Ol Man We Oli Mekem Wosip Long Tru God Oli Joengud

“Bambae mi tekem olgeta evriwan oli kam wanples bakegen . . . olsem man blong lukaot long sipsip, we i tekem ol sipsip blong hem oli kambak long fenis blong olgeta.”—MAEKA 2:12.

1. ?Olsem wanem ol samting we God i wokem oli soemaot se hem i waes?

WAN man blong raetem buk blong Ol Sam i talem se: “Hae God. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes. Wol ya i fulap long olgeta samting we yu yu mekem.” (Sam 104:24) Yumi luksave se God i waes taem yumi lukluk gud long ol laef samting long wol we oli wok tugeta. I gat plante milian kaen tri, bataflae, anamol, mo bebet, we olgeta wanwan oli dipen long ol narafala. Long bodi blong yu tu, i gat plante taosen samting we oli wok tugeta blong mekem se yu yu wan laef man mo bodi blong yu i strong. Sam long olgeta oli ol bigfala haf insaed long bodi, mo sam oli ol smosmol sel we man i no save luk wetem prapa ae blong hem.

2. Olsem pija long pej 16 i soemaot, ?from wanem i olsem wan merikel we ol Kristin long faswan handred yia oli joengud?

 ² Jeova i wokem ol man, blong olgeta wanwan oli dipen long ol narafala. I gat plante kaen man long wol. Fes blong olgeta wanwan i defdefren, oli gat ol defren fasin, mo oli gat gudhan blong wokem ol defdefren samting. Mo tu, God i wokem ol man blong oli tekem fasin blong hem. Samting ya i mekem se oli naf blong wok tugeta mo dipen long olgeta bakegen. (Jen. 1:27; 2:18) Nating se God i wokem ol man olsem, be naoia klosap olgeta man long wol oli stap longwe long God. Mo long ol yia we oli pas, neva olgeta man blong wol oli naf blong wok tugeta mo joengud. (1 Jon 5:19) Taswe, taem ol man long Kristin kongregesen long faswan handred yia oli joengud, ating ol narafala man oli luk se hemia i olsem wan merikel. Olgeta long kongregesen ya oli ol defren kaen man. I gat sam slef blong Efesas, sam woman Gris we oli gat haenem, sam man Jiu we oli skulgud, mo samfala we bifo oli mekem wosip long ol aedol. Nating se i olsem, oli joengud.—Wok 13:1; 17:4; 1 Tes. 1:9; 1 Tim. 6:1.

3. ?Baebol i talem se fasin blong ol Kristin blong joengud i olsem wanem samting? ?Bambae yumi tokbaot wanem long stadi ya?

³ Taem ol man oli mekem wosip long tru God, oli naf blong joengud mo wok tugeta, olsem ol haf blong bodi blong yumi. (Ridim 1 Korin 12:12, 13.) Long stadi ya, bambae yumi tokbaot ol kwestin ya: ?From wanem ol man we oli mekem wosip long tru God oli joengud? ?From wanem Jeova nomo i save mekem plante milian man long olgeta kantri blong wol oli joengud? ?Jeova i givhan long yumi blong winim wanem samting we i save mekem se yumi no joengud? Long saed blong fasin ya blong joengud, ?olsem wanem tru Kristin skul i defren long ol skul we oli giaman se oli Kristin?

?From Wanem Ol Man We Oli Mekem Wosip Long Tru God Oli Joengud?

4. ?From wanem ol man we oli mekem wosip long tru God oli joengud?

⁴ Ol man we oli mekem wosip long tru God oli bilif se Jeova i wokem olgeta samting. From samting ya, oli luk se i stret nomo we hem i King blong heven mo wol. (Rev. 4:11) Taswe, nating se ol tru Kristin oli stap long ol defren ples, mo laef blong olgeta i defdefren, be olgeta evriwan oli obei long ol loa blong God mo folem ol tingting blong hem long Baebol. I stret we ol man blong mekem wosip long tru God Jeova oli singaot hem se “Papa.” (Aes. 64:8; Mat. 6:9) From samting ya, ol man ya oli ol Kristin brata mo sista. Mo oli harem gud long fasin ya blong joengud, we man blong raetem Sam ya i tokbaot se: “!Olgeta! I gud tumas taem ol man blong God oli stap wanples, we oli gat wan tingting nomo. Fasin ya i gud tumas.”—Sam 133:1.

