Mekem Bes Blong Yu Long Wok Ya Blong Karem Kakae Long Garen

“Oltaem yufala i mas wok strong long ol wok ya blong Masta blong yumi.”—1 KOR. 15:58.

1. ?Jisas i singaot ol disaepol blong hem blong oli mekem wanem?

LONG en blong yia 30 K.T., Jisas i stap wokbaot i gotru long ples ya Sameria. Klosap long taon ya Saeka, hem i spel smol long wan wel. Nao hem i talem long ol disaepol blong hem se: “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae nao.” (Jon 4:35) Jisas i no stap tokbaot wan prapa garen. Hem i stap tokbaot wok blong hivimap ol man we hat blong olgeta i stret, blong oli kam ol man blong hem. Taem hem i talem tok ya, hem i stap singaot ol disaepol blong hem blong oli joen long wok ya. !I gat plante wok blong mekem, be smol taem nomo i stap blong mekem wok ya!

2, 3. (a) ?Olsem wanem yumi save se i taem nao blong karem kakae long garen? (b) ?Bambae yumi tokbaot wanem long stadi ya?

² Ol tok ya blong Jisas long saed blong wok blong karem kakae long garen, oli stret gud long yumi tede. Naoia ‘lif blong ol kakae i drae finis,’ hemia i min se i taem nao blong hivimap ol man. Evri yia, plante milian man long wol oli gat janis blong lanem trutok blong Baebol, we i save givim laef blong olwe long olgeta. Mo plante taosen long olgeta oli baptaes blong kam ol disaepol blong Kraes. Yes, wok ya blong karem kakae long garen i bigwan moa naoia i bitim olgeta taem bifo. I wan bigfala ona blong joen long wok ya we Masta blong garen, Jeova God, i lukaot long hem. ?Olsem wanem? ?Yu yu stap “wok strong” blong karem kakae ya long garen?—1 Kor. 15:58.

³ Long tri yia haf we Jisas i prij long wol, hem i rerem ol disaepol blong hem from wok ya blong karem kakae long garen. Long stadi ya, bambae yumi tokbaot tri impoten tijing we Jisas i givim long ol disaepol blong hem. Hemia tri fasin we oli save givhan long yumi bigwan, taem yumi traem mekem bes blong yumi blong hivimap ol man, blong oli kam ol disaepol blong Kraes. Bambae yumi tokbaot trifala fasin ya wanwan.

Yumi Mas Mekem Tingting Blong Yumi i Stap Daon

4. ?Jisas i mekem wanem blong soemaot long ol disaepol blong hem se oli mas mekem tingting blong olgeta i stap daon?

⁴ Traem tingbaot samting we i hapen: Ol disaepol oli jes rao se hu long olgeta i hae moa. Fes blong olgeta wanwan i soemaot klia nomo se oli gat nogud tingting long ol narawan mo oli no trastem olgeta. Ale, Jisas i singaot wan smol pikinini i kam. Hem i lukluk pikinini ya, nao i talem se: “Man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i King blong olgeta.” (Ridim Matiu 18:1-4.) Ol disaepol oli no mas tingting olsem ol man blong wol. Ol man blong wol oli ting se man we i hae, hem i man we i gat paoa, mane, mo haenem. Be ol disaepol oli mas kasem save se man we i hae, hem i man we i ‘mekem hem i stap daon’ long fored blong ol narafala. Sipos oli wantem we Jeova i yusum olgeta, oli mas meksua se tingting blong olgeta i stap daon.

5, 6. ?From wanem yu mas mekem tingting blong yu i stap daon, blong yu save mekem bes blong yu long wok ya blong karem kakae long garen? Talem wan stori we i soemaot samting ya.

