?Yu Yu Ona Long Narafala Fastaem?

“Yufala i mas lavlavem yufala olsem we yufala i wan brata nomo, mo yufala i mas kaen gud long yufala. Oltaem yufala i mas rere blong ona long narafala fastaem.”—ROM 12:10, NW.

1, 2. (a) ?Wanem advaes we Pol i givim long leta we hem i raetem long ol Kristin long Rom? (b) ?Wanem ol kwestin we bambae yumi tokbaot?

LONG leta we aposol Pol i raetem long ol Kristin long Rom, hem i makem se, yumi long Kristin kongregesen, yumi mas lavlavem yumi. Hem i mekem yumi tingbaot se yumi mas lavlavem yumi ‘we yumi no giaman.’ Hem i talem tu se ‘yumi mas lavlavem yumi olsem we yumi wan brata nomo.’ Mo yumi mas soemaot lav ya long fasin we ‘yumi kaen gud long yumi.’—Rom 12:9, 10a, NW.

² Taem ‘yumi lavlavem yumi olsem we yumi wan brata nomo,’ hemia i no min se yumi harem nomo se yumi laeklaekem yumi. Yumi mas mekem samting tu blong soemaot lav ya. Sipos yumi no mekem wan samting, bambae i no gat man we i save se yumi lavem hem. Taswe, Pol i givim advaes ya tu, se: “Oltaem yufala i mas rere blong ona long narafala fastaem.” (Rom  12:10b, NW) ?Yumi ona long narafala olsem wanem? ?From wanem yumi mas ona long narafala fastaem? ?Olsem wanem yumi save mekem olsem?

Yumi Respektem Narafala Mo Ona Long Hem

3. Long olfala lanwis we oli raetem Baebol long hem fastaem, ?wanem mining blong tok ya “ona”?

³ Long lanwis Hibru, tok we yumi tanem i kam “ona,” prapa mining blong hem se “hevi.” Taem yumi ona long wan man, yumi tinghevi long hem, no yumi ting se hem i impoten. Tok ya i soemaot se taem yumi ona long wan man, yumi tinghae long hem. Grik tok we long Baebol oli tanem i kam “ona,” hem i minim tinghae, impoten, gud tumas. (1 Pita 3:7) Yes, taem yumi ona long wan man, yumi ting se man ya i gud tumas mo hem i impoten.

4, 5. ?Olsem wanem fasin blong ona long narafala i joen wetem respek? Talem wan pijatok.

⁴ ?Yumi ona long narafala olsem wanem? Fastaem, yumi mas respektem hem. Plante taem yumi joenem tufala tok ya “ona” mo “respek” from we tufala i klosap sem mak. Taem yumi ona long wan narafala brata, yumi mekem wan samting blong soemaot respek. Blong talem long narafala rod, tingting we yumi gat long brata blong yumi i soemaot se yumi respektem hem, be samting we yumi mekem long brata blong yumi i soemaot se yumi ona long hem.

⁵ Wan Kristin i no save ona long ol narafala Kristin sipos hem i no respektem olgeta fastaem long tingting blong hem. (3 Jon 9, 10) Wan tri i save gru gud nomo sipos ol rus blong hem oli stap long gudfala graon. Long sem fasin, sipos yumi respektem narafala long hat mo tingting blong yumi, bambae yumi ona gud long hem oltaem. Man we i giaman se i ona long narafala, hem i no gat respek. Ale man ya bambae i no ona longtaem long narafala, bambae i ona long hem blong smoltaem nomo. Taswe, bifo we Pol i givim advaes ya se yumi mas ona long narafala, hem i talem klia se: “Yufala i mas lavem ol man, we yufala i no giaman.”—Rom 12:9; ridim 1 Pita 1:22.

Yumi Ona Long Ol Man We God i Mekem “Long Pija Blong Hem”

6, 7. ?From wanem yumi mas respektem narafala?

⁶ Yes, yumi ona long narafala taem yumi respektem hem long hat mo tingting blong yumi. From samting ya, oltaem yumi mas tingbaot ol risen we Baebol i talem, blong respektem ol Kristin brata mo sista blong yumi. Bambae yumi tokbaot tu risen.

