Long Olgeta Hat Blong Yu, Yu Mas Laekem Ol Fasin We i Stret

“Yu yu laekem ol fasin we i stret.”—SAM 45:7.

1. ?Wanem samting bambae i givhan long yumi blong wokbaot long “rod blong stret fasin”?

JEHOVA i yusum Tok blong hem mo tabu spirit blong hem, blong lidim ol man blong hem long ol “rod blong stret fasin.” (Sam 23:3, NW) From we yumi sinman, samtaem yumi gowe long rod ya. Be sipos yumi wantem kambak mo mekem samting we i stret, yumi mas traehad bigwan. ?Wanem samting bambae i givhan long yumi? Yumi mekem olsem Jisas, yumi mas laekem blong mekem samting we i stret.—Ridim Ol Sam 45:7.

2. ?Wanem ya “rod blong stret fasin”?

² ?Wanem ya “rod blong stret fasin”? “Rod” we vas ya i tokbaot, i minim laef blong yumi we yumi mekem i laenap wetem ol stamba rul blong Jehova long saed blong stret fasin. Long lanwis Hibru mo Grik, tok ya “fasin we i stret” i givim tingting se man i folem gud ol loa blong God long Baebol. Jehova hem i God ya we ‘stret fasin i stap long hem oltaem.’ Taswe, ol man we oli wosipim hem oli glad blong lukluk i go long hem, blong hem i talem long olgeta, ol fasin we oli stret we oli mas folem long laef blong olgeta.—Jer. 50:7, NW.

3. ?Yumi mas mekem wanem blong yumi save lanem moa long ol fasin blong God we oli stret?

³ Sipos yumi traehad wetem fulhat blong yumi blong folem gud ol stret rul blong God, hem bambae i glad we i glad long yumi. (Dut. 32:4) Blong mekem olsem, fastaem, yumi mas stadi long Tok blong Jehova long Baebol, blong yumi lanem plante save long saed blong hem. Taem yumi lanem moa long saed blong God, yumi kam klosap moa long hem evri dei, mo bambae yumi laekem moa ol fasin blong hem we oli stret. (Jem. 4:8) Mo tu, taem yumi mekem sam bigfala desisen long laef blong yumi, yumi mas letem Tok blong God long Baebol i lidim yumi.

Yu Mas Folem Ol Stret Fasin Blong God

4. ?Yumi mas mekem wanem sipos yumi wantem folem stret fasin blong God?

⁴ Ridim Matiu 6:33. Blong folem stret fasin blong God, yumi mas spenem taem blong yumi long wok blong talemaot gud nius blong Kingdom. Be hemia nomo i no naf. Sipos yumi wantem se Jehova i glad long tabu wok blong yumi, ol fasin we yumi mekem evri dei oli mas laenap wetem ol stret rul blong hem. ?Olgeta man we oli wantem folem stret fasin blong Jehova, oli mas mekem wanem? Oli mas ‘kam niufala man, we God i mekem olgeta oli kam olsem hem. Nao bambae ol man oli save luksave se laef blong olgeta i folem trutok blong hem, mo i stret gud, i tabu, i blong hem nomo.’—Efes. 4:24.

5. ?Wanem samting bambae i givhan long yumi taem tingting blong yumi i foldaon?

⁵ Taem yumi stap traehad blong mekem laef blong yumi i laenap wetem ol stret rul blong God, samtaem tingting blong yumi i save foldaon from ol slak fasin blong yumi. ?Wanem samting i save givhan long yumi taem tingting blong yumi i foldaon? ?Mo wanem samting i save givhan long yumi blong laekem mo folem ol fasin we i stret? (Prov. 24:10) Oltaem yumi mas kam klosap long Jehova long prea, “we tingting blong yumi i klin, mo bilif blong yumi i strong.” (Hib. 10:19-22) Nomata sipos yumi Kristin we tabu spirit i makemaot yumi, no yumi gat hop blong laef olwe long wol, be yumi bilif long ransom sakrefaes blong Jisas Kraes mo long ol wok blong hem olsem Hae Pris blong yumi. (Rom 5:8; Hib. 4:14-16) Aposol Jon i raetem se: “Blad blong Jisas, . . . bambae i stap wasemaot olgeta sin blong yumi, i stap mekem yumi klin.” (1 Jon 1:6, 7) Baebol i talem se nating sipos ol sin blong yumi oli “red we i red, be bambae oli save kam waet olsem sno.” !I gud tumas we Jehova i givim pikinini blong hem blong i ded mo i pemaot ol sin blong yumi!—Aes. 1:18, NW.