⁵ Tede, plante man blong wol oli yusum ful laef blong olgeta blong traem kasem paoa, mane, mo haenem. From samting ya, oli gat smol taem nomo i stap, no oli no gat taem nating, blong kasem save long God mo mekem wok blong hem. (Mat. 13:22) Be ol man blong Jeova oli defren. Oli glad blong  ‘mekem olgeta oli stap daon’ long fored blong ol narafala, from we hemia nao rod blong mekem Masta blong garen i glad mo i blesem olgeta.—Mat. 6:24; 2 Kor. 11:7; Fil. 3:8.

⁶ Traem tingbaot wan man long Saot Amerika, nem blong hem Francisco. Hem i wan elda long Kristin kongregesen. Taem hem i yangfala, hem i wantem tumas blong mekem wok blong paenia. Ale hem i lego yunivesiti bifo we kos blong hem i finis. Hem i tingting bak, i se: “Taem mi stap frenem gel ya we i kam woman blong mi, mi save faenem wan wok we i givim bigfala mane long mitufala. Be mitufala i no wantem se laef blong mitufala i fasfas. Mitufala i wantem gohed nomo long wok blong fultaem paenia. Taem mitufala i gat pikinini, i had moa. Be Jeova i halpem mitufala blong holem fasin blong laef ya we mitufala i jusum.” Francisco i finisim toktok blong hem, i se: “Bitim 30 yia nao, mi gat blesing ya blong mekem wok blong elda long Kristin kongregesen, wetem plante narafala spesel wok tu. Mitufala i no sore nating se mitufala i jusum wan laef we i no fasfas.”

7. ?Yu yu traem finis blong folem advaes long Rom 12:16? ?Wanem i kamaot from?

⁷ Sipos yu no letem ol “flas” samting blong wol oli pulum yu, mo yu “fren gud long ol man we oli no gat nem,” yu tu yu save kasem plante blesing mo spesel wok, taem yu stap karem kakae long garen.—Rom 12:16; Mat. 4:19, 20; Luk 18:28-30.

Man We i Wok Had i Kasem Blesing

8, 9. (a) Tokbaot parabol blong trifala slef we oli holem mane blong masta blong olgeta. (b) ?Parabol ya i save leftemap tingting blong hu?

⁸ Blong mekem bes blong yumi long wok blong karem kakae long garen, yumi mas wok had. Jisas i soemaot samting ya long parabol blong trifala slef we oli holem mane blong masta blong olgeta. * I gat wan masta we hem i stap mekem rere blong go long wan narafala kantri, ale hem i putum mane blong hem long han blong trifala slef blong hem. Long faswan, hem i givim faef milian vatu, long seken wan hem i givim tu milian vatu, mo long namba tri, hem i givim wan milian vatu. Taem masta i aot finis, wantaem nomo, faswan slef mo seken slef tugeta i go “mekem plante bisnes long mane ya,” yes, tufala i wok had. Be namba tri slef i “les tumas,” ale hem i berem mane blong hem long graon. Taem masta i kambak, hem i glad long faswan slef mo seken slef, ale hem i putumap tufala “blong lukaot long plante bisnes.” Be namba tri slef, masta i tekemaot mane we i bin putum long han blong hem, mo i sakemaot hem i go afsaed.—Mat. 25:14-30.

⁹ I klia se bambae yu wantem folem fasin blong tufala slef ya we tufala i wok had. Bambae yu wantem mekem bes blong yu long wok ya blong pulum ol man oli kam disaepol. Be maet i gat sam samting long laef blong yu we oli stap blokem yu, nao yu save mekem smol wok nomo. Ating praes blong evri samting i go antap tumas, nao yu mas wok moa blong kasem naf mane  blong pem ol samting blong famle blong yu. Sipos no, ating yu stap kam olfala mo paoa blong yu i stap godaon. Sipos samting olsem i stap blokem yu, ale parabol ya i save leftemap tingting blong yu bigwan.

10. ?Wanem i soemaot se masta ya i no mekem i strong tumas long trifala slef blong hem? ?From wanem samting ya i leftemap tingting blong yu?

