Trutok Long Saed Blong Sin

?SIPOS wan sikman i brekem samting ya blong makem tempraja blong hem (thermometer), hemia i pruvum se hem i no gat fiva? !Nogat! Long sem fasin, sipos plante man oli sakemaot tingting blong God long saed blong sin, be hemia i no min se i no gat sin. Tok blong God, Baebol, i talem plante samting long saed ya. ?Hem i tijim wanem stret long saed blong sin?

Olgeta Man Oli Save Mestem

Samwe long tu taosen yia bifo, aposol Pol i harem nogud, i talem se ‘oltaem hem i no mekem ol gudgudfala fasin ya we hem i wantem mekem, hem i stap mekem ol rabis fasin ya, we hem i no wantem mekem nating.’ (Rom 7:19) Sipos yumi tok tru, yumi mas talem se yumi tu yumi olsem Pol. Maet yumi wantem tumas blong folem ol Ten Komanmen, no sam narafala rul, long laef blong yumi. Be i no gat wan long yumi we i save mekem samting ya long fasin we i stret gud olgeta. I no se yumi minim nomo blong brekem wan rul, be yumi save foldaon. ?From wanem yumi olsem? Pol i ansa se: “Sipos mi stap mekem ol samting we mi no wantem mekem nating, ating i no mi tru, we mi stap mekem ol samting ya. Hemia fasin blong sin ya we i stap oltaem long tingting blong mi, we i stap mekem.”—Rom 7:20.

Olsem Pol, olgeta man oli bon wetem sam slak fasin. Samting ya i soemaot se yumi evriwan yumi bon wetem sin mo yumi no stret gud olgeta. Aposol Pol i talem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” ?Wanem i mekem se ol man oli olsem? Pol i gohed i se: “Wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 3:23; 5:12.

Faswan papa mama blong yumi, tufala i mekem sin, nao tufala i mekem se yumi stap longwe long ol gudgudfala fasin blong God, mo yumi no moa stret gud olgeta. Plante man tede oli sakemaot tingting ya, be hemia nao wanem we Baebol i tijim. Wan taem, Jisas i yusum ol faswan japta blong buk blong Jenesis, blong givim paoa long tok blong hem. Samting ya i soemaot se hem i bilif long stori blong Adam mo Iv.—Jenesis 1:27; 2:24; 5:2; Matiu 19:1-5.

Wan long ol stamba tijing blong Baebol, hemia se Jisas i kam long wol ya blong pemaot sin blong olgeta we oli bilif long hem. (Jon 3:16) Yumi evriwan yumi stap long wan trabol we yumi no naf blong kamaot long hem, ale Jeova i mekem wan rod blong sevem yumi long trabol ya. Sipos yumi talem tangkiu long hem mo yumi bilif long rod ya we hem i mekem, bambae yumi gat wan gudfala laef long fiuja. Be sipos yumi no kasem save klia long tingting blong God long saed long sin, bambae yumi no kasem save long rod ya we Hem i stanemap blong sevem yumi long sin, mo bambae yumi no save talem tangkiu from.

Sakrefaes Blong Jisas Mo Risen Blong Hem

Jeova i givim janis long Adam blong i gat laef olwe. Sipos hem i no obei long God, hem i save lusum nambawan janis ya. Mo hemia nao samting we Adam i mekem, hem i no obei long God, ale i kam sinman. (Jenesis 2:15-17; 3:6) Adam i no moa mekem samting we God i wantem, nao hem i no moa stret gud olgeta, mo i spolem fasin fren blong hem wetem God. Taem hem i brekem loa blong God hem i mekem sin, nao sloslo hem i kam olfala mo i ded. Sore tumas, ol bubu blong hem, hemia i min se yumi tu, yumi bon wetem sin, mo bambae yumi ded. ?From wanem yumi bon wetem sin?