⁷ Ol man oli defren long ol narafala laef samting long wol, from we God i mekem ol man “long pija blong hem.” (Jem. 3:9) Taswe, yumi gat ol fasin we oli kamaot long God, olsem lav, waes, mo stret fasin. Yumi gat wan narafala samting tu we God i givim long yumi. Wan man blong raetem Ol Sam i talem se: “Hae God. . . . Yu yu King,  mo hae nem blong yu i finisim olgeta ples long heven. . . . Yu yu mekem [man], yu leftemap hem . . . Yu mekem hem i olsem king, yu givim paoa long hem mo yu leftemap nem blong hem.” (Sam 8:1, 4, 5; 104:1) * Yes, i olsem we God i mekem man i kam king, taem Hem i respektem man, i leftemap hem, mo i ona long hem go kasem mak we i stret. Taswe, taem yumi respektem narafala, hemia i soemaot se yumi luksave Jeova olsem Stamba blong fasin ya blong respektem man. !Ale, sipos i stret blong respektem olgeta man, i moa impoten we yumi respektem ol Kristin brata sista blong yumi!—Jon 3:16; Gal. 6:10.

Yumi Evriwan i Wan Famle Nomo

8, 9. ?Pol i talem se yumi gat wanem risen blong respektem ol narafala Kristin?

⁸ Pol i talem wan narafala risen bakegen blong yumi respektem narafala. Bifo we hem i talem se yumi mas ona long narafala, hem i se: ‘Yufala i mas lavlavem yufala olsem we yufala i wan brata nomo, yufala i mas kaen gud long yufala.’ Grik tok ya we oli tanem i kam ‘kaen gud,’ i minim strong fasin joen gud we i stap long wan famle, we oli lavlavem olgeta mo oli givgivhan long olgeta. Taswe, taem Pol i yusum tok ya, hem i wantem makem gud se long kongregesen tu yumi mas frengud mo lavlavem yumi, olsem wan famle we i joen gud. (Rom 12:5) Mo tu, yumi mas tingbaot se Pol i raetem ol tok ya oli go long ol Kristin we tabu spirit i makemaot olgeta. Olgeta evriwan oli olsem ol pikinini blong wan Papa, hemia Jeova, we i adoptem olgeta. Taswe, long spesel fasin ya, i tru se oli wan famle. Ale ol Kristin we tabu spirit i makemaot olgeta long taem blong Pol, oli gat wan strong risen blong respektem olgeta. Samting ya i sem mak long ol Kristin we tabu spirit i makemaot olgeta tede.

⁹ ?Olsem wanem long “ol narafala sipsip”? (Jon 10:16) I tru, God i no adoptem olgeta yet, olsem ol pikinini blong hem. Nating se i olsem, i stret nomo we oli singaot olgeta se “brata” mo “sista,” from we oli wan famle blong ol Kristin we oli joen gud long fulwol. (1 Pita 2:17; 5:9) Taswe, sipos ol narafala sipsip oli kasem save gud from wanem oli singaot olgeta se “brata” mo “sista,” bambae olgeta tu oli gat wan strong risen blong respektem olgeta wetem fulhat blong olgeta.—Ridim 1 Pita 3:8.

?From Wanem i Impoten Blong Respektem Narafala Mo Blong Ona Long Hem?

10, 11. ?From wanem i impoten blong respektem narafala mo blong ona long hem?

¹⁰ ?From wanem i impoten blong respektem narafala mo blong ona long hem? Hemia from risen ya: Taem yumi ona long ol Kristin brata sista, yumi givhan bigwan blong mekem kongregesen i joen gud mo i harem gud.

¹¹ Yumi ol tru Kristin, yumi luksave se bigfala samting we i givim paoa long yumi, hemia fasin blong yumi blong fren gud wetem Jeova. Mo paoa blong tabu spirit tu i givhan long yumi. (Sam 36:7; Jon 14:26) Be taem ol narafala Kristin oli mekem samting blong soemaot se oli tinghae long yumi, hemia tu i save mekem yumi strong moa. (Prov. 25:11) Yumi harem gud taem narafala i mekem no i talem wan gudfala samting long yumi wetem fulhat blong hem, mo i soemaot respek long yumi. Hemia i givim paoa long yumi blong gohed blong wokbaot wetem glad mo strong tingting long rod blong laef. Ating samtaem yu yu harem olsem tu.

12. ?Yumi wanwan i save mekem wanem blong givhan long evriwan long kongregesen, blong oli lavlavem olgeta?

¹² Jeova i save se yumi bon wetem nid ya se narafala i mas respektem yumi. Taswe, long Tok blong hem, hem i talem se yumi mas “rere oltaem blong soemaot respek long narafala.” (Rom 12:10, Today’s English Version; ridim Matiu 7:12.) Ol Kristin we oli folem gudfala advaes ya wetem fulhat blong olgeta, oli givhan long kampani blong olgeta Kristin, blong oli lavlavem olgeta. Taswe, i gud yumi tingbaot se: ‘?Wetaem mi bin talem sam tok no mekem wan samting blong soemaot respek long wan brata no sista long kongregesen? ?Hemia i longtaem finis?’—Rom 13:8.

