Lida Blong Yumi Tede i Wok Strong
Lida Blong Yumi Tede i Wok Strong
“Hem i raed long hos i go, olsem man we i win finis long faet, nao i go blong faet bakegen, blong bambae i win bakegen.”—REV. 6:2.
1, 2. (a) ?Baebol i talem se wok blong Jisas olsem King, we i stat long yia 1914, i olsem wanem? (b) ?Wanem ol wok we Jisas i mekem afta we hem i kam King?
LONG yia 1914, Jisas we i Mesaea King, i kasem paoa blong rul long Kingdom blong Jeova. Traem tingbaot wok we Jisas i stap mekem tede. ?Yu tingbaot hem olsem wanem? ?Olsem wan king we i stap sidaon long jea blong hem, i stap tingting, mo wanwan taem i lukluk i kamdaon long wol, blong luk sipos kongregesen blong hem i oraet? Sipos hemia nao tingting blong yu, be yu mas jenisim tingting ya. Buk blong Ol Sam mo Revelesen oli tokbaot Jisas olsem wan king we i gat strong paoa. King ya i sidaon long wan hos, i raed i go blong “win long faet, nao i go blong faet bakegen, blong bambae i win bakegen,” gogo hem i “win” olgeta.—Rev. 6:2; Sam 2:6-9; 45:1-4.
2 Faswan samting we Jisas i mekem afta we hem i kam King, hem i faet agensem ‘bigfala algita wetem ol enjel blong hem,’ mo i winim olgeta. Jisas we i Mikael, jif blong ol enjel, i ronemaot Setan mo ol rabis enjel blong hem long tabu ples ya heven, mo i sakemaot olgeta oli kamdaon long wol. (Rev. 12:7-9) Biaen, Jisas i mekem wok olsem ‘man blong karem tok blong promes we God i mekem.’ Hem wetem Papa blong hem, tufala i kam jekem tabu haos blong God. (Mal. 3:1) Jisas i jekem ol jos ya we oli talem se oli Kristin mo i jajem olgeta. Ol jos ya we oli haf blong ‘Bigfala Babilon,’ oli gat moa fol i bitim ol narafala giaman skul. Jisas i jajem ol jos ya we oli talem se oli Kristin, from we hem i luk se oli kilim plante tumas man i ded, mo oli kam doti taem oli joen long politik blong wol ya.—Rev. 18:2, 3, 24.
Jisas i Mekem Ol Man Blong Wok Blong Hem Long Wol Ya, Oli Kam Klin
3, 4. (a) ?Taem Jisas i kam olsem “man blong karem tok” blong Jeova, hem i mekem wanem? (b) ?Taem Jisas i jekem haos blong God, hem i faenemaot wanem? ?Mo Jisas we i Hed blong kongregesen, i putumap hu?
3 Taem Jeova mo “man blong karem tok” blong hem, tufala i stap jekem tabu haos blong hem, tufala i faenemaot se i gat wan grup blong ol tru Kristin we oli no joen wetem ol jos ya we oli giaman Kristin. Grup ya i stap long wol ya, we i olsem yad blong tabu haos blong God. Be ol Kristin ya tu we tabu spirit i makemaot olgeta, mo we Baebol i tokbaot olgeta se ol “pikinini blong Livae,” oli mas kam klin. I sem mak olsem we profet Malakae i talem bifo, se: “Bambae hem i kam blong jajem olgeta man. Bambae hem i mekem olsem we man i bonem silva mo gol blong mekem i kam klin. Hem bambae i mekem laef blong ol pris [“ol pikinini blong Livae,” NW] i klin long fes blong Hae God, blong oli save tekem ol presen we oli stret i kam long hem.” (Mal. 3:3) Jeova i yusum Jisas Kraes we i ‘man blong karem tok blong promes blong God,’ blong hem i mekem Isrel blong God i kam klin.
