?Yu Tu Yu Mekem Se Ol Kristin Miting Oli Givhan Long Yumi Blong Yumi Kam Strong Moa?

‘Taem yumi kam wanples blong mekem wosip, yumi evriwan i gat sem tingting nomo, blong mekem ol man blong jos [“kongregesen,” NW] oli kam strong moa.’—1 KOR. 14:26.

1. ?Fas Korin japta 14 i tokbaot wanem impoten wok we ol Kristin miting oli mekem?

‘!MITING ya i gud we i gud!’ ?Yu tu yu gat tingting olsemtaem yu kamaot long wan miting long Haos Kingdom? !Ating yes! Ol miting blong kongregesen oli leftemap tingting blong yumi bigwan. Yumi no sapraes long samting ya. Bigfala wok we ol miting blong yumi tede i mekem, i sem mak long hemia blong faswan handred yia. Oli givhan long evriwan we oli stap, blong oli fren moa wetem God. Taem aposol Pol i raetem faswan leta blong hem i go long ol Kristin long Korin, hem i tokbaot wok ya blong ol Kristin miting. Long japta 14, hem i talem bakegen mo bakegen se olgeta tok we i kamaot long ol miting blong kongregesen, oli mas mekem sem wok nomo. Oli mas mekem ol man long kongregesen “oli kam strong moa.”—Ridim 1 Korin 14:3, 12, 26. *

2. (a) ?From wanem ol miting oli mekem yumi kam strong moa? (b) ?Wanem kwestin we bambae yumi tokbaot?

² Stamba risen from wanem ol miting oli leftemap tingting blong yumi mo oli mekem yumi i kam strong moa, hemia from tabu spirit blong God. Taswe, yumi statem miting wetem wan prea, mo yumi askem long Jeova we i Papa blong yumi long heven, blong i blesem yumi, i givim tabu spirit long yumi. Nating se i olsem, yumi save se evriwan long kongregesen oli gat wok we oli mas mekem, blong ol miting ya oli givhan long yumi blong kam strong moa. ?Ale, wanem sam samting we yumi wanwan yumi save mekem, blong ol miting we oli gohed evri wik long Haos Kingdom, oli mekem yumi harem gud mo oli leftemap tingting blong yumi?

3. ?Ol Kristin miting oli impoten olsem wanem?

³ Blong ansa long kwestin ya, bambae yumi tokbaot sam samting we ol brata blong lidim ol miting oli mas tingbaot. Mo tu, bambae yumi tokbaot olsem wanem ful kongregesen i save givhan blong mekem se ol miting oli leftemap tingting blong evriwan. Yumi evriwan yumi wantem save long samting ya from we ol miting ya oli tabu. Yes, taem yumi kam long ol miting mo mekem tok mo givim ansa, hemia ol impoten haf blong wosip we yumi mekem i go long Jeova.—Sam 26:12; 111:1; Aes. 66:22, 23.

Wan Miting We i Blong Stadi Baebol

4, 5. ?Wanem bigfala tingting biaen long Wajtaoa Stadi?

⁴ Yumi evriwan yumi wantem se Wajtaoa stadi we yumi gat evri wik, i givhan long yumi. Taswe, blong kasem save long bigfala tingting biaen long miting ya, i gud yumi tokbaot from wanem yumi mekem Wajtaoa stadi, mo from wanem i gat sam samting we oli jenis long ol haf we yumi stadi long olgeta.

⁵ Risen from wanem yumi gat Wajtaoa Stadi, hemia blong yumi stadi Baebol wetem help blong magasin ya. Yes, evri wik Wajtaoa Stadi i stap eksplenem Tok blong God. Mo tu, long miting ya oli “talemaot mining” blong tok blong God, sem mak olsem long taem blong Nehemaea bifo.—Neh. 8:8; Aes. 54:13.

6. (a) ?Wanem samting we i jenis long Wajtaoa Stadi? (b) ?Wanem samting we yumi mas tingbaot long saed blong ol vas ya we oli makem se “ridim”?