 Wok Blong Yumi Evriwan

13. (a) ?Hu olgeta we oli mas ona long ol narafala fastaem? (b) ?Ol tok blong Pol long Rom 1:7 oli soemaot wanem?

¹³ ?Hu olgeta we oli mas ona long ol narafala fastaem? Long leta we Pol i raetem long ol Hibru Kristin, hem i talem se ol Kristin elda nao ‘oli lidim yumi.’ (Hib. 13:17) I tru, ol elda oli lidim yumi long plante defren wok. Mo from we oli ol man blong lukaot long sipsip, olgeta nao oli mas ol faswan blong ona long ol narafala Kristin, mo blong ona long ol narafala elda tu. Olsem nao, taem ol elda oli mekem wan miting blong tokbaot samting we oli save mekem blong givhan long kongregesen, wanwan long olgeta oli mas lesin gud long ol tok blong ol narawan. Long rod ya, oli ona long olgeta. Mo tu, oli ona long olgeta taem oli tingting gud long ol tok mo ol tingting we ol narafala elda oli talem, bifo we oli mekem wan desisen. (Wok 15:6-15) Be yumi mas tingbaot se, leta we Pol i raetem long ol Kristin long Rom i go long fulwan kongregesen, i no long ol elda nomo. (Rom 1:7) Tede tu, advaes ya se yumi mas ona long narafala fastaem, i blong yumi evriwan.

14. (a) Tokbaot wan eksampol we i soemaot se ona long narafala i defren long ona long narafala fastaem. (b) ?Wanem kwestin we yumi wanwan i mas askem?

¹⁴ Yumi mas makem gud advaes ya blong Pol. Hem i no talem nomo long ol Kristin long Rom se oli mas ona long narafala. Be hem i talem se oli mas ona long narafala fastaem. ?Olsem wanem tok ya “fastaem” i mekem mining i defren? Traem tingbaot ol studen long skul. Sipos oli save rid finis, ?yu ting se tija bambae i strong long olgeta blong oli lanem blong rid? Nogat, from we oli save finis olsem wanem blong rid. Ale, tija bambae i halpem olgeta blong kam gud moa blong rid. Long sem fasin, yumi ona long narafala finis. Fasin ya blong lavlavem yumi we i makemaot ol tru Kristin, hem nao i pulum yumi blong ona long narafala. (Jon 13:35) Be yumi save go moa yet, olsem we ol yangfala oli save kam gud moa blong rid. Yumi save ona long narafala fastaem. (1 Tes. 4:9, 10) Wok ya blong ona long narafala fastaem, i stap long yumi evriwan. Maet yumi wanwan i askem se, ‘?Olsem wanem? ?Mi mi wet long narafala blong ona long mi, no mi mi ona long hem fastaem?’

Yumi Ona Long Olgeta We Oli ‘Man Nating’

15, 16. (a) Taem yumi ona long ol narafala, ?yumi no mas fogetem hu? ?From wanem? (b) ?Wanem i save soemaot sipos yumi respektem ol brata mo sista wetem fulhat blong yumi?

¹⁵ ?Taem yumi ona long ol narafala long kongregesen, yumi no mas fogetem hu? Tok blong God i talem se: “Taem yu givim samting long puaman [“man we i no gat nem,” NW], i olsem we yu letem Hae God i yusum fastaem, mo biaen, hem bambae i givim jenis blong samting ya long yu.” (Prov. 19:17) ?Olsem wanem yumi save folem tingting we i stap long vas ya taem yumi stap traehad blong ona long narafala fastaem?

¹⁶ Ating bambae yu agri se bighaf blong ol man oli ona long olgeta we oli hae moa long olgeta. Be maet ol man ya oli gat smol respek, no oli no gat respek nating, long olgeta we oli daon moa long olgeta. Jeova i no mekem olsem. Hem i talem se: “Man we i ona long mi, mi bambae mi ona long hem.” (1 Saml. 2:30; Sam 113:5-7) Jeova i ona long olgeta evriwan we oli mekem wok blong hem mo oli ona long hem. Hem i no fogetem ol man we oli “nating” nomo. (Ridim Aesea 57:15 *;  2 Kron. 16:9) I tru, yumi wantem folem fasin blong Jeova. Taswe, sipos yumi wantem jekemap se yumi stap ona long ol brata long fasin we yumi no giaman, i gud yumi askem se: ‘?Mi mi stap mekem olsem wanem long olgeta we oli no gat posisen mo wok long kongregesen?’ (Jon 13:14, 15) Ansa blong kwestin ya i soemaot sipos yumi respektem narafala wetem fulhat blong yumi, no nogat.—Ridim Filipae 2:3, 4.

