Man We God i Glad Long Hem Bambae i Kasem Laef We i No Save Finis

“Hae God. Oltaem yu stap blesem olgeta we oli stap obei long yu. Fasin blong yu we yu lavem man [“we yu glad long man,” NW] i olsem wan sil we i stap blokemgud olgeta.”—SAM 5:12.

1, 2. ?Elaeja i askem wanem samting long wido woman we i stap long taon ya Jarefat? ?Mo hem i talemaot wanem promes long woman ya?

WAN wido woman long taon ya Jarefat mo pikinini boe blong hem, tufala i hanggri. Elaeja, wan profet blong God, hem tu i hanggri. Wido ya i stap mekem faea blong kuk, nao profet Elaeja i askem smol wota mo bred long hem. Ale, hem i glad blong givim smol wota long Elaeja blong i dring, be hem i gat “wan kap flaoa nomo i stap long besin mo smol oel nomo i stap long botel.” Wido ya i luk se hem i no naf blong givim kakae long profet ya, mo hem i talemaot samting ya long profet ya.—1 King 17:8-12.

² Be Elaeja i gohed blong askem kakae long wido ya, hem i se: “Fastaem yu mekem wan smol bred long flaoa ya we i stap, yu tekem i kam long mi. Biaen yu wokem hemia we i stap, blong yu mo pikinini blong yu. Hae God i God blong mifala ol laen blong Isrel, mo hem i talem se bambae flaoa ya i no save finis long besin blong hem, mo oel ya i no save finis long botel blong hem.”—1 King 17:13, 14.

3. ?Yumi evriwan i mas mekem wanem desisen?

³ Wido ya i mas mekem desisen se bambae hem i serem las kakae we hem i gat wetem profet ya, no nogat. Be i no hemia nomo. Desisen blong hem bambae i soemaot se, ?hem i trastem Jehova blong sevem hem mo pikinini blong hem, no hem i putum ol samting long saed blong bodi fastaem long samting we i mekem God i glad mo long fasin fren blong hem wetem God? Yumi evriwan i mas mekem desisen we i klosap sem mak. ?Bambae yumi tinghevi moa long samting we i save mekem Jehova i glad no bambae yumi putum tingting blong yumi i stap long ol samting long saed blong bodi? I gat plante risen blong trastem God mo wosipim hem. Mo i gat sam samting we yumi save mekem blong God i glad long yumi.

‘I Stret Nomo Blong Ol Man Oli Wosipim Yu’

4. ?From wanem i stret nomo blong yumi wosipim Jehova?

⁴ Jehova i wantem se ol man oli wosipim hem long fasin we i laenap wetem tingting blong hem. I stret nomo we hem i wantem olsem. Wan grup blong ol man blong wok blong hem long heven oli talem  ol tok we i soemaot se samting ya i tru tumas. Oli talem se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” (Rev. 4:11) From we Jehova i mekem olgeta samting, i stret nomo blong yumi wosipim hem.

5. ?From wanem fasin blong God blong lavem yumi i pulum yumi blong wosipim hem?

⁵ Wan narafala risen from wanem i stret blong yumi wosipim Jehova, hemia from we i no gat narafala man we i lavem yumi moa i bitim Jehova. Baebol i talem se: “[God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.” (Jen. 1:27) Ol man oli fri blong jusum samting we oli wantem mekem. God i mekem olgeta oli naf blong tingting mo blong mekem ol desisen. Yes Jehova i givim laef long ol man, taswe hem i Papa blong yumi. (Luk 3:38) Jehova i olsem wan gudfala papa we i givim evri samting we ol pikinini boe mo gel blong hem oli nidim, blong oli harem gud long laef. ‘Hem i letem san i saen’ mo ‘hem i sanem ren i kam,’ blong graon i save givim plante kakae long ol man mo i mekem ol tri mo flaoa oli gru gud, oli naes, blong ol man oli harem gud long wol.—Mat. 5:45.

6, 7. (a) ?Adam i mekem wanem trabol i kasem ol pikinini blong hem? (b) ?Sakrefaes blong Jisas, bambae i mekem wanem blong givhan long ol man we God i glad long olgeta?