 ⁶ Baebol nao i impoten buk we yumi stap stadi long hem, taswe i gat wan samting long Wajtaoa Stadi we i jenis. I gat plante vas blong Baebol long ol haf we yumi stadi long olgeta, we oli makem se “ridim.” I gud we yumi evriwan yumi folem ol vas ya long prapa Baebol blong yumi, taem oli ridim olgeta long miting. (Wok 17:11) ?From wanem? From we taem yumi ridim ol advaes blong God long prapa Baebol blong yumi, yumi mekem se oli stap strong moa long tingting blong yumi. (Hib. 4:12) Taswe, bifo we wan i ridim ol vas ya long bigfala voes, elda we i lidim Wajtaoa Stadi i mas givim naf taem long evriwan, blong oli faenem ol vas ya mo folem long prapa Baebol blong olgeta.

Yumi Gat Moa Taem Blong Talemaot Bilif Blong Yumi

7. ?Wanem janis we yumi gat long Wajtaoa Stadi?

⁷ Long ol yia we oli jes pas, wan narafala samting we i jenis long Wajtaoa stadi, hemia se ol haf oli kam sot moa. Hemia i mekem se, yumi no moa nidim plante taem blong ridim ol paragraf long Wajtaoa Stadi, nao yumi gat moa taem blong givim ansa. Taswe, plante moa man long kongregesen oli gat janis blong givim ansa, we i talemaot bilif blong olgeta. Oli save talem ansa blong kwestin we i stap long Wajtaoa, oli save talemaot olsem wanem blong mekem wan vas blong Baebol i wok long laef blong yumi, oli save talem wan smol stori we i soemaot from wanem i waes blong folem ol rul blong Baebol, mo oli save givim sam narafala ansa tu. I gud tu blong spenem smol taem blong tokbaot ol pija.—Ridim Ol Sam 22:22; 35:18; 40:9.

8, 9. ?Wanem wok blong elda we i lidim Wajtaoa Stadi?

⁸ Yes, evriwan long kongregesen oli gat moa taem blong givim ol defdefren ansa. Be hemia i save hapen nomo sipos olgeta we oli ansa oli givim ol sotfala ansa nomo, mo sipos elda we i lidim miting ya i no talem plante tumas samting long taem blong Wajtaoa Stadi. Ale, ?wanem i save givhan long elda ya blong hem i no toktok tumas be i givim naf taem long olgeta long kongregesen blong givim ansa? ?Olsem wanem miting ya i save mekem evriwan oli kam strong moa?

⁹ Blong ansa long kwestin ya, yumi save tingbaot wan pijatok. Taem wan elda i lidim gud Wajtaoa Stadi, miting ya i olsem ol flaoa we man i katem, i putum gud long wan botel blong flasem ples. Ol defdefren ansa we man i givim long Wajtaoa Stadi oli olsem ol defdefren flaoa we yu putum gud olgeta. Long wan botel flaoa, sam flaoa oli bigwan mo sam oli smol mo oli gat ol defdefren kala. Long sem fasin, ol ansa we ol man oli givim long miting oli no sem mak, sam oli sot moa long ol narafala. Mo fasin blong toktok blong ol man we oli givim ansa i defdefren. ?Ale, elda we i lidim miting ya i mas mekem wanem? Wanwan taem, bambae hem i talem smol toktok. Hemia i sem mak long ol grin lif we yumi ademap long wan botel flaoa. Ol lif ya oli no mas plante tumas, oli no mas haedem ol flaoa ya. Oli blong mekem ol flaoa ya oli no moa stap wanwan, be oli kam wan bandel flaoa we oli naes tumas taem oli stap tugeta. Long sem fasin, elda we i lidim miting i mas tingbaot oltaem se wok blong hem i no blong talem tumas toktok blong kavremap save we ol narafala oli talem. Ol ansa we kongregesen i givim, oli olsem ol tok blong presem Jeova, taswe elda ya i mas tingbaot se wok blong hem i blong joenem ol tok ya i kam wan tingting nomo. Yes, taem elda ya i ademap smol tok we hem i jusum gud blong joenem ol defdefren ansa we kongregesen i givim, hem i save mekem se ol ansa ya oli kam wan nomo, olsem ol flaoa ya we oli kam wan naes bandel flaoa. Olsem nao, olgeta evriwan bambae oli harem gud long miting.

‘Yumi Mas Leftemap Nem Blong God, Olsem We Yumi Mekem Sakrefaes’

10. ?Wanem tingting blong ol faswan Kristin long saed blong ol miting blong kongregesen?

