Jisas Kraes ?Hem i Hu?
Jisas Kraes ?Hem i Hu?
“Nao taem Jisas i go insaed long Jerusalem, ol man long taon ya oli stap mekem plante toktok, oli stap asaskem se, ‘?Hu man ya?’ Mo olgeta ya we oli biaen long hem oli stap talem se, ‘Hemia profet ya we i kamaot long Nasaret, long distrik ya Galili, nem blong hem Jisas.’”—MATIU 21:10, 11.
LONG yia 33 K.T., * taem ol tri oli putum flaoa, Jisas Kraes * i kamtru long Jerusalem. ?From wanem ol man oli mekem plante toktok long taem ya? Plante man long Jerusalem oli harem ol stori long saed blong Jisas mo ol merikel we hem i mekem. Ale, oli stap tokbaot Jisas long ol narafala. (Jon 12:17-19) !Be olgeta oli no save se man ya we i stap wetem olgeta, bambae i gat paoa long ol man long olgeta ples long wol kam kasem taem blong yumi tede!
Naoia bambae yumi tingbaot sam samting we i soemaot se laef blong Jisas i gat paoa long laef blong plante man long wol.
▪ Long kalenda we ol man blong plante ples long wol oli yusum, oli kaontem ol yia stat long taem we oli ting se Jisas i bon.
▪ Samwe long tu bilian man oli talem se oli Kristin. Hemia i olsem wan long evri tri man long wol.
▪ I gat bitim wan bilian man long wol we oli blong skul ya Islam. Skul ya i tijim se Jisas i “profet we i hae moa long Ebraham, Noa, mo Moses.”
▪ Plante long ol waes tok we ol man tede oli talem oli kamaot long ol toktok blong Jisas. Sam long ol waes tok ya, hemia:
‘Yu mas lavem ol man we oli stap raonabaot long yu, olsem we yu mekem i gud long yu.’—MATIU 22:39.
‘Yu mas gohed blong kilkilim doa, nao bambae doa i save open long yu.’—MATIU 7:7.
‘Man i no save wok blong tu masta wantaem.’—MATIU 6:24.
‘Samting we i blong Sisa, yu mas givimbak long Sisa.’—MATIU 22:21.
‘Yu luk smol doti we i stap long ae blong brata blong yu, be yu no save luk bigfala wud we i stap long ae blong yu.’—MATIU 7:3.
‘Gudfala man Sameria.’—LUK 10:33.
I klia se laef blong Jisas i gat paoa long laef blong plante man. Be nating se i olsem, plante man oli gat defdefren tingting mo defdefren bilif long saed blong hem. Taswe, maet yu stap tingting se: ‘?Jisas Kraes hem i hu?’ Baebol nomo i talem se Jisas i kamaot long weples, laef blong hem i olsem wanem, mo from wanem hem i ded. Taem yu kasem save long trutok long saed ya, samting ya i save gat bigfala paoa long laef blong yu naoia mo long fiuja.
[Ol futnot]
^ par. 3 K.T. i minim Kristin Taem.
^ par. 3 Nem ya “Jisas,” hem i prapa nem blong profet ya we i kamaot long Nasaret. Nem ya i minim “Jehova i Sevem Man.” Tok ya “Kraes” i wan taetel we i minim “Man we God i Jusumaot.” Hemia i min se Jisas i man ya we God i makemaot, blong i mekem wan spesel wok.