4 Jisas i faenemaot se ol Kristin ya we tabu spirit i makemaot olgeta, oli mekem bes blong olgeta blong givim trutok blong God long ol man we oli bilif. Trutok ya i olsem kakae we i kamaot long stret taem blong hem. Stat long yia 1879 i kam, grup ya i printim ol trutok blong Baebol long saed blong Kingdom blong God, long magasin ya Wajtaoa. Oli gohed long wok ya, nomata se samtaem i no isi long olgeta blong mekem olsem. Jisas i bin talemaot se long “lashaf blong fasin blong laef long wol ya,” hem bambae “i kamtru” blong jekem ol man blong hem. Long taem ya, bambae hem i faenemaot wan slef we i stap ‘givim kakae long stret taem blong hem.’ Bambae hem i talem long slef ya se hem i glad long hem, mo bambae i “putumap [slef ya] blong lukaot long olgeta samting blong hem” long wol. (Mat. 24:3, 45-47, NW) Jisas we i Hed blong Kristin kongregesen, i yusum “slef ya we i stret mo waes” blong lukaot long olgeta samting blong hem long wol ya we oli joen wetem Kingdom blong God. Jisas i yusum wan Hed Kampani blong lidim “ol man blong hem” we tabu spirit i makemaot olgeta, mo ol fren blong olgeta, ol “narafala sipsip.”—Jon 10:16.
Wok Blong Tekem Kakae Long Garen We i Minim Wol
5. ?Long wan vison, aposol Jon i luk wanem wok we Mesaea King bambae i mekem?
5 Aposol Jon i luk wan vison we i soemaot wan narafala samting we Mesaea King bambae i mekem ‘long dei blong Masta,’ afta we hem i kam king long yia 1914. Jon i talem se: “Mi luk wan waet klaod i stap, mo mi luk wan man we i olsem Pikinini blong Man i stap sidaon long klaod ya. Hem i werem hat blong king we oli wokem long gol, mo i holem wan huknaef we i sap gud.” (Rev. 1:10; 14:14) Jon i harem wan enjel blong Jeova i talem long Man ya blong tekem kakae long garen, blong hem i yusum huknaef blong hem, from we ‘kakae i rere finis.’—Rev. 14:15, 16.
6. ?Jisas i talem wanem samting we bambae i hapen taem ol yia oli stap pas?
6 Wok ya blong “tekem kakae” long garen we i minim wol ya, i mekem yumi tingbaot parabol blong Jisas long saed blong gudfala sid mo rabis gras. Jisas i talem se hem i olsem wan man we i planem gudfala sid long garen blong hem, from we hem i wantem kasem plante gudfala wit. Gudfala wit ya i pija blong ‘ol pikinini blong Kingdom’ (NW), hemia ol tru Kristin we tabu spirit i makemaot olgeta, we bambae oli rul wetem hem long Kingdom blong hem. Be long naet, wan enemi, “hemia Setan,” i kam planem sid blong wan rabis gras long garen ya. Rabis gras ya i pija blong “ol man blong Setan.” Man blong garen ya i talem long ol man blong wok blong hem blong oli livim gudfala sid mo rabis gras tufala i gru tugeta, gogo kasem taem blong tekemaot ol kakae long garen, hemia long “en blong wol.” Long taem ya, bambae hem i sanem ol enjel blong hem oli go blong seraotem ol wit long ol rabis gras.—Mat. 13:24-30, 36-41.
7. ?Olsem wanem Jisas i mekem wok ya blong “tekem kakae” long garen?
7 Olsem we vison blong Jon i soemaot, Jisas i stap lidim wok ya blong tekem kakae long garen, we i stap gohed long fulwol. Wok ya blong “tekem kakae,” i stat taem Jisas i hivimap ol laswan blong ol 144,000 “pikinini blong kingdom,” we “gudfala sid” long parabol blong Jisas i pija blong olgeta. Afta long Wol Wo Wan, ol man oli naf blong luksave olgeta we oli tru Kristin mo olgeta we oli giaman Kristin. Mo samting ya i givhan long nambatu haf blong wok ya blong “tekem kakae” long garen, hemia wok blong hivimap ol narafala sipsip. Olgeta ya oli no ol “pikinini blong kingdom,” be oli “wan bigfala kampani blong man” we oli glad blong stap aninit long rul blong Kingdom ya. Jisas i tekemaot olgeta long “olgeta kantri mo olgeta kala mo olgeta lanwis.” Olgeta nomo oli putum olgeta oli stap aninit long rul blong Kingdom blong Mesaea. King blong gavman ya long heven, hem i Jisas Kraes mo ol 144,000 tabu “man blong God” we bambae oli joen wetem hem.—Rev. 7:9, 10, NW; Dan. 7:13, 14, 18.
