Toktok Long Narafala Wetem Lav Mo Kaen Fasin
Toktok Long Narafala Wetem Lav Mo Kaen Fasin
“Oltaem hem i save toktok gud long ol man [“toktok long narafala wetem lav mo kaen fasin,” NW], mo ol tok blong hem i waes.”—PROV. 31:26.
1, 2. (a) ?Wanem gudfala fasin we ol man blong Jeova oli mas wokem? (b) ?Bambae yumi tokbaot wanem long stadi ya?
MAMA blong King Lemuel bifo i givim plante advaes long boe blong hem. Wan long ol advaes ya i tokbaot wan impoten fasin we wan gudfala waef i mas gat. Mama ya i talem se: “Oltaem hem i save toktok gud long ol man [“toktok long narafala wetem lav mo kaen fasin,” NW], mo ol tok blong hem i waes.” (Prov. 31:1, 10, 26 *) I gud tumas taem wan waes woman i toktok long ol narafala wetem lav mo kaen fasin. Hemia i sem mak tu long evriwan we oli wantem mekem Jeova God i glad. (Ridim Ol Proveb 19:22, futnot) Olgeta we oli folem tru wosip, oltaem oli mas toktok long ol narafala wetem lav mo kaen fasin.
2 ?Taem wan man i gat lav mo kaen fasin, hem i soemaot olsem wanem? ?Hu ol man we yumi mas soemaot fasin ya long olgeta? ?Wanem bambae i givhan long yumi blong toktok long ol narafala wetem lav mo kaen fasin? ?Olsem wanem ol fasin ya bambae oli givhan long yumi blong storian gud insaed long famle, mo wetem ol Kristin brata sista?
Lav Mo Kaen Fasin
3, 4. (a) ?Lav mo kaen fasin i olsem wanem? (b) ?Olsem wanem lav mo kaen fasin we yumi tokbaot long stadi ya, i no sem mak long kaen fasin we plante man oli gat?
3 Klosap oltaem kaen fasin i joen wetem lav. Man we i kaen, hem i tingbaot ol man wanwan, ale hem i givhan long olgeta mo i talem ol gudfala tok long olgeta. Man we i lavem narafala, hem i mekem i gud long hem. Taem fasin ya i kamaot long hat blong hem, hem i putum tingting blong hem i stap strong long narafala ya go kasem we hem i finisim evri gudfala samting we hem i wantem mekem long man ya.
4 Mo tu, Baebol i soemaot se wan man we i kaen mo i lavem narafala, hem i mekem i gud long ol man, mo long ol strenja tu. Tingbaot taem sip we aposol Pol mo ol 275 narafala man oli stap long hem i rek, mo ol man long aelan blong Molta oli kaen mo oli mekem i gud tumas long olgeta. Nating se ol man ya oli neva luk Pol olgeta bifo, be oli kaen long olgeta. (Wok 27:37–28:2) Be lav mo kaen fasin we yumi tokbaot long stadi ya i pulum man blong putum tingting blong hem i stap strong long wan narafala we hem i fren gud finis wetem hem. * Hemia nao fasin we Deved i soemaot long Mefiboset bifo.—2 Saml. 9:7.
I Impoten Blong Tingting Dip Mo Prea
5. ?Wanem i save givhan long yumi blong bos long tang blong yumi?
5 I no isi nating blong toktok long ol narafala wetem lav mo kaen fasin. Disaepol Jemes i tokbaot tang blong yumi, se: “I no gat man samtaem we i save mekem tang blong hem i stap kwaet. Tok we i kamaot long hem i nogud tumas, mo yumi no save blokem. Hem i olsem posen we i save kilim man i ded.” (Jem. 3:8) I no isi blong bos long smol haf ya blong bodi blong yumi. ?Ale, wanem i save givhan long yumi blong bos long hem? Tok we Jisas i talem long ol lida blong skul long taem blong hem, i givhan long yumi blong luksave wan samting. Hem i talem se: “Taem man i tok, hem i stap talemaot ol samting we tingting [“hat,” NW] blong hem i fulap long hem.” (Mat. 12:34) Sipos yumi wantem toktok long ol narafala wetem lav mo kaen fasin, yumi mas wokem fasin ya fastaem long hat blong yumi. I gud yumi tokbaot olsem wanem fasin blong tingting dip mo prea oli save givhan long yumi blong mekem olsem.