⁶ Wan narafala samting we Jehova i mekem, hemia se hem i sevem yumi long ol nogud frut blong sin. Taem Adam i sin hem i agensem Jehova, mo hem i spolem nambawan laef we ol pikinini blong hem oli save gat, hemia blong harem gud olwe. Hem i mekem fasin olsem wan man we i plei laki mo i spolem famle blong hem. From we Adam i tingbaot hem wan nomo, olgeta man oli kam slef long wan rabis masta, hemia sin. Sin i mekem se ol man oli kasem sik, oli harem nogud, biaen oli ded. Blong mekem wan slef i kam fri, wan man i mas pemaot hem long masta blong hem. Jehova i pemaot yumi finis, hem i mekem rod blong sevem yumi long ol rabis frut blong sin. (Ridim Rom 5:21.) Jisas Kraes i mekem samting we Papa blong hem i wantem, hem i givim ‘laef blong hem blong pem rod blong plante man oli go fri.’ (Mat. 20:28) I no longtaem, ol man we oli mekem God i glad bambae oli kasem plante gudgudfala samting from sakrefaes ya.

⁷ Jehova i God ya we i mekem yumi, hem i mekem plante samting blong yumi save glad long laef mo blong laef blong yumi i gat mining. I no gat narafala man we i mekem plante samting olsem hem. Sipos yumi mekem hem i glad, bambae yumi save luk ol wok we hem i mekem blong finisim ol trabol we oli stap spolem ol man. Bambae Jehova i soemaot long yumi wanwan, se hem i “stap mekem i gud long olgeta we oli stap traem faenem hem.”—Hib. 11:6.

“Ol Man Blong Yu Bambae Oli Glad Blong Kam Joen Long Yu”

8. ?Samting we i hapen long Aesea i tijim wanem long yumi long saed wosip we yumi mekem long God?

⁸ Jehova i no fosem ol man blong wosipim hem. Taswe, sipos yumi wantem se God i glad long yumi, yumi mas waes long fasin blong yumi blong jusum samting. Long taem blong Aesea, Jehova i askem se: “?Bambae mi mi sanem hu? ?Hu bambae i go talemaot tok blong mifala?” Jehova i luksave se profet Aesea i gat raet blong jusum samting we hem i wantem  mekem. Fasin blong Jehova i soemaot se hem i gat respek long Aesea. Yu traem tingbaot glad blong Aesea taem hem i ansa se: “!Mi ya, mi save go! !Yu sanem mi!”—Aes. 6:8.

9, 10. (a) ?Yumi mas gat wanem tingting taem yumi mekem wok blong God? (b) ?From wanem i stret blong mekem wosip long Jehova long olgeta tingting blong yumi?

⁹ Ol man oli fri blong jusum sipos oli wantem wosipim God, no nogat. Jehova i wantem se yumi wosipim hem from we yumi wantem mekem olsem. (Ridim Josua 24:15.) Sipos man i ting se wosip we hem i mekem long God i wan baden long hem, God i no save glad long hem. Mo God i no glad long ol man we oli wosipim hem from we oli wantem mekem narafala man i glad long olgeta. (Kol. 3:22) Maet yumi mekem wok blong God be yumi no mekem “long olgeta tingting” blong yumi, from we yumi letem ol samting blong wol oli kam fastaem long wosip we yumi mekem long God. Samting ya tu i no save mekem God i glad long yumi. (Sam 119:2) Jehova i save se taem yumi mekem wok blong hem long olgeta tingting blong yumi, samting ya i mekem i gud long yumi. Moses i talem strong long ol man Isrel se oli mas jusum laef. Blong mekem olsem, ‘oli mas lavem Hae God, oli mas lesin long hem, oli mas obei long hem, mo oltaem, tingting blong olgeta i mas strong long hem.’—Dut. 30:19, 20.

¹⁰ King Deved blong Isrel bifo i singsing long Jehova se: “Long dei ya we bambae yu go faet long ol enemi blong yu, ol man blong yu bambae oli glad blong kam joen long yu. Olsem we wota blong naet i stap mekem gras i gru gud, long sem fasin, yu bambae yu kasem ol nambawan man blong faet oli kam joen long yu long ol hil ya we oli tabu.” (Sam 110:3) Bigfala samting long laef blong plante man tede, hemia blong harem gud long ol pleplei mo blong kasem plante mane blong oli save stap gud. Be ol man we oli lavem Jehova oli putum wok blong Jehova i stap fastaem long ol narafala samting long laef blong olgeta. Yumi luksave samting ya klia from we oli wok strong blong talemaot gud nius. Oli trastem Jehova se hem i save givim ol samting we oli nidim evri dei.—Mat. 6:33, 34.