5. ?Wanem fasin i mekem se ol man blong wosipim tru God oli joengud?

⁵ Ol tru Kristin oli save mestem samtaem. Nating se i olsem, oli joengud blong mekem wosip long God from we oli lanem finis blong lavlavem olgeta. Jeova nao i tijim olgeta blong lavlavem olgeta. I no gat wan narafala man we i save tijim olgeta olsem. (Ridim 1 Jon 4:7, 8.) Tok blong God i talem se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efes. 4:32) Mo tu, Tok blong God i pulum yumi blong lavem ol man, from we lav i “save joenemgud olgeta samting, blong oli kam wan.” (Kol. 3:14) Taem ol man oli lavlavem olgeta, fasin ya i joenemgud olgeta. Mo lav ya  nao i makemaot ol tru Kristin. ?Yu wan, yu luk samting ya? ?Yu yu luk se ol man we oli mekem wosip long tru God, oli joengud olsem?—Jon 13:35.

6. ?Olsem wanem strong tingting we yumi gat long saed blong Kingdom i givhan long yumi blong joengud?

⁶ Mo tu, ol man blong mekem wosip long tru God oli joengud from we oli putum tingting blong olgeta i stap strong long Kingdom blong God, olsem rod blong sevem ol man. Oli save se i no longtaem, bambae Kingdom blong God i tekem ples blong ol gavman blong man. Bambae Kingdom ya i blesem ol man we oli obei long God, bambae i mekem se oli stap long pis olwe. (Aes. 11:4-9; Dan. 2:44) Taswe, ol tru Kristin oli folem tok ya we Jisas i talem long saed blong ol man blong hem, se: “Mi mi no man blong wol ya, mo long sem fasin, olgeta tu oli no man blong wol ya.” (Jon 17:16) Ol tru Kristin oli no joen nating long ol faet blong wol. From samting ya, oli gat pis mo oli joengud, nating se ol man raonabaot long olgeta oli stap faet.

Wan Rod Nomo Blong Tijim Yumi

7, 8. ?Olsem wanem tijing we yumi kasem long Baebol i givhan long yumi blong joengud?

⁷ Ol Kristin long faswan handred yia oli joengud from we olgeta evriwan oli kasem ol tok long wan rod nomo, blong tijim olgeta. Oli luksave se Jisas i stap yusum hed kampani, hemia ol aposol mo elda long Jerusalem, blong oli tijim mo lidim kongregesen. Ol man long hed kampani ya oli onagud long God, mo oli mekem ol desisen folem Tok blong God. Mo ol elda we oli goraon long ol kongregesen, oli karem ol tok blong hed kampani i go long ol kongregesen long plante kantri. Baebol i tokbaot sam long ol elda ya se: “Nao taem trifala ya i gotru long ol taon, trifala i stap talemaot long ol man blong Jisas, ol rul ya we ol aposol mo ol elda long Jerusalem oli putum. Mo trifala i stap tijim olgeta, se oli mas holem ol rul ya.”—Wok 15:6, 19-22; 16:4.

⁸ Long sem fasin, i gat wan Hed Kampani tede, hemia sam Kristin we tabu spirit i makemaot olgeta. Hed Kampani ya i givhan blong mekem olgeta man blong Jeova long fulwol oli joengud. Hed Kampani i wokem ol buk long plante lanwis, we oli stap givhan long ol man blong kasem save long God. Ol save ya i kamaot long Tok blong God nomo. Taswe, samting we Hed Kampani i tijim ol narafala long hem, i no kamaot long man, be i kamaot long Jeova.—Aes. 54:13.

9. ?Olsem wanem wok we God i givim long yumi i stap givhan long yumi blong joengud?