6. ?From wanem yumi mas tingting dip mo talem tangkiu, from ol wok blong Jeova we oli soemaot se Hem i kaen mo i lavem ol man?
6 Baebol i talem se Jeova God i ‘stap lavem man oltaem.’ (Eks. 34:6) Man blong raetem Sam i singsing se: “Hae God, wol ya i fulap long fasin ya blong yu we yu yu lavem man tumas.” Jeova i kaen long ol man we hem i lavem olgeta tumas. (Sam 119:64) Long Baebol i gat plante stori we oli tokbaot olsem wanem Jeova i kaen mo i lavem ol man we oli wosipim hem. I gud yumi tekem taem blong tingting dip long ‘olgeta bigbigfala wok ya blong Jeova,’ mo yumi talem tangkiu long hem from. Hemia bambae i givhan long yumi blong yumi wantem wokem gudfala fasin ya blong Hem.—Ridim Ol Sam 77:12.
7, 8. (a) ?Wanem wok we Jeova i mekem long Lot mo famle blong hem, we i soemaot se hem i kaen mo i lavem olgeta? (b) ?Deved i harem olsem wanem taem God i kaen mo i lavem hem?
7 Lot, we i boe blong brata blong Ebraham, wetem famle blong hem oli stap long taon blong Sodom. Tingbaot olsem wanem Jeova i sevem olgeta taem Hem i spolem taon ya. Klosap long taem we bambae Hem i spolem taon ya, tufala enjel oli kam luk Lot, oli talem long hem blong i tekem famle blong hem mo i goaot long taon ya kwiktaem. Baebol i talem se: “Be Lot i stap tektaem, nao Hae God i gat sore long hem, mo tufala enjel ya i holem han blong hem wetem woman blong hem mo tufala dota blong hem, nao tufala i lidim olgeta oli goaot long taon.” Taem yumi tingting dip long wok ya we Jeova i mekem blong sevem Lot mo tufala gel blong hem, yumi luksave se Hem i kaen mo i lavem olgeta, mo samting ya i tajem hat blong yumi.—Jen. 19:16, 19.
8 Tingbaot stori blong Deved we i king blong Isrel bifo. Hem i singsing se: “[Jeova] i stap fogivim mi, i stap tekemaot ol sin blong mi. Hem i stap tekemaot ol sik blong mi, i mekem mi mi gud bakegen.” !I klia se Deved i glad we i glad from we Jeova i fogivim sin we hem i mekem wetem Batseba! Deved i presem Jeova, i se: “Fasin ya blong hem we oltaem hem i stap lavem ol man we oli stap ona long hem, hem i gud tumas. Lav ya blong hem i bigfala tumas, i hae moa i bitim skae antap.” (Sam 103:3, 11) Taem yumi tingting dip long ol stori ya blong Baebol, hat blong yumi i pulum yumi blong presem mo talem tangkiu long Jeova from we hem i lavem ol man mo i kaen long olgeta. Moa we yumi talem tangkiu wetem fulhat blong yumi, moa we yumi wantem folem fasin ya blong tru God.—Efes. 5:1.
9. ?Wanem i mas pulum ol man blong Jeova blong oli soemaot long laef blong olgeta evri dei, se oli kaen mo oli lavem ol narafala?
9 Ol stori blong Baebol oli soemaot se Jeova i kaen mo i lavem ol man, taem oli fren gud finis wetem hem. Hem i lavem olgeta, i putum tingting blong hem i stap strong oltaem long olgeta mo hem i glad long olgeta. ?Be olsem wanem long ol man we oli no fren gud yet wetem God ya we i laef? ?Jeova i mekem i strong long olgeta? ?Hem i no kaen long olgeta? Si, hem i kaen long olgeta. Luk 6:35 i talem se: “[God] i kaen tumas long olgeta we oli no save talem tangkiu long hem, oli stap tingbaot olgeta nomo.” Mo tu, “hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Mat. 5:45) Taem yumi no lanem mo folem trutok yet, be God i kaen long yumi finis olsem we hem i kaen long olgeta man long wol. Be taem yumi wosipim hem, hem i putum tingting blong hem i stap strong long yumi mo i lavem yumi. Yes hem i kaen oltaem mo i lavem yumi tumas. (Ridim Aesea 54:10.) !Yumi talem bigfala tangkiu long Jeova from gudfala fasin ya blong hem! !Mo hemia i mas pulum yumi evri dei blong toktok long ol narafala wetem lav mo kaen fasin, mo i mas pulum yumi tu blong mekem ol narafala samting we oli soemaot kaen fasin ya!