Ol Sakrefaes We Oli Mekem God i Glad

11. ?From wanem ol man Isrel oli mekem ol sakrefaes i go long Jehova?

¹¹ Taem ol man blong God oli stap aninit long Loa we God i givim long Moses, oli mekem ol sakrefaes we oli laenap wetem tingting blong God. Oli mekem ol sakrefaes ya blong God i glad long olgeta. Levitikas 19:5 i talem se: “Sipos yufala i kilim wan anamol blong mekem sakrefaes ya we pris i bonem haf, yufala i kakae haf blong soemaot we yufala i stap fren gud wetem mi, yufala i mas folem ol rul ya we mi givim finis long yufala, nao bambae mi mi glad long sakrefaes blong yufala.” Sem buk ya blong Levitikas i talem se: “Mi mi Hae God, mo sipos yufala i mekem sakrefaes blong talem tangkiu long mi, bambae yufala i mas folem ol rul ya, blong mi mi save glad long sakrefaes ya blong yufala.” (Lev. 22:29) Taem ol man Isrel oli bonem wan anamol olsem wan sakrefaes long olta blong Jehova, smok blong hem we i go antap i olsem wan “gudfala smel” long tru God. (Lev. 1:9, 13) Hemia i min se Jehova i glad tumas mo i agri long ol sakrefaes ya, we oli soemaot se ol man Isrel ya oli lavem Jehova. (Jen. 8:21) Ol haf ya blong Loa oli tijim yumi long wan trutok we i stret long yumi tede. Ol man we oli givim ol sakrefaes we oli laenap wetem tingting blong Jehova, oli mekem Jehova i glad long olgeta. ?Wanem sakrefaes we i laenap wetem tingting blong hem? Bambae yumi tokbaot tu samting long laef blong yumi, hemia ol fasin blong yumi mo ol toktok blong yumi.

12. ?Wanem sam samting we oli save mekem se God i no moa glad long ‘bodi blong yumi we yumi givim i go long hem olsem wan sakrefaes’?

¹² Long wan leta we aposol Pol i raetem long ol Kristin blong Rom, hem i talem se: “Plis yufala i mas givim olgeta laef [“bodi,” NW] blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem. Hemia nao prapa wosip we i stret nomo blong yufala i mekem long hem.” (Rom 12:1) Man we i wantem se God i glad long hem, hem i mas lukaot gud oltaem long bodi blong hem blong God i glad long sakrefaes ya we hem i givim i go long Hem. Sipos hem i smok tabak, hem i kakae betel nat, hem i tekem drag, no hem i dring bitim mak, hem i save mekem bodi blong hem i doti. Bambae ol samting ya oli mekem se God i no moa glad long sakrefaes blong man ya. (2 Kor. 7:1) Baebol i talem tu se, man we i “mekem nogud wetem woman, hem i spolem bodi blong hem.” Ol nogud fasin olsem oli mekem se Jehova i no save agri long sakrefaes blong man ya. (1 Kor. 6:18) Taswe, ‘yumi mas tabu, yumi mas klin gud long olgeta samting we yumi mekem,’ blong God i glad long yumi.—1 Pita 1:14-16.

13. ?From wanem i stret nomo we yumi presem Jehova?

¹³ Wan narafala sakrefaes we i mekem Jehova i  glad, hemia toktok blong yumi. Long taem bifo i kam kasem tede, ol man we oli lavem Jehova oli talem ol gudfala toktok long saed blong hem taem oli stap wetem ol narafala mo taem oli stap long haos blong olgeta. (Ridim Ol Sam 34:1-3.) Plis yu ridim Ol Sam 148-150, mo traem makem hamas taem trifala sam ya i talem ol tok blong presem Jehova. Yes, i stret nomo we ‘yumi evriwan we i stap obei long hem, yumi presem hem.’ (Sam 33:1) Jisas Kraes i soemaot ol fasin we yumi mas traehad blong folem. Mo hem i talemaot klia se wan rod blong presem God hemia taem yumi talemaot gud nius long ol man.—Luk 4:18, 43, 44.

