!Jeova i Hae God Mo Masta Blong Yumi!

“Hae God [“Jeova,” NW], yu yu God blong mi, mo yu yu Masta blong mi. . . . Yu yu sefples blong mi.”—SAM 73:28.

1. ?Ol tok blong Pol long 1 Korin 7:31 (NW), oli givim wanem tingting?

APOSOL Pol i talem se: “Fasin blong wol ya i stap jenis.” (1 Kor. 7:31, NW) Long olfala lanwis, tok ya we Pol i yusum i givim tingting se wol ya i olsem wan ples blong mekem muvi. Long ples blong mekem muvi, ol man oli stap talem ol toktok mo mekem ol aksen, sam oli mekem olsem ol gudfala man, sam oli mekem olsem ol man nogud. Ale, taem wan haf blong stori i finis, ol man ya oli aot, nao ol narafala man oli tekem ples blong olgeta blong mekem nekis haf.

2, 3. (a) ?Trabol we i kasem hae rul blong Jeova, hem i olsem wanem samting? (b) ?Wanem ol kwestin we bambae yumi tokbaot?

² Tede, ol samting we oli stap hapen long wol, oli olsem wan muvi we stori blong hem i impoten tumas. !Yu tu yu stap insaed long muvi ya! Stori blong hem i joen wetem hae rul blong Jeova God we bambae i win. Stori ya i olsem samting we i hapen long sam kantri. Ol kantri oli gat prapa gavman blong olgeta we oli mekem pis mo loa i stanap. Be long sam kantri, i gat wan grup blong ol rabis man blong brekem loa, we olgeta tu oli wantem rul. Oli trikim ol man blong oli save stilim mane blong olgeta, oli faet, mo oli kilim man i ded tu, blong holem paoa blong olgeta antap long ol man. Rabis grup ya i mekem trabol long prapa gavman blong kantri ya, mo i traem ol sitisen blong kantri ya tu, se bambae oli lego prapa gavman blong olgeta no nogat.

³ Wan samting we i klosap sem mak long hemia, i stap hapen long heven mo wol. I gat wan prapa gavman blong heven mo wol, hemia gavman blong ‘Hae God Jeova, Masta blong yumi.’ (Sam 71:4) Be wan grup blong ol man blong brekem loa i stap spolem ol man. Hed blong grup ya, hemia “Setan.” (1 Jon 5:19) Grup ya i mekem trabol long prapa gavman ya blong God, mo i traem ol man blong God se bambae oli lego hem mo rul blong hem no nogat. ?Wanem i mekem trabol ya i kamaot? ?From wanem God i letem trabol ya i gohed? ?Yumi wanwan i save mekem wanem?

Sam Haf Blong Stori Ya

4. ?Wanem tu bigfala samting i stap insaed long stori ya long saed blong heven mo wol?

⁴ I gat tu bigfala samting insaed long stori ya long saed blong heven mo wol. Faswan, hemia hae rul blong Jeova, mo sekenwan, hemia fasin blong man blong holemstrong long Jeova. Plante taem Baebol i singaot Jeova se “Hae God” mo “Masta.” Olsem nao, singsing blong man blong raetem Sam 73 we i soemaot se hem i trastem gud Jeova, i talem se: “Hae God, yu yu God blong mi, mo yu yu Masta blong mi. . . . Yu yu sefples blong mi.” (Sam 73:28) I gat plante risen blong tingbaot Jeova olsem God ya we i hae olgeta.—Dan. 7:22.

5. ?Wanem samting i mas mekem se yumi wantem leftemap hae rul blong Jeova?

⁵ From we Jeova God i mekem olgeta samting, hem i hae we i hae, mo hem i rul long evri samting long heven mo long wol. (Ridim Revelesen 4:11.) Mo tu, Jeova i Jaj blong yumi, hem i putumap ol loa we yumi mas folem, mo hem i King blong yumi. (Aes. 33:22) Laef blong yumi i kamaot long God, mo yumi dipen long hem. Taswe yumi mas tingbaot hem olsem Hae God mo Masta blong yumi. Oltaem yumi mas tingbaot se: “Hae God, hem i King. Hem i stap long ples blong hem long heven, mo i stap rul long olgeta samting.” Tingting ya bambae i mekem se yumi wantem leftemap hae rul blong hem oltaem.—Sam 103:19; Wok 4:24.