10. ?From wanem prea i save halpem yumi blong gat gudfala fasin ya blong kaen mo lavem ol narafala?
10 Prea i wan gudfala rod blong givhan long yumi blong yumi lavem ol man mo kaen long olgeta. Hemia from we tufala fasin ya, lav mo kaen fasin, tufala i frut blong tabu spirit blong Jeova. (Gal. 5:22) Sipos yumi letem spirit ya i wok long laef blong yumi, fasin ya blong kaen mo lavem ol man i save stap long hat blong yumi. Wan rod blong kasem tabu spirit blong Jeova, hemia blong askem long hem long prea. (Luk 11:13) I gud we yumi prea bakegen mo bakegen blong God i givim tabu spirit blong hem, mo blong yumi letem spirit ya i lidim yumi. Yes, sipos yumi wantem toktok long ol narafala wetem lav mo kaen fasin, yumi mas tingting dip mo prea.
Man Mo Woman We i Mared, Tufala i Toktok Wetem Lav Mo Kaen Fasin
11. (a) ?Olsem wanem yumi save se Jeova i wantem we man i lavem woman blong hem mo i kaen long hem? (b) ?Olsem wanem fasin ya we man i lavem woman blong hem mo i kaen long hem, i save givhan long man blong lukaot gud long ol toktok blong hem?
11 Aposol Pol i givim advaes long ol man we oli mared, i se: “Yufala ol man we i mared, yufala i mas lavem ol woman blong yufala, olsem we Kraes i lavem jos [“kongregesen,” NW] ya. Taswe hem i letem laef blong hem, blong sevem jos [“kongregesen,” NW] ya.” (Efes. 5:25) Aposol Pol i mekem ol mared man oli tingbaot tok ya tu we Jeova i talem long Adam mo Iv. Hem i raetem se: “Bambae man i aot long papa mo mama blong hem, i go joen wetem woman blong hem, nao bambae tufala i kam olsem wan bodi nomo.” (Efes. 5:31) Yes, Jeova i wantem se ol man oli putum tingting blong olgeta i stap strong long woman blong olgeta mo oli fasgud long olgeta. Hem i wantem se oli kaen long woman blong olgeta mo oli lavem olgeta oltaem. Wan man we i putum tingting blong hem i stap strong long woman blong hem mo i lavem hem, i no save talemaot ol rong blong woman ya long fored blong evriwan, mo i no save daonem hem tu. Man ya i glad blong talem ol gudfala tok long woman blong hem. (Prov. 31:28) Sipos wan trabol i kamaot long mared blong tufala, man ya bambae i no talem sam tok we i save mekem woman blong hem i sem, nogat. Man ya i kaen long woman blong hem mo i lavem hem.
12. ?Olsem wanem woman i save toktok long man blong hem wetem lav mo kaen fasin?
12 Woman tu i mas toktok long man blong hem wetem lav mo kaen fasin. Hem i no mas letem spirit blong wol ya i gat paoa long ol toktok blong hem. Woman olsem i “ona gud long man blong hem.” Taswe, taem hem i stap wetem ol narafala, hem i talemaot ol gudfala samting long saed blong man blong hem, blong mekem se ol narafala oli respektem man blong hem moa. (Efes. 5:33) Hem i no mekem se ol pikinini blong hem oli no moa respektem papa blong olgeta. Olsem nao, sipos hem i no agri long desisen we man blong hem i mekem, no hem i gat sam samting blong talem long saed ya, hem i no mekem long fored blong ol pikinini. Hem i wet fastaem blong hem mo man blong hem, tufala i stap tufala nomo. Baebol i talem se: “Woman we i waes, oltaem hem i stap lukaot gud long hom blong hem.” (Prov. 14:1) Famle i mas harem se hom blong olgeta i wan ples we oli glad mo oli harem gud long hem.
