Kwestin Blong Olgeta We Oli Ridim Magasin Ya . . .

?Mi Mi Mas Joen Long Wan Jos?

▪ Maet yu wantem joen long wan jos, be ating yu stap harem nogud long ol fasin blong ol memba blong skul mo ol lida blong olgeta tu, we oli gat tu fes mo oli no joen gud. ?Hemia nao samting we yu stap tingbaot? Sipos yes, tingting blong yu i sem mak long waes tok we ol man Franis oli stap talem se: “Man we i klosap long jos, plante taem hem i longwe long God.”

Maet yu respektem Baebol mo yu harem se ol haeman blong gavman mo ol man wanwan, oli mas respektem raet blong man blong joen long wan jos. Be maet yu stap tingbaot se, ‘?God i talem se ol man we oli wantem wosipim hem, oli mas joen long wan jos?

Ansa we i kam kwiktaem long tingting blong yumi, hemia yes. ?From wanem yumi talem olsem? ?Mo God i glad we yumi joen long eni kaen jos?

Yumi save tingbaot Jisas. ?Olsem wanem? ?Jisas i joen long wan jos? Taem Jisas i pikinini nomo, oltaem hem mo famle blong hem mo ol narafala man Jiu, oli folem kastom blong ol laen blong Isrel, hemia blong go oltaem long haos blong God long Jerusalem, blong mekem wosip long God. (Luk 2:41-43) Taem Jisas i kam bigwan, oltaem hem i go insaed long haos prea long Nasaret wetem ol narafala man Jiu, blong mekem wosip long God. (Luk 4:14-16) Jisas i toktok long wan woman we i joen long wan narafala jos, hem i talem se: “Mifala, mifala i stap mekem wosip long God, we mifala i save hem.” (Jon 4:22) Long ples ya, Jisas i soemaot klia se hem i joen long skul blong ol man Jiu.

Biaen, Jisas i talem se, ful neson blong ol man Jiu oli no bilif long hem. Mo from samting ya, God i lego olgeta. Hem i no wantem wosip blong olgeta we i no klin. (Matiu 23:33–24:2) Be Jisas i soemaot se ol man we oli wantem wosipim God long fasin we God i glad long hem, oli mas joen long wan skul. Hem i talem long ol disaepol blong hem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Wan disaepol blong Kraes i mas joen oltaem wetem ol Kristin brata blong hem. Long rod ya, hem i stap soemaot se hem i lavem olgeta. Blong taem stret, Jisas i talemaot klia se, i gat tu rod nomo we man i save folem. Hem i tokbaot get ya we i “bigwan, mo rod ya we i isi nomo,” hemia “blong go lus” nomo. Be hem i tokbaot wan narafala rod tu, hem i talem se: “Get ya we i smol nomo, mo rod we i strong, hemia i blong go kasem laef. Mo smol man nomo oli faenem.”—Matiu 7:13, 14.

I klia se, i no stret blong joen long eni kaen skul we yumi nomo i wantem. Baebol i givim woning se yumi no mas joen wetem ol man we “oli stap folem fasin blong Kristin man, be oli no wantem paoa blong God nating long laef blong olgeta.” Baebol i talem bakegen se, bambae yumi “no go klosap nating long ol man olsem.” (2 Timoti 3:5) Defren olgeta, sipos yumi luksave ol man we oli stap folem rod ya we i go kasem laef, mo yumi joen wetem olgeta oltaem, bambae yumi save kasem plante blesing. Bambae ol man ya oli save leftemap tingting blong yumi mo givhan long yumi naoia, mo yumi save putum tingting blong yumi i stap strong long wan gudfala laef long fiuja.—Hibrus 10:24, 25.

?Olsem wanem blong luksave skul ya we i folem rod we i smol? Yu save faenem ansa we Baebol i givim, long japta 15 blong buk ya, ?Wanem Samting We Baebol i Rili Tijim? * Save ya bambae i halpem yu blong yu save jusum wan skul we ol tijing blong hem oli stret wetem Baebol.

[Futnot]