Long Saed Blong Tru Wosip, Yumi Mas Wok Olsem We Faea i Laet Long Tingting Blong Yumi

“I gat plante kakae tumas i stap long garen we i rere finis, be smol man nomo oli stap blong karem i go long haos.”—MAT. 9:37.

1. ?Wanem i hapen taem man i hareap blong mekem wan samting?

YU GAT wan pepa we yu wantem se wan narafala i mas fulumap bifo long en blong dei ya. ?Bambae yu mekem wanem? Bambae yu talem long hem se: “!Plis, yu fulumap pepa ya KWIKTAEM!” Yu stap go long wan bigfala miting, be yu let finis. ?Bambae yu mekem wanem? Bambae yu wokbaot HAREAP. Yes, taem yu mas hareap blong mekem wan samting we klosap nao i let, yu fosem bodi blong yu mo yu tingting strong long samting ya. Hat blong yu i pam strong, mo yu wok kwik. !Hemia nao samting we i hapen taem wan man i mas hareap blong mekem wan samting!

2. ?Wanem wok we ol tru Kristin tede oli mas hareap blong mekem?

² Ol tru Kristin tede oli mas hareap blong talemaot gud nius blong Kingdom, mo pulum ol man long olgeta ples long wol oli kam man blong Kraes. I no gat wan narafala wok bakegen we oli mas hareap blong mekem, i bitim wok ya. (Mat. 24, 14, NW; 28:19, 20) Disaepol Mak i yusum sem tok we Jisas i talem, taem hem i raetem se wok ya i mas gohed “fastaem.” Hemia i min se wok ya i mas gohed fastaem, bifo we en i kam. (Mak 13:10) I stret nomo we yumi mekem olsem. Jisas i talem se: “I gat plante kakae tumas i stap long garen we i rere finis, be smol man nomo oli stap blong karem i go long haos.” Ol kakae we oli rere long garen oli no save wet, ol man oli mas hareap blong go karem olgeta bifo we i let tumas.—Mat. 9:37.

3. ?From we yumi mas hareap blong mekem wok blong prij, wanem samting we plante brata sista oli mekem?

³ Long tingting blong yumi, wok blong prij i wan wok we i impoten tumas. Taswe, i stret nomo we yumi yusum taem mo paoa blong yumi long wok ya, mo yumi putum tingting blong yumi i stap moa long wok ya, i bitim ol narafala samting. Yumi glad tumas we plante brata mo sista oli mekem samting ya. Samfala oli jenisim sam samting long laef blong olgeta, blong oli save prij fultaem olsem ol paenia, misinari, mo wok long wan long ol Betel we oli stap long olgeta ples long wol. Olgeta oli bisi gud long ol  wok ya. Maet oli mas lego plante samting, mo oli mas fesem plante hadtaem. Be Jehova i blesem olgeta bigwan. Yumi glad tumas long olgeta. (Ridim Luk 18:28-30.) Sam narafala oli no naf blong prij fultaem, be olgeta ya oli traehad blong spenem moa taem long wok ya blong sevem laef blong ol man. Hemia i minim laef blong ol pikinini blong olgeta tu.—Dut. 6:6-7.

4. ?From wanem maet samfala oli no moa wok wetem tingting ya se oli mas hareap?

⁴ Olsem we yumi luk finis, plante taem yumi mas hareap blong mekem wan wok, from we i gat wan stret aoa no wan stret dei we oli putum blong wok ya i finis long hem. Wok olsem i gat wan en blong hem. Plante samting we Baebol i talem mo we oli kamaot long ol yia we oli pas, oli pruvum se yumi stap laef long taem blong en. (Mat. 24:3, 33; 2 Tim. 3:1-5) Nating se i olsem, i no gat wan man we i save se en bambae i kam long wanem taem stret. Jisas i tokbaot sam samting we oli mekemap “saen” we i makemaot “lashaf blong fasin blong laef long wol ya.” Be hem i talemaot tu se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Mat. 24:36) Samting ya i mekem we plante long yumi oli harem se i no isi blong gohed nomo blong wok oltaem wetem tingting ya se oli mas hareap, antap moa taem oli mekem olsem blong plante yia finis. (Prov. 13:12) ?Samtaem yu tu yu harem olsem? Jehova mo Jisas tufala i askem long yumi blong mekem wan wok tede. ?Ale, wanem samting i save halpem yumi blong wok wetem tingting ya se yumi mas hareap? ?Mo wanem bambae i givhan long yumi blong gohed blong holemtaet tingting ya?

