Wan Kwestin

?Olsem wanem Jisas i save talem long wan woman we ol man oli save se hem i wan woman nogud, se hem i fogivim sin blong hem?—Luk 7:37, 48.

Taem Jisas i stap kakae long haos blong wan Farisi, nem blong hem, Saemon, wan woman “i kam long bak blong Jisas, i bendaon long leg blong hem.” Hem i mekem leg blong Jisas i wetwet long wota blong ae blong hem, mo i waepem long hea blong hem blong mekem i drae. Biaen hem i kis long leg blong hem, mo i kafsaedem senta i go long hem. Gospel i talem se ol man long taon ya oli save se, ‘woman ya i wan woman nogud.’ I tru, evri man we i mekem sin, i wan man nogud. Be klosap oltaem Baebol i yusum tok ya blong tokbaot wan man we ol sin blong hem oli nogud olgeta, no man we i mekem rabis fasin oltaem nomo. Maet woman ya i wan woman blong rod. Hemia nao kaen woman we Jisas i talem long hem se: “Ol sin blong yu, mi mi tekemaot finis.” (Luk 7:36-38, 48) ?Jisas i minim wanem? Long taem ya, Jisas i no ded yet blong pemaot sin blong ol man. Taswe, ?olsem wanem Jisas i save fogivim sin blong woman ya?

Afta we woman ya i wasem mo putum senta long leg blong Jisas, mo bifo we Jisas i fogivim sin blong hem, Jisas i talem wan pijatok long Saemon blong eksplenem wan impoten poen long hem. Hem i talem se, sin i olsem wan kaon we i bigwan tumas blong man i pembak, nao hem i gohed se: “I gat wan masta we tu man i gat kaon long hem. Wan i kaon long faef handred taosen vatu, mo narawan i kaon long fifti taosen vatu. Tufala i no save pem kaon ya blong tufala, nao masta ya i ravemaot kaon ya i talem se, ‘Bambae yutufala i no pem kaon blong yutufala. Livim.’ ?Nao weswan long tufala ya bambae i save laekem masta ya moa?” Nao Saemon i talem se: “Ating man ya we kaon blong hem i bigfala moa, nao masta ya i sore long hem.” Jisas i talem se: “Tok blong yu i stret.” (Luk 7:41-43) Yumi evriwan i gat wan kaon long God, hemia blong obei long hem. Taem yumi no obei long God be yumi mekem sin, yumi no pembak kaon we yumi gat long God. Yumi stap mekem kaon blong yumi i kam bigwan moa. Be Jeova i olsem masta ya we i rere blong ravemaot kaon blong man ya. Jisas i stap tokbaot kaon we yumi gat long God, taem hem i pulum ol man blong hem blong oli prea long God se: “Yu fogivim mifala from ol sin blong mifala, olsem we mifala i stap fogivim ol man we oli mekem i nogud long mifala.”—Mat. 6:12.

?Long wanem rod God i fogivim ol sin blong ol man long taem bifo? Stret fasin blong God blong jajem man, hemia se man we i mekem sin i mas ded from. From we Adam i mekem sin, hem i mas ded. Be Loa we God i givim long ol man Isrel bifo i talem se, man we i mekem sin, hem i save kilim anamol blong mekem sakrefaes i go long Jeova. Long rod ya, Jeova i save fogivim sin blong hem. Aposol Pol i talem se: “Long fasin blong Loa ya, klosap olgeta samting, be pris i mas yusum blad blong anamol no pijin blong mekem olgeta oli klin long fes blong God. Mo sipos i no gat blad i ron, bambae God i no save tekemaot sin blong man.” (Hib. 9:22) Ol man Jiu oli save se i no gat narafala rod we God i yusum, blong i save tekemaot sin blong olgeta. From samting ya, yumi no sapraes taem ol man we oli lesin long Jisas, oli agensem samting we hem i talem long woman ya. Olgeta we oli kakae wetem Jisas oli stap taltalem long olgeta se: “?Olsem wanem ya? !Hem i man nomo! !Hem i no save tekemaot sin blong man!” (Luk 7:49) Woman ya i mekem bigfala sin. ?Long wanem rod Jisas i save tekemaot ol sin ya?