⁹ Ol Kristin elda tu oli pulum ol man blong joengud, taem oli lidim olgeta long wok blong prij. Fasin fren we i pulum ol man blong joengud blong mekem wok blong God, i strong moa i winim fasin fren we i pulum ol man blong wol blong joen wanples blong harem gud tugeta. Risen from wanem Kristin kongregesen i stanap, i no blong mekem se ol Kristin oli joen wanples blong storian mo harem gud nomo. Hem i stanap blong givim ona long Jeova mo blong mekem wan wok, hemia wok blong talemaot gud nius, pulum ol man oli kam disaepol blong Kraes, mo mekem kongregesen i strong. (Rom 1:11, 12; 1 Tes. 5:11; Hib. 10:24, 25) Taswe, aposol Pol i talem long ol Kristin se: “Yufala i gat wan tingting nomo, yufala i stap stanap strong, nao yufala i stap wok olsem wan tim nomo, blong traehad blong mekem ol man oli bilif long gud nius.”—Fil. 1:27.

10. ?Long wanem rod ol man blong God oli joengud?

¹⁰ Ale, yumi ol man blong Jeova, yumi joengud from we yumi obei long Jeova olsem King we i rul long yumi, yumi lavlavem yumi, yumi putum tingting blong yumi i stap strong long Kingdom blong God, mo yumi respektem olgeta we God i yusum blong lidim yumi. Be, from we yumi sinman, yumi gat sam tingting we oli save spolem fasin blong yumi blong joengud. I gud tumas we Jeova i stap givhan long yumi blong jenisim ol tingting ya.—Rom 12:2.

Yumi Mas Winim Flas Tingting Mo Jalus

11. ?Olsem wanem flas tingting i mekem ol man oli seraot? ?Olsem wanem Jeova i givhan long yumi blong winim flas tingting?

¹¹ Flas tingting i mekem ol man oli seraot. Man we i gat flas tingting, hem i ting se hem i gud moa i winim ol narafala. Hem i harem gud blong tok flas blong leftemap hem wan. Be plante taem, man olsem i mekem se ol man oli seraot. Olgeta we oli harem ol tok flas blong hem oli save kam jalus. Disaepol Jemes i talem stret se: “Ol tok flas olsem i nogud.” (Jem. 4:16) Man we i mekem olsem se hem i gud moa i winim ol narafala, hem i no lavem ol man. Yumi sapraes long tingting daon we Jeova i gat, taem yumi tingbaot we hem i yusum mo i givhan long ol sinman olsem yumi. Deved i raetem se: “Fasin blong yu [God] we yu stap givhan long mi [“yu gat tingting daon,” NW], hem i stap leftemap  nem blong mi.” (2 Saml. 22:36) Tok blong God i tijim yumi blong tingting gud mo blong gat stret tingting, nao long rod ya i givhan long yumi blong winim flas tingting. Tabu spirit i pulum Pol blong askem se: “?Weswe? ?Yufala i hae moa long ol narafala man? ?Yufala i gat sam samting blong yufala we God i no givim long yufala? !Nogat! ?Be weswe yufala i stap tok flas from ol samting ya we God i givim long yufala, olsem we oli blong yufala fastaem?”—1 Kor. 4:7.

12, 13. (a) ?From wanem i isi blong kam jalus? (b) ?Wanem i save kamaot sipos yumi gat sem tingting olsem Jeova long saed blong ol narafala?

¹² Jalus tu i mekem se ol man oli seraot. From we yumi sinman, i isi nomo blong yumi kam jalus. Nating se yumi tru Kristin longtaem finis, be sam samtaem yumi save harem yet se yumi jalus long narafala. Maet yumi jalus from we laef blong hem i moagud, hem i gat plante samting, i kasem spesel wok, no i gat gudhan mo plante save. (Pri. 4:4) Olsem nao, maet wan brata we i gat pikinini, i jalus long wan brata we i harem gud blong mekem wok blong prij fultaem. Be hem i no tingbaot se maet brata we i mekem wok blong prij fultaem i jalus smol long hem tu, from we hem i gat pikinini. ?Ale, olsem wanem yumi save blokem jalus, blong i no spolem fasin joengud?