6. ?Man we i holemstrong long God, hem i olsem wanem?

⁶ Blong leftemap hae rul blong Jeova, yumi mas holemstrong long Hem. Man we i “holemstrong” long God, hem i strong blong mekem ol stret fasin,  mo olgeta tingting blong hem i stap long God. Hem i wan gudfala man mo i lukaot gud blong i no mekem wan samting we i nogud. Long taem bifo, Job nao i wan man olsem.—Job 1:1.

?Stori Ya i Stat Olsem Wanem?

7, 8. ?Setan i mekem wanem blong traem soemaot se Jeova i no gat raet blong rul?

⁷ Samwe long 6,000 yia bifo, wan enjel i talem se Jeova i no gat raet blong rul. Enjel ya i wantem leftemap hem wan, i wantem we ol man oli wosipim hem. Hemia nao samting we i pulum hem blong talem ol nogud tok agensem Jeova mo blong mekem stronghed. Enjel ya i pulum faswan man mo woman, Adam mo Iv, blong tufala i lego rul blong God. Mo hem i traem blong spolem nem blong Jeova taem hem i talem se Jeova i giaman. (Ridim Jenesis 3:1-5.) Stronghed enjel ya i kam Setan, Man blong giaman blong spolem nem blong narafala, Snek ya blong bifo, mo bigfala algita ya.—Rev. 12:9.

⁸ Setan i putumap hem wan blong i rul, mo hem i traem winim God. ?Hae God mo Masta Jeova i mekem wanem? ?Hem i kilim i ded trifala stronghed ya, Setan, Adam, mo Iv? I tru, hem i gat paoa blong mekem olsem. Sipos hem i kilim trifala stronghed ya i ded, ating hemia bambae i soemaot klia hu i gat moa paoa. Mo tu, bambae samting ya i pruvum se Jeova i no giaman taem hem i talem se man we i brekem loa blong hem bambae i ded. Ale, ?from wanem God i no kilim trifala ya i ded?

9. ?Setan i wantem soemaot wanem?

⁹ Taem Setan i giaman mo i pulum Adam mo Iv blong lego God, hemia i soemaot tingting blong Setan se God i no gat raet blong talem long ol man se oli mas obei long hem. Mo tu, taem Setan i pulum fas man mo woman ya blong tufala i no moa obei long God, hem i wantem soemaot se hem i save pulum olgeta man blong oli lego God. Long taem blong Job, Setan i talem se hem i save mekem we olgeta man oli tanem baksaed long God. Be Job i no lego hae rul blong Jeova.—Job 2:1-5.

10. Jeova i no soemaot hae rul blong hem mo kilim Setan i ded, ?be hem i letem taem long Setan blong hem i mekem wanem?

¹⁰ Jeova i save soemaot hae rul blong hem mo kilim Setan i ded. Be hem i no mekem olsem long taem ya. Hem i letem taem long Setan blong hem i traem pruvum ol tok blong hem. Mo tu, God i letem taem i pas blong ol man oli gat janis blong soemaot se oli no save lego hae rul blong hem. Ale, ?wanem i hapen long ol handred yia we oli pas? Setan i pulum fulap man oli kam long saed blong hem, nao oli kam olsem wan bigfala grup blong ol man blong brekem loa. Jeova bambae i spolem ol man ya mo Setan tu, mo samting ya bambae i pruvum gud se i stret nomo we God i rul. Jeova God i save se ol samting bambae oli kamaot gud long en blong bisnes ya. Taswe, taem Setan i jes mekem stronghed long Iden, Jeova i talemaot samting we bambae i hapen.—Jen. 3:15.

11. ?Plante man oli mekem wanem long saed blong hae rul blong Jeova?

