Yumi Mas Mekem Kongregesen i Kam Strong Moa

“Yufala i mas stap toktok gud long yufala blong mekem tingting blong yufala i strong.”—1 TES. 5:11.

1. ?Wanem ol gudfala samting we yumi kasem taem yumi stap long Kristin kongregesen? ?Be wanem sam trabol we yumi save fesem yet?

TAEM yu stap insaed long Kristin kongregesen, yu kasem plante gudfala samting. Yu frengud wetem Jeova. Yu trastem Tok blong hem blong i lidim yu, mo samting ya i blokem yu long ol rabis frut we i kamaot taem man i no folem ol Kristin rul. Yu gat plante trufala fren we oli wantem se yu gat gudfala laef. Yes, i gat plante gudgudfala samting we yumi kasem. Nating se i olsem, plante Kristin oli stap traehad blong winim wan hadtaem no wan problem. Sam long olgeta oli no kasem mining blong sam dip save blong Baebol mo oli nidim narafala blong givhan yet long olgeta. Sam narafala oli sik no tingting blong olgeta i foldaon. Mo i gat samfala we oli stap harem nogud long ol frut we oli kasem from wan desisen we i no waes. Mo yumi evriwan i laef long medel blong ol man blong wol ya we oli no stap obei God.

2. ?Yumi mas mekem wanem taem ol brata sista blong yumi oli kasem trabol? ?From wanem?

² I no gat wan long yumi we i laekem blong luk wan narafala Kristin i safa no i kasem hadtaem. Aposol Pol i talem se kongregesen i olsem wan bodi, mo ‘sipos wan haf blong bodi i harem nogud,  be bambae olgeta bodi i mas harem nogud.’ (1 Kor. 12:12, 26) Long taem olsem, yumi mas traehad blong givhan long ol brata sista blong yumi. I gat sam stori long Baebol blong samfala long kongregesen we oli givhan long ol narafala, blong oli fesem mo winim ol trabol blong olgeta. Bambae yumi tokbaot ol stori ya. Mo long semtaem, i gud yu tingbaot olsem wanem yu save folem eksampol blong olgeta long stori ya, blong yu tu yu save givhan long ol narafala. ?Olsem wanem yu save givhan long ol brata sista blong yu blong oli gohed blong mekem wok blong Jeova, nao long rod ya, yu mekem tingting blong ol narafala insaed long kongregesen blong Jeova i kam strong moa?

“Tufala i Tekem Hem i Go Long Haos Blong Tufala”

3, 4. ?Long wanem rod, Akwila mo Prisila tufala i givhan long Apolos?

³ Bifo we Apolos i go stap long Efesas, hem i wok strong blong talemaot tok blong God. Buk blong Ol Wok i talem se, “tabu spirit i fulap long hem, hem i go toktok long ol man mo i tijim ol samting we oli stret long saed blong Jisas. Be hem i save nomo baptaes ya we Jon i stap mekem.” Apolos i no save long baptaes ya ‘long nem blong Papa, mo long nem blong Pikinini, mo long nem blong tabu spirit.’ Samting ya i min se maet ol disaepol blong Jon Baptaes, no sam man blong Jisas, oli bin prij long hem bifo long dei blong Pentekos long yia 33 K.T. * Taswe, nating we Apolos i wok strong blong talemaot tok blong God, be i gat sam impoten poen we hem i no save yet. ?Olsem wanem fasin blong joen wetem ol narafala Kristin i givhan long hem?—Wok 1:4, 5; 18:25, NW; Mat. 28:19.