Yumi Tingbaot Jisas, Eksampol Blong Yumi

5. ?Wanem i soemaot se Jisas i hareap blong wok taem hem i stap long wol?

⁵ Long olgeta man we oli hareap blong mekem wok blong God, Jisas nao i bigfala eksampol blong yumi. Wan risen we i pusum hem blong hareap, hemia se hem i gat plante wok blong mekem, be hem i gat tri yia haf nomo blong finisim ol wok ya. Nating se i olsem, Jisas i finisim plante wok we oli joen wetem tru wosip, i no gat wan narafala man bakegen we i save mekem olsem hem. Hem i mekem ol man oli kasem save long nem blong Papa blong hem mo long stamba tingting blong Hem. Hem i prij blong talemaot gud nius blong Kingdom, mo hem i mekem fasin tu fes mo giaman tijing blong ol lida blong skul i kam long klia ples. Mo tu hem i leftemap hae rul blong Jehova gogo kasem ded blong hem. Jisas i yusum olgeta taem mo paoa blong hem blong wokbaot long olgeta ples blong tijim mo givhan long ol man, mo mekem ol sikman oli kamgud bakegen. (Mat. 9:35) I no gat wan narafala man we i mekem plante wok olsemia long sot taem nomo. Jisas i traehad bitim ol narafala man, blong wok strong.—Jon 18:37.

6. ?Jisas i tingting moa long wanem samting?

⁶ ?Wanem i pulum Jisas blong wok strong olsem? Hem i save profet tok blong Daniel. Mo hem i save tu se folem kalenda blong Jehova, i gat hamas taem i stap yet blong hem i finisim wok blong hem long wol ya. (Dan. 9:27) Taswe, olsem Baebol i talem, wok blong hem long wol ya i mas finis long en blong “haf blong [wik] ya,” no long tri yia haf. Long yia 33 K.T., * taem we ol tri oli putum flaoa, Jisas i sidaon long wan dongki mo i go insaed long Jerusalem. Smoltaem afta, hem i talem se: “Mi mi Pikinini blong Man, mo naoia, taem i kamtru finis blong God i leftemap nem blong mi.” (Jon 12:23) Jisas i save se klosap nao bambae hem i ded. Be hem i no tingting tumas long samting ya, olsem se hemia nao bigfala risen blong hem i wok strong. Jisas i tingting moa blong mekem samting we Papa blong hem i wantem, mo blong soemaot long olgeta man se hem i lavem olgeta, mo hem i traehad blong faenem evri janis blong mekem olsem. Lav ya i pulum hem blong hivimap sam man blong oli kam ol disaepol, i trenem olgeta mo i sanemaot olgeta oli go prij. Jisas i mekem olsem blong oli save gohed taem hem i no moa stap, blong mekem wok ya we hem i statem, mo blong oli save mekem plante wok moa i winim ol wok ya we hem i mekem.—Ridim Jon 14:12.

7, 8. ?Wanem samting we ol disaepol oli tingbaot, taem Jisas i ronemaot ol man we oli salem ol anamol long haos blong God? ?From wanem Jisas i mekem samting ya?

⁷ Jisas i mekem wan samting we i soemaot se hem i wok olsem we faea i laet long tingting blong hem. Hemia long taem blong Pasova, long yia 30 K.T., taem we hem i jes stat blong mekem wok blong hem long wol ya. Jisas mo ol disaepol blong hem oli kam long Jerusalem, mo hem i luk “plante man we oli stap salem buluk mo sipsip mo nawimba, blong ol man oli pem blong mekem sakrefaes. Mo i gat ol man tu we oli stap sidaon biaen long ol tebol blong  olgeta, oli stap jenisim mane blong ol man blong ol narafala ples.” ?Jisas i mekem wanem? ?Mo ol disaepol blong hem oli tingbaot wanem taem oli luk samting we hem i mekem?—Ridim Jon 2:13-17.

