaetem tumas man i kam, mo se, taem oli kam, yumi mas lukaotgud long olgeta, speseli sipos i gat sam strong dring.

Wok Blong Prij i Mekem Yumi Harem Gud Bakegen

8, 9. (a) ?Wanem fasin blong Jisas we i defren long ol Farisi? (b) ?Taem yumi talemaot ol trutok blong Baebol, samting ya i givhan long yumi olsem wanem?

⁸ Jisas i wok strong long wok blong prij, mo hem i pulum ol disaepol blong hem blong mekem sem mak. Tok blong hem i soemaot klia samting ya: “I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:37, 38) Taem Jisas i prij, hem i talemaot wan “gud nius,” we i mekem ol man oli harem gud. (Mat. 4:23; 24:14) Hemia i defren bigwan long ol hevi rul we ol Farisi oli putum long ol man.—Ridim Matiu 23:4, 23, 24.

⁹ Taem yumi stap talemaot gud nius blong Kingdom long ol man, yumi stap mekem olgeta oli harem gud long saed blong spirit, mo long semtaem, save we yumi gat long ol trutok blong Baebol i kam klia moa, mo yumi gat bigfala tangkiu from ol sas trutok ya. Taswe, man blong raetem Sam i talem se: “Olgeta. !Yumi mas presem Hae God! Hem i God blong yumi mo i gud yumi singsing blong presem hem, from we fasin ya i gud tumas, mo i stret tu.” (Sam 147:1) ?Olsem wanem yu save kasem moa glad taem yu tokbaot Jeova long ol man?

10. ?Olsem wanem? ?Glad we yumi kasem long wok blong prij i dipen long hamas man we i lesin long gud nius blong Kingdom? Eksplenem.

¹⁰ I tru se long sam ples, ol man oli lesin long gud nius i bitim long sam narafala ples. (Ridim Ol Wok 18:1, 5-8.) Sipos yu laef long wan ples we i no gat plante man we oli intres long gud nius blong Kingdom, i gud we yu traem blong putum tingting blong yu i stap long ol gudfala samting we  yu kasem long wok blong prij. Tingbaot se traehad blong yu blong talemaot nem blong Jeova i no blong nating. (1 Kor. 15:58) Mo tu, glad we yumi kasem long wok blong prij i no dipen long hamas man we oli lesin long gud nius. Yumi trastem Jeova se sipos i gat wan man we i laekem trutok, bambae Hem i mas meksua se man ya i gat janis blong harem gud nius blong Kingdom.—Jon 6:44.

Baebol Stadi Blong Famle i Save Mekem Yumi Harem Gud

11. ?Jeova i givim wanem wok long ol papa mo mama, mo olsem wanem oli save mekem gud impoten wok ya?

¹¹ Ol Kristin papa mama oli gat wok blong tijim ol pikinini blong olgeta long saed blong Jeova mo ol rod blong hem. (Dut. 11:18, 19) ?Sipos yu yu wan papa no mama, yu yu makemaot wan taem blong tijim ol pikinini blong yu long saed blong Papa blong yumi long heven we i gat lav? Jeova i givim plante gudfala samting long saed blong spirit blong mekem yufala i harem gud, olsem ol buk, ol magasin, ol video, ol CD mo DVD we oli stanap long Baebol. Ol samting ya oli blong halpem yu blong mekem impoten wok ya mo givim samting we famle blong yu i nidim long saed blong wosip.

12, 13. (a) ?Olsem wanem famle i save harem gud long naet blong Baebol Stadi blong Famle? (b) ?Olsem wanem ol papa mama oli save meksua se Baebol stadi blong famle i mekem famle i harem gud?

¹² Antap long samting ya, slef we i stret mo waes i mekem wan plan se wan naet evri wik bambae i gat Baebol Stadi blong Famle. Plante famle oli faenem se plan ya i mekem oli joen gud, mo i halpem olgeta blong lavlavem olgeta moa. Mo tu, i mekem fasin fren blong olgeta wetem Jeova i strong moa. ?Be olsem wanem ol papa mama oli save meksua se Baebol stadi blong famle i mekem olgeta i harem gud long saed blong spirit?