¹⁰ Long 1 Korin 14:26-33, Pol i tokbaot ol Kristin miting. Samting ya i givhan long yumi blong save olsem wanem ol Kristin long faswan handred yia oli stap mekem ol miting blong olgeta.  Wan man blong stadi long ol tok blong Baebol, i raet long saed blong ol vas ya. Hem i talem se, gudfala samting we yumi makem long saed blong ol miting blong ol faswan Kristin, “hemia se klosap evriwan oli kam wetem tingting ya se oli gat janis blong givhan blong mekem ol [miting] ya oli gud moa, mo se hemia i wan samting we oli mas mekem. Wan man i no kam wetem tingting ya se bambae hem i lesin nomo. Hem i no kam blong kasem samting nomo, be hem i kam blong givim samting tu.” Yes, ol faswan Kristin oli luk ol miting blong kongregesen olsem ol janis blong talemaot bilif blong olgeta.—Rom 10:10.

11. (a) ?Wanem samting i givhan bigwan blong ol miting oli mekem yumi kam strong moa? ?From wanem samting ya i givhan? (b) ?Wanem ol advaes we yumi save folem, blong mekem se ol ansa blong yumi long miting oli kam gud moa? (Lukluk futnot.)

¹¹ Taem yumi talemaot bilif blong yumi long ol miting, yumi givhan bigwan blong mekem kongregesen “i kam strong moa.” Ating bambae yu agri se nomata hamas yia we yumi stap kam long ol miting, be yumi glad tumas yet blong lesin long ol ansa we ol brata mo sista blong yumi oli givim. Taem wan olfala Kristin we i holemstrong long Jeova longtaem finis i givim ansa, samting ya i tajem hat blong yumi. Taem wan  elda i serem wan save we hem i faenem long stadi blong hem long Baebol, hemia i leftemap tingting blong yumi. Mo yumi smael taem wan pikinini i kwik blong givim wan ansa we i soemaot tru se hem i lavem Jeova. I klia se taem yumi givim ansa, yumi evriwan i joen blong mekem se ol miting blong Kristin kongregesen oli mekem yumi kam strong moa. *

12. (a) ?Wanem samting we yumi save lanem long stori blong Moses mo Jeremaea? (b) ?Olsem wanem prea i givhan long yumi taem yumi wantem givim ansa?

¹² Olgeta we oli gat fasin blong sem, maet oli harem se i hadwok tumas blong givim ansa. Sipos yu yu olsem, i gud we yu tingbaot se i no yu nomo we yu harem olsem. Blong talem stret, sam gudfala man blong God tu olsem Moses mo Jeremaea bifo, oli talemaot se oli no naf blong toktok long fored blong ol narafala. (Eks. 4:10; Jer. 1:6) Nating se i olsem, Jeova i givhan long ol man ya, blong oli presem nem blong hem long fored blong ol narafala man. Bambae hem i givhan long yu tu, blong mekem sakrefaes ya blong leftemap nem blong hem. (Ridim Hibrus 13:15.) ?Sipos yu fraet blong givim ansa, olsem wanem yu save kasem help blong Jeova blong winim fraet ya? Fastaem, yu mas rerem gud miting blong yu. Biaen, yu save prea long Jeova bifo we yu go long Haos Kingdom. Yu save askem long hem blong i mekem tingting blong yu i strong blong yu no fraet blong givim wan ansa. (Fil. 4:6) Yu save trastem Jeova se bambae i ansa long prea blong yu, from we samting ya we yu stap askem, hem i wan samting “we i stret long tingting blong hem.”—1 Jon 5:14; Prov. 15:29.

Ol Miting Oli Blong ‘Givhan, Leftemap Tingting, Mo Mekem Man i Harem Gud’

13. (a) ?Ol miting oli mas mekem wanem long yumi? (b) ?Wanem kwestin we i impoten tumas long ol elda?

¹³ Pol i talemaot se wan impoten samting we ol miting blong kongregesen oli mas mekem, i blong ‘givhan, leftemap tingting, mo mekem man i harem gud.’ * (1 Kor. 14:3) ?Olsem wanem ol Kristin elda tede oli save meksua se ol tok we oli givim long ol miting, oli leftemap tingting blong ol brata sista blong olgeta, mo oli mekem olgeta oli harem gud? Blong ansa long kwestin ya, i gud yumi tokbaot wan miting we Jisas i mekem wetem ol man blong hem, smoltaem afta we hem i laef bakegen.

14. (a) ?Wanem i hapen bifo we Jisas i singaot ol man blong hem oli kam long wan miting? (b) ?From wanem ol aposol oli harem gud tumas taem “Jisas i kam klosap long olgeta” mo i toktok long olgeta?

