Yu Mas Lukaot Gud Blong Folem “Ol Stret Fasin Blong Hem” Fastaem

“Fastaem yufala i mas lukaot gud blong obei long God we i King blong yufala [“blong lukaot kingdom,” NW], mo blong folem ol stret fasin blong hem. Nao biaen hem i save givim olgeta samting ya tu long yufala.”—MAT. 6:33.

1, 2. ?Wanem ya stret fasin blong God?

“FASTAEM yufala i mas lukaot gud blong obei long God we i King blong yufala [“blong lukaot kingdom,” NW].” (Mat. 6:33) Ol Witnes blong Jeova oli save gud ol tok ya we Jisas i talem taem hem i mekem Bigfala Toktok blong hem antap long Hil. Long olgeta samting we yumi mekem, yumi traehad blong soemaot we yumi glad  tumas long Kingdom ya no gavman ya, mo yumi wantem obei long hem. Be yumi mas tingbaot narafala haf blong vas ya tu, we i talem se, yumi mas “folem ol stret fasin blong hem.” ?Wanem ya stret fasin blong God? ?Mo olsem wanem yumi save lukaot gud blong folem stret fasin blong hem fastaem?

² Stret fasin blong God, hemia stret fasin we i laenap wetem tingting blong God, ol samting we hem i luk se oli stret mo impoten. From we Jeova i mekem olgeta samting, hem i gat raet blong talem wanem samting i gud mo i nogud, mo wanem fasin i stret mo i no stret. (Rev. 4:11) Be stret fasin blong God i no wan longfala lis blong ol strong loa mo rul, nogat. Stret fasin blong Jeova i wan prapa fasin blong God from we hem i wan long ol fofala stamba fasin blong hem. Yes, stret fasin blong hem i wok wetem fasin blong hem blong lavem man, waes fasin, mo paoa blong hem. Taswe, stret fasin blong God i laenap wetem samting we hem i wantem mo stamba tingting blong hem. Stret fasin blong God, hemia ol samting we Jeova i talem se man i mas mekem, sipos man ya i wantem wosipim hem.

3. (a) ?Olsem wanem yumi lukaot gud blong folem stret fasin blong God fastaem? (b) ?From wanem yumi folem ol loa mo tingting blong God?

³ ?Olsem wanem yumi lukaot gud blong folem stret fasin blong God fastaem? Blong talem long sot toktok nomo, yumi mekem samting we God i wantem, blong hem i glad long yumi. Sipos yumi lukaot stret fasin blong hem, yumi traehad blong folem ol tingting, fasin, mo ol loa blong hem. Yumi no folem samting we yumi nomo i ting se i stret. (Ridim Rom 12:2.) Blong folem fasin blong laef olsem, yumi mas fren gud wetem Jeova. Yumi no obei long Jeova from we yumi fraet se bambae hem i panisim yumi, nogat. Yumi lavem God nao yumi wantem mekem hem i glad. Ale yumi folem ol loa mo ol tingting blong hem, i bitim we yumi nomo i jusum wanem samting i stret mo i no stret. Yumi luksave se i stret nomo blong folem ol tingting mo loa blong God, mo God i mekem yumi blong yumi folem fasin blong laef olsem. Jisas Kraes we i King blong Kingdom blong God, hem i laekem tumas stret fasin. Yumi tu yumi mas laekem stret fasin.—Hib. 1:8, 9.

4. ?From wanem i impoten tumas blong lukaot gud blong folem stret fasin blong God?

⁴ ?From wanem i impoten tumas blong lukaot gud blong folem stret fasin blong Jeova? Yu traem tingbaot: Samting we i hapen long garen blong Iden i traem Adam mo Iv, se bambae tufala i luksave raet we Jeova i gat blong stanemap ol loa no nogat. (Jen. 2:17; 3:5) Tufala i no luksave raet we Jeova i gat. From samting ya, yumi ol pikinini blong tufala, yumi kasem plante trabol, yumi harem nogud, mo yumi ded. (Rom 5:12) Be Tok blong God i talem se: ‘Man we i kaengud mo i stap mekem i stret, hem bambae i gat longfala laef. Bambae oli mekem i stret long hem, mo oli ona long hem.’ (Prov. 21:21) Yes, sipos yumi lukaot gud blong folem stret fasin blong God fastaem, bambae yumi fren gud wetem Jeova, mo bambae hem i sevem yumi.—Rom 3:23, 24.