Faswan profet tok we Jeova i talem afta we faswan man mo woman i rebel, i tokbaot tingting blong hem se bambae i mekem wan spesel “pikinini” i kamtru. Mo Setan wetem ol pikinini blong hem bambae oli kakae leg blong ‘pikinini ya.’ (Jen. 3:15, futnot) Samting ya i kamtru taem ol enemi blong God oli kilim Jisas i ded long pos. (Gal. 3:13, 16) Blad blong Jisas i pemaot ol man blong wol blong oli kam fri long sin mo ded. I no gat wan samting we i save blokem Jeova blong i no mekem stamba tingting blong hem i kamtru. Taswe stret afta we Jeova i talemaot profet tok ya long Jenesis 3:15, long tingting blong hem i olsem we hem i pemaot ol man finis. Ale afta long taem ya, hem i save fogivim sin blong olgeta we oli bilif long ol promes blong hem.

Bifo long taem blong ol faswan Kristin, i gat sam man we Jeova i luk olgeta olsem we oli stret man  long fes blong hem. Long olgeta ya, i gat Inok, Noa, Ebraham, Rehab mo Job. From we oli bilif, oli wet blong luk ol promes blong God we bambae oli kamtru long fiuja. Disaepol Jemes i raetem se: “Ebraham i bilif long God, mo from we hem i bilif olsem, God i mekem hem i stret man long fes blong hem.” Jemes i talem long saed blong Rehab se: “Traem tingbaot woman blong rod ya Rehab. God i mekem hem i stret woman long fes blong hem from we hem i lukaot gud long tufala laen ya blong Isrel we tufala i kam blong lukluksave Jeriko.”—Jem. 2:21-25.

Long taem blong ol man Isrel bifo, King Deved i mekem bigfala sin. Be hem i gat strong bilif long tru God, mo evri taem we hem i mekem sin, hem i tanem tingting blong hem. Antap long hemia, Baebol i talem se: “God i givim Jisas Kraes blong hem i ded, blong blad blong hem i save tekemaot ol sin blong ol man we oli bilif long hem. Hem i mekem olsem blong soemaot fasin blong hem blong mekem ol man oli stret long fes blong hem, from we bifo, tingting blong hem i longfala, nao hem i letem ol sin blong ol man i stap fastaem. Be naoia long taem blong yumi, hem i soemaot we fasin blong hem i stret, mo we hem i stap mekem olgeta man we oli bilif long Jisas, oli stret man long fes blong hem.” (Rom 3:25, 26) From sakrefaes blong Jisas we bambae i kamtru afta long taem blong Deved, Jeova i save fogivim sin blong Deved, be i no lego stret fasin blong hem blong jajem man.

I klia se Jeova i fogivim Deved long sem fasin ya nomo we i mekem long woman ya we i kafsaedem senta long leg blong Jisas. Hem i bin mekem rabis fasin, be hem i tanem tingting blong hem from sin blong hem. Hem i luksave nid blong hem, hemia blong kam fri long sin. Hem i mekem ol samting ya blong talem tangkiu long man ya we Jeova i yusum blong tekemaot sin blong ol man. Nating se sakrefaes ya i no kamtru yet, i sua se bambae i kamtru. Taswe God i save yusum sakrefaes ya blong tekemaot sin blong olgeta we oli olsem woman ya. Ale, Jisas i save talem long hem se: “Mi mi fogivim sin blong yu.”

Stori ya i soemaot klia se, Jisas i no tanem baksaed long ol man ya we oli mekem sin. Hem i mekem i gud long olgeta. Mo tu, Jeova i wantem tumas blong fogivim sin blong ol man ya we oli tanem tingting blong olgeta. Hemia wan nambawan promes we i save leftemap tingting blong yumi, ol sinman.

[Tok blong pija long pej 23]

God i mekem olgeta oli stret man long fes blong hem