“Naoia i Taem Blong God i Givhan Long Man”

“Naoia i taem blong God i givhan long man. Tede i dei blong hem i sevem man.”—2 KOR. 6:2.

1. ?From wanem yumi mas luksave oltaem long laef blong yumi, wanem wok we i impoten moa blong mekem?

“EVRI samting i gat wan taem we i stret long hem. Yes, i gat wan taem blong evri samting aninit long heven.” (Pri. 3:1, NW) Solomon i stap tokbaot se yumi mas luksave wanem taem we i stret blong mekem wan gudfala samting, olsem maet wok long garen, wokbaot i go long narafala ples, mekem bisnes, mo storian wetem ol narafala. Be oltaem long laef blong yumi, yumi mas luksave tu wanem wok we i impoten moa blong mekem. Yes, yumi mas kasem save gud long wanem wok we i mas stap long fasples long laef blong yumi.

2. ?Wanem i soemaot we Jisas i save gud se taem ya we hem i stap prij long wol, i impoten tumas?

² Jisas i save gud se taem ya we hem i stap long wol i impoten tumas, mo hem i save wanem we hem i mas mekem. Hem i kasem save long samting we i mas stap long fasples long laef blong hem. Hem i save se naoia i taem blong ol profet tok long saed blong Mesaea oli kamtru. Hemia wan samting we longtaem finis i kam ol man oli stap wet long hem. (1 Pita 1:11; Rev. 19:10) Hem i mas mekem plante samting, blong soemaot klia long ol man se hem nao Mesaea ya we Baebol i promes se bambae i kam. Hem i mas givim witnes long saed blong trutok blong Kingdom mo i mas hivimap ol man we bambae oli rul wetem hem long Kingdom ya. Mo hem i mas stanemap Kristin kongregesen we bambae i gohed long wok ya blong prij mo pulum ol man long olgeta ples long wol, blong oli kam disaepol.—Mak 1:15.

3. ?Save we Jisas i gat long saed blong taem ya we hem i stap long wol, i pulum hem blong mekem wanem?

³ Save ya we Jisas i gat long saed blong taem ya we hem i stap long wol, i givhan bigwan long hem. Mo i pulum hem blong wok olsem we faea i laet long tingting blong hem, blong mekem samting we Papa blong hem i wantem. Hem i talem long ol disaepol blong hem se: “Tru, i gat plante kakae tumas i stap long garen we i rere finis, be smol man nomo oli stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” (Luk 10:2; Mal. 4:5, 6) Jisas i jusum 12 man blong hem, mo biaen i jusum 70 man, i givim sam advaes long olgeta mo i sanem olgeta oli go prij. Oli mas talemaot long ol man se: “Taem blong God i kam King blong olgeta man long wol [“Kingdom blong heven,” NW], i kam klosap finis.” Long saed blong Jisas, Baebol i talem se: “Taem Jisas i talem ol tok ya finis long ol twelef man blong hem, hem i aot long ples ya, i go long ol taon long distrik ya, blong i tijim ol man, mo blong i prij long olgeta.”—Mat. 10:5-7; 11:1; Luk 10:1.

4. ?Olsem wanem Pol i folem fasin blong Jisas Kraes?

⁴ Jisas i wan nambawan eksampol long fasin blong fasgud long Jehova mo blong wok olsem we faea i laet long tingting blong hem. Hemia nao wanem we aposol Pol i tokbaot long ol narafala Kristin se: “Oltaem, yufala i mas folem fasin blong mi, olsem we mi mi stap folem fasin blong Kraes.” (1 Kor. 11:1) ?Olsem wanem Pol i folem fasin blong Kraes? Bigfala samting se Pol i mekem evri samting we hem i naf blong mekem, blong talemaot gud nius. Long ol leta we hem i raetem i go long ol kongregesen, hem i talem ol toktok olsem, “yufala i no mas mekem wok blong yufala long fasin we yufala i stap les,”  “yufala i mas wok olsem ol slef blong Jehova,” “oltaem yufala i mas wok strong long ol wok ya blong Masta,” mo “long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi.” (Rom 12:11, NW; 1 Kor. 15:58; Kol. 3:23) Pol i no fogetem taem ya we Masta Jisas Kraes i kamtru long hem long rod we i go long Damaskes. Mo hem i no fogetem ol tok blong Jisas we maet disaepol Ananaeas i talemaot long hem, se: “Mi mi jusumaot hem finis, blong hem i man blong wok blong mi. Hem bambae i talemaot nem blong mi long ol man we oli no laen blong Isrel, mo long ol king, mo long ol laen blong Isrel tu.”—Wok 9:15; Rom 1:1, 5; Gal. 1:16.