⁴ Tufala Kristin ya, Akwila mo Prisila, tufala i harem Apolos i stap prij insaed long haos blong prea, we tingting blong hem i no seksek nating. Ale, tufala i tekem hem i go long haos blong tufala, mo tufala i tijim hem long sam moa save. (Ridim Ol Wok 18:24-26.) Lav i pusum tufala blong mekem samting ya. I klia se taem Akwila mo Prisila tufala i toktok long Apolos, tufala i toktok long kaen fasin mo soemaot we tufala i wantem halpem hem. Olsem nao, Apolos i no harem se tufala i agensem hem. Apolos i no save se Kristin kongregesen i stanap finis. Mo i klia se hem i talem tangkiu long tu niufala fren ya, from we tufala i talemaot ol impoten save ya long hem. Save ya we hem i kasem, i mekem se biaen, “hem i stap givhan gud” long ol brata blong hem long Akaea, mo hem i givim wan strong witnes long ples ya.—Wok 18:27, 28.

5. ?Olsem wanem plante taosen man blong talemaot Kingdom oli givhan long ol narafala wetem lav? ?Oli kasem wanem frut?

⁵ Tede plante man insaed long Kristin kongregesen oli talem tangkiu long ol brata sista we oli givhan long olgeta blong kasem save blong Baebol. Plante long olgeta we oli stadi Baebol, oli gohed olwe blong frengud wetem tija blong olgeta. Blong givhan long ol man blong kasem save long trutok, yumi mas makemaot wan stret taem blong stadi Baebol wetem olgeta evri wik, mo yumi mas gohed olsem blong plante manis. Yumi ol man blong talemaot Kingdom, yumi glad nomo blong traehad olsem from we yumi luksave se laef blong ol man i stap long denja. (Jon 17:3) !Mo yumi glad tumas taem yumi luk we ol man oli kasem mining blong trutok, oli mekem laef blong olgeta i laenap wetem trutok ya, mo oli yusum laef blong olgeta blong mekem samting we Jeova i wantem!

 ‘Oli Stap Talem Se Hem i Wan Gudfala Man’

6, 7. (a) ?From wanem Pol i jusum Timoti blong joen wetem hem long misinari wok? (b) ?Olsem wanem Pol i givhan long Timoti blong gohed gud?

⁶ Taem aposol Pol mo Saelas tufala i go long Listra long namba tu misinari trip blong tufala, tufala i faenem wan yangfala man we nem blong hem Timoti. Maet long taem ya, hem i gat samwe long 20 yia blong hem. “Ol brata blong yumi long Listra mo Ikoniam oli stap talem se Timoti i wan gudfala man.” Mama blong Timoti, Yunis, mo bubu woman blong hem, Loes, tufala i Kristin we tufala i givim laef blong tufala i go long God, be papa blong hem i no bilif. (2 Tim. 1:5) Maet Pol i bin mitim famle ya sam yia bifo, long faswan taem we hem i visitim ples ya. Be naoia, aposol ya i intres bigwan long Timoti from we hem i defren long ol narafala yangfala. Taswe, kampani blong ol elda long kongregesen blong Timoti, oli agri blong hem i joenem Pol long wok blong misinari, blong givhan long hem.—Ridim Ol Wok 16:1-3.

⁷ I gat plante samting we aposol Pol i mas tijim Timoti long hem. Mo Timoti i lanem gud ol tijing ya gogo, long ol yia biaen, Pol i trastem hem blong tekem ples blong hem, ale i sanem hem i go blong visitim ol kongregesen. Timoti i wok wetem Pol blong samwe 15 yia. Long ol yia ya, yangfala man ya we fastaem i no gat gudhan mo we maet i sem, i gohed gud gogo i kam wan nambawan elda.—Fil. 2:19-22; 1 Tim. 1:3.

8, 9. ?Olgeta long kongregesen oli save mekem wanem blong pulum ol yangfala? Talem wan stori.

⁸ Plante yangfala man mo woman long Kristin kongregesen tede oli naf blong mekem gudfala wok. Oli gat sam fren we oli wok strong long wok blong God. Sipos ol fren ya oli toktok gud long olgeta oltaem blong traem pulum olgeta, bambae ol yangfala ya oli traehad moa. Mo bambae oli save glad blong mekem sam impoten wok long ogenaesesen blong Jeova. !Lukluk raon long kongregesen blong yu! ?Yu yu luk sam yangfala we oli naf blong mekem moa wok, olsem Timoti? Sipos yu givhan long olgeta, mo yu toktok gud long olgeta, maet oli save kam paenia, misinari, seket elda, no wok long Betel. ?Wanem samting we yu yu save mekem, blong givhan long olgeta blong wantem kasem ol mak ya?