⁸ Samting we Jisas i mekem mo i talem long taem ya, i pulum ol disaepol blong oli tingbaot wan profet tok blong Deved long buk blong Ol Sam, we i talem se: “Mi mi wantem tumas se evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.” (Sam 69:9) ?From wanem ol disaepol oli tingbaot tok ya? From we samting we Jisas i mekem i save karem bigfala trabol i kam long hem. Olgeta we oli lukaot long haos blong God, hemia ol pris, ol tija blong loa, mo ol narafala lida blong skul. Olgeta nao oli stamba blong ol nogud bisnes ya blong salem ol anamol long haos blong God. Taem Jisas i soemaot mo i spolem rabis plan blong ol lida ya blong skul, hem i mekem se hem i kam enemi blong olgeta. Yes, samting we ol disaepol oli tingbaot long saed blong Jisas, i stret nomo. Jisas i soemaot klia se ‘hem i wantem tumas se evri samting long haos blong God oli mas stret gud. Oltaem tingting ya i stap wok insaed long hem, olsem faea we i stap laet.’ Yes long saed blong tru wosip, Jisas i wok olsem we faea i laet long tingting blong hem. Be ?i minim wanem taem man i wok olsem we faea i laet long tingting blong hem? ?Hemia i defren long man we i wok wetem tingting ya se hem i mas hareap?

Wok Hareap Mo Wok Olsem We Faea i Laet Long Tingting

9. ?Olsem wanem yumi save eksplenem wan man we i wok olsem we faea i laet long tingting blong hem?

⁹ Wan diksonari i soemaot se man we i ‘wok olsem we faea i laet long tingting’ blong hem, hem i “wantem tumas blong mekem wan samting, i tingting tumas long samting ya, mo i gohed gogo i finisim.” Ol tok ya oli soemaot gud fasin blong Jisas blong wok taem hem i stap long wol ya. I gud blong save se long sam lanwis long ol kantri blong Is, oli yusum tu wod blong talem ‘wok olsem we faea i laet long tingting.’ Tufala wod ya i minim “hat we i hot,” olsem se wan faea i stap bon insaed long hat blong man. Taswe, yumi no sapraes we ol disaepol oli tingbaot tok blong Deved taem oli luk we Jisas i ronemaot ol man ya we oli mekem bisnes long haos blong God. ?Be wanem samting i mekem se Jisas i harem olsem se wan faea i stap laet long tingting blong hem, mo i pusum hem blong ronemaot ol man ya?

10. ?Long Baebol, man we i ‘wok olsem we faea i laet long tingting’ blong hem i minim wanem?

¹⁰ Long vas ya blong Ol Sam, tok ya we Deved i yusum se ‘wok olsem we faea i laet long tingting,’ i kamaot long wan wod long Hibru lanwis. Wod ya mining blong hem i dip mo Baebol i yusum plante taem. (Ridim Eksodas 20:5; 34:14; Josua 24:19.) Wan diksonari blong Baebol i eksplenem se, plante taem, Baebol i yusum wod ya taem i tokbaot man mo woman we tufala i mared. Wan man we i mared i no save letem woman blong hem i fasgud long wan narafala man. Hem i wantem se woman ya i fasgud long hem nomo from we hem i woman blong hem. Hemia wan samting we man ya i gat raet blong talem strong long woman blong hem. God i gat sem raet ya mo hem i talem strong long ol man blong hem blong oli fasgud long Hem from we oli blong Hem nomo. Sam man tede oli putum tingting blong olgeta i stap strong long sam samting we oli laekem tumas, olsem spot, ale oli sapotem ol samting ya fulwan. Be taem Baebol i talem se man i wok olsem we  faea i laet long tingting blong hem, hem i minim moa i bitim fasin ya we sam man i gat long spot no nara samting olsem. Tok we Deved i yusum blong tokbaot Jisas we i wok olsem we faea i laet long tingting blong hem, i min se hem i no save letem wan narafala i tekem ples blong Jehova no i spolem hem. Jisas i wantem tumas blong blokem ol samting we oli save spolem gudnem blong Jehova, mo i wantem tumas blong stretem wan rong we i mekem Jehova i harem nogud.

11. ?Wanem samting i pulum Jisas blong wok olsem we faea i laet long tingting blong hem?