Yumi No Mas Ting Se Yumi Stret Man Finis

5. ?Wanem fasin we yumi mas blokem?

⁵ Long leta we aposol Pol i raetem long ol Kristin long Rom, hem i tokbaot wan fasin we yumi evriwan i mas blokem sipos yumi wantem lukaot gud blong folem stret fasin blong God fastaem. Pol i tokbaot ol man we oli blong laen blong Isrel olsem hem, i se: “Mi save talemaot se olgeta ya oli wantem God tumas. Oli wantem hem, be oli no save prapa rod blong faenem hem. Oli no save fasin ya blong God we hem i stap mekem we ol man oli kam stret man long fes blong hem, be oli stap traem mekem rod blong olgeta, blong oli kam stret man. Oli no rere blong ona long fasin ya blong God we hem i stap mekem we ol man oli kam stret man long fes blong hem.” (Rom 10:2, 3) Pol i talem se olgeta ya oli wosipim God be oli no kasem save long stret fasin blong God, from we oli stap traehad blong mekem rod blong olgeta, blong oli kam stret man. *

6. ?Wanem tingting we yumi no mas gat, mo from wanem?

⁶ Yumi save foldaon long trap ya sipos yumi  traem mekem moa long wok blong God from we yumi wantem winim narafala. I nogud yumi skelem samting we yumi mekem wetem samting we narafala i mekem. Tingting olsem i save mekem se yumi tinghae tumas long yumi wan mo ol wok blong yumi. Sipos yumi gat fasin olsem, yumi stap fogetem stret fasin blong Jeova. (Gal. 6:3, 4) Gudfala tingting we i mas pusum yumi blong mekem samting we i stret, hemia se yumi lavem Jeova. Be sipos yumi mekem samting blong traem soemaot se yumi stret man, bambae i no laenap wetem tok blong yumi se yumi lavem Jeova.—Ridim Luk 16:15.

7. ?Olsem wanem Jisas i tokbaot problem ya we man i ting se hem i stret finis?

⁷ Jisas i wari long olgeta we “oli bilif strong se fasin blong olgeta i stret gud, mo oli stap lukluk rabis long ol narafala man.” Long wan parabol, Jisas i tokbaot problem ya we man i ting se hem i stret finis, i se: “I gat tu man, we tufala i go long haos blong God, blong tufala i prea. Wan long tufala ya, hem i Farisi, mo narawan, hem i man blong tekem mane blong takis. Nao Farisi ya i stanap hem wan, i prea. Hem i talem se, ‘God. Mi mi talem tangkiu tumas long yu, from we mi mi no olsem ol narafala man we oli wantem holem evri samting i blong olgeta, mo oli stap mekem i no stret, mo oli stap stilim woman blong narafala man. Mo mi talem tangkiu long yu from we mi no olsem man ya blong tekem mane blong takis. Tu taem long wan wik, mi mi livim kakae, blong mekem wosip. Mo mi stap givim taet, we mi tekemaot long olgeta samting we mi mi kasem.’ Be man ya blong tekem mane blong takis, hem i stap stanap longwe, mo i no save luk antap long heven. Hem i harem nogud, i stap kilim jes blong hem from, nao i stap talem se, ‘God, mi mi man nogud. Plis, yu sore long mi.’” Ale Jisas i talem se: “Mi mi talem long yufala. Taem tufala ya i gohom, seken man ya, i stret man long fes blong God, be fas man ya i no olsem, from we man we hem nomo i stap leftemap hem, God bambae i mekem hem i stap daon, be man we hem nomo i mekem hem i stap daon, God bambae i leftemap hem.”—Luk 18:9-14.

Yu No Mas ‘Traehad Tumas Blong Kam Gud Moa, Gogo Yu Bitim Mak’

8, 9. ?Man we i ‘traehad tumas blong kam gud moa, gogo i bitim mak,’ hem i mekem wanem? ?Mo fasin ya i save mekem yumi kam olsem wanem?