Yumi Yusum Taem Blong Yumi Blong Givhan Long Narafala

17. ?Wanem bigfala samting we yumi save mekem blong ona long narafala fastaem? ?Mo olsem wanem samting ya i soemaot se yumi ona long olgeta?

¹⁷ ?Wanem bigfala samting we yumi long kongregesen, yumi save mekem blong ona long ol narafala fastaem? Yumi save yusum taem blong yumi blong halpem olgeta. ?Olsem wanem samting ya i soemaot se yumi ona long olgeta? Yumi ol Kristin, laef blong yumi i bisi. Mo ol bigfala wok we yumi mekem wetem kongregesen tu oli tekem plante taem. From samting ya, yumi tingbaot taem blong yumi olsem samting we i gud tumas mo yumi no wantem westem. Yumi luksave tu se i no stret blong askem long ol brata mo sista blong oli yusum plante tumas taem blong givhan long yumi. Mo yumi talem tangkiu long olgeta long kongregesen we oli no askem long yumi blong yusum plante tumas taem blong givhan long olgeta.

18. ?Folem pija we i stap long pej 24, wanem i save soemaot sipos yumi rere blong yusum taem blong yumi blong givhan long ol narafala Kristin?

¹⁸ Yumi (antap moa, ol man blong lukaot long sipsip long kongregesen), yumi luksave tu se, taem yumi rere blong lego sam wok we yumi stap mekem mo yusum taem blong yumi blong givhan long ol Kristin brata mo sista, hemia i soemaot respek long olgeta. ?Olsem wanem samting ya i soemaot respek? Taem yumi lego wan wok we yumi stap mekem blong yusum taem blong yumi blong givhan long wan brata, i olsem we yumi talem long hem se: ‘Mi mi tinghae long yu, taswe i impoten we mi spenem taem wetem yu i bitim we mi gohed long wok blong mi.’ (Mak 6:30-34) Be sipos yumi no wantem lego wok blong yumi blong givhan long brata blong yumi, hemia i soemaot samting we i defren olgeta. I olsem we yumi no tinghae long hem. I tru, samtaem i gat wan wok we yumi no save lego, from we wok ya i impoten mo yumi mas mekem hareap. Nating se i olsem, taem yumi rere blong lego wan wok blong givhan long brata blong yumi, yumi soemaot se yumi gat bigfala respek long hat blong yumi. Be sipos yumi no wantem lego wan wok mo yusum taem blong yumi blong givhan long brata blong yumi, yumi soemaot se yumi no respektem hem.—1 Kor. 10:24.

Strong Tingting Blong Ona Long Narafala Fastaem

19. ?Wanem wan narafala rod blong ona long ol Kristin brata sista blong yumi, antap long rod ya blong yusum taem blong yumi blong givhan long olgeta?

¹⁹ I gat plante moa bigfala rod blong ona long ol Kristin brata sista blong yumi. Wan rod se, taem yumi yusum taem blong yumi blong halpem olgeta, yumi mas lukluk mo lesin gud long olgeta tu. Bakegen, Jeova i givim eksampol long saed ya. Deved i raetem Sam ya we i talem se: “Hae God i stap lukluk long ol stret man, i stap lesin blong harem krae blong olgeta.” (Sam 34:15) Yumi traehad blong folem fasin ya blong Jeova. Yumi lukluk mo lesin gud long ol brata blong yumi, antap moa, olgeta we oli kam luk yumi blong askem help. Taem yumi mekem olsem, yumi ona long olgeta.

20. ?Wanem advaes blong ona long narafala we yumi no mas fogetem?

²⁰ Long stadi ya, yumi tokbaot se yumi mas respektem ol narafala Kristin wetem fulhat blong yumi. Mo yumi tokbaot from wanem samting ya i mas stap klia oltaem long tingting blong yumi. Mo tu, yumi mas lukaot janis blong ona long ol narafala bifo we oli ona long yumi. Antap moa, yumi ona long olgeta we oli no gat nem. Sipos yumi mekem ol samting ya, bambae yumi givhan blong mekem evriwan long kongregesen oli lavlavem olgeta olsem wan brata nomo, mo oli joen gud. Ale, yumi evriwan i mas gohed blong ona long ol narafala. Be i impoten moa we yumi ona long narafala fastaem. ?Bambae yu yu traehad blong mekem olsem?

[Ol futnot]

?Yu Yu Tingbaot?

• ?Olsem wanem fasin blong ona long narafala i joen wetem respek?

• ?Wanem sam risen we oli mas pulum yumi blong ona long ol narafala Kristin?

• ?From wanem i impoten we yumi ona long narafala?

• ?Wanem sam rod blong ona long ol narafala Kristin?

[Kwestin]

[Tok blong pija long pej 24]

?Olsem wanem yumi save ona long ol narafala Kristin?