¹⁴ Fastaem, i gud yumi tingbaot ol samting we oli hapen bifo long miting ya. Bifo we ol man oli kilim Jisas i ded, ol aposol oli “lego hem, oli ronwe.” Mo olsem we Jisas i bin talem, olgeta ya oli ‘go wanwan long ol ples blong olgeta.’ (Mak 14:50; Jon 16:32) Tingting blong ol aposol i foldaon bigwan. Biaen, taem Jisas i laef bakegen, hem i singaot ol aposol ya blong oli kam long wan spesel miting. * ?Ol aposol oli mekem wanem? Baebol i talem se “ol leven man blong Jisas oli go long Galili, long wan bigfala hil we Jisas i bin talem long olgeta bifo blong oli go long hem.” Taem oli kamtru long ples ya, “Jisas i kam klosap long olgeta” mo i toktok long olgeta. (Mat. 28:10, 16, 18) !Traem tingbaot olsem wanem ol  aposol ya oli harem gud tumas taem Jisas i mekem olsem! ?Be Jisas i tokbaot wanem?

15. (a) ?Jisas i tokbaot wanem samting? ?Wanem samting we hem i no tokbaot? (b) ?Miting ya i mekem wanem long ol aposol?

¹⁵ Blong statem miting ya, Jisas i talem se: “God i givim olgeta paoa long mi.” Biaen, hem i givim wan wok long olgeta, se: “Yufala i mas go long ol man long olgeta ples long wol, blong pulum olgeta oli kam man blong mi.” Ale, hem i toktok long olgeta wetem lav i se: “Mi bambae mi stap wetem yufala oltaem.” (Mat. 28:18-20) ?Be yu yu makem wanem samting we Jisas i no mekem? Hem i no tok blong stretem ol aposol blong hem, mo hem i no yusum miting ya blong tok long olgeta se tingting we i stap pusum olgeta i no stret. Mo hem i no tokbaot smoltaem ya we bilif blong olgeta i slak, blong mekem oli harem nogud moa. Nogat. Jisas i givim wan impoten wok long olgeta, blong mekem oli save se hem mo Papa blong hem, tufala i lavem olgeta. ?Samting ya i mekem wanem long ol aposol? Samting ya i givhan long olgeta, i leftemap tingting blong olgeta, mo i mekem olgeta oli harem gud. Ale, smoltaem afta long miting ya, oli stat bakegen blong “tijim ol man, mo oli stap talemaot gud nius.”—Wok 5:42.

16. ?Olsem wanem ol Kristin elda tede oli folem eksampol blong Jisas, taem oli givim ol tok long miting we oli mekem man i harem gud?

¹⁶ Ol elda tede oli folem fasin blong Jisas. Oli tingbaot ol miting olsem ol janis blong mekem ol Kristin brata sista blong olgeta, oli kasem save se Jeova i lavem olgeta tumas. (Rom 8:38, 39) Taswe, taem oli givim wan tok, oli pulum tingting i go moa long ol gudfala wok we ol brata sista oli stap mekem, be i no long ol slak fasin blong olgeta. Oli no tok olsem se tingting we i no stret i stap pusum ol brata sista. Defren olgeta, toktok blong olgeta i soemaot tingting ya se ol brata sista oli lavem Jeova mo oli wantem mekem samting we i stret. (1 Tes. 4:1, 9-12) I tru, samtaem ol elda oli mas givim advaes long ful kongregesen, blong stretem olgeta. Be sipos oli mas stretem samfala nomo, i moa gud we ol elda oli storian wetem olgeta long wan narafala taem mo long wan ples we olgeta nomo oli stap. (Gal. 6:1; 2 Tim. 2:24-26) Taem ol elda oli toktok long ful kongregesen, oli mas talem ol gudfala tok sipos i stret blong mekem olsem. (Aes. 32:2) Oli traehad blong toktok long fasin we i mekem se long en blong miting, evriwan oli harem gud mo oli kasem paoa.—Mat. 11:28; Wok 15:32.

Wan Sefples Blong Harem Gud

17. (a) ?From wanem i impoten tumas tede we ol miting oli stap olsem wan sefples? (b) ?Olsem wanem yu wan yu save mekem se ol miting oli givhan long yumi evriwan blong yumi kam strong moa? (Lukluk bokis ya, “Ten Rod Blong Mekem Se Ol Miting Oli Givhan Long Yu Mo Ol Narafala, Blong Yumi Kam Strong Moa.”)