13. ?Long weples nao yumi mas toktok long narafala wetem lav mo kaen fasin? ?Olsem wanem yumi mekem samting ya?
13 Nating sipos wan man mo woman blong hem, tufala i stap tufala nomo long haos, be tufala i mas gohed blong toktok wetem respek. Pol i raetem se: “Yufala i mas sakemaot olgeta i gowe long laef blong yufala. Bambae yufala i no moa kros. Bambae yufala i no moa faerap. Bambae yufala i no moa stap badfren long yufala. Bambae yufala i no moa tok agens long narafala man, mo yufala i no moa yusum ol doti tok.” Hem i gohed i se: “Yufala i mas putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. . . . Yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.” (Kol. 3:8, 12-14) Taem ol pikinini oli lan blong harem papa mama blong olgeta tufala i toktok long tufala wetem lav mo kaen fasin, bambae oli hapi. Mo tu, bambae oli folem fasin blong papa mama blong toktok.
14. ?Olsem wanem ol tok blong hed blong famle i save mekem tingting blong famle i kam strong?
14 Man blong raetem Sam i talem se: “Mi mi man blong wok blong yu, mo oltaem yu yu lavem mi tumas. Plis yu mekem tingting blong mi i strong bakegen, olsem we yu yu promes.” (Sam 119:76) Wan nambawan rod we Jeova i yusum blong mekem tingting blong ol man blong hem i strong, hemia taem hem i givim advaes long olgeta mo i lidim olgeta. (Sam 119:105) ?Olsem wanem hed blong famle i save folem eksampol blong Papa blong yumi long heven? ?Olsem wanem toktok blong hem i save mekem tingting blong olgeta we hem i lukaot long olgeta, i kam strong? Hed blong famle i mekem olsem taem hem i lidim gud famle mo i toktok blong leftemap tingting blong olgeta. !Naet blong Famle Wosip nao i nambawan janis blong evriwan long famle blong faenemaot ol gudgudfala save blong Baebol!—Prov. 24:4.
Putum Tingting Blong Yu i Stap Strong Long Ol Kristin Brata Sista Mo Lavem Olgeta
15. ?Olsem wanem ol elda mo olgeta we oli bigman long ol Kristin fasin, oli save toktok blong givhan long ol narafala long kongregesen blong oli stap sef?
15 King Deved i prea se: “Fasin blong yu we yu stap lavem mi tumas, mo we tingting blong yu i stap strong long mi, oltaem bambae i stap mekem mi mi sef.” (Sam 40:11) ?Olsem wanem ol Kristin elda mo olgeta long kongregesen we oli bigman finis long ol Kristin fasin, oli save folem fasin ya blong Jeova? Sipos yumi yusum tang blong yumi blong pulum tingting blong ol man i go long ol advaes blong Baebol, yumi soemaot se yumi kaen long ol man mo yumi lavem olgeta.—Prov. 17:17.
16, 17. ?Wanem sam rod blong soemaot se yumi toktok long ol narafala wetem lav mo kaen fasin?
16 ?Sipos yumi luk se wan Kristin i stap mekem wan samting we i no laenap wetem ol rul blong Baebol, bambae yumi mekem wanem? ?Bambae yumi toktok long Kristin ya wetem lav mo kaen fasin, blong traem pulum hem i kambak long stret rod? (Sam 141:5) ?Olsem wanem sipos yumi save se wan brata no wan sista blong yumi i mekem wan bigfala sin? From we tingting blong yumi i stap strong long hem mo yumi lavem hem, bambae yumi go toktok long hem. Bambae yumi pulum hem blong “singaot ol elda blong jos [“kongregesen,” NW] blong oli kam luk hem.” Nao oli save ‘prea mo kafsaedem oel i go long hem long nem blong’ Jeova. (Jem. 5:14) Sipos brata no sista ya i no go luk ol elda, mo yumi tu yumi no ripotem bisnes ya long olgeta, yumi no kaen long brata no sista ya mo yumi no lavem hem. Maet sam long yumi, tingting blong olgeta i foldaon, oli harem se oli no gat fren, no oli no naf blong mekem wan gudfala samting. No maet oli harem nogud tumas from we oli putum tingting blong olgeta i stap strong long wan samting, be samting ya i no kamtru. Taem yumi toktok long ol Kristin ya, yumi mas toktok wetem lav mo kaen fasin. Yumi “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.”—1 Tes. 5:14, NW.