⁸ Prija 7:16 i tokbaot wan narafala fasin we yumi mas blokem, i se: “I nogud yu stap traehad tumas blong kam gud moa, no blong kam waes moa, gogo i bitim mak. ?From wanem yu wantem kilim yu yu ded?” Long vas 20, God i pulum man we i raetem ol tok ya blong talem from wanem yumi mas blokem fasin ya, i se: “I no gat man long wol ya se i no save mekem mastik, we oltaem i stap mekem i stret nomo.” Man we i ‘traehad tumas blong kam gud moa, gogo i bitim mak,’ hem nomo i jusum ol fasin we hem i ting se oli stret no oli no stret, ale hem i jajem ol narafala folem tingting blong hem. Be samting we hem i no luksave, hemia se hem i stap leftemap tingting blong hem i hae moa long ol tingting mo loa blong God. From samting ya, God i luk se fasin blong hem i no stret nating.

⁹ Taem yumi stap ‘traehad tumas blong kam gud moa, gogo yumi bitim mak,’ yumi save kam olsem we yumi no glad long fasin blong Jeova blong mekem samting. Be yumi mas tingbaot, se sipos yumi ting se Jeova i stap mekem sam desisen we oli no stret, yumi stap leftemap ol rul blong yumi olsem se oli hae moa long ol rul we Jeova i putumap. I olsem se yumi putum Jeova long kot mo yumi jajem hem folem ol rul we yumi ting se oli stret. !Be Jeova nao we i gat raet blong talem  wanem samting i stret, i no yumi!—Rom 14:10.

10. ?Wanem i save mekem se yumi traem jajem God, olsem Job i mekem?

¹⁰ I no gat wan long yumi we i gat tingting blong jajem God, nogat. Be yumi evriwan i sinman, mo sin i save pulum yumi blong traem jajem God. Samting ya i save hapen isi nomo, taem yumi luk wan samting we yumi ting se i no stret, mo tu, taem trabol i kasem yumi. Gudfala man ya Job hem i mekem mastik ya. Fastaem God i talem se, “oltaem [Job] i stap mekem wosip long [hem], mo oltaem i stap bilif strong long hem we tingting blong hem i no foldaon nating. Hem i wan gudfala man, mo oltaem i stap lukaot gud blong i no mekem wan samting we i nogud.” (Job 1:1) Be biaen, plante trabol oli kasem Job. Mo hem i harem se i no stret we ol trabol ya oli kasem hem. Ale hem i stap talem se “hem i wan stret man, mo i stap putum stamba blong trabol ya blong hem i go long God.” (Job 32:1, 2) Job i kasem advaes we i givhan long hem blong stretem tingting blong hem. Taswe, yumi no mas sapraes sipos samtaem yumi gat sem tingting olsem Job. ?Sipos i olsem, wanem i save givhan long yumi blong stretem tingting blong yumi?

Maet Yumi No Gat Olgeta Save

11, 12. (a) ?Sipos yumi ting se wan samting i no stret, yumi mas tingbaot wanem? (b) ?Long parabol we Jisas i talem long saed blong ol man we oli wok long plantesen, from wanem yumi save harem se samting we i hapen i no stret?

¹¹ Faswan samting we yumi mas tingbaot taem yumi harem se wan samting i no stret, hemia se maet yumi no gat olgeta save long saed ya. Job tu i no gat olgeta save long saed blong ol trabol we i kasem hem. Hem i no save long ol miting we ol enjel, hemia ol pikinini blong God long heven, oli gat. Mo hem i no save se, long ol miting ya, Setan i sakem ol giaman tok blong agensem Jeova. (Job 1:7-12; 2:1-6) Job i no luksave se ol trabol we hem i kasem oli kamaot long Setan. !Mo tu, maet Job i no save se Setan hem i hu! Taswe hem i ting se ol trabol we oli kasem hem oli kamaot long God, be samting ya i no tru. Yes, i isi nomo blong yumi gat rong tingting taem yumi no gat olgeta save long saed blong wan bisnes.