¹¹ Long ol yia we oli pas, plante man oli bilif strong long Jeova, oli holemstrong long hem mo hae rul blong hem, mo oli mekem nem blong hem i tabu. Sam long ol man ya, hemia Ebel, Inok, Noa, Ebraham, Sera, Moses, Rut, Deved, Jisas, ol disaepol blong Kraes, mo plante milian man tede we oli stap holemstrong long God. Olgeta evriwan ya we oli leftemap hae rul blong God, oli joen blong pruvum se Setan i wan man blong giaman. Mo tu, oli givhan blong tekemaot doti we Setan i sakem long nem blong Jeova, taem hem i tokflas se hem i save pulum olgeta man blong oli tanem baksaed long God.—Prov. 27:11.

Yumi Save En Blong Stori Ya

12. ?From wanem yumi save gat strong tingting se God bambae i no letem ol rabis fasin oli gohed olwe?

¹² Yumi save se i no longtaem, Jeova bambae i soemaot hae rul blong hem. Bambae hem i no letem rabis fasin i gohed olwe. Yumi save se yumi stap finis long ol las dei. Jeova i spolem ol rabis man long bigfala wota we i ron long taem blong Noa. Hem i spolem tufala taon ya Sodom mo Gomora bifo. Hem i kilim i ded King Fero mo ol ami blong hem. Siseraha wetem bigfala ami blong hem, mo Senakerib wetem ol ami blong Asiria, oli no naf blong winim Hae God. (Jen. 7:1, 23; 19:24, 25; Eks. 14:30, 31; Jaj. 4:15, 16; 2 King 19:35, 36) Taswe, yumi save gat strong tingting se Jeova God bambae i no letem ol man oli gohed olwe, blong spolem nem blong hem mo mekem i nogud long ol Witnes blong hem. Mo tu, yumi luk ol saen se Jisas i stap finis, mo se en blong rabis wol ya i klosap.—Mat. 24:3, NW.

13. ?Yumi mas mekem wanem blong stap laef long taem ya we Jeova i spolem ol enemi blong hem?

 ¹³ Sipos yumi no wantem lus wetem ol enemi blong God, yumi mas gohed blong leftemap hae rul blong Jeova, yumi no mas lego. ?Olsem wanem yumi save mekem samting ya? Yumi mas stap longwe long rul blong Setan, we i olsem rul blong ol man blong brekem loa. Yumi no mas letem ol man blong Setan oli mekem yumi fraet. (Aes. 52:11; Jon 17:16; Wok 5:29) Sipos yumi stap longwe long rul blong Setan, yumi save leftemap hae rul blong Papa blong yumi long heven. Mo tu, yumi save stap laef long taem ya we Jeova bambae i tekemaot doti we ol man oli sakem long nem blong hem, mo i soemaot gud se hem nao Man we i rulum heven mo wol.

14. ?Ol defren haf blong Baebol oli givim wanem save?

¹⁴ Long ol defren vas blong Baebol, i gat ol save we i joen wetem ol man mo hae rul blong Jeova. Long stat blong Baebol, Jenesis japta 1 kasem 3 i tokbaot we Jeova i mekem wol ya mo ol samting long hem, mo i tokbaot olsem wanem man i foldaon long sin. Trifala japta long en blong Baebol olgeta, oli tokbaot taem ya we man bambae i kamaot long sin. Ol pej long medel oli givim plante save long ol samting we Hae God mo Masta Jeova i mekem, blong stamba tingting blong hem i save kamtru long saed blong ol man, wol ya, mo heven tu. Buk blong Jenesis i soemaot olsem wanem Setan mo rabis fasin i kam long wol ya. Lashaf blong buk blong Revelesen i soemaot olsem wanem ol rabis fasin mo Setan bambae oli lus, mo olsem wanem samting we God i wantem bambae i kamaot long wol, olsem we i kamaot finis long heven. Yes, Baebol i talem from wanem yumi kasem sin mo ded. Baebol i soemaot olsem wanem sin mo ded bambae oli finis, mo ol man we oli holemstrong long God bambae oli glad we oli glad long laef we i no save finis samtaem.