14, 15. ?Wanem sakrefaes we Hosea i talem long ol man Isrel se oli mas givim? ?Mo Jehova i mekem wanem taem oli mekem olsem?

¹⁴ Taem yumi mekem wok blong prij wetem strong tingting, yumi soemaot se yumi lavem Jehova mo yumi wantem se hem i glad long yumi. Yumi save tingbaot ol tok we Hosea i talem taem sam man Isrel oli joen long giaman wosip. Fasin blong olgeta i mekem se God i no moa glad long olgeta. (Hos. 13:1-3) Hosea i talem long olgeta blong askem strong long Jehova se: “Plis yu fogivim mifala, yu tekemaot ol sin blong mifala, mo yu lesin long prea blong mifala, nao bambae mifala i stap presem yu bakegen [“long ol toktok blong mifala, olsem we mifala i kilim yangfala buluk blong givim long yu,” NW].”—Hos. 14:1, 2.

¹⁵ Long olgeta anamol we ol man Isrel oli givim i go long Jehova, ol buluk oli sas moa. Taswe, taem Baebol i talem se ol man oli presem God long ‘ol toktok, olsem we oli kilim yangfala buluk,’ hemia i min se oli tingting gud long ol toktok we oli talem blong presem tru God, mo ol toktok blong olgeta i kamaot long hat blong olgeta. ?Jehova i mekem wanem long olgeta we oli givim ol sakrefaes olsem? Hem i talem se: “Bambae mi lavem yufala long olgeta tingting blong mi.” (Hos. 14:4) Jehova i glad long olgeta we oli mekem ol sakrefaes olsem blong presem hem. Hem i fogivim olgeta mo i fren gud wetem olgeta.

16, 17. ?Taem bilif blong man i pusum hem blong joen long wok blong talemaot gud nius, Jehova i gat wanem tingting long sakrefaes we man ya i mekem blong presem hem?

¹⁶ Longtaem i kam, fasin ya blong presem Jehova long fored blong plante man, i wan impoten haf blong tru wosip. Man we i raetem ol sing blong presem God, hem i wantem tumas blong leftemap nem blong God, nao i askem strong long God se: “Jehova, plis yu glad long ol tok blong mi we mi givim i go long yu olsem wan sakrefaes.” (Sam 119:108, NW) ?Olsem wanem long yumi tede? Long wan profet tok, Aesea i tokbaot wan bigfala grup blong ol man, se: “Ol man bambae oli stap talemaot se, ‘!Ol fasin ya we Hae God i mekem, oli gud tumas!’ . . . Bambae oli mekem sakrefaes long olta blong mi [God], nao mi bambae mi glad long olgeta.” (Aes. 60:6, 7) Profet tok ya i stap kamtru tede. Plante milian man oli stap ‘leftemap nem blong God. Fasin ya i olsem we oltaem oli stap mekem sakrefaes blong givim long hem, i olsem we oli givim wan presen i go long God.’—Hib. 13:15.

¹⁷ ?Olsem wanem? ?Yu yu stap mekem ol sakrefaes long God we oli laenap wetem tingting blong hem? Sipos yu no stap mekem olsem, ?bambae yu yu jenisim samting we i blokem yu blong presem Jehova long fored blong ol man? Taem bilif blong yu i pusum yu blong joen long wok blong talemaot gud nius, bambae yu ‘mekem Hae God i harem gud moa, i winim we yu stap givim buluk long hem.’ (Ridim Ol Sam 69:30, 31.) Yu save gat strong tingting se sakrefaes blong yu blong presem Jehova bambae i mekem hem i glad tumas long yu, olsem we yu bonem “gudfala insens” i go long hem. (Esik. 20:41) Yu tu bambae yu harem we yu glad we yu glad.

‘Hae God i Blesem Olgeta We Oli Stap Obei Long Hem’

18, 19. (a) ?Plante man tede oli gat wanem tingting long wok blong God? (b) ?Taem man i no mekem samting we God i glad long hem, wanem bambae i hapen long hem?

¹⁸ Plante man tede oli gat tingting olsem sam man long taem blong Malakae, hemia se: “Yumi stap mekem wok blong Hae God, be blong nating nomo. Sipos yumi mekem ol samting we hem i stap talem, no sipos yumi soemaot long hem we yumi tanem tingting  blong yumi from ol samting nogud we yumi bin mekem, be ol samting ya tu i no save givhan long yumi.” (Mal. 3:14) Ol man we oli gat tingting olsem oli wantem kasem ol samting long saed blong bodi, ale oli ting se stamba tingting blong God bambae i no save kamtru mo oli ting se ol loa blong God oli no moa stret long taem blong yumi. Long tingting blong olgeta, wok ya blong talemaot gud nius i blong westem taem nomo mo i mekem man i kros.