17 Tingbaot. Taem ol man we oli no laekem God, oli talem sam giaman tok long saed blong ol brata sista blong yumi, ?yumi mekem wanem? Yumi no mas stat blong gat nogud tingting long ol brata sista blong yumi se oli no stap tru long Jeova. Defren olgeta, yumi mas sakemaot ol giaman tok ya, mo stap kwaet. Sipos yumi luk se i stret, yumi save askem long man we i talem giaman tok ya, sipos hem i save sam samting we oli pruvum se tok blong hem i tru. Tingbaot sipos ol enemi blong ol man blong God oli wantem spolem ol Kristin brata sista blong yumi, nao oli traem blong faenemaot weples oli stap long hem. From we yumi lavem ol brata sista ya mo tingting blong yumi i stap strong long olgeta, bambae yumi no talemaot long ol enemi ya weples oli stap long hem.—Prov. 18:24.
Man We i ‘Kaengud Long Man Mo i Mekem i Stret Long Hem, Bambae i Gat Laef’
18, 19. ?Taem yumi joen wetem ol narafala Kristin, from wanem yumi mas toktok oltaem long olgeta wetem lav mo kaen fasin?
18 Fasin we yumi mekem long ol narafala Kristin, i mas soemaot se yumi lavem olgeta mo tingting blong yumi i stap strong long olgeta. Nating sipos yumi stap fesem wan trabol, be yumi mas gohed yet blong toktok long ol man wetem lav mo kaen fasin. Taem ol man Isrel oli no moa lavem ol man mo oli no moa kaen long olgeta, fasin ya blong olgeta i kam “olsem wota blong naet, we taem san i girap, be kwiktaem nomo i mekem i kam drae.” Jeova i no glad nating long olgeta. (Hos. 6:4, 6) Jeova i glad taem yumi kaen oltaem long ol man mo yumi lavem olgeta. Tingbaot olsem wanem hem i blesem olgeta we oli gat fasin ya.
19 Ol Proveb 21:21 i talem se: “Man we i kaengud long ol man, mo i stap mekem i stret long olgeta, hem bambae i gat longfala laef. Bambae ol man oli mekem i stret long hem, mo oli ona long hem.” Wan long ol blesing we man olsem bambae i kasem, hemia laef, i no wan laef we i sot nomo, be laef we i no save finis. Jeova i givhan long hem blong “kasem laef ya we i prapa wan.” (1 Tim. 6:12, 19) Taswe, i gud we yumi traehad long evri rod blong ‘yumi kaen long ol narafala man’ mo yumi lavem olgeta.—Sek. 7:9.
[Ol futnot]
^ par. 1 Long ol vas long stadi ya, Baebol long Bislama i yusum ol tok ya, ‘mekem i gud tumas,’ ‘lavem man tumas,’ ‘kaen tumas,’ ‘toktok gud,’ mo ‘kaengud.’ Be folem ol olfala hanraet, ol tok ya oli minim ‘lav mo kaen fasin.’
^ par. 4 Blong kasem save moa olsem wanem lav mo kaen fasin, i no sem mak long fasin ya we man i stap tru long narafala, i lavem narafala, no i mekem i gud long narafala, lukluk Wajtaoa blong Mei 15, 2002, pej 12-13, 18-19.
?Yu Yu Save Eksplenem?
• ?Lav mo kaen fasin i olsem wanem?
• ?Wanem bambae i givhan long yumi blong toktok long ol narafala wetem lav mo kaen fasin?
• ?Olsem wanem tok blong man mo woman we i mared i save soemaot se tufala i lavem tufala, mo tufala i putum tingting blong tufala i stap strong long tufala?
• Taem yumi joen wetem ol narafala Kristin, ?olsem wanem yumi toktok long olgeta wetem lav mo kaen fasin?
[Kwestin]
[Tok blong pija long pej 25]
Deved i presem Jeova from we hem i kaen mo i lavem ol man
[Tok blong pija long pej 26]
?Yu yu putum wan stret taem evri wik blong mekem Famle Wosip?