15. ?Yumi wanwan i mas mekem wanem blong kasem blesing, taem stori long saed blong hae rul i finis?

¹⁵ I no longtaem, fasin blong wol ya bambae i jenis olgeta. Muvi ya long saed blong hu i gat raet blong rul, we i stap gohed blong plante handred yia, bambae i finis. Setan bambae i no moa stap insaed long stori ya, from we hem bambae i go blong lus olwe. Samting we God i wantem bambae i kamaot mo i stap olwe. Be sipos yumi wantem stap laef blong harem gud long ol blesing we Tok blong God i talemaot, yumi mas leftemap hae rul blong Jeova naoia. Yumi no save stap olsem we yumi no wantem mekem wan desisen. Hemia i olsem wan man we i sidaon long fenis, wan leg blong hem i stap long wan saed blong fenis mo narafala leg blong hem i stap long narasaed. Sipos yumi wantem talem se: ‘Jeova i stap wetem mi,’ yumi mas stap wetem hem, yumi no mas gowe long hem nating.—Sam 118:6, 7.

!Yumi Naf Blong Holemstrong Long God!

16. ?From wanem yumi save gat strong tingting se yumi naf blong holemstrong long God?

¹⁶ Yumi naf blong leftemap hae rul blong Jeova mo holemstrong long Hem. Aposol Pol i raetem se: “Ol samting ya we oli stap traem yumi, oli sem mak nomo long ol samting we oli stap traem ol narafala man. Be God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” (1 Kor. 10:13) ?Wanem ya, ol samting we oli stap traem yumi, we Pol i tokbaot? ?God i save mekem rod olsem wanem blong yumi winim ol samting ya?

17-19. (a) ?Wanem samting blong traem man we i pulum ol man Isrel long draeples? (b) From wanem yumi naf blong holemstrong long Jeova?

¹⁷ Ol samting we oli hapen long ol man Isrel long draeples, oli soemaot se ‘ol samting we oli stap traem yumi,’ hemia ol samting we oli hapen long laef blong yumi we oli save pulum yumi blong brekem loa blong God. (Ridim 1 Korin 10:6-10.) Ol man Isrel oli naf blong winim ol samting we i traem olgeta, be trabol blong olgeta se oli wantem “ol rabis fasin” nomo. Yumi save tingbaot taem ya we Jeova i mekem wan merikel blong givim pijin ya kwel long olgeta, we mit blong hem i naf blong wan manis. I tru, oli no bin kakae mit longtaem lelebet. Nating se i olsem, oli no sot long kakae. God i bin givim plante mana long olgeta. Be oli no glad long mana ya, oli wantem mit tumas, mo from samting ya, oli bitim mak nao oli hivimap plante tumas pijin. Yes, oli letem fasin ya blong wantem plante samting tumas i winim olgeta.—Nam. 11:19, 20, 31-35.

¹⁸ Bifo finis, long taem ya we Moses i stap kasem Loa antap long Hil ya Sinae, ol man Isrel oli foldaon long wosip blong ol aedol. Oli bodaon long wan bul  we oli wokem, mo tu, ol man mo woman oli mekem rabis fasin. Lida blong olgeta i no moa stap blong blokem olgeta, nao oli foldaon long samting we i traem olgeta. (Eks. 32:1, 6) Bifo we ol man Isrel oli go insaed long Promes Lan, ol woman Moab oli pulum plante taosen blong olgeta blong oli mekem nogud wetem olgeta. Plante taosen man Isrel oli ded from sin ya. (Nam. 25:1, 9) Wanwan taem, ol man Isrel oli letem fasin blong komplen mo tok agensem narafala i winim olgeta. !Wan taem, oli tok agensem Moses, mo oli tok agensem God tu! (Nam. 21:5) Taem Jeova i kilim i ded Kora, Datan, Abiram, mo ol fren blong trifala from nogud fasin blong olgeta, ol man Isrel oli toktok smol bakegen. Oli gat rong tingting, oli talem se i no stret we Jeova i kilim ol stronghed ya oli ded. From samting ya, Jeova i panisim olgeta, i kilim 14,700 long olgeta oli ded.—Nam. 16:41, 49.

