?Yumi No Moa Save Wanem Ya Sin?

I NO longtaem i pas, ol man we oli go long jos oli harem pasta blong olgeta i stap prij strong long saed blong ol bigfala sin we oli karem panis blong ded. Ol bigfala sin ya, hemia fasin blong slip olbaot, kakae bitim mak, griri, les, kros, jalus, mo praod. Plante taem, pasta i eksplenem gud panis we man bambae i kasem taem hem i mekem ol bigfala sin ya, mo hem i pulum ol man blong oli tanem tingting blong olgeta from ol sin blong olgeta. Wan man blong raetem buk i talem se: “Tede, ol pasta oli no moa tokbaot sin from we i save spolem filing blong ol man blong jos. Oli tokbaot ol samting ya nomo we ol man oli glad blong harem.”

Ol man blong raetem niuspepa tu oli luksave samting ya. Hemia sam tok we oli stap long ol niuspepa:

▪ “Ol prija oli no moa tokbaot sin, man i tanem tingting blong hem from sin blong hem, mo fasin blong pemaot sin blong man. Hemia ol samting blong bifo. Oli tokbaot moa ol samting we oli mekem man i harem gud, olsem rod blong man i tinghae long hem wan, mo blong i tingbaot hem wan.”—Star Beacon, Ashtabula, Ohio.

▪ “Klosap i no moa gat man tede we oli fraet blong mekem wan sin, mo we oli tingbaot se oli sinman.”—Newsweek.

▪ “Yumi no moa askem se: ‘?Wanem samting we God i wantem blong mi mi mekem?’ Be yumi askem se: ‘?Wanem samting we God i save mekem blong mi?’”—Chicago Sun-Times.

Tede ol man blong ol defdefren laen, pati blong politik, mo jos, oli stap olbaot long olgeta ples blong wol. From we i gat plante defren kaen man olsem, ol man oli fraet blong jajem fasin blong narafala. Oli talem se i no stret blong jajem fasin blong narafala man. I luk olsem se sin we i bigwan moa, hemia taem man i jajem samting we narafala i mekem. Taswe, oli stap talem se: “Maet samting we yu yu bilivim i stret long yu, be yu no mas fosem ol narafala blong olgeta tu oli bilivim samting ya. Tede, ol man oli gat defdefren tingting, mo oli laef folem ol tingting ya. Wan man i no save talem se hem nomo i save fasin we i stret. Ol samting we ol narafala man oli mekem, oli stret tu.”

Ol tok olsem i mekem se tingting blong ol man i jenis. Naoia, oli no moa tinghevi long tok ya “sin.” Plante man oli yusum tok ya olsem wan tok plei nomo. Oli no moa ting se i wan bigfala sin taem wan man i laef wetem wan woman be tufala i no mared, man i slip wetem woman blong narafala man, mo man i slip wetem man bakegen.

I klia se ol man oli jenisim tingting blong olgeta long saed blong “fasin we i stret” mo wanem ya “sin.” ?From wanem oli jenisim tingting blong olgeta? ?I no moa gat samting ya we oli kolem sin? ?Tingting we yu yu gat long saed ya, i impoten no nogat?