⁹ Martin i wok long Betel 20 yia finis. Hem i glad taem hem i tingtingbak long 30 yia bifo, taem hem wetem wan seket elda tufala i prij tugeta, mo elda ya i intres bigwan long hem. Seket elda ya i glad tumas blong tokbaot taem ya we hem i yangfala mo i wok long Betel. Hem i pulum tingting blong Martin blong i tingbaot se hem tu i save mekem wok ya insaed long ogenaesesen blong Jeova. Martin i ting se storian ya blong tufala i gat bigfala paoa long ol desisen we hem i mekem long ol yia biaen. I no gat man we i save wanem gudfala frut bambae i kamaot, sipos yu yu tokbaot long ol yangfala fren blong yu, ol mak we oli save kasem long wok blong God.

‘Leftemap Tingting Blong Man We i Harem Nogud’

10. ?Epafrodaetas i harem olsem wanem? ?From wanem?

¹⁰ Epafrodaetas i mekem longfala trip stat long Filipae i go kasem Rom, blong visitim Pol we i stap kalabus from bilif blong hem. Ol Kristin long Filipae nao oli sanem Epafrodaetas i go. Hem i karem presen blong olgeta i go long Pol, mo antap long hemia, hem i gat plan blong stap wetem Pol mo givhan long hem. Be taem Epafrodaetas i stap long Rom, hem i sik “we klosap i ded.” Ale, hem i harem nogud mo tingting blong hem i foldaon, from we hem i filim se hem i no mekem wok ya we hem i kam blong mekem.—Fil. 2:25-27.

11. (a) ?From wanem yumi no mas sapraes se tingting blong samfala long kongregesen i save foldaon? (b) ?Pol i talem se ol narafala oli mas mekem wanem long Epafrodaetas?

¹¹ Tede, plante defren kaen trabol i save mekem se tingting blong man i foldaon. Ripot we i kamaot long Wol Helt Ogenaesesen, i soemaot se long evri faef man, i gat wan long olgeta we wan taem long laef blong hem, tingting i foldaon olgeta. Samting ya i save hapen long ol man blong Jeova tu. Maet man i wokhad tumas blong givim samting we famle i nidim, i sik, i harem nogud from sam mastik blong hem, ale tingting i foldaon. ?Ol Kristin blong Filipae oli mekem wanem blong givhan long Epafrodaetas? Pol i raetem leta i go long olgeta i se: “Yufala i mas glad blong luk hem, from we hem i joen long Masta blong yumi finis, i wan brata blong yumi. Yufala i mas ona gud long ol man olsem. Klosap hem i ded long wok blong Kraes, be  hem i no fraet blong lusum laef blong hem, nao i gohed blong finisim ol wok blong givhan long mi, we yufala i no gat rod blong mekem.”—Fil. 2:29, 30.

12. ?Wanem samting i save mekem ol man we tingting blong olgeta i foldaon, oli harem gud bakegen?

¹² Yumi tu, yumi mas leftemap tingting blong ol brata sista blong yumi we tingting blong olgeta i slak no i foldaon. I gat plante gudfala samting we yumi save talem long saed blong wok we oli mekem blong Jeova. Ating ol brata sista ya oli bin jenisim plante samting long laef blong olgeta, blong oli save kam Kristin, no blong oli save prij fultaem. Yumi tinghae long olgeta from we oli traehad bigwan olsem, mo yumi mekem olgeta oli savegud se Jeova tu i tinghae long olgeta from. Taem sam man we oli stap tru long God oli kam olfala no oli sik, oli no moa wok strong long wok blong God olsem bifo. Nating se i olsem, yumi mas gat respek long olgeta from olgeta yia we oli spenem long wok ya. Nomata wanem samting i mekem se tingting blong ol brata sista i foldaon, be Jeova i givim advaes long olgeta man blong hem, se: “Yufala i mas toktok gud blong leftemap tingting blong olgeta we oli harem nogud oltaem from we tingting blong olgeta i foldaon. Yufala i mas givhan long olgeta we oli slak. Mo yufala i mas gat longfala tingting long evriwan.”—1 Tes. 5:14, NW.