¹⁹ Stat long garen blong Iden i kam, wan man nomo hem i stamba blong ol tingting olsem. Hemia Setan. Setan i pulum Iv blong ting nating long nambawan laef we Jehova i givim long hem, mo i pulum hem blong ting nating long samting we i mekem Jehova i glad. Tede Setan i stap pulum ol man blong tingting se, man we i mekem samting we God i wantem, hem i no save kasem wan gudfala samting from. Be sore tumas, man we i no mekem samting we God i glad long hem, hem bambae i ded. Samting ya nao i hapen long Iv mo man blong hem. Mo i no longtaem, ol man tede we oli folem nogud fasin blong tufala, bambae oli kasem sem samting.—Jen. 3:1-7, 17-19.

20, 21. (a) ?Wido woman blong Jarefat i mekem wanem, mo wanem i hapen long hem? (b) ?Yumi save mekem wanem blong folem fasin blong wido blong Jarefat, mo from wanem yumi wantem mekem olsem?

²⁰ Traem tingbaot nogud frut we i kasem Adam mo Iv mo gudfala frut we i kasem Elaeja mo wido woman blong Jarefat, we yumi tokbaot long stat blong stadi ya. Taem wido ya i harem ol tok blong Elaeja we i leftemap tingting blong hem, hem i wokem bred. Nating se bred i smol nomo, hem i givim long profet Elaeja fastaem. Ale promes blong Jehova we Elaeja i talem long wido ya, i kamtru. Baebol i talem se: “Evri dei, trifala i gat kakae we i naf long trifala. Flaoa i no finis nating long besin, mo oel i no finis long botel, stret olsem tok ya blong Hae God we profet i talemaot.”—1 King 17:15, 16.

²¹ Wido ya blong Jarefat i mekem wan samting we plante man tede oli no glad blong mekem. Hem i trastem God ya we i sevem man. Mo God i givhan long hem. Stori ya, mo plante narafala stori long Baebol, oli soemaot se i stret blong yumi trastem Jehova. (Ridim Josua 21:43-45; 23:14.) Plante Witnes blong Jehova tede tu oli luk se Jehova i neva lego ol man we hem i glad long olgeta.—Sam 34:6, 7, 17-19. *

22. ?From wanem yumi no mas tektaem tumas blong mekem samting we God i glad long hem?

²² Dei we God bambae i jajem “olgeta man long wol” i klosap nomo. (Luk 21:34, 35) I no gat rod blong ronwe long dei ya. Samting we i gud moa i bitim ol sas samting mo ol samting long saed blong bodi, hemia blong harem tok blong Jaj ya we God i putumap, se: “Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem. Yufala i kam tekem ples ya blong yufala.” (Mat. 25:34) Yes Jehova ‘bambae i blesem olgeta we oli stap obei long hem. Fasin blong hem we hem i lavem man [“we i glad long man,” NW] i olsem wan sil we i stap blokemgud olgeta.’ (Sam 5:12) Yes yumi mas traehad blong mekem samting we God i glad long hem.

[Futnot]

?Yu Yu Tingbaot?

• ?From wanem i stret nomo blong wosipim Jehova long olgeta tingting blong yumi?

• ?Long taem blong yumi, wanem ol sakrefaes we Jehova i glad long olgeta?

• ?Taem yumi presem God long ‘ol toktok, olsem we yumi kilim yangfala buluk,’ hemia i minim wanem? ?Mo from wanem yumi mas mekem olsem?

• ?From wanem yumi mas traehad blong mekem samting we God i glad long hem?

[Kwestin]

[Tok blong pija long pej 17]

?Profet blong God i askem long wan mama we i pua, blong hem i mekem wanem?

[Tok blong pija long pej 18]

?Taem yumi mekem sakrefaes blong presem Jehova, wanem gudfala samting we yumi kasem?

[Tok blong pija long pej 21]

Sipos yu trastem Jehova fulwan, bambae hem i no lego yu samtaem