Prea

 4 ?Yumi Tokbaot Wanem Taem Yumi Prea?

OL MAN oli stap talem se Lodsprea, no Prea blong Masta, i wan prea we olgeta Kristin long wol oli talem moa, i winim ol narafala prea. Yumi no save sipos tok ya i tru no nogat, be samting we yumi luk, hemia se plante man oli no kasem save long mining blong ol tok blong prea ya. Plante milian man oli stap talem prea ya baehat evri dei, mo samfala oli stap talem plante taem long wan dei. Be taem Jisas i talem prea ya long ol man blong hem bifo, hem i no talem se man i mas lanem baehat. ?Olsem wanem yumi save samting ya?

Jes bifo we Jisas i tokbaot prea ya, hem i talem se: “Taem yufala i prea, i nogud yufala i talem sem toktok bakegen mo bakegen, fasin ya i blong nating nomo.” (Matiu 6:7, King James Version) Sipos Jisas i talem se yumi no mas talem sem toktok bakegen mo bakegen, ?from wanem biaen hem i talem se yumi mas prea folem ol tok blong Lodsprea ya? Jisas i no talem se yumi mas ripitim ol tok blong Lodsprea baehat. Defren olgeta, hem i stap tijim yumi long ol samting we yumi save tokbaot taem yumi prea. Mo hem i stap soemaot long yumi, wanem ol samting we oli impoten blong tingbaot taem yumi prea. I gud yumi tingbaot wanwan long ol samting we hem i talem long prea ya we i stap long Matiu 6:9-13.

“Mifala i wantem we olgeta man oli ona long nem blong yu we i tabu.” (Good News Bible)

Long tok ya, Jisas i soemaot long ol man blong hem se taem oli prea, oli mas prea i go long Papa blong hem, Jeova. ?Be yu yu save from wanem nem blong God i impoten tumas? ?Yu yu save from wanem yumi talem se olgeta man oli mas ona long nem ya we i tabu?

Stat long taem blong Adam mo Iv finis, i gat plante giaman toktok i stap goraon we i sakem doti long nem blong God. Enemi blong God, hemia Setan, i talem se Jeova i wan God we i giaman, i stap tingbaot hem wan nomo, mo i no gat raet nating blong rulum ol man we hem i mekem olgeta. (Jenesis 3:1-6) Plante man oli stanap long saed blong Setan. Oli tijim se God i no gat sore, hem i wan rabis God, i stap kros mo i stap givimbak rabis fasin long man we i mekem i nogud. Sam man oli talem tu se i no God we i mekem evri samting we i stap. Mo sam man oli agensem nem blong God stret. Oli karemaot nem ya, Jeova, taem oli tanem Baebol i go long narafala lanwis, mo oli talem long ol man se oli no mas talem nem ya nating.

Baebol i talem se God bambae i stretem rong ya we ol man oli mekem agens long nem blong hem. (Esikel 39:7) Taem God i stretem rong ya, bambae hem i mekem we yu tu yu no moa gat ol trabol mo wari. ?God bambae i mekem samting ya olsem wanem? Nekis toktok blong Jisas long prea ya i ansa long kwestin ya.

“Mifala i wantem we kingdom blong yu i kam.” (King James Version)

Tede, plante man we oli tijim ol man long saed blong Baebol, oli konfius se wanem nao Kingdom blong God. Be ol man long taem blong Jisas oli savegud mining blong tok ya. Oli save se ol profet blong God bifo oli stap tokbaot wan Mesaea we bambae i kam. Mesaea ya, hem i Sevia we God i jusumaot, mo bambae hem i kam King long wan Kingdom we bambae i jenisim wol ya. (Aesea 9:6, 7; Daniel 2:44)  Kingdom ya bambae i mekem we ol man oli ona long nem blong God we i tabu. Blong mekem olsem, bambae Kingdom ya i soemaot klia se Setan i giaman nomo, mo bambae i sakemaot Setan wetem olgeta rabis wok blong hem. Kingdom blong God bambae i finisim ol faet, ol sik, mo bambae i mekem we ol man oli no moa gat hadtaem blong kasem kakae. Bambae hem i finisim ded tu. (Ol Sam 46:9; 72:12-16; Aesea 25:8; 33:24) Taem yu prea se bambae Kingdom i kam, i olsem we yu stap askem God blong i mekem olgeta gudfala samting ya oli kamtru.