Wok Blong Lidim Kongregesen
8, 9. (a) ?Wanem i soemaot se Jisas i lukluk mo i save gud laef blong ol Kristin wanwan, i no ol kongregesen wanwan nomo? (b) ?Folem pija long pej 29, wanem sam samting we oli olsem “tokhaed blong Setan,” we yumi mas ronwe long olgeta?
8 Long laswan stadi, yumi tokbaot se Jisas i stap lukluk ol kongregesen wanwan long faswan handred yia, mo i savegud sipos oli strong no oli slak. Long taem blong yumi, Jisas i rul olsem wan King we i gat “olgeta paoa . . . long heven mo long wol,” taswe, hem i Lida blong yumi. Hem i wok strong olsem Hed blong olgeta kongregesen mo Hed blong ol elda we oli lukaot long ol kongregesen ya long fulwol. (Mat. 28:18; Kol. 1:18) Jeova i “putumap Kraes blong i hed blong [kongregesen]” blong ol Kristin we tabu spirit i makemaot olgeta. (Efes. 1:22) I gat bitim 100,000 kongregesen blong ol Witnes blong Jeova long olgeta ples long wol. Be Jisas i luk evri samting we i hapen insaed long ol kongregesen ya wanwan.
9 Jisas i talem long kongregesen blong Tuatira, i se: ‘Yu mas raetemdaon tok blong mi, se, “Mi mi Pikinini blong God, we ae blong mi i olsem faea we i laet. Mi mi save finis fasin blong yufala long Tuatira.”’ (Rev. 2:18, 19) Jisas i tok strong long ol man long kongregesen ya, from we oli no tekemaot ol rabis fasin blong man wetem woman, mo olgeta tu oli mekem ol rabis fasin ya. Hem i talem long olgeta se: “Mi mi save tingting blong olgeta man, mo wanem samting olgeta oli wantem.” (Rev. 2:23) Tok ya i soemaot se Jisas i luk samting we ol kongregesen wanwan oli stap mekem, be i no hemia nomo. Hem i luk fasin blong laef blong olgeta man wanwan long ol kongregesen ya. Hem i talem ol gudfala tok long sam Kristin long Tuatira we oli “no lanem ol fasin ya we oli kolem gudfala tokhaed blong Setan.” (Rev. 2:24) Tede, ol “tokhaed blong Setan” oli kamaot long Intenet, ol video gem we oli fulap long raf fasin, mo long waes blong wol ya we i agri long enikaen rabis fasin nomo. Be Jisas i glad long ol olfala mo ol yangfala we oli no folem ol tokhaed ya, sem mak olsem we hem i glad long ol Kristin bifo. Plante Kristin tede oli traehad bigwan mo oli lego plante samting we olgeta nomo oli wantem, from we oli wantem mekem bes blong olgeta blong folem Jisas long evri haf blong laef blong olgeta. !Jisas i glad tumas blong luk we oli traehad olsem!
10. ?Baebol i yusum wanem pijatok blong soemaot se Jisas i stap lidim ol elda long ol kongregesen? ?Be ol elda ya oli luksave wanem plan we Jisas i stanemap?
10 Jisas i lavem ol kongregesen blong hem long wol ya, ale blong lukaot gud long olgeta, hem i putumap ol elda. (Efes. 4:8, 11, 12) Long faswan handred yia, olgeta we oli gat wok ya blong lukaot long kongregesen oli ol man we tabu spirit i makemaot olgeta. Buk blong Revelesen i tokbaot olgeta olsem ol sta long raethan blong Jisas. (Rev. 1:16, 20) Tede, bighaf blong ol elda long ol kongregesen oli ol narafala sipsip. Bifo we ol man ya oli kam elda, olgeta we oli putumap olgeta blong kam elda oli prea, mo oli letem tabu spirit i lidim olgeta. Taswe, yumi save talem se ol elda ya tu oli stap long han blong Jisas, hemia i min se Jisas i lidim olgeta. (Wok 20:28) Be oli luksave se Jisas i stap yusum wan smol grup blong ol Kristin we tabu spirit i makemaot olgeta, blong oli wok olsem Hed Kampani, mo blong lidim ol disaepol blong hem long wol ya.—Ridim Ol Wok 15:6, 28-30.