“Naoia i Taem Blong God i Givhan Long Man”

5. ?Wanem i givhan long Pol blong i prij olsem we faea i laet long tingting blong hem?

⁵ Long buk blong Ol Wok, yumi luksave se Pol i no fraet mo i stap prij olsem we faea i laet long tingting blong hem. (Wok 13:9, 10; 17:16, 17; 18:5) Pol i luksave se taem ya we hem i stap laef long hem, i impoten tumas. Hem i talem se: “Naoia i taem blong God i givhan long man. Tede i dei blong hem i sevem man.” (2 Kor. 6:2) Longtaem bifo we Pol i raetem ol tok ya, ol man Isrel we oli kalabus long Babilon, oli gobak long ples blong olgeta. Samting ya we i hapen long yia 537 B.K.T., * i wan taem blong God i givhan long man. (Aes. 49:8, 9) ?Be Pol i minim wanem long vas ya? Ol tok we Pol i talem bifo mo afta long vas ya, oli givhan long yumi blong kasem save long tingting blong hem.

6, 7. ?Ol Kristin we tabu spirit i makemaot olgeta tede, oli kasem wanem bigfala blesing? ?Mo hu i joen blong wok wetem ol Kristin ya we tabu spirit i makemaot olgeta?

⁶ Bifo we Pol i raetem vas ya, hem i tokbaot wan bigfala blesing we hem mo ol narafala Kristin we tabu spirit i makemaot olgeta, oli kasem. (Ridim 2 Korin 5:18-20.) Hem i talem se God i jusumaot olgeta blong oli mekem wan spesel wok, hemia blong ‘pulum ol man oli kam, oli fren blong hem.’ Mo oli mas talem long ol man se: “Plis, yufala i letem God i tanem yufala, yufala i no moa enemi blong hem, yufala i kam fren blong hem.” Hemia i min se oli givhan long ol man blong oli frengud wetem God mo oli stap long pis wetem Hem.

⁷ Stat long faswan fasin stronghed long Iden, ol man oli stap longwe long Jehova, oli enemi blong hem. (Rom 3:10, 23) Samting ya i mekem se olgeta man oli no save long Jehova mo stamba tingting blong hem, i olsem se oli stap long tudak nomo, ale oli stap harem nogud mo oli stap ded. Pol i raetem se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud.” (Rom 8:22) Be God i mekem sam samting blong pulum ol man oli kambak long hem, yes hem i “plis” long olgeta blong oli fren wetem hem. Hemia nao wok we God i putum long han blong Pol mo ol narafala fren blong hem, we tabu spirit i makemaot olgeta. “Taem blong God i givhan” long ol man, bambae i kam olsem “dei blong hem blong sevem” ol man we oli bilif long Jisas tu. Olgeta Kristin we tabu spirit i makemaot olgeta, wetem ol fren blong olgeta, “ol narafala sipsip,” oli wok wanples mo oli gohed blong singaot ol narafala, blong olgeta tu oli kasem blesing long ‘taem ya blong God i givhan long man.’—Jon 10:16.

8. ?Taem God i singaot ol man blong oli fren wetem hem, from wanem hemia i wan bigfala samting?

⁸ Taem God i singaot ol man blong oli fren wetem hem, hemia i wan bigfala samting. Yumi mas tingbaot se man nao i mekem stronghed long garen blong Iden, ale from samting ya, ol man oli no moa fren wetem God. Nating se i fol blong man, be God nao i askem fastaem long ol man blong oli kambak long hem. (1 Jon 4:10, 19) ?Hem i mekem wanem? Pol i ansa se: “God i mekem rod long Kraes blong tekem ol man long wol oli kam, oli fren blong hem. Naoia hem i no moa makem kaon blong ol sin blong olgeta. Mo hem i givim tok ya long mifala blong talemaot, se God i mekem rod finis, blong olgeta man oli save kam fren blong hem.”—2 Kor. 5:19; Aes. 55:6.

9. ?Pol i mekem wanem blong talem tangkiu long God from bigfala sore blong hem?