¹⁹ Ol man Isrel oli naf blong winim olgeta samting ya we oli traem olgeta. Be oli foldaon from we oli no moa bilif long Jeova. Oli fogetem hem mo ol gudfala samting we hem i mekem blong lukaot gud long olgeta, mo oli fogetem se ol rod blong hem oli stret nomo. Olsem long taem blong ol man Isrel, ol samting we oli traem yumi tede tu, hemia ol samting we oli hapen long laef blong yumi evriwan. Sipos yumi traehad blong stanap strong agensem ol samting ya, mo yumi lukluk i go long God blong i givim paoa long yumi, yumi save holemstrong long hem. Yumi save gat strong tingting se yumi naf blong holemstrong long God, from we “God i stap holem promes blong hem.” Hem i no save letem “wan samting i traem yumi, we i strong tumas long yumi.” Jeova i no save lego yumi go kasem mak we yumi fesem wan samting we i bigwan tumas, nao yumi no moa naf blong mekem samting we hem i wantem.—Sam 94:14.

20, 21. ?Taem wan samting i traem yumi, olsem wanem God i “mekem rod blong yumi”?

²⁰ Jeova i “mekem rod blong yumi,” taem hem i mekem yumi strong nao yumi naf blong winim samting we i traem yumi. Olsem nao, maet sam man oli agensem yumi mo oli kilim yumi blong traem fosem yumi blong lego bilif blong yumi. Maet ol raf fasin blong olgeta i mekem yumi ting se i moa gud we yumi lego bilif, nao bambae oli no moa kilim yumi, oli no moa mekem yumi harem nogud, mo oli no kilim yumi i ded. Be ol tok we tabu spirit i pulum Pol blong raetem long 1 Korin 10:13 i promes se, samting we i traem yumi bambae i stap blong smoltaem nomo, i no blong olwe. Jeova bambae i no letem samting ya i kam bigwan tumas, gogo yumi no moa save holemstrong long hem. God i save mekem bilif blong yumi i strong, mo i save givim paoa we yumi nidim blong yumi holemstrong long hem.

²¹ Jeova i stap yusum tabu spirit blong hem blong mekem yumi strong. Spirit ya i mekem se ol tingting blong Baebol we oli save halpem yumi blong winim samting we i traem yumi, oli kam long tingting blong yumi. (Jon 14:26) Nao yumi no folem wan giaman tingting we i save lidim yumi i gorong. Yu traem tingbaot: Yumi kasem save long hae rul blong Jeova, mo from wanem yumi mas holemstrong long hem. Save ya mo paoa blong God i givhan long plante man finis blong oli stanap strong go kasem ded. Be ded i no rod we God i mekem blong oli winim samting we i traem olgeta, nogat. Jeova i mekem rod taem hem i givhan long olgeta blong oli stanap strong go kasem ded, mo oli no letem samting blong traem olgeta i winim olgeta. Hem i save mekem sem samting long yumi. Mo hem i stap yusum ol gudfala enjel blong hem tu blong givhan long yumi. Ol enjel oli stap mekem wok blong God. Ale God i save ‘sanem olgeta oli kam givhan long ol man we bambae hem i sevem olgeta.’ (Hib. 1:14) Olsem nekis stadi bambae i tokbaot, ol man nomo we oli holemstrong long God oli save kasem nambawan blesing ya blong leftemap hae rul blong God gogo i no save finis. Yumi save stap wetem olgeta ya sipos yumi fasgud long Jeova, olsem Hae God mo Masta blong yumi.

?Bambae Yu Yu Ansa Olsem Wanem?

• ?From wanem yumi mas luksave se Jeova i Hae God mo Masta blong yumi?

• ?Yumi mekem olsem wanem taem yumi holemstrong long God?

• ?Wanem i mekem yumi save se bambae Jeova i soemaot hae rul blong hem i no longtaem?

• Olsem 1 Korin 10:13 i talem, ?from wanem yumi naf blong holemstrong long God?

[Kwestin]