?Yumi Save Toktok Long Olgeta?

GOD ya we i gat olgeta paoa, hem i givim sam wok long ol narafala we oli stap long heven. God i givim wok long Jisas Kraes blong hem i rulum wol, mo hem i jusum sam enjel we oli obei, blong oli givhan blong lidim wok blong talemaot gud nius. (Revelesen 14:6) Be long saed blong prea, God i no mekem olsem. Hem i no givim wok ya blong lesin long ol prea blong yumi, long wan narafala man. Nogat. Taswe, yumi mas prea i go long God nomo, i no long wan narafala man bakegen.

Jehova i “stap ansa long ol prea.” (Ol Sam 65:2) Hem i harem ol prea blong yumi, mo hem i ansa long olgeta. Long wan leta we aposol Jon i raetem long ol man blong Jehova, hem i tokbaot prea se: “Sipos yumi askem samting long [God] we i stret long tingting blong hem, hem bambae i harem prea blong yumi. Mo sipos yumi save se oltaem hem i stap harem prea blong yumi, oraet, yumi save se evri samting we yumi askem long hem, oli blong yumi finis.”—1 Jon 5:14, 15.

Ol enjel we oli obei gud long God oli no wantem yumi blong traem toktok wetem olgeta mo prea long olgeta. Oli kasem save long plan ya blong prea we God i stanemap mo oli wok gud folem plan ya. Samtaem God i yusum olgeta blong ansa long prea blong yumi. ?Long wanem rod? Traem tingbaot samting we i hapen taem profet  Daniel i prea long Jehova from we Jerusalem i stap olsem ples nating nomo. God i ansa long prea blong Daniel taem hem i sanem wan enjel we nem blong hem Gabriel, i kam blong talem ol gudfala tok long Daniel blong leftemap tingting blong hem.—Daniel 9:3, 20-22.

?Ol Dedman Oli Save Toktok Long Yumi?

?Olsem wanem? ?I stret blong traem toktok wetem olgeta we oli ded? I gat plante stori long saed blong ol man we oli talem se oli toktok wetem ol spirit blong ol dedman. Long kantri ya Aealan, wan kleva i talem long wan woman se, las naet hem i toktok wetem Fred, we i man blong woman ya. Be Fred i ded sam wik bifo finis. Kleva i talem long woman ya sam samting we “Fred” i talem, hemia ol samting we woman ya i ting se hem nomo i save. Ating i isi long woman ya blong gat tingting ya se Fred i laef olsem wan spirit samples mo i sanem kleva ya blong karem toktok i kam long hem. Be tingting ya i no laenap nating wetem ol tok blong Baebol, we i talem klia wanem i hapen long man taem hem i ded.—Lukluk bokis we i stap daon.

Sipos tingting ya i no laenap wetem Baebol, ?from wanem sam man oli talem se oli toktok wetem man we i ded? Wan rod we ol rabis enjel oli yusum blong giaman long ol man, hemia blong tekem fasin mo voes olsem man ya we i ded. Olsem nao, ol rabis enjel oli giaman se Fred i laef yet samples. ?From wanem oli mekem olsem? Oli wantem se ol man oli gowe long tijing blong Baebol, mo oli wantem mekem bilif blong olgeta long Jehova i kam slak, nao oli no moa trastem hem. Yes i tru tumas, Setan mo ol rabis enjel oli lidim ol man oli go krangke, ‘oli wokem ol naranarafala merikel mo giaman saen mo ol samting blong sapraes. Oli yusum evrikaen trik we oli no stret, blong oli giaman long ol man ya we oli blong lus.’—2 Tesalonaeka 2:9, 10.

 I tru se sam kleva mo man we i joen long wok blong olgeta, oli bilif strong se oli stap toktok long ol man we oli ded finis. Be blong talem stret, oli no stap toktok long ol man we oli ded, oli stap toktok long ol spirit we oli agensem Jehova. Long sem fasin, samfala oli bilif strong se oli stap wosipim God, be sore tumas, i no tru. Tabu spirit i pulum aposol Pol blong raetemdaon ol strong tok ya se: “Taem oli mekem sakrefaes, oli no mekem long God, oli mekem long ol devel nomo.”—1 Korin 10:20, 21.

Yu save prea long God ya we i Hae olgeta, i lavem yu mo i tingbaot yu. ?Weswe yu wantem prea long wan narafala man bakegen? Baebol i mekem promes ya se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”—2 Kronikel 16:9.

[Tok blong makem poen long pej 9]

Yu save prea long God ya we i Hae olgeta, i lavem yu mo i tingbaot yu. ?Weswe yu wantem prea long wan narafala man bakegen?

[Bokis/Tok blong pija long pej 8, 9]

?I Tru No i Giaman?

I TRU: SETAN I STAP

“Nating we Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.”—2 Korin 11:14.

“Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.”—1 Pita 5:8.

“Man we i stap mekem sin oltaem, hem i man blong Setan, from we Setan i stap mekem sin oltaem, i stat bifo olgeta.”—1 Jon 3:8.

“Nao from samting ya, yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.”—Jemes 4:7.

“Oltaem yufala i wantem mekem ol samting we [Setan] i wantem. Fasin blong hem we i stat bifo olgeta, hem i man blong kilim man. Neva hem i stap wetem olgeta we oli tok tru, from we i no gat trutok nating long hem. Taem hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.”—Jon 8:44.

I GIAMAN: TAEM MAN I DED, SPIRIT BLONG HEM I LAEF SAMPLES

“Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.”—Jenesis 3:19.

“Ol man we oli laef yet oli save se bambae oli ded, be ol man we oli ded finis oli no moa save wan samting. Oli no moa save kasem pei blong ol samting we oli stap mekem, mo ol man oli fogetem olgeta finis.”—Prija 9:5.

“Wanem samting we yumi stap mekem, yumi mas strong long hem long fulpaoa blong yumi, from we bambae i no gat wok, mo tingting, mo save, mo waes long Hom blong ol Dedman [no beregraon], mo hemia nao ples we bambae yumi go long hem.”—Prija 9:10.

“Taem oli ded, oli stap gobak long graon nomo, nao ol plan blong olgeta oli no save kamtru.”—Ol Sam 146:4.

I TRU: OL GUDFALA ENJEL OLI TINGBAOT YUMI

“Oltaem enjel blong hem i stap lukaot gud long olgeta we oli ona long hem, mo i stap tekemaot olgeta long trabol.”—Ol Sam 34:7; 91:11.

“Ol enjel ya, oli spirit nomo, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.”—Hibrus 1:14.

“Nao mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis. Hem i stap singaot bigwan, i talem se, ‘Yufala i mas ona gud long God, mo yufala i mas leftemap nem blong hem.’”—Revelesen 14:6, 7.

I GIAMAN: PAOA BLONG JISAS I SEM MAK LONG PAOA BLONG GOD

“I gat wan tok we mi wantem yufala i savegud mining blong hem. God, hem i hed blong Kraes, mo Kraes, hem i hed blong man, mo man, hem i hed blong woman blong hem.”—1 Korin 11:3.

“Fastaem God bambae i putum olgeta samting oli stap aninit long paoa blong Kraes. Nao biaen, Kraes ya we i Pikinini blong God, hem nomo bambae i putum hem i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.”—1 Korin 15:28.

“Tru mi talem long yufala. Mi mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem. Ol samting we Papa blong mi i mekem, mi tu mi mas mekem.”—Jon 5:19.