Yu Mas Jekem Ol Klos Blong Faet Blong Yu Long Saed Blong Spirit

6. ?From wanem i impoten tumas we yumi mas jekem ol klos blong faet blong yumi long saed blong spirit?

⁶ Oltaem yumi “mas holem stret fasin. Hemia i olsem  klos blong faet we oli wokem long aean.” Klos ya, hem i wan impoten haf blong ol klos blong faet long saed blong spirit we God i givim. (Efes. 6:11, 14) I impoten tumas we evri dei, yumi jekem ol klos blong faet blong yumi long saed blong spirit. Yumi mas mekem olsemia, nomata we yumi jes baptaes nomo, no yumi mekem wok blong God plante yia finis. ?From wanem? From we Jisas i sakemaot Setan mo ol rabis enjel blong hem, oli kamdaon long wol. (Rev. 12:7-12) Setan i kros tumas, mo hem i save se hem i gat smol taem nomo i stap. Taswe, hem i gohed strong moa blong agensem ol man blong God. From samting ya, i impoten tumas we yumi holem stret fasin, we i olsem klos ya blong faet we oli wokem long aean.

7. ?Sipos yumi luksave se yumi nidim ‘stret fasin, we i olsem klos blong faet we oli wokem long aean,’ bambae yumi mekem wanem?

⁷ Wan prapa klos blong faet we oli wokem long aean, i save protektem hat blong soldia we i stap faet. Sem mak, stret fasin i save protektem hat mo tingting blong yumi. From we yumi sinman, hat blong yumi i save giaman long yumi mo i wantem win oltaem. (Jer. 17:9, NW) Hat blong yumi i pulum yumi blong mekem samting we i rong, taswe i impoten tumas we yumi trenem hat blong yumi, mo yumi stretem hem. (Jen. 8:21) Sipos yumi luksave se yumi nidim ‘stret fasin, we i olsem klos blong faet we oli wokem long aean,’ bambae yumi no tekemaot klos ya, nating se i blong smoltaem nomo. Bambae yumi no jusum ol pleplei we God i no laekem nating, mo bambae yumi no letem hat blong yumi i pulum yumi blong wantem mekem samting we i rong. Taem i wan samting we i sas tumas, taswe bambae yumi no westem bighaf blong ol gudfala taem ya blong lukluk televisin nomo. Defren olgeta, bambae yumi traehad blong mekem samting we Jehova i glad long hem. Nating se yumi foldaon from we yumi folem ol tingting we oli no stret long saed blong bodi, be yumi mas girap bakegen from we Jehova i halpem yumi.—Ridim Ol Proveb 24:16.

8. ?From wanem yumi nidim ‘sil blong bilif’?

⁸ Wan narafala haf blong klos blong faet long saed blong spirit, hemia ‘sil blong bilif.’ Sil ya i givhan long yumi blong “blokem ol ara ya blong Setan, we faea i laet long hem.” (Efes. 6:16) Taem yumi bilif long Jehova mo yumi lavem hem wetem olgeta hat blong yumi, hemia i givhan long yumi blong mekem ol fasin we oli stret, mo blong yumi gohed blong wokbaot long rod we i go blong kasem laef we i no save finis. Moa we yumi lanem blong lavem Jehova, moa we bambae yumi tinghae long ol stret fasin blong hem. ?Be olsem wanem long tingting blong yumi we yumi trenem folem Baebol? ?Tingting ya i givhan long yumi olsem wanem long traehad blong yumi blong laekem ol fasin we oli stret?

Yu Mas Gat Wan Tingting We i Klin Gud

9. ?Wanem gudfala samting we yumi kasem taem tingting blong yumi i stap klin gud oltaem?