⁹ Jehova i givim pikinini blong hem blong i ded olsem wan sakrefaes. Long rod ya, God i mekem se hem i save fogivim sin blong ol man we oli bilif long sakrefaes ya, mo oli save fren wetem hem. Mo tu, God i sanem ol man blong hem blong oli go toktok long ol man long olgeta ples, mo pulum olgeta blong oli mekem pis wetem Hem naoia we i gat taem yet i stap. (Ridim 1 Timoti 2:3-6.) Pol i kasem save long samting we God i wantem, mo hem i kasem save se taem ya we hem i stap laef long hem i impoten tumas. From samting ya, hem i wok olsem we faea i laet long tingting blong hem, ‘blong pulum ol narafala  man oli kam fren blong God.’ Samting we Jehova i wantem, i no jenis. Tede yet, hem i wantem se ol man oli fren wetem hem. Ol tok ya we Pol i talem se, “naoia i taem blong God i givhan long man” mo se “tede i dei blong hem i sevem man,” i tru yet long taem blong yumi. !Yes, Jehova i wan God we i gat bigfala sore!—Eks. 34:6, 7.

Yumi No Mas ‘Letem Gudfala Wok Ya Blong Hem i Go Nating Nomo’

10. ?Ol Kristin we tabu spirit i makemaot olgeta bifo mo tede, oli kasem save se oli gat wanem wok blong mekem, long ‘dei blong God i sevem man’?

¹⁰ Ol fas man we oli kasem blesing from gladhat ya blong God, hemia olgeta we ‘God i joenem olgeta long Kraes.’ (2 Kor. 5:17, 18) Olgeta ya, ‘dei blong God i sevem olgeta’ i stat long Pentekos blong yia 33 K.T. Stat long taem ya, olgeta oli gat wan wok blong mekem. Oli mas “talemaot, se God i mekem rod finis, blong olgeta man oli save kam fren blong hem.” Tede, ol Kristin we tabu spirit i makemaot olgeta mo oli stap yet long wol ya, oli stap gohed long “wok ya blong pulum ol narafala man oli kam fren blong [God].” Oli luksave se ol fofala enjel we aposol Jon i luk long vison, oli stap “blokem ol fo win long wol, nao i no gat win i blu long graon.” Taswe, tede yet, hem i ‘dei blong God i sevem man’ mo hem i ‘taem blong givhan long man.’ (Rev. 7:1-3) From samting ya, stat long ol yia 19 handred, ol Kristin long wol ya we tabu spirit i makemaot olgeta, oli wok olsem we faea i laet long tingting blong olgeta, “blong pulum ol narafala man oli kam fren blong [God].” Mo oli traehad blong kasem ol man long olgeta ples long wol.

11, 12. ?Long stat blong ol yia 1900, wanem i soemaot se ol Kristin we tabu spirit i makemaot olgeta, oli kasem save se taem ya we oli laef long hem i impoten tumas?

¹¹ Yumi traem tingbaot buk ya Jehovah’s Witnesses—Proclaimers of God’s Kingdom. Hem i talem se klosap long ol yia 1900, “C.T. Russell mo ol fren blong hem, oli bilif strong se oli laef long taem blong tekem kakae long garen mo se ol man oli mas harem trutok we i save mekem oli kam fri.” ?Oli mekem wanem? Olgeta oli kasem save se oli laef long taem blong hivimap kakae long garen, yes long wan “taem blong God i givhan long man.” Ale, ol brata ya oli go singaotem ol man oli kam. Be oli no singaot ol man oli kam nomo blong lesin long wan seves blong jos, nogat. Hemia nao samting we ol lida blong ol jos we oli giaman se oli Kristin, oli stap mekem. Ol brata ya we tabu spirit i makemaot olgeta, oli faenem sam narafala rod blong talemaot gud nius. Sam long ol rod ya, hemia ol masin we ol man oli wokem. Ol brata ya oli yusum ol masin ya long waes fasin, blong mekem se wok blong olgeta i gohed moa.