¹⁷ Wol ya blong Setan i stap kam moa raf. Taswe yumi mas meksua se ol Kristin miting oli olsem wan sefples, wan ples we evriwan oli save harem gud. (1 Tes. 5:11) Sam yia bifo, wan sista wetem man blong hem, tufala i fesem wan bigfala trabol. Sista ya i talem se: “Taem mitufala i stap long Haos Kingdom, mitufala i harem olsem se Jeova i putum han blong hem i goraon long mitufala, mo i tingbaot mitufala. Long ol aoa we mitufala i stap long ples ya, long medel blong ol Kristin brata sista, mitufala i harem se mitufala i naf blong putum ol trabol blong mitufala long Jeova. Samting ya i mekem se tingting blong mitufala i kam kwaet.” (Sam 55:22) I gud we olgeta evriwan we oli stap joen long ol miting, olgeta tu oli harem se ol miting oli leftemap tingting blong olgeta mo mekem olgeta oli harem gud. Blong meksua se samting ya i kamtru, i gud yumi wanwan yumi gohed blong mekem se ol Kristin miting oli givhan long yumi blong kam strong moa.

[Ol futnot]

?Bambae Yu Yu Ansa Olsem Wanem?

• ?Ol Kristin miting oli impoten olsem wanem?

• ?From wanem ol ansa we yumi givim long ol miting, oli givhan blong ‘mekem ol man long kongregesen oli kam strong moa’?

• ?Miting we Jisas i mekem wetem ol man blong hem i tijim yumi long wanem samting?

[Kwestin]

[Bokis blong pija long pej 30, 31]

TEN ROD BLONG MEKEM SE OL MITING OLI GIVHAN LONG YU MO OL NARAFALA, BLONG YUMI KAM STRONG MOA

Yu Mas Rere Gud Fastaem. Taem yu stadi fastaem long ol buk we bambae yumi tokbaot long Haos Kingdom, bambae yu intres moa long miting, mo ol samting we yumi tokbaot bambae oli stap strong moa long tingting mo hat blong yu.

Yu Mas Go Oltaem Long Ol Miting. Taem plante man oli kam long miting, hemia i leftemap tingting blong evriwan. Taswe i impoten we yu tu yu stap, samting ya i save leftemap tingting blong ol narafala.

Yu Mas Kam Long Stret Taem. Sipos yu sidaon bifo we miting i stat, yu save joen long faswan singsing mo prea. Tufala samting ya oli haf blong wosip we yumi mekem i go long Jeova.

Yu Mas Karem Ol Buk Wetem Yu. Yu mas karem Baebol blong yu mo ol buk we bambae yu yusum long miting. Olsem nao, yu save folem ol tok long buk blong yu, mo bambae yu kasem save moa long ol poen we brata i stap tokbaot.

Yu No Mas Letem Wan Samting i Pulum Tingting Blong Yu. Sipos yu kasem sam mesej long mobaelfon, i moa gud yu ridim olgeta afta long miting, be i no long taem ya we miting i stap gohed. Long rod ya, yu stap mekem se ol bisnes blong yu oli stap long prapa ples blong olgeta.

Yu Mas Givim Ansa. Taem plante man oli givim ansa mo yusum ol defdefren toktok blong talemaot bilif blong olgeta, hemia i leftemap tingting blong ol narafala, mo i mekem olgeta oli kam strong.

Yu Mas Givim Ansa We i Sot Nomo. Samting ya bambae i givim janis long plante narafala blong olgeta tu oli save ansa.

Yu Mas Mekem Ol Tok Blong Yu Long Miting. Sipos yu gat wan tok long Tiokratik Skul, no yu mas mekem wan pleplei long Miting Blong Kingdom Wok, i gud we fastaem yu rere gud. Mo yu mas traehad blong no letem wan samting i blokem yu, mo i mekem se yu kanselem tok blong yu.

Yu Mas Talem Gudfala Tok Long Olgeta We Oli Mekem Tok Mo Pleplei. Taem samfala oli mekem pleplei mo oli ansa long miting, i gud yu talemaot long olgeta se yu glad we oli traehad olsem.

Yu Mas Storian Gud Wetem Ol Narafala. Taem yu talem halo mo storian long ol gudfala samting wetem ol narafala bifo mo afta long miting, yu mekem se evriwan oli harem gud blong stap long miting, mo oli kasem gudfala samting from.