⁹ Taem yumi baptaes, yumi askem long Jehova blong hem i givim wan ‘tingting we i klin gud’ long yumi. (1 Pita 3:21) From we yumi bilif long sakrefaes blong Jisas, blad blong hem i kavremap sin blong yumi. Ale, yumi harem gud blong gat wan tingting we i klin long fored blong God. Be blong God i sevem yumi, tingting blong yumi i mas stap klin gud oltaem. Sipos sam samtaem, yumi harem se tingting blong yumi i stikim yumi mo i givim woning long yumi, yumi mas glad from we tingting ya i wok gud. Taem yumi harem se tingting blong yumi i stikim yumi olsem, hemia i soemaot se yumi gat respek long ol stret rod blong Jehova. Mo tu, i soemaot se tingting blong yumi i no kam olsem skin we faea i bonem nao taem i kamgud bakegen be skin ya i ded, i no moa soa taem yumi stikim. (1 Tim. 4:2) Be tingting we i klin i save givhan long wan narafala rod bakegen.

10, 11. (a) ?Yu save tokbaot wan stori we i soemaot from wanem yumi mas lesin long tingting blong yumi we yumi trenem folem Baebol? (b) ?From wanem yumi glad tumas taem yumi laekem ol fasin we i stret?

 ¹⁰ Taem yumi mekem samting we i rong, tingting blong yumi i save jajem yumi mo i save mekem yumi harem nogud. Wan yangfala i gowe long “rod blong stret fasin.” Hem i kam slef blong ol doti pija blong man wetem woman, mo hem i stat blong smok drag ya mariuana. Tingting blong hem i stikim hem taem hem i go long ol miting, ale hem i no moa go long ol miting. Mo tu, taem hem i go prij, hem i harem olsem se hem i gat tu fes, ale hem i no moa prij. Hem i talem se: “Mi mi no save se tingting blong mi bambae i stikim mi from ol samting we mi mekem.” Hem i talem bakegen se: “Mi gohed long krangke laef ya blong samwe fo yia olsem.” Biaen, hem i stat blong tingbaot blong kambak long trutok. Hem i ting se Jehova bambae i no lesin long prea blong hem, be nating, hem i prea mo i askem Jehova blong i fogivim hem. Ten minit i no pas yet, ale mama blong hem i kam luk hem mo i leftemap tingting blong hem blong hem i kambak long ol miting. Hem i go long Haos Kingdom mo hem i askem long wan elda blong i stadi wetem hem. Sam taem biaen, hem i baptaes mo hem i talem tangkiu long Jehova from we i sevem laef blong hem.

¹¹ I tru, yumi glad tumas taem yumi mekem samting we i stret. Taem yumi lanem blong laekem ol fasin we i stret mo yumi mekem ol fasin ya long ful laef blong yumi, bambae yumi glad moa blong mekem samting we Papa blong yumi long heven i wantem. !Mo yu traem tingbaot! I gat taem i stap kam we olgeta man bambae oli glad nomo from we tingting blong olgeta i klin, bambae oli kam olsem stret pija blong God. Taswe, i gud we naoia yumi mekem se long fulhat blong yumi, yumi laekem ol fasin we i stret, mo long rod ya, yumi mekem Jehova i glad.—Prov. 23:15, 16.

12, 13. ?Yumi mas mekem wanem blong trenem tingting blong yumi?

¹² ?Yumi mas mekem wanem blong yumi save trenem tingting blong yumi? Taem yumi stadi Baebol mo ol buk we oli stanap long Baebol, i impoten tumas we yumi tingbaot se “gudfala man i tingting gud fastaem, nao biaen i tok.” (Prov. 15:28) I gud yumi tingbaot olsem wanem waes tok ya i save givhan long yumi, taem yumi mas jusum wan wok. Sipos i klia gud se wan wok i agensem ol rul blong Baebol, bighaf blong yumi i obei kwiktaem long advaes we slef we i stret mo waes i givim blong lidim yumi. Be sipos i no klia gud se wan wok i stret no nogat, yumi mas faenemaot ol rul blong Baebol mo yumi mas prea mo tingting gud long ol rul ya. * Taem yumi mas mekem sam narafala desisen yumi mas folem sem rul ya bakegen, blong yumi no spolem tingting blong ol narafala. (1 Kor. 10:31-33) Yumi mas lukaot gud moa taem yumi folem sam rul we oli joen wetem fasin fren blong yumi wetem God. Sipos yumi bilif se Jehova i stap, bambae yumi askem kwestin ya se: ‘?Jehova bambae i harem nogud sipos mi mekem wok ya?’—Sam 78:40, 41.