¹⁰ Traem tingbaot se, masta long parabol ya i luksave wanem we trifala slef ya wanwan oli naf blong mekem. Hem i “makem save blong olgeta,” nao hem i givim mane we hem i luk se i stret long trifala wanwan. (Mat. 25:15) Masta i save finis se faswan slef i naf blong winim moa mane i bitim seken slef, mo hemia nao samting we i hapen. Nating se i olsem, masta i luksave se tufala slef ya evriwan oli wok had. Hem i talem tangkiu long tufala wanwan, i se: “Yu yu wan gudfala man we yu lukaot gud long ol wok blong mi.” Nao hem i givim presen long tufala we i sem mak nomo. (Mat. 25:21, 23) Long sem fasin, Jeova God we i Masta blong garen, i save gud ol samting long laef blong yu we i blokem yu long wok blong hem. Be bambae hem i luksave we yu traehad wetem ful paoa blong yu blong mekem wok blong hem, mo bambae hem i givim blesing long yu from.—Mak 14:3-9; ridim Luk 21:1-4.

11. Talem wan stori we i soemaot se man we i wok had i save kasem bigfala blesing, nating se laef blong hem i had.

¹¹ Traem tingbaot wan Kristin sista long Brasil, nem blong hem Selmira. Hem i wok had long wok blong God, nating we hem i gat wan had laef. I gat 20 yia finis we man blong Selmira i ded, from we sam man blong stil oli sutum hem i ded long masket. Ale Selmira nomo i lukaot long trifala smol pikinini blong tufala. Hem i wok plante aoa evri dei blong winim mane blong famle. Hem i mas mekem wan longfala trip evri dei long pablik transpot we i fasfas gud, blong i go mekem wok ya blong haosgel. Be nating se laef blong hem i had olsem, hem i mekem wan gudfala program blong hem i save kam wan fultaem paenia. Taem trifala pikinini blong hem oli kam bigwan, tu long olgeta oli kam paenia tu. Selmira i talem se: “Long ol yia we oli pas, mi mekem Baebol stadi long bitim 20 man mo woman we naoia oli kam olsem ‘famle’ blong mi. Mo mi stap harem gud yet we oli lavem mi mo frengud wetem mi. Hemia i gud moa i bitim enikaen samting we mane i save pem.” !Tru ya, Masta blong garen i blesem bigwan hadwok blong Selmira!

12. ?Olsem wanem yumi save wok had long wok blong prij?

¹² Maet sam samting long laef blong yu i mekem se yu no save prij plante aoa. Nating se i olsem, yu save traehad yet blong mekem moa long wok blong karem kakae long garen. ?Olsem wanem blong traehad moa? Yu save mekem se wok blong prij blong yu i karem moa frut. Sipos yu folem ol advaes we i kamaot evri wik long Miting Blong Kingdom Wok, bambae yu kamgud moa blong toktok long ol man long wok blong prij. Mo bambae yu traem ol niufala rod blong prij tu. (2 Tim. 2:15) Antap long hemia, ating yu save faenem wan narafala taem blong mekem ol samting we oli no impoten, no maet yu no moa mekem ol samting ya nating. Nao bambae yu yu naf blong joen oltaem wetem kongregesen long wok blong prij.—Kol. 4:5.

13. ?Sipos yu wantem kam wan man we i wok had oltaem, yu mas mekem wanem?

¹³ Yu mas tingbaot se, sipos yu tingting gud long ol samting we Jeova i mekem blong yu, bambae yu wantem wok had moa. (Sam 40:8) Namba tri slef long parabol blong Jisas, i fraet long masta blong hem. Hem i ting se masta ya i wan had man. From samting ya, hem i no yusum mane we masta i putum long han blong hem blong mekem ol samting blong masta oli kam plante moa. Be hem i berem mane ya nomo. Sipos yumi no wantem kam wan les man olsem slef ya, yumi mas fren gud wetem Jeova we i Masta blong garen. I gud yu makemaot taem blong stadi mo tingting dip long ol nambawan fasin blong hem blong lavem ol man, gat longfala tingting, mo gat sore long man. Nao bambae yu yu wantem mekem bes blong yu long wok blong hem.—Luk 6:45; Fil. 1:9-11.

