Tijim Pikinini Blong Yu

Ol Man We Oli Raetem Ol Stori Long Saed Blong Jisas

?YU YU laekem ridim ol stori wetem narafala?— * Sam man we oli ridim stori long saed blong Jisas, oli sapraes se hem i no raetem wan buk blong Baebol. Be eit long olgeta man we oli raetem Baebol, oli bin laef long taem blong Jisas, mo oli talem plante samting long saed blong hem, mo ol tijing blong hem. ?Yu yu save talem nem blong ol eit man ya?— I gat Matiu, Mak, Luk, mo Jon. Ol fo narafala hemia Pita, Jemes, Jud, mo Pol. ?Wanem samting we yu save long saed blong ol man ya?—

Fastaem, bambae yumi tokbaot tri long ol twelef aposol blong Jisas, we oli raetem Baebol. ?Yu yu save nem blong trifala?— I gat Pita, Jon, mo Matiu. Pita i raetem tu leta i go long ol narafala Kristin. Hem i tokbaot ol samting we hem i save long saed blong ol wok blong Jisas, mo ol tok blong hem. Traem openem Baebol blong yu i go long 2 Pita 1:16-18, mo ridim wanem we Pita i talem, long saed blong taem ya we hem i harem voes blong Jeova i kamaot long heven, i toktok long Jisas.—Matiu 17:5.

Aposol Jon i raetem faef buk blong Baebol. Long laswan naet we ol disaepol oli kakae wetem Masta blong olgeta, Jon i sidaon klosap long Jisas. Mo tu, Jon i stap wetem Jisas taem Hem i ded. (Jon 13:23-26; 19:26) Jon i raetem wan long ol fo buk blong Baebol we oli tokbaot laef blong Jisas, hemia ol Gospel. Mo tu, Jon i raetem buk blong Revelesen we Jisas i givim long hem, mo tri narafala leta long Baebol, we oli karem nem blong hem, Jon. (Revelesen 1:1) Namba tri aposol we i raetem Baebol, hemia Matiu. Bifo, hem i wan man blong tekem mane blong takis.

Tu narafala man we tufala i raetem Baebol, tufala i save gud Jisas. Tufala i pikinini blong Josef mo Meri, mo tufala i smol brata blong Jisas. (Matiu 13:55) Fastaem, tufala i no bilif long hem. Tufala i stap talem se hem i prij strong from ating hed blong hem i krangke. (Mak 3: 21) ?Wanem nem blong tufala brata ya blong hem?— Wan long tufala, hemia Jemes, we i raetem buk blong Jemes long Baebol. Narafala brata blong hem we i raetem buk blong Jud, nem blong hem Judas, mo narafala nem blong hem, Jud.—Jud 1.

Tu narafala man we oli raetem stori blong laef blong Jisas, hemia Mak mo Luk. Meri, we i mama blong Mak, i gat wan bigfala haos long Jerusalem, we ol Kristin long faswan handred yia, wetem aposol Pita tu, oli mekem miting long hem. (Ol Wok 12:11, 12) Plante yia bifo, long naet ya we Jisas i mekem lafet blong Pasova wetem ol aposol blong hem, ating Mak i go wetem olgeta long garen blong Getsemane. Taem oli holem Jisas, oli traem holem Mak tu, be hem i lego parpar blong hem, i ronwe we i neked nomo.—Mak 14:51, 52.

Luk i wan dokta we i skul gud, mo hem i kam wan disaepol afta we Jisas i ded. Hem i stadi gud long ol samting we oli hapen long laef blong Jisas, mo hem i raetem wan stori we i klia mo i tru. Biaen, Luk i wokbaot  wanples wetem aposol Pol, mo tu, hem i raetem buk blong Ol Wok long Baebol.—Luk 1:1-3; Ol Wok 1:1.

Pol i namba eit man ya we i raetem stori long saed blong Jisas long Baebol. Gamaliel we i wan nambawan tija blong Loa, i tijim Pol, we bifo ol man oli singaot hem Sol. Hem i gruap mo i kasem tijing long ol Farisi, ale hem i no laekem nating ol man blong Jisas, mo i joen blong kilim ol man ya blong Jisas oli ded. (Ol Wok 7:58–8:3; 22:1-5; 26:4, 5) ?Yu yu wantem save olsem wanem Pol i lanem trutok long saed blong Jisas?—

Taem Pol i stap wokbaot i go long Damaskes blong holem ol man blong Jisas, wantaem nomo, wan bigfala laet i saenaot long heven, i mekem se hem i blaen. Mo hem i harem wan voes we i singaot se: “!Sol! !Sol! ?Weswe yu stap mekem i nogud long mi olsem?” !Hemia Jisas ya we i toktok! Hem i talem long Pol blong i go long Damaskes. Nao Jisas i lidim wan disaepol blong hem Ananaeas, blong i go toktok wetem Pol. Biaen, Pol i kam wan disaepol blong Jisas. (Ol Wok 9:1-18) Pol i raetem 14 buk blong Baebol, i stat long buk blong Rom i go kasem buk blong Hibrus.

?Yu yu stap ridim ol buk blong Baebol we oli tokbaot Jisas, no i gat wan man we i ridim ol buk ya long yu?— Wan long ol beswan samting we yu save mekem long laef blong yu naoia we yu yu yangfala nomo, hemia blong kasem save samting we Baebol i talem long saed blong Jisas.

[Futnot]

OL KWESTIN:

▪ ?Hu ol aposol blong Jisas we oli kam ol man blong raetem Baebol?

▪ ?Hu tufala man blong raetem Baebol we oli brata blong Jisas?

▪ ?From wanem maet Mak i save gud Jisas, be Luk i no save hem nating?

▪ ?Olsem wanem Pol i kam wan disaepol blong Jisas?

[Tok blong pija long pej 21]

Jud

Mak

Pita

Matiu

Pol

Jemes

Luk

Jon