¹¹ Taem ol disaepol oli luk samting we Jisas i mekem long haos blong God, oli tingbaot tok blong Deved. Tingting blong olgeta i stret nomo. Jisas i no wok had nomo from we wok blong hem i mas finis kwik, nogat. Hem i wantem tu blong leftemap nem blong Papa blong hem mo tru wosip, from we tingting ya i wok long hem olsem we faea i laet. Taem hem i luk we ol man oli sakem doti mo spolem nem blong God, hem i wantem tumas blong stretem samting ya, ale hem i tekem aksen. Jisas i luk we ol lida blong skul oli stap ravem mo mekem i strong tumas long ol man we tingting blong olgeta i stap daon. Fasin blong hem blong wok olsem we faea i laet long tingting blong hem, i pulum hem blong givhan long ol man ya, mo hem i talemaot ol rabis fasin blong ol lida ya.—Mat. 9:36; 23:2, 4, 27, 28, 33.

Long Saed Blong Tru Wosip, Yumi Mas Wok Olsem We Faea i Laet Long Tingting

12, 13. ?Tede ol lida blong ol jos we oli talem se oli Kristin, oli mekem wanem long saed blong (a) nem blong God? (b) Kingdom blong God?

¹² Ol samting we oli hapen long ol jos tede oli sem mak olsem long taem blong Jisas, no maet oli nogud moa. Yumi mas tingbaot se faswan samting we Jisas i tijim ol man blong prea from, hemia nem blong God. Hem i talem se: “Mifala i wantem we olgeta man oli ona long nem blong yu we i tabu.” (Mat. 6:9, Good News Bible) ?Olsem wanem? ?Ol lida blong jos, antap moa ol jos we oli talem se oli Kristin, oli stap tijim ol man blong oli save long nem blong God, mo blong oli ona long nem ya? Nogat. Olgeta ya oli tijim ol giaman tingting olsem Triniti, wan samting insaed long man i gohed blong laef taem man ya i ded, mo helfaea. Ol tijing ya oli mekem se ol man oli gat nogud tingting long saed blong God. Oli ting se i no gat man i naf blong kasem save long Hem, mo se hem i wan God we fasin blong hem i raf tumas, mo i stap mekem i nogud long ol man. Mo tu, ol lida ya oli spolem nem blong God taem oli stap mekem ol rabis fasin mo oli gat tu fes. (Ridim Rom 2:21-24.) Antap moa, oli mekem evri samting blong haedem nem blong God long ol man, mo oli tekemaot nem ya long ol Baebol tu. Long rod ya, oli blokem ol man blong oli no go klosap long God mo fren gud wetem hem.—Jem. 4:7, 8.

¹³ Mo tu, Jisas i tijim ol man blong hem blong oli prea from Kingdom blong God, se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i  kamaot long heven.” (Mat. 6:10, NW) Plante taem ol lida blong ol giaman Kristin skul oli talem prea ya bakegen mo bakegen. Nating se i olsem, oli pulum ol man blong oli sapotem politik mo ol ogenaesesen we man nomo i stanemap. Mo tu, oli daonem ol man we oli stap traehad blong prij blong talemaot Kingdom ya. Samting ya i mekem se plante man we oli talem se oli Kristin, oli no moa tokbaot Kingdom blong God mo oli no moa bilif long hem.

14. ?Olsem wanem ol lida blong ol jos ya we oli talem se oli Kristin, oli no moa tijim Tok blong God?

¹⁴ Taem Jisas i prea long God, hem i talem klia nomo se: “Tok blong yu i tru olgeta.” (Jon 17:17) Mo bifo we Jisas i gobak long heven, hem i soemaot se bambae hem i putumap “slef ya we i stret mo waes,” blong i givim kakae long ol man blong hem. Kakae ya i blong givhan long bilif blong olgeta. (Mat. 24:45, NW) Ol lida blong ol jos we oli talem se oli Kristin, oli kwik blong talem se olgeta nao slef ya we i tijim ol man long Tok blong God. Be ?olsem wanem? ?Olgeta oli mekem wok ya we Masta i askem long olgeta blong mekem? Nogat. Ol lida ya oli stap talem se ol tok blong Baebol oli kastom stori nomo. Oli no givim ol save blong Baebol we ol man blong olgeta oli nidim blong oli harem gud long tingting blong olgeta. Be oli tijim ol save blong man nomo we ol man oli wantem harem. Mo tu, oli no tijim ol man long ol gudfala fasin blong laef we God i wantem se oli folem. Oli tijim olgeta long niufala tingting ya se nating we ol man oli no folem ol gudfala fasin blong God, be God i glad long olgeta yet.—2 Tim. 4:3, 4.