“Jisas, Masta, Plis Yu Kam”
11. ?From wanem yumi wantem tumas blong luk Lida blong yumi i kam?
11 Long Revelesen, Jisas i talem plante taem se bambae hem i kam i no longtaem. (Rev. 2:16; 3:11; 22:7, 20) I klia se hem i stap tokbaot taem ya we bambae hem i kam blong jajem Bigfala Babilon mo ol narafala rabis fasin blong wol ya blong Setan. (2 Tes. 1:7, 8) Olfala aposol Jon i wantem tumas blong luk ol nambawan profet tok ya we hem i stap talemaot, oli kamtru. Ale hem i singaot strong, se: “Mi wantem se bambae i olsem. Jisas, Masta, plis yu kam.” Tede, yumi stap laef long ol las dei blong rabis fasin blong wol ya. Taswe, yumi tu yumi wantem tumas blong luk Lida mo King blong yumi i kam wetem bigfala paoa long Kingdom blong hem, blong mekem nem blong Papa blong hem i kam tabu, mo blong leftemap hae rul blong Hem.
12. ?Wanem wok we Jisas i mas finisim bifo we ol enjel oli letem ol fo win blong bigfala trabol oli kasem wol ya?
12 Bifo we Jisas i spolemgud ogenaesesen blong Setan long wol ya, hem bambae i putum laswan mak long smol haf blong ol 144,000 man long Isrel blong God we oli stap yet long wol. Baebol i talemaot klia se Jisas i mas finisim wok ya blong putum laswan mak blong hem long ol 144,000 man, nao biaen ol enjel oli save letem ol fo win blong bigfala trabol oli kasem rabis wol ya blong Setan.—Rev. 7:1-4.
13. ?Olsem wanem Jisas bambae i soemaot se hem i stap, taem faswan haf blong “bigfala trabol” i stat?
13 Bighaf blong ol man long wol oli no luksave se stat long yia 1914, Jisas i “stap” finis. (2 Pita 3:3, 4, NW) Be bambae i no longtaem hem i soemaot se hem i stap, taem hem i mekem jajmen blong Jeova i kamtru long ol defren haf blong rabis wol ya blong Setan. Jisas bambae i ‘soemaot klia se hem i stap,’ taem bambae hem i spolemgud ‘man blong brekem loa,’ hemia ol lida blong ol giaman Kristin skul. (2 Tesalonaeka 2:3, 8, NW) Samting ya bambae i pruvum strong se Jisas i tekem aksen finis olsem Jaj ya we Jeova i makemaot hem. (Ridim 2 Timoti 4:1.) Olgeta skul we oli giaman Kristin, oli haf blong Bigfala Babilon we i gat moa fol i bitim ol narafala skul. Ol skul ya we oli giaman Kristin bambae oli faswan blong lus olgeta, nao biaen, bambae ol narafala giaman skul long fulwol tu oli lus olgeta. Jeova bambae i putum long tingting blong ol lida blong politik, blong oli spolemgud ol skul ya we oli olsem wan woman blong rod. (Rev. 17:15-18) Samting ya bambae i olsem faswan haf blong “bigfala trabol.”—Mat. 24:21.
14. (a) ?From wanem God bambae i katem taem blong faswan haf blong bigfala trabol? (b) ?‘Saen blong Pikinini blong Man’ bambae i mekem wanem long ol man blong Jeova?
14 Jisas i talem se God bambae i katem taem blong bigfala trabol ya, ‘blong sevem ol man we hem i jusumaot olgeta finis,’ hemia ol Kristin we tabu spirit i makemaot olgeta we oli stap yet long wol ya. (Mat. 24:22) Jeova bambae i no letem bigfala trabol ya we i finisim ol giaman skul, i spolem ol Kristin we tabu spirit i makemaot olgeta, wetem ol fren blong olgeta, ol narafala sipsip. Mo tu, Jisas i talem se “taem trabol ya i finis,” bambae i gat ol saen long san, mun, mo ol sta, nao biaen, ‘saen blong Pikinini blong Man, bambae i kamaot long skae.’ Samting ya bambae i mekem ol man blong olgeta kantri blong wol “oli krae.” Be ol man we tabu spirit i makemaot olgeta blong bambae oli laef long heven, wetem ol fren blong olgeta we bambae oli laef long wol ya, oli no save krae. Olgeta evriwan bambae oli ‘stanap stret, oli leftemap hed blong olgeta, from we i no longtaem, bambae Jisas i kam blong sevem olgeta, i mekem olgeta oli fri.’—Mat. 24:29, 30; Luk 21:25-28.
