Kwestin Blong Olgeta We Oli Ridim Magasin Ya

?Ol Witnes Blong Jeova Oli Agri Blong Joen Wetem Ol Narafala Skul Blong Mekem Wosip Tugeta?

▪ World Christian Encyclopedia i talem se i gat samwe long “10,000 skul long wol.” Be ol skul ya oli raorao mo mekem bigfala trabol long ol man. From samting ya, plante man blong ol skul ya oli gat tingting se ol skul oli mas joen tugeta. Oli ting se, rod ya nomo i save mekem ol man oli joengud mo oli stap long pis, long wol ya we ol man blong hem oli seraot olbaot.

Baebol i pulum ol man blong oli joengud. Aposol Pol i tokbaot Kristin kongregesen se hem i olsem bodi blong man, we wanwan haf blong bodi ya i “joen blong kam wan bodi nomo.” (Efes. 4:16) Mo tu, aposol Pita i talem long ol Kristin brata sista blong hem se: “Yufala evriwan i mas gat wan tingting nomo.”—1 Pita 3:8.

Ol Kristin bifo oli laef long wan taem we i gat ol defdefren kastom mo ol defdefren skul. Nating se i olsem, taem Pol i tokbaot sipos i stret we ol skul oli joen tugeta, hem i talem se: “Man we i bilif mo man we i no bilif, tufala i no save joen long wan tingting.” Mo i givim woning long ol Kristin blong oli “gowe long olgeta.” (2 Korin 6:15, 17) I klia we Pol i no agri se ol skul oli save joen blong mekem wosip tugeta. ?From wanem hem i talem olsem?

Aposol Pol i eksplenem se i no stret we wan tru Kristin i joen wetem man we i no Kristin blong tufala i mekem wosip. Hemia i olsem we man i putum yok long tu buluk blong mekem tufala i wok wanples. (2 Korin 6:14) Fasin ya i save spolem bilif blong tru Kristin ya. Tingting blong Pol i sem mak long tingting blong wan papa we i save se ol pikinini raonabaot long ples blong hem, oli gat nogud fasin. From we papa ya i wari long ol pikinini blong hem, ale, long waes fasin, hem i putum sam rul se weswan pikinini i stret blong ol pikinini blong hem oli pleplei wetem. Maet ol narafala oli no glad long wanem we papa ya i mekem. Be papa ya i mekem se ol pikinini blong hem oli stap longwe long ol narafala pikinini, from we hem i wantem lukaotgud long ol pikinini blong hem blong oli no lanem ol nogud fasin. Long sem fasin, Pol i luksave se taem wan tru Kristin i stap longwe long ol narafala skul, samting ya i lukaotgud long hem, blong i no gat ol rabis fasin blong laef we ol skul ya oli gat.

Pol i folem tingting blong Jisas taem hem i talem se wan Kristin i mas stap longwe long ol narafala skul. Jisas i givim nambawan eksampol olsem wanem blong gat pis wetem ol man, be hem i no joen wetem ol narafala skul blong mekem wosip. Long taem we Jisas i stap prij long wol, plante skul olsem ol Farisi mo Sadusi, oli strong. Ol skul ya oli joen tugeta blong agensem Jisas, gogo oli kilim hem i ded. Be Jisas i no pulum ol man blong hem blong joen wetem ol narafala skul. Defren olgeta, hem i talem long ol man blong hem se oli mas “lukaot long ol tok we ol Farisi mo ol Sadusi oli stap tijim ol man long hem.”—Matiu 16:12.

?Olsem wanem long taem blong yumi? ?Woning we Baebol i givim se yumi no mas joen wetem ol narafala skul blong mekem wosip, i stret yet tede? Yes i stret yet, from we rod ya we ol skul oli joen wanples, i no save joenem ol defdefren bilif blong ol skul ya. I sem mak olsem we yumi traem miksim oel mo wota long wan kap. Traem tingbaot: ?Taem ol man blong ol defdefren skul oli kam tugeta blong prea blong i gat pis, oli stap prea long wanem god? ?Oli stap prea long god blong ol skul we oli stap talem se oli Kristin, we i olsem wan Triniti? ?Oli stap prea long Brahma, we i god blong skul blong Hindu, no long Buda, no long wan narafala god bakegen?

Profet Maeka i talem se “long laswan haf blong ol dei,” ol man blong olgeta neson bambae oli talem se: “Yufala i kam, blong yumi go antap long hil blong Jeova, long haos blong God blong Jekob. Mo hem bambae i tijim yumi long ol wei blong hem, mo bambae yumi wokbaot long ol rod blong hem.” (Maeka 4:1-4, NW) Ale, frut blong samting ya, hemia se bambae i gat pis mo fasin joengud long fulwol. Samting ya bambae i kamtru, i no from we ol skul oli joen wanples blong mekem wosip no sam narafala samting, nogat. Be hemia from we olgeta man oli folem wan trufala bilif nomo.

[Tok blong pija long pej 23]

Ol memba blong ol bigfala skul long wol oli joen tugeta long wan miting, long yia 2008

[Credit Line]

REUTERS/Andreas Manolis