¹³ Taem yumi rerem Wajtaoa Stadi blong yumi, no Baebol Stadi blong Kongregesen, yumi mas tingting dip long ol save we yumi stap lanem. ?Olsem wanem? ?Yu yu luk se oltaem yu yu hareap blong makem ol ansa blong kwestin long stadi, mo yu muv i go long nekis haf? Fasin blong stadi olsem bambae i no givhan long yumi blong laekem moa ol fasin we i stret, mo bambae i no trenem gud tingting blong yumi. Sipos yumi wantem se yumi laekem ol fasin we i stret, yumi mas stadi dip, mo yumi mas tingting dip long ol samting we yumi ridim long Tok blong God. !Yumi mas traehad sipos yumi wantem lanem  blong laekem ol fasin we i stret long olgeta hat blong yumi!

Yu Mas Wantem Stret Fasin Olsem We Yu Hanggri Mo Yu Tosta From

14. ?Jehova God mo Jisas Kraes tufala i wantem se yumi harem olsem wanem taem yumi mekem ol tabu wok blong God?

¹⁴ Jehova God mo Jisas Kraes, tufala i wantem se yumi glad taem yumi stap mekem ol tabu wok blong God. ?Wanem samting bambae i givhan long yumi blong stap glad? !Yumi mas laekem ol fasin we i stret! Long Bigfala Toktok blong Jisas antap long Hil, Jisas i talem se: “Olgeta we oli wantem stret fasin, olsem we man we i hanggri i wantem kakae, man we i tosta i wantem dring, oli save harem gud, from we God bambae i mekem laef blong olgeta i fulap long stret fasin ya.” (Mat. 5:6, Nyutesteman wetem Ol Sam long Bislama) ?Ol tok ya oli minim wanem long olgeta we oli laekem blong mekem fasin we i stret?

15, 16. ?Long wanem rod ol man we oli wantem stret fasin olsem we oli hanggri mo oli tosta from, oli save harem gud?

¹⁵ Setan i bos long wol ya we yumi stap laef long hem. (1 Jon 5:19) Nomata wanem ples long wol we yumi stap long hem, yumi save ridim ol ripot long niuspepa we oli tokbaot faet mo raf fasin we oli nogud bitim mak. Taem wan stret man i luk ol nogud fasin we ol man oli mekem long ol narafala, hem i harem nogud tumas. (Pri. 8:9) Yumi save se ol man we oli lavem Jehova mo we oli laekem stret fasin olsem we oli hanggri mo oli tosta from, oli save harem gud, from we Jehova nomo bambae i givhan long olgeta. Klosap nao ol rabis man oli lus, mo ol man we oli laekem ol fasin we i stret, bambae oli no moa harem nogud from ol fasin mo wok blong ol rabis man ya. (2 Pita 2:7, 8) !Taem samting ya i kamtru, bambae laef i gud tumas!

¹⁶ Yumi ol man blong wok blong Jehova mo yumi ol man blong Jisas Kraes, yumi kasem save se ol man we oli wantem stret fasin olsem we oli hanggri mo oli tosta from, bambae “laef blong olgeta i fulap long stret fasin ya.” Taem God bambae i mekem plan blong hem i kamtru long saed blong niufala heven mo niufala wol we “stret fasin nomo bambae i stap long hem,” olgeta ya bambae oli harem gud fulwan. (2 Pita 3:13) From samting ya, yumi no mas letem tingting blong yumi i foldaon mo yumi no mas sapraes we long wol ya blong Setan, fasin blong mekem i strong tumas long narafala mo ol raf fasin oli tekem ples blong ol fasin we i stret. (Pri. 5:8) Jehova, God ya we i Hae Olgeta, hem i save samting we i stap hapen, mo klosap nao bambae hem i sevem ol man we oli laekem ol fasin we i stret.