15. ?Wanem wok we Kraes bambae i mekem taem hem i kam?
15 Bifo we Pikinini blong Man i finisim faet blong hem blong i win olgeta, hem i mas ‘kam’ long wan narafala fasin bakegen. Hem i talem profet tok ya se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru wetem olgeta enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i stap seraot ol sipsip blong hem long ol nani blong hem. Bambae mi putum ol sipsip oli stap long raet saed blong mi, mo ol nani, oli stap long lef saed blong mi.” (Mat. 25:31-33) Profet tok ya i tokbaot Kraes we hem i kam olsem wan Jaj. Jaj ya i seraotem “olgeta man blong wol” long tu grup: “Ol sipsip,” hemia olgeta we oli givhan long ol brata blong olgeta long wol ya we tabu spirit i makemaot olgeta, mo “ol nani,” hemia olgeta we “oli no save obei long gud nius blong Jisas, Masta blong yumi.” (2 Tes. 1:7, 8) Ol sipsip ya we Baebol i tokbaot olgeta se “ol stret man,” bambae oli kasem “laef ya we i no save finis” long wol. Be ol nani, “bambae oli go blong kasem panis ya we i no save finis,” hemia i min se bambae oli lus blong olwe.—Mat. 25:34, 40, 41, 45, 46.
Jisas i Finisim Faet Blong Hem Mo i Win
16. ?Olsem wanem Lida blong yumi Jisas, bambae i finisim faet blong hem mo i win?
16 Ol man we bambae oli joen wetem Jisas blong rul olsem ol king mo pris, oli mas kasem ful namba blong olgeta. Mo Jisas i mas finisim wok ya blong seraotem ol sipsip oli go long raetsaed blong hem, blong bambae hem i sevem olgeta. Taem tufala wok ya i finis, Jisas i save gohed ‘blong faet blong i win bakegen.’ (Rev. 5:9, 10; 6:2) Bambae hem i lidim wan ami blong ol enjel we oli gat bigfala paoa, nao i go blong spolemgud fulwan wol blong Setan, hemia ol politik paoa, ol ami, mo ol bisnes. Yumi save se ol brata blong Jisas we oli laef bakegen finis, bambae oli joen wetem hem long faet ya. (Rev. 2:26, 27; 19:11-21) Jisas bambae i win fulwan taem hem i finisim gud rabis wol ya blong Setan. Biaen, bambae hem i sakem Setan mo ol rabis enjel blong hem oli godaon long wan bigfala hol, mo i lokem olgeta long ples ya blong wan taosen yia.—Rev. 20:1-3.
17. ?Long Wan Taosen Yia Rul blong Kraes, hem bambae i lidim ol narafala sipsip oli go blong mekem wanem? ?Yumi mas gat strong tingting blong mekem wanem?
17 Aposol Jon i tokbaot “wan bigfala hip blong ol man” we bambae oli no ded long taem blong bigfala trabol. Olgeta ya hemia bigfala kampani blong ol narafala sipsip. Hem i talem wan profet tok long saed blong olgeta, se: “Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwota ya we i save givim laef.” (Rev. 7:9, 17) Yes, long Wan Taosen Yia Rul blong Kraes, hem bambae i gohed blong lidim ol narafala sipsip. Olgeta ya oli lesingud long voes blong hem. Mo hem bambae i lidim olgeta blong oli kasem laef we i no save finis. (Ridim Jon 10:16, 26-28.) !I gud we tede yumi holemstrong long Lida ya blong yumi we i King, mo yumi biaen long hem go kasem we yumi go insaed long niufala wol ya we God i promes blong mekem!
Tingtingbak
• ?Wanem wok we Kraes i mekem finis taem hem i kam King?
• ?Jisas i yusum hu long wol ya blong lidim ol kongregesen?
• ?Long wanem rod, Lida blong yumi Jisas bambae i kam yet?
• ?Olsem wanem Kraes bambae i gohed blong lidim yumi long niufala wol?
[Kwestin]
[Tok blong pija long pej 31]
Taem rabis wol blong Setan i lus, ol man bambae oli luksave se Jisas i stap