¹³ Blong givhan long yumi blong blokem jalus, i gud yumi tingbaot wan eksampol we Baebol i yusum. Hem i talem se olgeta long Kristin kongregesen we tabu spirit i makemaot olgeta, oli olsem ol haf blong bodi blong man. (Ridim 1 Korin 12:14-18.) From we hat blong man i haed insaed long bodi, maet yumi ting se hem i no impoten tumas. Maet yumi ting se samting we yumi stap luk oltaem, olsem ae blong man, i moa impoten. Be bodi i nidim hat wetem ae tugeta. Long sem fasin, Jeova i tinghae long evriwan long kongregesen, nating se samfala oli gat bigfala wok bitim ol narafala. Taswe i gud yumi gat sem tingting olsem Jeova long saed blong ol brata blong yumi. Yumi no mas jalus long olgeta. I moagud yumi mekem ol samting blong givhan long olgeta mo intres long olgeta wanwan. Taem yumi mekem olsem, ol man oli luksave moa se tru Kristin skul i defren long ol skul we oli giaman nomo se oli Kristin.

Ol Skul We Oli Giaman Se Oli Kristin, Oli No Save Joengud

14, 15. ?Wanem i hapen blong mekem se ol man we oli lego tru Kristin skul, oli no save joengud?

¹⁴ Ol tru Kristin oli joengud, be ol skul we oli giaman nomo se oli Kristin, oli defren olgeta, oli fulap long rao mo trabol. Long ol yia bifo long 300 K.T., * sam man oli lego tru Kristin skul, mo oli pulum plante narafala blong joenem olgeta. Ale, hedgavman blong Rom we hem i wan hiten man, i luk se oli kam plante, nao hem tu i joenem olgeta mo i kam bos long olgeta. Samting ya i givhan blong statem ol skul we oli giaman nomo se oli Kristin. Biaen, plante kantri oli seraot long Rom mo oli statem ol prapa skul blong olgeta.

¹⁵ Blong plante handred yia, plante long ol kantri ya oli faet agens long olgeta bakegen. Nao long ol yia 1600 mo 1700, ol man Briten, Franis, mo Yunaeted Stet, oli toktok plante blong pulum ol man blong oli ona long prapa kantri blong olgeta. Ale, fasin ya we man i leftemap kantri blong hem, i kam olsem wan kaen wosip. Long ol yia 1800 mo 1900, bighaf blong ol man long olgeta ples blong wol oli tekem tingting ya se prapa kantri blong olgeta i moagud i bitim ol narafala kantri. Sloslo, ol skul we oli giaman se oli  Kristin, oli seraot long plante grup. Bighaf blong ol grup ya oli agri long fasin ya blong leftemap prapa kantri blong olgeta. Plante taem, ol man blong wan jos oli faet agensem ol man long narafala kantri we oli blong sem jos nomo. Tede, ol tijing mo fasin blong leftemap wan kantri antap long ol narawan, tufala samting ya i mekem se ol skul blong wol we oli giaman nomo se oli Kristin, oli no save joengud.

16. ?Wanem ol samting we oli mekem se ol skul we oli giaman nomo se oli Kristin, oli no joengud?

¹⁶ Long ol yia 1900, sam long ol handred skul we oli giaman nomo se oli Kristin, oli traem pulum ol jos blong joen bakegen. Oli traehad blong plante yia, be i gat smol nomo we oli joen bakegen. Mo ol man we oli stap go long jos oli no gat wan tingting yet long ol kwestin olsem: ?Yumi kamaot long mangki? ?I stret blong kilim pikinini long bel? ?I oraet we man i slip wetem man bakegen? ?I stret we oli putumap ol woman blong oli kam lida blong jos? Sam skul we oli giaman nomo se oli Kristin, ol lida blong olgeta oli talem long ol man se ol tijing we oli seraotem jos bifo, oli no moa impoten. Ol lida ya oli ting se maet ol tok olsem i mekem se ol skul oli save joen bakegen. Be taem oli talem se ol tijing ya oli no moa impoten, hemia i mekem se ol man oli no moa bilif strong long wan samting. Ale samting ya i no givhan nating blong mekem ol giaman skul ya oli joengud.