Blesing We Yu Kasem Taem Yu Laekem Ol Fasin We i Stret

17. ?Wanem sam long ol blesing we man i kasem taem hem i laekem ol fasin we i stret?

¹⁷ Ol Sam 146:8 i pulum tingting blong yumi i go long wan nambawan blesing we man i save kasem taem hem i folem rod blong stret fasin. Man blong raetem Ol Sam i singsing se: “Ol man we fasin blong olgeta i stret, hem [Jehova] i stap lavem olgeta.” !Yu traem tingbaot! !Hae King blong heven mo wol i lavem yumi from we yumi laekem ol fasin we i stret! From we Jehova i lavem yumi, yumi trastem se hem bambae i givim ol samting we yumi nidim blong laef, taem yumi putum ol wok blong Kingdom long fas ples long laef blong yumi. (Ridim Ol Sam 37:25; Ol Proveb 10:3.) Sloslo, ol man we oli laekem ol fasin we i stret bambae oli harem gud blong stap long olgeta ples long wol. (Prov. 13:22) Long saed blong ol man blong God, olgeta we oli folem ol fasin we i stret bambae oli kasem blesing ya, hemia bigfala glad mo laef blong olwe long wan naesfala paradaes long wol. Be tede tu, olgeta we oli laekem stret fasin blong God oli kasem blesing, hemia se oli gat pis long tingting blong olgeta, mo pis ya i givhan blong mekem se famle mo kongregesen blong olgeta i joen gud.—Fil. 4:6, 7.

18. ?Wanem ol gudfala samting we yumi save mekem taem yumi stap wet long dei blong Jehova?

¹⁸ Naoia we yumi stap wet long bigfala dei blong Jehova, yumi mas gohed blong lukaot stret fasin blong hem. (Sef. 2:2, 3) Taswe, i gud we yumi soemaot tru se yumi lavem ol rod blong Jehova we oli stret  gud olgeta. Blong mekem olsem, yumi mas putum “stret fasin we i olsem klos blong faet we oli wokem long aean.” Yumi mas putum klos ya oltaem, blong i save protektem hat blong yumi. Mo tu, yumi mas gat wan tingting we i klin gud, wan tingting we bambae i mekem yumi glad mo i mekem God blong yumi i glad.—Prov. 27:11.

19. ?Yumi mas gat strong tingting blong mekem wanem? ?Wanem samting we bambae yumi tokbaot long nekis stadi?

¹⁹ Jehova “i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.” (2 Kron. 16:9) !Ol tok ya oli leftemap tingting blong yumi bigwan! Hemia from we yumi stap mekem samting we i stret long medel blong ol man we oli no stap gud, oli raf, mo we oli mekem plante rabis fasin. I tru se plante man we oli stap longwe long God, bambae oli no kasem save from wanem yumi stap folem ol fasin we i stret. Be taem yumi stap folem gud ol stret fasin blong Jehova, yumi stap mekem i gud long yumi bakegen. (Aes. 48:17; 1 Pita 4:4) Taswe, wetem fulhat blong yumi, i gud we yumi gat strong tingting blong gohed blong laekem ol fasin we i stret mo yumi folem ol fasin ya. Be sipos yumi wantem se hat blong yumi i fulwan long Jehova, yumi mas agensem ol fasin we i nogud tu. Nekis stadi bambae i soemaot se hemia i minim wanem.

[Futnot]

?Bambae Yu Yu Ansa Olsem Wanem?

• ?From wanem yumi mas kasem save long sakrefaes blong Jisas, sipos yumi wantem mekem ol fasin we i stret?

• ?From wanem i impoten tumas we yumi putum “stret fasin we i olsem klos blong faet we oli wokem long aean”?

• ?Yumi save trenem tingting blong yumi olsem wanem?

[Kwestin]

[Tok blong pija long pej 26]

Tingting blong yumi we yumi trenem folem Baebol, i save givhan long yumi taem yumi mas jusum wan wok