Wan Kwestin

Afta we tufala boe blong Eron, Nadab mo Abihu, tufala i ded, Moses i kros long tufala narafala brata blong tufala, Eleasara mo Itamara. ?From wanem? ?Mo wanem i mekem se kros blong hem i godaon?—Lev. 10:16-20.

Smoltaem afta we Jehova i putumap ol pris blong oli wok long Haos Tapolen, Jehova i kilim i ded tufala boe blong Eron, Nadab mo Abihu. Hemia from we long fes blong God, faea we tufala i givim i go long Hem i no tabu. (Lev. 10:1, 2) Moses i talem long ol narafala pikinini blong Eron we oli laef i stap, se oli no mas krae from tufala brata ya blong olgeta we tufala i ded. I no longtaem afta, Moses i kros long Eleasara mo Itamara from we tufala i no kakae nani ya we ol man oli givim olsem spesel sakrefaes blong tekemaot sin. (Lev. 9:3) ?From wanem Moses i kros olsem?

Taem wan man i tekem wan anamol i kam long pris olsem wan spesel sakrefaes blong tekemaot sin blong hem, loa we Jehova i givim long Moses i talem klia se pris ya i mas kakae sam mit blong anamol ya insaed long yad blong Haos Tapolen. Taem pris ya i mekem olsem, i olsem we hem i karem blem blong sin blong man ya we i karem anamol i kam. Be, sipos hae pris i mas tekem sam blad blong wan anamol i go long Rum we i Tabu, bambae i tabu blong olgeta oli kakae mit blong hem. Bambae oli mas bonem olgeta mit ya evriwan.—Lev. 6:24-26, 30.

I luk olsem se afta long ol trabol we oli hapen long dei ya, Moses i wantem meksua se ol pris oli folem gud olgeta loa we Jehova i givim. Taem Moses i faenemaot se Eleasara mo Itamara tufala i bonem nani ya finis, hem i kros long tufala. Mo hem i askem long tufala se from wanem tufala i no kakae anamol ya. Moses i askem olsem from we hem i save se hae pris bambae i no tekem blad blong anamol ya i go long Rum ya we i Tabu.—Lev. 10:17, 18.

Eron i ansa long kwestin blong Moses from i luk olsem se hem nao i givim raet long tufala blong bonem anamol ya. Long dei ya we Jehova i kilim i ded tufala boe blong Eron, maet Eron i ting se i no stret we ol pris oli kakae mit blong spesel sakrefaes we ol man oli karem i kam blong tekemaot sin blong olgeta. Nating se oli no gat fol from ded blong Nadab mo Abihu, be maet Eron i ting se Jehova bambae i no glad long olgeta sipos oli kakae mit blong anamol ya.—Lev. 10:19.

Antap long samting ya, maet Eron i tingbaot se long dei we ol pikinini blong hem oli statem wok blong olgeta olsem pris, olgeta nao oli mas lukaot gud blong mekem se God i glad long olgeta, nating se wok we oli mekem i smol nomo. Be, from we Nadab mo Abihu tufala i spolem nem blong Jehova, ale God i kros tumas long tufala. Taswe maet Eron i ting se sipos wan pris i mekem wan bigfala sin olsem, be famle blong hem i no mas kakae mit blong spesel sakrefaes ya we i blong tekemaot sin blong man.

I luk olsem se Moses i agri long ansa blong brata blong hem, from we Baebol i talem se: “Taem Moses i harem tok ya, hem i luk se i stret nomo.” (Lev. 10:20) Mo i luk olsem se Jehova tu i glad long ansa blong Eron.