Fas Stamba Rod

Lavem Ol Man, i No Mane Mo Olting

?BAEBOL I TIJIM WANEM? “Fasin blong laekem mane tumas, hem i stamba blong olgeta fasin nogud.”—1 Timoti 6:10.

?WANEM I SAVE TRAEM YUMI? Ol man blong mekem plante toktok blong salem samting, oli pulum yumi blong yumi no glad long ol samting we yumi gat. Oli wantem we yumi wok oltaem blong kasem mane, nao yumi save pem ol niufala samting, ol samting we oli beswan mo oli bigwan. Mane i save trikim man mo i isi nomo blong man i foldaon long trap ya blong laekem mane tumas. Be Baebol i givim woning se man we i wantem kam rijman, neva bambae i harem gud. King Solomon i raetem se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf. Mo sipos yu wantem tumas blong kam rijman, neva yu save kasem ol samting we yu yu wantem.”—Prija 5:10.

?YU SAVE MEKEM WANEM? I gud blong folem eksampol blong Jisas, mo lanem blong lavem ol man i bitim we yumi laekem ol samting. Jisas i glad blong lego olgeta samting we hem i gat mo laef blong hem tu, from we hem i lavem ol man. (Jon 15:13) Hem i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Sipos yumi stap yusum taem mo ol samting blong yumi blong givhan long narafala, bambae ol man tu oli mekem i sem mak long yumi. Jisas i talem se: “I gud yu lanem fasin blong givim samting long ol man, nao ol man bambae oli givim samting long yu tu.” (Luk 6:38, NW) Olgeta we oli ronem mane mo olting, oli harem nogud tumas mo oli safa. (1 Timoti 6:9, 10) Be taem yumi lavem ol narafala man mo olgeta tu oli lavem yumi, samting ya i mekem yumi harem gud tumas.

?Olsem wanem? ?Yu tu yu save mekem se laef blong yu i no fasfas tumas wetem plante samting? ?Yu yu save lego ol samting we yu wantem pem, no maet yu pem sam long olgeta nomo? Sipos yu mekem olsem, bambae yu luk se yu gat moa taem mo paoa blong mekem ol samting we oli moa impoten long laef. Ol samting ya, hemia blong halpem ol man mo blong mekem wok blong God ya we hem nao i givim ol samting we yu yu gat.—Matiu 6:24; Ol Wok 17:28.

[Tok blong pija long pej 4]

“I gud yu lanem fasin blong givim samting long ol man, nao ol man bambae oli givim samting long yu tu”