‘Yu Mas Tabu, Yu Mas Klin Gud’

14. ?Olgeta we oli wantem mekem wok ya blong karem kakae long garen, oli mas kasem wanem bigfala mak?

¹⁴ Aposol Pita i talem sam tok blong Hibru haf blong Baebol, blong soemaot samting we God i wantem se ol man blong hem long wol oli mekem. Hem i talem se: “God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud long olgeta  samting we yufala i mekem. Long Baebol God i talem se, ‘Yufala i mas tabu, yufala i mas klin gud, olsem we mi mi tabu, mi klin gud.’” (1 Pita 1:15, 16; Lev. 19:2; Dut. 18:13) Ol tok ya oli soemaot se ol man blong karem kakae long garen oli mas klin long ol fasin blong olgeta mo long wosip blong olgeta. Yumi save kasem bigfala mak ya sipos yumi mekem samting we yumi mas mekem blong kam klin long fes blong God. ?Olsem wanem blong kam klin olsem? Trutok blong God long Baebol i save givhan long yumi blong kam klin.

15. ?Trutok blong Baebol i gat paoa blong mekem wanem long yumi?

¹⁵ Baebol i talem se trutok i olsem wota we i mekem man i klin. Long wan leta we aposol Pol i raetem, hem i talem se kongregesen blong ol Kristin we tabu spirit i makemaot olgeta, hem i klin long fes blong God. Hem i woman blong Kraes, we Kraes i mekem hem i klin, ‘i olsem we hem i wasem long wota, mo long tok blong hem, blong bambae i tabu, i stret gud olgeta.’ (Efes. 5:25-27) Bifo finis, Jisas i tokbaot paoa blong tok blong God we hem i stap talemaot, se hem i save mekem man i klin. Jisas i talem long ol disaepol blong hem se: “Mi mi mekem yufala i klin finis long ol tok ya we mi mi talem long yufala.” (Jon 15:3) Taswe, trutok blong Baebol i gat paoa blong mekem yumi klin long ol fasin blong yumi mo long wosip blong yumi. Yumi mas letem trutok blong God i mekem yumi klin olsem. Long rod ya nomo, bambae God i glad long wosip blong yumi.

16. ?Olsem wanem yumi save stap klin long ol fasin blong yumi mo long wosip blong yumi?

¹⁶ Taswe, sipos yumi wantem kam ol wokman blong God we oli karem kakae long garen, fastaem yumi mas sakemaot olgeta fasin we oli stap mekem yumi doti long fes blong God. Mo blong gohed blong holem gudfala wok ya blong karem kakae long garen, laef blong yumi i mas soemaot se yumi stap folem ol tok blong Jeova, long ol fasin blong yumi mo long wosip blong yumi. (Ridim 1 Pita 1:14-16.) Oltaem yumi mas letem trutok blong God i mekem yumi klin, olsem we yumi wasem prapa bodi blong yumi long wota blong mekem i klin. Yumi mas ridim Baebol oltaem mo kam long ol Kristin miting. Mo tu, yumi mas traehad blong folem ol tok blong God long laef blong yumi. Taem yumi mekem olsem, yumi naf blong faet agensem ol tingting we oli pulum yumi blong mekem sin, mo yumi naf blong blokem ol rabis fasin blong wol ya. (Sam 119:9; Jem. 1:21-25) !Tru ya, yumi harem gud blong save se trutok blong Baebol i save givhan blong “wasemaot” ol sin blong yumi, nating se oli bigwan olsem wanem, mo ‘blong mekem yumi klin’!—1 Kor. 6:9-11.

17. ?Sipos yumi wantem stap klin, yumi mas folem wanem advaes blong Baebol?

