Wan Kwestin

Long Jenesis 6:3, yumi ridim se: “I nogud mi letem laef blong mi i stap olwe long ol man ya. Olgeta oli man blong wol nomo, we oli save ded. I stat naoia, bambae oli save stap kasem wan handred twanti yia nomo.” ?Olsem wanem? ?Jehova i letem ol man long taem ya oli laef go kasem 120 yia nomo? ?Mo Noa i talemaot woning long saed blong Bigfala Wota ya blong 120 yia?

Ansa blong tufala kwestin ya se nogat.

Bifo we Bigfala Wota i ron, laef blong plante man i longfala moa, i go kasem plante handred yia. Noa i gat 600 yia taem Bigfala Wota i ron, mo hem i gat 950 yia taem hem i ded. (Jen. 7:6;  9:29) Afta long Bigfala Wota ya, sam man oli laef bitim 120 yia. Apaksad i gat 438 yia, mo Sela i gat 433 yia, taem tufala i ded. (Jen. 11:10-15) Be long taem blong Moses, ol man oli kasem 70 no 80 yia nomo. (Sam 90:10) Taswe Jenesis 6:3 i no stap talem se ol man oli save laef go kasem 120 yia nomo.

?Ale, vas ya, hemia tok we God i talem long Noa, blong hem i mas givim woning long ol man se bambae hem i spolem olgeta long 120 yia? Nogat. I tru, plante taem God i toktok long Noa. Yumi save ridim samting ya long ol vas we oli kam biaen. “God i talem long Noa se: ‘Noa. Mi mi tingbaot finis blong mekem lasdei blong olgeta man blong wol. Bambae mi spolem wol ya wetem olgeta man ya evriwan, from we olbaot long evri ples, ol man ya oli stap faet mo oli stap kilim man i ded.’” Sam yia biaen, Noa i finisim gud bigfala wok ya blong bildim sip, mo stret long taem ya nao “God i talem long Noa se: ‘Noa. Naoia, yu wetem woman blong yu mo olgeta pikinini blong yu, yufala i mas go insaed long sip ya.’” (Jen. 6:13; 7:1) Mo i gat sam narafala taem bakegen we Jehova i toktok long Noa blong givim save long hem.—Jen. 8:15; 9:1, 8, 17.

Be Jenesis 6:3 i no tokbaot Noa, mo i no talem se God i stap toktok long Noa. Taswe yumi kasem save se long vas ya God i stap talemaot stamba tingting blong hem, hemia samting we hem i wantem mekem. (Skelem wetem Jenesis 8:21.) I gud blong makem se, taem Baebol i tokbaot ol samting we oli kamaot longtaem bifo long taem blong Adam, hem i talem ol tok olsem: “God i tok bakegen, i talem se.” (Jen. 1:6, 9, 14, 20, 24) I klia se, Jehova i no stap toktok long wan man long wol, from we long taem ya God i no wokem wan man yet.

Taswe, i stret nomo blong talem se Jenesis 6:3 i tokbaot tingting we God i gat, hemia blong finisim ol rabis fasin blong wol. Jehova i mekem desisen se bambae hem i jajem ol man long en blong 120 yia ya, nating se long taem ya Noa i no save samting ya yet. ?From wanem Jehova i putum stret taem ya blong finisim ol trabol? ?From wanem hem i wet?

Aposol Pita i givim risen se: “Hemia [ol man] ya we long taem blong Noa, taem hem i stap wokem bigfala sip blong hem, God i stap wet long olgeta, we tingting blong hem i longfala, be olgeta oli no obei long hem. Nao long sip ya i gat eit man nomo, we God i yusum wota blong sevem olgeta.” (1 Pita 3:20) Yes, taem God i mekem desisen long samting ya we bambae hem i mekem long en blong 120 yia ya, i gat wok yet blong mekem. Samwe 20 yia biaen, Noa mo woman blong hem tufala i gat ol pikinini blong tufala. (Jen. 5:32; 7:6) Tri pikinini boe blong tufala oli gruap mo oli mared, i mekem se i gat “eit man” long famle blong Noa. Biaen oli mas bildim sip. Yu traem tingbaot, famle blong Noa i smol nomo, mo sip ya i bigwan tumas, wok ya bambae i tekem taem. Yes, longfala tingting blong God long ol 120 yia ya, i givim janis long ol eit man ya blong oli finisim gud sip ya, we i “sevem olgeta” taem bigfala wota i draonem wol ya.

Jehova i talemaot long Noa se Bigfala Wota bambae i ron, be Baebol i no talemaot stret yia we Jehova i bin toktok wetem Noa. Ol pikinini blong Noa oli bon, oli gruap, mo oli mared finis. Ating i gat 40 no 50 yia nomo i stap bifo we Bigfala Wota i ron. Nao Jehova i talem long Noa se: “Noa. Mi mi tingbaot finis blong mekem lasdei blong olgeta man blong wol.” Hem i gohed moa, i talem long Noa blong bildim wan bigfala sip, we hem mo famle blong hem oli save go insaed. (Jen. 6:13-18) Long ol yia we oli stap yet, Noa i soemaot stret fasin long laef blong hem, be i no hemia nomo. Hem i wan “prija we i stap talemaot stret fasin.” Mo hem i talemaot woning we i klia long ol man, se God bambae i spolem olgeta we oli no wantem obei long Hem. Noa i no bin save fastaem finis stret taem we wota bambae i ron, be hem i save se samting ya bambae i kamtru. Mo yu tu, yu save se samting ya i kamaot olsem God i talem.—2 Pita 2:5.