Tru Skul i No Leftemap Wan Kantri Se i Moagud Long Ol Narawan

17. ?Wanem profet tok i talemaot se wosip blong tru God bambae i mekem ol man oli joengud “long laswan haf blong ol dei”?

¹⁷ Ol man blong wol oli seseraot moa naoia i bitim olgeta taem bifo. Be ol man we oli mekem wosip long tru God oli stap defren yet long ol man blong wol, from we oli gohed blong joengud. Profet Maeka i talemaot tok blong God se: “Bambae mi tekem olgeta evriwan oli kam wanples bakegen. Bambae mi mekem olsem man blong lukaot long sipsip, we i tekem ol sipsip blong hem oli kambak long fenis blong olgeta.” (Maeka 2:12) Maeka i talemaot se tru wosip bambae i kam antap bitim ol narafala wosip, we ol man oli wosipim ol giaman god no oli wosipim kantri blong olgeta olsem we hem i wan god. Maeka i raetem se: “[“Long laswan haf blong ol dei,” NW] hil ya we haos blong Hae God i stap long hem bambae i kam hae moa, i winim ol narafala hil. Mo ol man blong plante ples long wol bambae oli save wokbaot blong kam long hem. Nating we olgeta man long wol ya oli stap mekem wosip long ol god blong olgeta, mo oli stap obei long olgeta, be yumi ya, Hae God i God blong yumi, mo bambae yumi stap mekem wosip long hem, mo yumi stap obei long hem oltaem nomo, gogo i no save finis.”—Maeka 4:1, 5.

18. ?Wanem ol bigfala jenis we yumi mekem taem yumi joen long tru wosip?

¹⁸ Maeka i talem tu se wosip blong tru God i save mekem se ol man we fastaem oli enemi, bambae oli joengud. Hem i talem se: “[Ol man blong ol defren kantri] bambae oli kam, oli talem se, ‘Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot.’ . . . Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” (Maeka 4:2, 3) Olgeta we oli lego wosip blong ol god we man nomo i wokem, no oli lego wosip blong kantri blong olgeta, nao oli mekem wosip long Jeova, oli joengud long fulwol. God i tijim olgeta blong oli lavlavem olgeta.

19. ?Taem plante milian man tede oli joengud blong mekem wosip long tru God, samting ya i soemaot wanem?

¹⁹ Ol tru Kristin oli joengud long fulwol. Hemia i defren long ol narafala man blong wol tede, mo i  soemaot gud se Jeova i stap yusum spirit blong hem blong lidim ol man blong hem. Ol tru Kristin we oli blong ol defdefren kantri oli stap joengud, mo oli plante moa i bitim ol narafala taem bifo. Yes, tingting we i stap long Revelesen 7:9, 14 i stap kamtru long nambawan fasin. Taem yumi luk we tok ya i kamtru olsem, yumi save se i no longtaem, ol enjel blong God bambae oli lego “win” ya we i blong spolem ol rabis fasin blong wol ya. (Ridim Revelesen 7:1-4, 9, 10, 14.) Tru ya, i wan bigfala ona blong joengud wetem kampani blong ol brata long fulwol. ?Yumi wanwan i save mekem wanem blong givhan long kampani ya blong i joengud oltaem? Bambae yumi tokbaot samting ya long nekis stadi.

[Futnot]

?Bambae Yu Yu Ansa Olsem Wanem?

• ?Olsem wanem wosip blong tru God i mekem ol man oli joengud?

• ?Olsem wanem yumi save blokem jalus, blong i no spolem fasin joengud?

• ?From wanem tingting ya se wan kantri i moagud i winim ol narafala kantri, i no save seraotem ol man we oli mekem wosip long tru God?

[Kwestin]

[Tok blong pija long pej 15]

Ol Kristin long faswan handred yia oli kamaot long ol defren ples mo fasin blong laef

[Tok blong pija long pej 17]

?Taem yu joen blong wokem ol Haos Kingdom, olsem wanem yu givhan blong mekem ol man blong God oli joengud?