Prea

 1 ?From Wanem?

PREA. Long olgeta samting we Baebol i tokbaot, ating prea nao we ol man oli wantem tumas blong save long hem. I gat seven kwestin long saed blong prea we ol man oli askem. Ol haf we oli kam biaen, bambae oli tokbaot ol seven kwestin ya. I gud yu ridim ansa we Baebol i givim long saed ya. Sipos yu no stap prea, ating ol haf ya oli save halpem yu blong yu lanem blong prea. Sipos yu stap prea finis, maet ol haf ya oli save halpem yu blong mekem ol prea blong yu oli kam gud moa.

LONG evri ples long wol, ol man blong defdefren kantri mo skul oli stap prea. Oli prea olgeta wan nomo, no oli prea wetem plante man wantaem. Oli prea insaed long ol jos, ol tempol, ol spesel haos blong prea no long ol narafala spesel ples bakegen. Oli yusum plante defdefren samting tu, taem oli prea. Samfala oli gat wan spesel mat blong nildaon long hem taem oli prea, mo samfala oli yusum ol bidbid. Samfala oli tantanem ol wil we i gat ol prea long olgeta finis. Samfala oli yusum ol aedol mo pija. Samfala oli yusum ol prea buk, no oli raetem prea blong olgeta long ol smol pis wud we oli hangem long ol spesel ples.

Fasin blong prea i mekem we yumi ol man yumi defren long ol anamol. I tru, i gat plante samting long saed blong yumi man we i sem mak long ol anamol. Yumi olsem anamol long fasin ya we yumi mas kakae, yumi mas pulum win mo yumi mas dring wota. Yumi bon, yumi laef, mo yumi ded, olsem we ol anamol tu oli bon, oli laef, mo oli ded. (Prija 3:19) Be yumi ol man nomo, yumi stap prea. ?From wanem?

Blong talem stret, hemia from we prea i wan samting we yumi ol man yumi nidim. Prea i wan fasin we ol man oli mekem blong oli save toktok wetem wan god no wan paoa we oli no save luk, we i tabu, mo we i stap oltaem. Baebol i talem se God i mekem yumi man wetem fasin ya we yumi wantem save hem. (Prija 3:11) Taem Jisas Kraes i stap long wol, hem i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—Matiu 5:3.

Yes ol man oli wantem ‘gat paoa blong God long laef blong olgeta.’ Taswe oli wokem plante haos blong prea mo oli wokem plante samting tu we oli yusum blong mekem prea, mo oli spenem plante aoa tu blong prea. Samtaem, ol man oli folem rod we olgeta nomo oli ting se i stret no narafala man i ting se i stret, blong kasem paoa we oli nidim long laef blong olgeta. ?Be yu ting se ol man oli naf blong givim samting we yumi nidim? Nogat. Yumi no strong, laef blong yumi i sot, mo yumi no gat save long ol samting we bambae oli kam. Wan man we i waes moa, i gat moa paoa, mo i laef longtaem moa i bitim yumi, hem nomo i save givim samting we yumi nidim. ?Be wanem samting i pusum yumi blong prea blong kasem paoa blong God?

Tingbaot: ?Samtaem yu wantem tumas blong gat save blong lidim yu, no yu wantem tumas blong save wan samting be i no gat man blong givim save ya long yu? ?Samtaem yu harem nogud tumas from we yu lusum wan famle no fren long ded, mo yu wantem tumas blong harem gud bakegen? ?Samtaem yu mas mekem wan impoten desisen long laef blong yu mo yu wantem wan man blong soem stret rod long yu? ?Samtaem yu mekem wan samting we i nogud, nao yu wantem tumas we narafala i fogivim yu blong mekem we tingting blong yu i no moa stikim yu?

Baebol i talem se long taem olsem ya nao, yu mas prea. Baebol i tokbaot prea, mo yu save trastem ol tok blong hem moa i bitim ol narafala buk. Baebol i tokbaot plante man mo woman bifo, we bilif blong olgeta i strong long God, mo hem i tokbaot olsem wanem olgeta ya oli prea long God. Oli prea blong God i mekem olgeta oli harem gud bakegen, blong hem i soem stret rod long olgeta, blong hem i fogivim sin blong olgeta, mo blong hem i givhan long olgeta blong kasem save long sam samting we i fasfas long tingting blong olgeta.—Ol Sam 23:3; 71:21; Daniel 9:4, 5, 19; Habakuk 1:3.

Taem ol man ya oli prea, oli tokbaot defdefren samting, be i gat wan samting long olgeta evriwan we i sem mak. Ol man ya oli save wan samting we i impoten tumas. Samting ya, plante man tede oli no tingbaot no maet oli no save. Yes, ol man ya bifo, oli save se prea blong olgeta i mas go long hu.