¹² Smol grup blong ol Kristin ya, oli wantem se plante moa man oli kasem save long gud nius blong Kingdom. Ale oli yusum ol smosmol pepa, magasin mo buk. Mo tu, oli raetemdaon sam pablik tok mo sam save blong Baebol long ol pepa, mo oli givimaot long plante taosen niuspepa, blong oli printim olgeta. Mo oli wokem ol program blong tokbaot Baebol long radio, blong plante man long kantri blong olgeta mo long ol narafala ples tu oli save lesin long ol program ya. Oli wokem ol foto mo ol pija we oli save mufmuv mo oli rikodem ol saon, biaen oli mekem ol saon ya oli plei long semtaem we ol foto mo pija ya oli stap muv. Oli wokem ol samting ya bifo we ol bigfala bisnes blong sinema oli faenemaot wei blong wokem ol muvi we i gat voes i joen wetem ol pija. Ol Kristin long ol yia ya oli wok olsem we faea i laet long tingting blong olgeta. ?Wanem frut i kamaot from hadwok blong olgeta? Tede, i gat samwe long seven milian man we oli lesin long tok ya se: “Yufala i kam fren blong [God].” Mo olgeta tu oli talem sem tok ya blong singaot ol narafala bakegen oli kam. I tru tumas, ol man ya blong Jehova oli soemaot gudfala eksampol blong wok olsem we faea i laet long tingting blong olgeta, nating se long taem ya, oli no gat plante samting blong givhan long olgeta long wok ya.

13. ?Yumi mas tingting gud se gladhat blong God i blong mekem wanem?

¹³ Tok ya blong Pol se “naoia i taem blong God i  givhan long man,” i tru yet long taem blong yumi. Yumi tede, yumi luk olsem wanem Jehova i givhan long yumi long gladhat blong hem. Taswe yumi talem tangkiu long hem, from we hem i givim janis long yumi blong harem mo obei long tok ya we i singaot yumi blong fren wetem hem. Yumi no mas ting nating long blesing ya. Defren olgeta, yumi mas tingting gud long ol tok ya blong Pol, we i talem se: “Mifala i talem long yufala bakegen, se God i givhan long yufala finis, long gladhat blong hem. Plis yufala i no letem gudfala wok ya blong hem i go blong nating nomo.” (2 Kor. 6:1) Bigfala risen from wanem God i givhan long ol man long gladhat blong hem, hemia from we hem i wantem “mekem rod long Kraes blong tekem ol man long wol oli kam, oli fren blong hem.”—2 Kor. 5:19.

14. ?Wanem jenis we i stap kamaot naoia long plante kantri?

¹⁴ Setan i satem tingting blong bighaf blong ol man long wol, mekem se oli stap longwe long God mo oli no save risen from wanem God i givhan long ol man long gladhat blong hem. (2 Kor. 4:3, 4; 1 Jon 5:19) Be ol fasin blong wol we oli stap kam moa nogud, oli mekem se plante man oli lesin taem yumi prij. Yumi soemaot long olgeta se ol rabis fasin ya, wetem ol samting we oli stap mekem ol man oli harem nogud, oli kamaot from we ol man oli stap longwe long God. Long ol kantri tu we bifo, bighaf blong ol man oli no intres long gud nius, be naoia plante long olgeta oli lesin mo oli mekem sam samting blong oli save fren wetem God. ?Olsem wanem long yumi? ?Yumi kasem save se naoia i taem blong yumi wok olsem we faea i laet long tingting blong yumi, blong singaot ol man oli kam ‘fren blong God’?

15. Yumi no go prij blong talemaot ol tok we i mekem man i harem gud nomo, ?be yumi wantem se ol man long evri ples oli save long wanem samting?

¹⁵ Wok blong yumi i no blong talem nomo long ol man se sipos oli lukluk i go long God, hem bambae i givhan blong stretem ol problem blong olgeta, mo bambae oli harem gud. Hemia nao wanem we plante man oli wantem harem taem oli go long ol jos, mo ol jos oli yusum ol tok olsem. (2 Tim. 4:3, 4) Hemia i no samting we yumi wantem mekem taem yumi go prij. Yumi talemaot gud nius ya se Jehova i lavem ol man tumas, nao from sakrefaes blong Jisas, Hem i glad blong fogivim sin blong olgeta. Long rod ya, olgeta man wanwan oli save mekem sam samting blong oli no moa stap longwe long God, be oli kam fren blong hem. (Rom 5:10; 8:32) Be ‘taem ya blong God i givhan long man’ i stap kam klosap moa long en blong hem.

“Tabu Spirit i Mas Fulap Long Yufala”

16. ?Wanem i givhan long Pol blong i no fraet mo i prij olsem we faea i laet long tingting blong hem?