“Mifala i wantem . . . we olgeta man long wol oli mekem ol samting we yu yu wantem, olsem we olgeta long heven oli stap mekem.”

Ol tok ya blong Jisas oli soemaot we God bambae i mas mekem ol samting we hem i wantem oli kamtru long wol ya olsem we i kamtru finis long heven, ples ya we God i stap long hem. I no gat man i save blokem God blong i no mekem ol samting we hem i wantem mekem long heven. Long heven nao, Pikinini blong God i faet agensem Setan mo ol enjel blong hem, mo i sakemaot olgeta long heven, oli kamdaon long wol. (Revelesen 12:9-12) Namba tri toktok ya long Lodsprea i olsem faswan mo sekenwan. Oli halpem yumi blong tingbaot se samting we i moa impoten long laef blong yumi hemia ol samting we God i wantem, i no ol samting we yumi nomo yumi wantem. Ol samting we God i wantem mekem, hemia nao bambae i mekem we olgeta laef samting oli harem gud. Taswe Jisas tu, we hem i no gat sin, hem i prea long Papa blong hem se: “Yu no mekem olsem we mi mi wantem, yu mekem olsem we yu nomo yu wantem.”—Luk 22:42.

“Plis yu givim kakae long mifala, i naf blong tede.”

Long tok ya, Jisas i soemaot se yumi save tokbaot ol nid blong yumi long God. I no rong blong prea long God evri dei from ol samting we yumi nidim long laef. Tru ya, taem yumi prea blong askem samting olsem, hemia i mekem yumi tingbaot se Jeova nomo “i stap mekem yumi evriwan i laef, mo hem i stap givim olgeta samting long yumi.” (Ol Wok 17:25) Baebol i soemaot we Jeova i wan papa we i lavem ol pikinini blong hem mo i wantem givim samting we oli nidim. From we hem i wan papa we i lavem yumi, hem i no save givim samting we yumi askem long hem, sipos hem i luk we samting ya bambae i spolem yumi.

“Yu fogivim mifala from ol sin blong mifala.”

Plante man tede oli no moa save wanem ya sin mo oli no ting se sin i wan bigfala samting. Be Baebol i tijim se sin nao i stamba blong olgeta trabol blong yumi. From sin ya, ol man oli stap ded. Taem yumi bon, yumi sinman finis. Taswe yumi stap mekem sin oltaem. I gat wan rod nomo i stap blong yumi save kasem wan gudfala laef long fiuja. Rod ya, hemia se God i fogivim ol sin blong yumi. (Rom 3:23; 5:12; 6:23) Baebol i talem long saed blong Jeova, se: “Yu yu gud tumas long mifala, yu stap fogivim mifala, yu stap tekemaot ol sin blong mifala.” Tok ya i save leftemap tingting blong yumi.—Ol Sam 86:5.

“Yu blokem Setan i no kam spolem mifala.”

?Yu yu luksave se yu nidim God blong i protektem yu? ?Yu ting se i impoten tumas we God i lukaot long yu olsem? Plante man oli no bilif se Setan i stap. Be Jisas i talem ol tok we oli soemaot se Setan i wan man we yumi no save luk hem be hem i stap, mo hem i “stap rulum wol ya.” (Jon 12:31; 16:11) Setan i tanem ol fasin blong wol ya we i stap long han blong hem, i mekem oli kam nogud olgeta. Setan i wantem tumas blong tanem ol fasin blong yu tu, blong blokem yu blong yu no save fren wetem Papa blong yu, Jeova. (1 Pita 5:8) Be Jeova i strong moa i bitim Setan, mo hem i glad tumas blong blokem Setan blong i no spolem ol man we oli lavem Hem.

Storian blong yumi long saed blong ol wanwan haf blong Lodsprea i sot nomo. Hem i no talem olgeta samting we yumi save tokbaot long prea blong yumi. Yu mas tingbaot toktok blong 1 Jon 5:14. Vas ya i tokbaot God se: “Yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi.” Taswe, yu no mas ting se ol trabol blong yu oli olsem samting nating nomo long lukluk blong God.—1 Pita 5:7.

?Olsem wanem long saed blong taem mo ples blong prea? ?Hemia wan samting we i impoten blong tingbaot?