¹² Traem tingbaot parabol blong Jisas long saed blong ol man we oli wok long wan plantesen blong grep. (Ridim Matiu 20:8-16.) Long parabol ya, Jisas i tokbaot wan masta we i pem ol man blong wok blong hem. Nating se oli wok ful dei no wan aoa nomo, masta ya i givim sem pei long olgeta. ?Wanem tingting blong yu long samting ya? ?Yu harem se i no stret? Maet faswan tingting blong yu se, yu sore long ol man ya we oli wok ful dei long big san. !Maet yu harem se i stret we oli kasem mane we i bigwan moa! Folem tingting ya, i luk olsem se masta ya i mekem i no stret long ol man ya mo i mekem i strong tumas long olgeta. Mo yumi save ting se ansa blong hem long ol man ya we oli no glad, i strong tumas, i olsem se hem i wantem soemaot nomo se hem i bos. ?Be olsem wanem? ?Yumi gat olgeta save long saed blong bisnes ya?

13. ?Wanem narafala tingting we yumi save gat long saed blong parabol blong Jisas?

¹³ I gud yumi traem lukluk bakegen long parabol ya. Ating masta long parabol ya i luksave se olgeta man we oli wok blong hem oli mas gat mane, blong pem kakae blong famle blong olgeta. Long taem ya we Jisas i stap long wol, ol man we oli wok long ol garen mo plantesen, oli kasem pei blong  olgeta long en blong dei. Famle i wet long mane we ol man ya oli kasem blong pem samting we oli nidim long dei ya. Ale yumi traem tingbaot ol man ya we masta blong plantesen i singaot olgeta oli kam wok blong hem klosap long en blong dei. Olgeta ya oli wok wan aoa nomo. Maet pei blong wan aoa nomo i no naf blong oli pem kakae blong famle blong olgeta. Oli traehad blong kasem wok, mo oli wet ful dei blong wan masta i singaot olgeta. (Mat. 20:1-7) I no fol blong olgeta we oli no wok ful dei. Jisas i no talem se oli no wantem wok, nogat. Traem tingbaot sipos yu yu wet ful dei olsem, mo yu save se sam narafala oli stap dipen long yu blong kasem mane blong dei ya. !Ating bambae yu glad tumas blong kasem smol wok! !Mo bambae yu sapraes bigwan taem masta i givim pei long yu we i naf blong pem kakae blong famle blong yu!

14. ?Wanem impoten samting we parabol ya long saed blong plantesen i tijim yumi long hem?

¹⁴ Naoia i gud yumi traem tingting bakegen long fasin blong masta ya blong plantesen. Hem i no ravem wan long ol man ya we oli wok blong hem. Be hem i mekem i sem mak long olgeta evriwan, from we hem i luk se olgeta evriwan oli gat raet blong kasem mane blong pem ol samting we oli nidim. Sipos hem i wantem, hem i save givim pei we i daon olgeta long ol man ya, from we i gat plante narafala man we hem i save singaot olgeta oli kam wok blong hem. Be hem i no mekem olsem. Olgeta man we oli wok blong masta ya oli karem mane i gobak long haos, we i naf blong pem kakae blong famle blong olgeta. Taem yumi tingbaot ol samting ya, maet tingting blong yumi long saed blong fasin blong masta ya i jenis. Desisen blong hem blong givim pei we i sem mak long olgeta man ya, i soemaot we hem i tingbaot olgeta evriwan, mo i no bos strong long olgeta nating. ?Wanem samting we parabol ya i tijim yumi long hem? Taem yumi gat sam save nomo long saed blong wan bisnes, yumi save gat rong tingting olgeta. Parabol ya i soemaot se stret fasin blong God i hae moa long stret fasin blong man. Hem i no soemaot stret fasin folem ol loa blong man, mo i no mekem stret fasin long ol gudfala man nomo.

Tingting i No Stret, Yumi No Naf Blong Save Hat Blong Man

15. ?From wanem samtaem yumi no gat stret tingting? ?Mo wanem samting we yumi no naf blong mekem?

¹⁵ Seken samting we yumi mas tingbaot taem yumi harem se wan samting i no stret, hemia se maet tingting blong yumi i no stret mo yumi no naf blong save wanem i stap long hat blong man. Wan samting we i save mekem se yumi no gat stret tingting, hemia sin we i stap long yumi. Sam narafala samting se, kastom blong yumi mo maet yumi no laekem narafala from we hem i defren long yumi. Mo yumi no naf blong luksave tingting we i pusum man blong mekem samting, yumi no save wanem i stap long hat blong man. Be Jeova mo Jisas tufala i no olsem yumi, tufala i save ol samting ya.—Prov. 24:12; Mat. 9:4; Luk 5:22.