¹³ Baebol Stadi blong Famle i mas wan taem blong glad. Yes, hemia from we yumi wosipim God ya we i stap “harem gud oltaem,” mo we i wantem yumi blong harem gud tu long wosip blong yumi. (1 Tim. 1:11; Fil. 4:4) Yumi glad tumas blong gat wan dei long wik we yumi save yusum blong tokbaot ol nambawan trutok blong Baebol wetem famle blong yumi. Ol papa mama oli save jenisim fasin blong olgeta blong tij, blong mekem i laenap wetem wanwan pikinini blong olgeta mo oli mas yusum tingting mo gudsave blong olgeta tu. Tingbaot Brandon we i gat 10 yia blong hem. Long naet blong famle stadi, papa mama blong hem tufala i letem hem i talemaot ol save we hem i faenem long saed blong kwestin ya se, “?From wanem Baebol i tokbaot Setan olsem wan snek?” Hemia wan kwestin we i mekem tingting blong Brandon i fasfas longtaem finis, antap moa from we hem i laekem ol snek, mo hem i kros taem hem i tingbaot se snek i pija blong Setan. Sam famle oli ridim wan stori blong Baebol mo oli mekem olsem se olgeta nao oli stap toktok long stori ya. Samtaem famle i aktem stori we oli ridim. Ol kaen tijing olsem oli no blong mekem oli harem gud nomo be oli save pulum pikinini blong joen long stadi, nao i save mekem se ol stamba trutok blong Baebol oli kasem hat blong olgeta. *

Blokem Ol Samting We Oli Save Mekem Yu Yu Slak

14, 15. (a) ?Olsem wanem ol wari mo filing ya we man i harem se hem i no sef, i kam antap long ol lasdei ya? (b) ?Wanem trabol we maet yumi gat from we yumi Kristin?

¹⁴ Ol wari, mo filing ya we man i harem se hem i no sefgud, i kam antap bigwan long ol lasdei blong rabis wol ya. Plante plante man oli lusum wok mo oli gat trabol long saed blong mane. Mo tu, olgeta we oli wok, oli harem se mane we oli kasem i no naf blong givhan long famle blong olgeta. I olsem se poket i brok, mane i kam be i no save stap. (Skelem Hagae 1:4-6.) I luk olsem se ol man blong politik mo ol narafala lida blong wol oli no save mekem wan samting nating blong finisim ol rabis wok blong teroris mo ol narafala nogud fasin. Plante man oli harem nogud from sin we i stap long olgeta we i pulum olgeta blong mekem plante mastik.—Sam 38:4.

¹⁵ Ol tru Kristin oli stap kasem ol trabol mo ol traem we wol ya blong Setan i mekem long ol man. (1 Jon 5:19) Samtaem, ol man blong Kraes oli save gat moa trabol mo wari from we oli stap traehad blong holemstrong long Jeova. Jisas i talem se: “From we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) Be taem “ol man oli stap ronem” yumi,  oltaem nomo yumi gat ‘ol fren we oli stap givhan long yumi.’ (2 Kor. 4:9) ?From wanem i olsem?

16. ?Wanem i save halpem yumi blong holem glad blong yumi oltaem?

¹⁶ Jisas i talem se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.” (Mat. 11:28) Taem yumi bilif fulwan long ransom sakrefaes blong Kraes, yumi soemaot we yumi dipen long Jeova. Long rod ya, yumi kasem “paoa ya we i bigwan tumas.” (2 Kor. 4:7) “Spirit ya blong Givhan,” we hem i tabu spirit blong God, i save mekem bilif blong yumi i strong nao yumi save stanap strong taem yumi kasem trabol mo taem ol samting oli kam traem yumi. Be i no hemia nomo, tabu spirit i save mekem se yumi holem glad oltaem.—Jon 14:26; Jem. 1:2-4.