“I Gud Yufala i Fogivim Hem, Yufala i Leftemap Tingting Blong Hem Bakegen”

13, 14. (a) ?Wanem impoten samting we kongregesen blong Korin i mekem? ?Mo from wanem? (b) ?Taem oli putumaot man ya, wanem frut i kamaot?

¹³ Long faswan handred yia, i gat wan man long kongregesen blong Korin we i mekem rabis fasin, be i no tanem tingting blong hem. Fasin blong hem i sakem doti long kongregesen, mo ol man we oli no bilif tu oli sek long fasin blong hem. Taswe, i stret nomo we Pol i talem se oli mas putumaot man ya long kongregesen.—1 Kor. 5:1, 7, 11-13.

¹⁴ Fasin blong stretem man ya olsem, i karem gudfala frut, from i blokem rabis fasin ya blong i no spolem kongregesen. Mo i mekem se man ya we i mekem sin, i luksave rong blong hem mo i tanem tingting blong hem wetem fulhat blong hem. Man ya i soemaot long ol wok blong hem se hem i tanem tingting blong hem. Ale, long namba tu leta we Pol i raetem i go long kongregesen blong Korin, hem i talem se oli mas tekembak man ya long kongregesen. Be Pol i no talem hemia nomo. Hem i talem long kongregesen ya tu se oli mas ‘fogivim hem, oli leftemap tingting blong hem bakegen. Sipos no, bambae hem i harem nogud tumas, nao bambae tingting blong hem i foldaon olgeta.’—Ridim 2 Korin 2:5-8.

15. ?Yumi mas gat wanem tingting long ol man we oli mekem sin, be biaen oli tanem tingting blong olgeta mo kongregesen i tekembak olgeta?

¹⁵ ?Yumi lanem wanem long stori ya? Yumi sore taem kongregesen i mas putumaot samfala. Maet olgeta ya oli sakem doti long nem blong God mo oli spolem nem blong kongregesen. Maet oli bin mekem sin agensem yumi tu. Taem wan man we i bin mekem sin, i tanem tingting blong hem, kampani blong ol elda bambae i jusumaot sam elda blong lukluk long bisnes ya. Ale taem oli letem Jeova i lidim olgeta, nao oli talem se kongregesen i  tekembak man ya, samting ya i soemaot se Jeova i fogivim man ya finis. (Mat. 18:17-20) ?Olsem wanem? ?Yu ting se i stret we yumi tu yumi folem fasin ya blong Jeova? Sipos yumi mekem i strong tumas long olgeta mo yumi no fogivim olgeta, hemia i min se yumi agensem Jeova. Yumi wantem givhan blong mekem se kongregesen blong Jeova i gat pis, i joengud, mo yumi wantem mekem Jeova i glad long yumi. Taswe, sipos wan man i mekem sin mo i tanem tingting blong hem tru, mo kongregesen i tekembak hem, i stret nomo we yumi ‘mekem hem i save we yumi lavem hem.’—Mat. 6:14, 15; Luk 15:7.

“Hem i Save Givhan Long Mi”

16. ?From wanem Pol i harem nogud long Mak?