Ansa blong kwestin ya i isi nomo. Ol papa mama we oli no stret gud olgeta, oli no naf blong gat ol pikinini we oli stret gud. Olgeta pikinini blong Adam mo Iv oli sinman finis taem oli bon, mo olsem aposol Pol i talem, “ol man we oli stap mekem sin, pei blong olgeta, bambae oli ded from.” (Rom 6:23) Be seken haf blong vas ya i leftemap tingting blong yumi. Hem i talem se: “Be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” Jisas i givim laef blong hem olsem wan sakrefaes. Ale hemia i openem rod blong olgeta man  we oli wantem talem tangkiu long God mo obei long hem, oli kam klin from rabis wok we sin ya blong Adam i mekem long olgeta. * (Matiu 20:28; 1 Pita 1:18, 19) ?Save ya i mas mekem wanem long yu?

Lav Blong Kraes i ‘Holemtaet Yumi’

Aposol Pol i talemaot ansa we God i givim long kwestin ya. Hem i raetem se: “From we Kraes i lavem mifala tumas, nao fasin ya blong hem i stap holemtaet mifala. Mifala i luksave se hem wan nomo we hem i ded blong sevem olgeta man. . . . Hem i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.” (2 Korin 5:14, 15) Taem wan man i luksave se sakrefaes blong Jisas i save mekem hem i kam fri long sin, samting ya i save pulum hem blong wantem talem tangkiu long God. Man olsem i mas traehad blong mekem ol samting we God i wantem hem blong mekem long laef blong hem. Hemia i min se man ya i mas kasem save long samting we God i wantem, hem i mas trenem tingting blong hem folem ol rul blong Baebol, mo i mas laef folem ol save ya.—Jon 17:3, 17.

Taem yumi mekem samting we i no stret, yumi no moa frengud wetem Jeova God. King Deved i luksave se hem i mekem wan bigfala sin taem hem i slip wetem Batseba mo i kilim man blong Batseba i ded. I klia se hem i sem bigwan. Be samting we hem i wari moa long hem, hemia se hem i mekem God i harem nogud. I stret nomo we hem i wari olsem. Ale, hem i sore tumas mo i talem long Jeova se: “Sin ya we mi mekem i agens long yu nomo, mi mi mekem ol samting ya we i nogud tumas long fes blong yu.” (Ol Sam 51:4) Sem mak, taem wan woman i traem pulum Josef blong slip wetem hem, tingting we i save jajem hem i pulum hem blong talem se: ‘Sipos mi mi kam slip wetem yu, bambae mi mekem sin long fes blong God. Hemia i nogud tumas ya.’—Jenesis 39:9.

Taswe, sin i no wan nogud filing nomo we yumi gat taem yumi mekem wan rong mo ol narafala oli faenemaot yumi. Mo sin i no hemia nomo se taem yumi mestem, yumi mas talemaot long ol narafala from wanem yumi mestem. God i putumap ol loa long saed blong fasin blong slip olbaot, giaman mo stil, respek, wosip, mo sam narafala fasin bakegen. Taem yumi brekem ol loa ya, yumi spolem fasin fren blong yumi wetem hem. Sipos yumi gohed nomo  blong mekem sin, yumi kam enemi blong God. Hemia wan trutok we yumi mas tingting gud long hem.—1 Jon 3:4, 8.

Taswe, ?olsem wanem? ?I no moa gat sin? Blong talem stret, i gat sin yet. Ol man nomo oli putum ol defren nem long hem, blong mekem i luk olsem se sin i no wan impoten samting. Plante man, tingting blong olgeta i no moa stikim olgeta, sipos no, oli no lesin long tingting ya taem i stikim olgeta. Ol man we oli wantem se God i glad long olgeta, oli no mas mekem samting ya. Yumi luk finis se man we i mekem sin, pei blong hem i no se hem i harem nogud mo se i sem, nogat. Pei blong hem, hemia ded. Laef blong yumi long fiuja i dipen long tingting we yumi gat long saed blong sin.