17, 18. (a) ?Wanem spirit ya we yumi mas lukaotgud long hem blong i no pulum yumi? (b) ?Wanem nogud frut i kamaot sipos yumi tinghae long ol samting we oli no impoten?

¹⁷ Ol tru Kristin tede oli mas lukaotgud blong no letem spirit blong wol ya i pulum olgeta blong ronem ol sas samting blong wol ya. (Ridim Efesas 2:2-5.) Yes, sipos yumi no lukaotgud, yumi save foldaon long trap ya we yumi ‘wantem tumas ol rabis samting we tingting blong yumi i wantem, mo yumi wantem tumas ol samting we ae blong yumi i luk, mo yumi flas tumas long ol samting we yumi gat.’ (1 Jon 2:16) Mo tu, maet yumi save gat rong tingting ya se ol samting ya we yumi wantem, oli save mekem yumi harem gud. (Rom 8:6) Traem tingbaot. Sam man oli traehad blong mekem se oli harem gud long tingting blong olgeta, ale, oli tekem drag, oli dring bitim mak, oli lukluk ol rabis pija we i soemaot ol rabis fasin blong man wetem woman, oli bitim mak long spot, mo plante defren samting olsem. Setan i yusum ol “giaman trik” blong hem blong pulum ol man blong oli ting se ol samting ya nao oli save mekem man i harem gud.—Efes. 6:11.

¹⁸ I tru, i no rong blong kakae, dring mo joen long ol kaen pleplei we oli stret mo we yumi no bitim mak long olgeta. Be yumi no mas letem ol samting ya oli kam faswan samting long laef blong yumi. I impoten we yumi gat fasin blong skelgud mo blong bos long tingting blong yumi tu, speseli long taem blong yumi. Sipos yumi ronem ol samting we yumi nomo i wantem, ol samting ya oli save kam hevi tumas long yumi nao bambae ‘yumi no karem frut long laef blong yumi, olsem we yumi no save Jisas Kraes, Masta blong yumi.’—2 Pita 1:8, Nyutesteman wetem Ol Sam long Bislama.

19, 20. ?Yumi mas mekem wanem blong yumi rili save harem gud?

¹⁹ Taem yumi tingbaot ol samting olsem we Jeova i tingbaot olgeta, yumi luksave se ol samting blong harem gud we wol ya i givim oli blong smoltaem nomo. Moses i luksave samting ya mo yumi tu yumi mas mekem sem mak. (Hib. 11:25) I klia se, sipos yumi rili wantem harem gud longtaem, yumi mas mekem samting we Papa blong yumi long heven i wantem yumi blong mekem.—Mat. 5:6.

²⁰ I gud yumi gohed oltaem blong lukluk i go long ol samting long saed blong spirit, olsem rod blong harem gud mo gat wan tingting we i spel. Taem yumi mekem olsem, yumi ‘livim olgeta fasin we oli no stret long fes blong God mo yumi no mas wantem tumas ol samting blong wol ya.’ Nao yumi mas “wet blong luk bigfala Dei ya we tingting blong yumi i stap long hem,” we long dei ya Hae God Jeova, mo Jisas Kraes Sevia blong yumi, bambae ‘oli kamtru long bigfala paoa blong tufala.’ (Taet. 2:12, 13) Yumi mas gat strong tingting blong gohed blong folem eksampol blong Jisas mo letem hem i lidim yumi. Hemia i olsem we yumi stap aninit long yok blong Jisas. Ale, taem yumi mekem olsem, bambae yumi harem gud tumas, tingting blong yumi i spel.

[Futnot]

?Bambae Yu Yu Ansa Olsem Wanem?

• ?Wanem samting i mekem ol man blong Jeova tede oli harem gud?

• ?Long wanem fasin, wok blong prij i mekem yumi mo ol man we oli lesin long yumi oli harem gud?

• ?Ol hed blong famle oli save mekem wanem blong meksua se Baebol stadi blong famle i mekem evriwan long famle oli harem gud?

• ?Wanem ol samting we oli save mekem yumi slak long saed blong wosip?

[Kwestin]