16, 17. ?Wanem i save mekem se Jeova i no panisim Deved mo Batseba stret olsem loa i talem?

¹⁶ I gud yumi lukluk long samting we i hapen taem Deved i mekem nogud fasin wetem Batseba. (2 Saml. 11:2-5) Folem Loa we God i givim long Moses, tufala i mas kasem panis blong ded. (Lev. 20:10; Dut. 22:22) I tru se Jeova i panisim tufala, be tufala i no ded olsem loa blong hem i talem. ?Olsem wanem? ?Desisen blong Jeova long taem ya i no stret? ?Jeova i mekem i gud moa long Deved i bitim ol narafala man? ?Hem i brekem ol loa we hem nomo i stanemap? Samfala we oli ridim stori ya long Baebol, oli tingting olsem.

¹⁷ Be loa ya long saed blong man we i slip wetem woman blong narafala man, Jeova i givim long ol jaj. Ol jaj ya oli sinman, mo oli no save samting we i stap long tingting mo hat blong man. Loa ya i givhan long ol jaj blong oli mekem i  sem mak long olgeta man. Be Jeova i no olsem ol jaj ya. Hem i save samting we i stap long tingting mo hat blong ol man. (Jen. 18:25; 1 Kron. 29:17) Taswe, i no stret blong yumi ting se Jeova i mas folem wan loa we hem i putumap blong ol jaj we oli sinman. Hemia i olsem se yumi traem fosem wan man we i save lukluk gud finis, blong i putum glas we i blong givhan long man we ae blong hem i nogud. Jeova i save samting we i stap long tingting mo hat blong Deved mo Batseba. Hem i luk we tufala i tanem tingting blong tufala. Jeova i tingbaot samting ya, nao i jajem tufala long fasin we i stret. Taswe hem i sore long tufala mo i mekem i gud long tufala.

Yu Mas Gohed Blong Folem Stret Fasin Blong Jeova

18, 19. ?Wanem bambae i givhan long yumi blong blokem tingting ya se God i mas folem fasin we yumi ting se i stret?

¹⁸ Maet yumi ridim wan samting long Baebol no maet wan samting i hapen long laef blong yumi, we i mekem yumi harem se Jeova i no mekem i stret. Long taem olsem, i nogud yumi ting se God i mas folem fasin we yumi ting se i stret. Yumi mas tingbaot se yumi no gat olgeta save long saed blong ol samting we oli hapen. Mo tu, maet tingting blong yumi i no stret, mo yumi no naf blong save wanem i stap long hat blong man. Yumi no mas fogetem se, “fasin blong man we i kros i no save mekem stret fasin blong God i kamtru.” (Jem. 1:19, 20) Sipos yumi tingbaot ol samting ya, bambae yumi no save gat tingting ya se ‘Hae God nomo i stap spolem yumi.’—Prov. 19:3.

¹⁹ Olsem Jisas, oltaem yumi mas luksave se Jeova nomo i gat raet blong talem wanem samting i stret mo i gud. (Mak 10:17, 18) Yumi mas traehad blong kasem “stret save” mo “savegud” long saed blong ol tingting mo loa blong Jeova. (Rom 10:2, NW; 2 Tim. 3:7) Taem yumi agri long ol loa blong Jeova mo yumi mekem laef blong yumi i laenap wetem samting we hem i wantem, yumi soemaot se yumi stap lukaot gud blong folem “stret fasin blong hem” fastaem.—Mat. 6:33.

[Futnot]

?Yu Yu Tingbaot?

• ?From wanem i impoten blong lukaot gud blong folem stret fasin blong Jeova?

• ?Wanem tufala fasin we yumi mas blokem?

• ?Olsem wanem yumi save lukaot gud blong folem stret fasin blong God fastaem?

[Kwestin]

[Tok blong pija long pej 20]

?Parabol we Jisas i talem long saed blong tufala man we tufala i prea long God long haos blong hem, i tijim yumi long wanem samting?

[Tok blong pija long pej 21]

?Olsem wanem? ?Masta ya we i givim sem pei long ol man we oli wok wan aoa mo ol man we oli wok ful dei, hem i mekem i no stret?