¹⁷ ?Olsem wanem? ?Yu yu glad blong letem trutok blong Baebol i mekem laef blong yu i klin? ?Taem yu kasem woning blong lukaotgud long ol rabis muvi mo nogud miusik, yu yu mekem wanem? (Sam 101:3) ?Yu yu lukaotgud blong no joen plante wetem ol yangfala long skul, mo ol man we yu wok wetem olgeta we oli no gat sem bilif olsem yu? (1 Kor. 15:33) ?Yu yu stap traehad blong winim ol slak fasin we oli save mekem yu yu doti long fes blong Jeova? (Kol. 3:5) ?Yu yu stap longwe long ol rao long saed blong politik? ?Yu yu sakemaot tingting ya we i kamaot plante taem long spot, se wan kantri i moagud long narafala kantri?—Jem. 4:4.

18. ?Taem yumi klin long ol fasin mo wosip blong yumi, olsem wanem samting ya bambae i givhan long yumi blong karem plante moa kakae long garen?

¹⁸ Sipos yu obei long Baebol long ol samting ya, bambae yu kasem nambawan frut. Jisas i talem long ol disaepol blong hem we tabu spirit i makemaot olgeta, se oli olsem ol han blong wan rop. Hem i talem se: “Evri han blong rop ya we oli no save karem frut, [Papa blong mi] i stap katemaot olgeta. Mo evri han we oli stap karem frut, hem i stap klinim olgeta blong bambae oli save karem plante frut moa.” (Jon 15:2) Taem yu letem trutok blong  Baebol, we i olsem wota, i mekem yu yu klin, yu karem plante moa frut.

Ol Blesing Naoia Mo Long Fiuja

19. ?Wanem ol blesing we ol disaepol blong Jisas oli kasem taem oli traehad long wok ya blong karem kakae long garen?

¹⁹ Ol gudfala disaepol we oli folem trening we Jisas i givim long olgeta, oli kasem tabu spirit long lafet blong Pentekos long yia 33 K.T. Paoa ya i pusum olgeta blong oli prij ‘gogo oli finisim olgeta ples long wol.’ (Wok 1:8) Sam long olgeta oli kam ol brata long hed kampani, samfala oli kam misinari, mo samfala oli kam ol elda we oli goraon long ol kongregesen. Olgeta ya oli mekem wan bigfala wok blong talemaot gud nius “long olgeta man long wol.” (Kol. 1:23) !Oli kasem plante bigfala blesing, mo oli mekem ol narafala oli glad tu!

20. (a) ?Wanem sam blesing we yu yu kasem finis from we yu wok had blong karem kakae long garen? (b) ?Yu yu gat strong tingting blong mekem wanem?

²⁰ Yes, yumi mas mekem tingting blong yumi i stap daon, yumi mas wok had, mo yumi mas folem ol gudfala fasin we Tok blong God i leftemap. Sipos yumi mekem ol samting ya, bambae yumi gohed blong harem gud mo karem frut long bigfala wok ya blong karem kakae long garen, we i stap gohed naoia. Plante man blong wol we oli ronem mane mo pleplei oltaem, oli harem nogud, oli safa, mo oli kros. Be yumi glad tumas mo yumi harem gud long laef blong yumi. (Sam 126:6) Samting we i moa gud, se ‘wok blong yumi bambae i gat frut blong hem.’ (1 Kor. 15:58) Masta blong garen, Jeova God, bambae i mekem i gud long yumi gogo i no save finis, from ‘wok ya we yumi mekem’ mo from we ‘yumi lavem hem.’—Hib. 6:10-12.

[Futnot]

?Yu Yu Tingbaot?

Taem yu stap traehad blong mekem bes blong yu long wok blong karem kakae long garen . . .

• ?from wanem yu mas mekem tingting blong yu i stap daon?

• ?olsem wanem yu save kam wan man blong wok had oltaem?

• ?from wanem yu mas stap klin long ol fasin blong yu mo wosip blong yu?

[Kwestin]

[Tok blong pija long pej 25]

Taem yumi mekem tingting blong yumi i stap daon, yumi save mekem we laef blong yumi i no fasfas mo wok blong Kingdom i stap long fasples