¹⁶ Wan narafala stori blong Baebol i soemaot se yumi no mas gat nogud tingting long olgeta we oli mekem yumi harem nogud. Tingbaot olsem wanem Jon Mak i mekem aposol Pol i harem nogud. ?Hem i mekem wanem? Taem Pol mo Banabas tufala i statem faswan misinari trip blong tufala, Mak i go wetem tufala blong givhan long tufala. Be taem oli stap gohed long trip blong olgeta yet, Mak i lego tufala mo i gobak long ples blong hem. Pol i harem nogud from samting we Mak i mekem. Biaen, taem hem mo Banabas tufala i stap mekem plan blong namba tu misinari trip blong tufala, Banabas i wantem tekem Mak bakegen be Pol i no wantem, ale wan bigfala rao i kamaot. Samting we i hapen long faswan trip i mekem we Pol i no wantem se Mak i folem tufala bakegen.—Ridim Ol Wok 13:1-5, 13; 15:37, 38.

17, 18. ?Olsem wanem yumi save se Pol mo Mak tufala i stretem problem blong tufala? ?Yumi save lanem wanem long stori ya?

¹⁷ I klia se Mak i no letem tingting blong hem i foldaon taem Pol i no wantem hem, from we hem i gohed nomo wetem Banabas blong mekem wok blong misinari long wan defren ples. (Wok 15:39) Sam yia afta, Pol i tokbaot Mak long leta blong hem, mo ol tok blong hem oli soemaot se Mak i stap tru long Jeova mo se ol man oli trastem hem. Taem Pol i stap kalabus long Rom, hem i raetem wan leta long Timoti, blong singaot hem i kam. Long leta ya, Pol i talem se: “I gud taem yu kam, yu tekem Mak i kam wetem yu, from we hem i save givhan long mi long ol wok blong mi.” (2 Tim. 4:11) Yes, Pol i tok olsem from we hem i luk se Mak i gohed gud.

¹⁸ Yumi save lanem wan samting long stori ya. Mak i wokem ol gudfala fasin we wan misinari i mas gat. Hem i no foldaon taem Pol i no moa wantem we hem i folem tufala. Mak mo Pol tugeta, tufala i frengud wetem Jeova, mo nogud tingting we tufala i gat long tufala, i no stap longtaem. Defren olgeta, biaen, Pol i luksave se Mak i wan gudfala man blong givhan. Taswe, taem yumi gat trabol wetem wan brata, mo yumi winim trabol ya, stret samting we yumi mas mekem, hemia se yumi no moa tingbaot samting we i hapen, be yumi mas halpem ol narafala blong gohed gud long trutok. Taem yumi luksave ol gudfala fasin blong ol narafala, yumi stap givhan blong mekem tingting blong evriwan long kongregesen i kam strong moa.

Yu Mo Kongregesen

19. ?Olgeta memba blong Kristin kongregesen oli save givgivhan long olgeta olsem wanem?

¹⁹ “Long taem ya blong ol las dei,” yu nidim help blong ol brata sista blong yu long kongregesen, mo olgeta tu oli nidim help blong yu. (2 Tim. 3:1, NW) Maet wanwan Kristin oli no save stret samting blong mekem taem oli fesem wan problem, be Jeova i save. Mo hem i save yusum ol narafala memba blong kongregesen, wetem yu tu, blong givhan long ol narafala blong oli folem stret rod. (Aes. 30:20, 21; 32:1, 2) !Taswe, i gud we yumi obei long advaes blong aposol Pol! I gud we yumi gohed blong ‘toktok gud long yumi blong mekem tingting blong yumi i strong, mo yumi mas givgivhan long yumi, olsem we yumi stap mekem naoia.’—1 Tes. 5:11.

[Futnot]

?Bambae Yu Yu Ansa Olsem Wanem?

• ?From wanem yumi mas mekem tingting blong ol narafala long Kristin kongregesen i kam strong moa?

• ?Wanem sam trabol we maet yu save givhan long ol narafala blong winim?

• ?From wanem yumi nidim help blong ol narafala long kongregesen blong yumi?

[Kwestin]

[Tok blong pija long pej 13]

Taem wan Kristin brata no sista blong yumi i stap traehad blong winim wan problem, yumi save givhan long hem

[Tok blong pija long pej 15]

Plante yangfala man mo woman long Kristin kongregesen tede, oli naf blong mekem gudfala wok