¹⁶ ?Long saed blong tru wosip, yumi mas mekem wanem blong wok olsem we faea i laet long tingting blong yumi? ?Mo yumi mas mekem wanem blong faea ya i laet oltaem? Sam long yumi oli gat fasin blong sem mo oli no toktok plante, mo oli harem se i no isi blong talemaot tingting blong olgeta mo blong fren wetem ol narafala. Be i gud blong tingbaot se taem wan man i wok olsem we faea i laet long tingting blong hem, hemia i no min se hem i soemaot wan glad we i bitim mak long fes blong ol man. Mo man i save wok olsem we faea i laet long tingting blong hem, nomata we prapa fasin blong hem i no olsem. Pol i soemaot long ol narafala Kristin, olsem wanem blong gat fasin ya mo gohed long fasin ya. Hem i talem se: “Yufala i mas glad, tabu spirit i mas fulap long yufala.” (Rom 12:11, NW) Spirit blong Jehova i givhan bigwan long aposol Pol blong hem i no fraet mo i stanap strong long wok blong prij. Bitim 30 yia, fasin ya blong hem i no godaon nating. Pol i wok olsem we faea i laet long tingting blong hem, stat long taem ya we Jisas i kamtru long hem long rod blong Damaskes, i go kasem nambatu taem we hem i go kalabus long Rom mo oli kilim hem i ded. Oltaem Pol i lukluk i go long God mo God i givim spirit long hem blong mekem hem i kam strong. Pol i talem se: “Mi mi naf blong mekem evri samting from we hem i stap givim paoa long mi.” (Fil. 4:13, NW) !Sipos yumi letem eksampol blong hem i tijim yumi, yumi save kasem plante gudfala samting from!

17. ?Yumi mas mekem wanem blong ‘tabu spirit i fulap long yumi’?

¹⁷ Long Rom 12:11, Pol i yusum wan Grik tok we i minim “boel.” Blong wota i boel, yumi mas mekem se faea i laet oltaem. Long sem fasin, sipos yumi wantem se ‘tabu spirit i fulap long yumi,’ yumi mas kasem spirit blong God oltaem. Blong kasem spirit ya, yumi mas yusum gud evri samting we Jehova i givim blong mekem bilif blong yumi i strong. Hemia i min se yumi mas tinghevi long famle wosip mo long wosip we yumi mekem wetem kongregesen. Yes yumi mas stadi oltaem yumi wan mo wetem famle blong yumi, mo yumi mas joen oltaem wetem ol Kristin brata sista long ol miting. Samting ya i save givhan  blong mekem ‘tabu spirit i fulap long yumi,’ olsem we faea i givhan blong mekem wota i boel.—Ridim Ol Wok 4:20; 18:25, NW. *

18. ?Yumi ol Kristin, yumi mas putum olgeta tingting blong yumi i stap long wanem samting?

¹⁸ Wan man we i givim laef blong hem long God mo i baptaes, hem i wan man we i putum olgeta tingting blong hem long wan samting nomo. Mo hem i no save letem wan narafala samting i pulum no slakem tingting blong hem. Yumi ol Kristin, mak blong yumi i blong mekem olgeta samting we Jehova i wantem yumi blong mekem, mo yumi putum tingting blong yumi i stap long mak ya nomo, olsem we Jisas i mekem. (Hib. 10:7) Tede, Jehova i wantem se plante moa man oli fren wetem hem. Taswe, i gud we yumi folem fasin blong Jisas mo Pol. I gud we yumi mekem impoten wok ya olsem we faea i laet long tingting blong yumi. Wok ya nao we yumi mas hareap blong mekem tede.

[Ol futnot]

?Yu Yu Tingbaot?

• Pol mo ol Kristin we tabu spirit i makemaot olgeta, oli mas “talemaot se God i mekem rod finis, blong olgeta man oli save kam fren blong hem.” ?Oli mekem samting ya olsem wanem?

• ?Ol Kristin we tabu spirit i makemaot olgeta mo oli stap yet long wol ya, oli mekem wanem blong yusum gud ‘taem ya blong God i givhan long man’?

• ?Wanem i mekem we ‘tabu spirit i fulap’ long ol Kristin?

[Kwestin]

[Tok blong pija long pej 18]

Pol i no fogetem taem ya we Masta Jisas Kraes i kamtru long hem long rod we i go long Damaskes