Kam Klosap Long God

“Yu Yu Wantem Tumas”

YUMI harem nogud bitim mak, taem yumi stap lukluk wan we yumi laekem hem tumas i safa, mo i ded. Long taem olsem i stret nomo we yumi krae. Be nomata we yumi harem nogud olsem, yumi glad tumas blong save se God ya we i Mekem yumi, Jehova, i kasem save. Mo antap long hemia, hem i wantem tumas blong yusum bigfala paoa blong hem, blong givimbak laef long man we i ded. I gud blong makem promes blong hem, we Job i talemaot long Job 14:13-15 (NW).

Yu traem tingbaot man ya Job. Hem i wan man we i gat strong bilif, mo hem i kasem plante trabol. Hem i lusum olgeta samting we hem i gat, ol ten pikinini blong hem we hem i lavem olgeta tumas, oli ded, mo antap long hemia, hem i kasem wan strong sik. Long taem ya we hem i stap harem nogud tumas, hem i singaot i go long God i talem se: “Plis yu haedem mi long Seol [beregraon].” (Vas 13) Long lukluk blong Job, Seol i olsem wan ples we hem i save go long hem blong spel long ol trabol we hem i kasem. Long tingting blong Job, sipos God i haedem hem olsem wan sas samting we oli berem, hem bambae i kam fri long ol hadtaem mo ol soasore we hem i kasem. *

?Olsem wanem? ?Job bambae i stap olwe long Seol? Job i no bilif olsem. Hem i gohed blong prea long God i se: “Plis yu makem dei we bambae yu yu save tingbaot mi bakegen.” Job i bilif strong se bambae hem i stap long Seol blong smoltaem nomo, mo se Jehova bambae i no save fogetem hem. Job i tokbaot taem ya we bambae hem i spenem long Seol, olsem se hem i stap “kalabus,” mo hem i mas wet blong i save kamfri. ?Bambae hem i wet gogo kasem wetaem? Job i talem se: “bambae mi mi wet gogo kasem taem we bambae mi mi fri bakegen.” (Vas 14) !Bambae hem i fri bakegen taem hem i kamaot long Seol! !Yumi save talem long wan narafala tok, se bambae hem i laef bakegen long ded!

?From wanem Job i bilif strong se bambae hem i kam fri? Hemia from we hem i kasem save se Jehova we i Mekem yumi mo i lavem yumi, i harem nogud taem ol man we oli holemstrong long hem oli ded. Job i talem se: “Yu bambae yu singaot long mi, nao mi bambae mi ansa long yu. Bambae yu yu wantem tumas we wok blong ol han blong yu i kambak.” (Vas 15) Job i luksave se God nao i Mekem hem, mo i givim laef long hem. God ya we i Givim Laef, hem nao i wokem Job taem i stap long bel blong mama blong hem. Mo sipos Job i ded, sem God ya nomo i save givimbak laef long hem.—Job 10:8, 9; 31:15.

Ol tok ya blong Job oli tijim yumi long wan bigfala samting. Oli soemaot olsem wanem Jehova i lavem yumi tumas. Hem i gat wan spesel fasin fren wetem ol man we oli olsem Job. Olgeta ya oli putum olgeta oli stap long han blong Jehova, oli letem hem i jenisim tingting blong olgeta blong oli kam ol man we oli stret long fes blong hem. (Aesea 64:8) Long lukluk blong Jehova, ol man we oli holemstrong long hem, oli olsem ol gudgudfala samting. Olgeta we oli holemstrong long Jehova gogo oli ded, hem i ‘wantem tumas we oli kambak.’ Wan man blong hae save i talem se, long olfala lanwis Hibru, “tok ya ‘wantem tumas,’ i wan tok we i makem strong, tingting ya blong wantem tumas wan samting.” Yes, Jehova i no fogetem ol man we oli mekem wosip long hem, mo hem i wantem tumas blong givimbak laef long olgeta.

Yumi glad tumas long buk blong Job, we hem i wan long ol fas buk blong Baebol we oli raetem. Long buk ya, Jehova i soemaot stamba tingting blong hem blong mekem ol dedman oli laef bakegen. * Hem i wantem tumas blong mekem hemia we i ded, we yu yu lavem hem tumas, i laef bakegen, blong yutufala i save joen gud bakegen. Tingting ya i save mekem se yu yu no moa harem nogud tumas. ?Olsem wanem? ?Yu yu wantem lanem moa long saed blong God ya we i lavem yumi tumas? I gud yu letem God i jenisim fasin blong yu, blong yu kam wan gudfala man we bambae i luk stamba tingting blong Hem i kamtru.

[Ol futnot]