Wan gudfala nius se, sipos yumi tanem tingting blong yumi from ol sin blong yumi mo yumi lego olgeta, God i save yusum sakrefaes blong Jisas blong fogivim yumi. Pol i raetem se: “Man we God i fogivim hem, mo i tekemaot ol sin blong hem, hem i save harem gud. Man we God i no makem ol sin blong hem, hem i save harem gud.”—Rom 4:7, 8.

[Futnot]

[Bokis/Foto blong pija long pej 10]

Wan Tijing We Jos i Tekemaot Fulwan

Bighaf blong ol man Katolik oli no kasem save long tijing ya long saed blong Limbo. Long ol yia we oli jes pas, tijing ya i stap lus sloslo, gogo kasem we oli tekemaot fulwan long ol buk we oli yusum blong tijim ol man long bilif blong olgeta. Long yia 2007, Katolik Jos i saenem wan pepa blong blokem fulwan tijing ya. Long pepa ya, oli raetem se “stadi we mifala i mekem long saed blong God mo ol kastom we jos i folem, oli mekem tingting blong mifala i strong se God i save sevem ol bebi we oli ded be oli no baptaes, mo hem i save tekem olgeta oli go long ples we oli save harem gud blong olwe.”—International Theological Commission.

?From wanem jos i jenisim tingting blong hem olsem? Hemia i blong mekem se i kam fri long tijing ya we i hevi long ol man. Wan Franis man we i stap raetem niuspepa, nem blong hem Henri Tincq, i talem se tijing ya we jos i wantem kam fri long hem, i olsem “wan baden, mo wan tijing we jos i sapotem plante yia finis, stat long Medel Ejes * i kam kasem ol yia 19 handred. Long ol yia ya, Jos i yusum tijing ya blong Limbo blong trikim ol man mo mekem ol papa mama oli fraet, nao oli hareap nomo blong baptaesem bebi blong olgeta.” Be taem jos i tekemaot tijing ya blong Limbo, sam narafala kwestin oli kamkamaot.

?Hemia Tingting Blong Ol Olfala Bifo No i Kamaot Long Baebol? Tijing ya blong Limbo i kamaot long ol yia 11 handred, taem ol lida blong jos oli raorao from tijing blong pegatri. Katolik Jos i stap tijim se wan samting insaed long man i gohed blong laef afta we man i ded. Be jos i mas eksplenem tu wanem bambae i hapen long spirit blong ol pikinini we oli ded be oli no baptaes. Ol pikinini ya oli no save go long heven, be i no stret tu we oli go long helfaea. Ale, hemia nao stat blong tijing ya Limbo.

Baebol i no tijim se wan samting insaed long man i gohed blong laef taem hem i ded. Baebol i tokbaot se taem man i ded, hem i no moa save wan samting, i olsem se hem i slip nomo. (Prija 9:5, 10; Jon 11:11-14) I no gat wan samting insaed long man we i gohed blong laef afta we hem i ded, taswe i no gat wan ples we nem blong hem Limbo.

Baebol i talem se God i tingbaot ol pikinini blong ol Kristin papa mama se oli tabu. (1 Korin 7:14) Tok ya i soemaot we tijing ya se ol bebi oli mas baptaes blong God i sevem olgeta, i no tru.

Tijing ya blong Limbo i spolem nem blong God bigwan. Hem i mekem ol man oli tingbaot God olsem wan rabis man we i stap panisim strong ol nogud man, be i no wan Papa we i lavem man mo i stap mekem ol samting we i stret. (Dutronome 32:4; Matiu 5:45; 1 Jon 4:8) !Taswe, yumi no sapraes se ol Kristin we oli wantem tumas blong kasem save blong God, oli no save agri long tijing ya we i no stanap long Baebol!

[Futnot]

[Tok blong pija long pej 9]

Taem yumi folem ol samting we Tok blong God i talem, yumi save frengud wetem God mo ol man