15. ?Yu yu harem olsem wanem taem yu luk ol samting we ol lida blong jos oli mekem?

¹⁵ Ol lida ya blong jos oli mekem olgeta rabis fasin ya long nem blong God ya we Baebol i tokbaot. Samting ya i mekem se plante man we hat blong olgeta i stret, oli harem nogud mo oli no moa wantem bilif long God mo long Baebol. Oli foldaon long trap blong Setan mo blong rabis wol ya blong hem. Taem yu luk mo yu harem we evri dei oli mekem ol rabis fasin olsem bakegen mo bakegen, ?yu yu harem olsem wanem? Yu yu wan man blong wok blong Jehova. Taem yu luk we rabis fasin blong olgeta i sakem doti long nem blong God, ?yu yu no harem se yu wantem tumas blong mekem wan samting blong stretem? Taem yu luk we ol lida blong skul oli stap trikim mo ravem ol man we hat blong olgeta i stret, ?yu yu no harem se yu wantem tumas blong mekem ol man ya oli harem gud bakegen long tingting blong olgeta? Taem Jisas i luk ol man long taem blong hem we “olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta,” hem i sore long olgeta. Be i no hemia nomo, “hem i stat tijim olgeta long plante samting” tu. (Mat. 9:36; Mak 6:34) Long saed blong tru wosip, yumi tu yumi gat plante risen, olsem Jisas, blong wok olsem we faea i laet long tingting blong yumi.

16, 17. (a) ?Wanem samting i mas pulum yumi blong prij olsem we faea i laet long tingting blong yumi? (b) ?Bambae yumi tokbaot wanem long nekis stadi?

¹⁶ Long saed blong tru wosip, taem yumi wok olsem we faea i laet long tingting blong yumi, yumi luk se ol tok blong aposol Pol long 1 Timoti 2:3, 4, i gat moa paoa. (Ridim.) Long wok blong prij, yumi wok had from we yumi save se yumi stap laef long taem blong las dei. Be i no hemia nomo. Yumi wok olsem from we yumi kasem save tu se God i wantem we yumi wok had. Hem i wantem we ol man oli save long trutok, nao oli save wosipim hem mo mekem wok blong hem. Long rod ya, oli save kasem blesing. Faswan risen we i pulum yumi blong prij, i no from we smoltaem nomo i stap, be hemia from we yumi wantem ona long nem blong God mo yumi wantem givhan long ol man blong oli kasem save long samting we God i wantem. Yes, long saed blong tru wosip, yumi wok olsem we faea i laet long tingting blong yumi.—1 Tim. 4:16.

¹⁷ Yumi ol man blong Jehova, yumi gat blesing ya blong save trutok. Yumi save stamba tingting blong God long saed blong ol man mo long saed blong wol. Yumi gat ol save blong givhan long ol man blong oli kasem glad, mo blong oli putum tingting blong olgeta i stap strong long saed blong fiuja. Yumi save soemaot rod long olgeta blong oli stap sef, taem bigfala trabol i kasem rabis wol ya blong Setan. (2 Tes. 1:7-9) Sipos yumi luk olsem se dei blong Jehova i no kam kwik, yumi no mas harem nogud mo tingting blong yumi i no mas foldaon. Defren olgeta, yumi mas glad se i gat taem yet blong mekem ol wok blong tru wosip, we faea i laet long tingting blong yumi. (Maeka 7:7; Hab. 2:3) ?Be olsem wanem yumi save mekem se yumi wantem wok olsem we faea i laet long tingting blong yumi? Bambae yumi tokbaot samting ya long nekis stadi.

[Futnot]

?Yu Yu Save Eksplenem?

• ?Wanem samting i pulum Jisas blong wok olsem we faea i laet long tingting blong hem taem hem i stap long wol ya?

• ?Long Baebol, ‘wok olsem we faea i laet long tingting’ i minim wanem?

• ?Wanem samting we yumi stap luk tede, we i mas pulum yumi blong wok long saed blong tru wosip, olsem we faea i laet long tingting blong yumi?

[Kwestin]

[Tok blong pija long pej 15]

Jisas i tingting moa blong mekem samting we Papa blong hem i wantem mo blong soemaot long olgeta man se hem i lavem olgeta

[Tok blong pija long pej 16]

Long saed blong tru wosip, yumi gat plante risen blong wok olsem we faea i laet long tingting blong yumi