‘!Olgeta! !Waes Blong God i Bigfala Tumas!’

“!Olgeta! !Fasin blong God blong givhan long ol man, i gud tumas! !Waes blong hem, mo save blong hem i bigfala tumas, i bitim mak! Yumi no save talemaot olsem wanem hem i jusumaot ol rod blong hem. Yumi no naf blong save ol plan blong hem, se bambae oli kamtru olsem wanem.”—ROM 11:33.

1. ?Ol Kristin we oli baptaes finis oli gat wanem blesing we i bigwan olgeta?

?WANEM blesing we yu yu kasem finis, we i bigwan olgeta? Fastaem, maet yu tingbaot wan spesel wok we yu kasem long kongregesen, no maet yu tingbaot wan spesel janis we yu kasem long skul no long wok. Be long saed blong ol Kristin we oli baptaes finis, blesing we i bigwan olgeta, hemia blong fren gud wetem Jehova, God ya we hem nomo i tru. Blesing ya i mekem se ‘God i savegud yumi.’—1 Kor. 8:3; Gal. 4:9.

2. From wanem i wan bigfala blesing blong savegud Jehova, mo blong Jehova i savegud yumi?

² ?From wanem i wan bigfala blesing blong savegud Jehova, mo blong Jehova i savegud yumi? Wan risen se, hem i Man we i hae moa long ol narafala man long heven mo wol. Mo antap long hemia, hem i Man blong protektem olgeta we hem i lavem. Tabu spirit i pulum profet Neham blong raetem se: “Hae God i gud tumas. Taem ol man blong hem oli stap long trabol, hem i save lukaot gud long olgeta. Hem i sefples blong olgeta we oli putum tingting blong olgeta i stap strong long hem.” (Neham 1:7; Sam 1:6) Yes, sipos yumi wantem kasem laef we i no save finis, yumi mas savegud God ya we i tru mo Pikinini blong Hem, Jisas Kraes.—Jon 17:3.

3. ?Blong savegud God, yumi mas mekem wanem?

³ Blong savegud God, i no naf blong save nem blong hem nomo. Hem i mas kam Fren blong yumi. Yumi mas kasem save long ol samting we hem i laekem mo ol samting we hem i no laekem. Wan impoten rod blong soemaot se yumi savegud God, hemia blong mekem ol save we yumi kasem long saed blong hem, i wok long laef blong yumi. (3 Jon 11) Be sipos yumi wantem tumas blong save Jehova, i gat wan moa samting we yumi mas mekem. I no naf blong save nomo wanem ol samting we hem i mekem finis, be yumi mas save olsem wanem hem i mekem ol samting ya, mo from wanem hem i mekem olsem. Taem yumi kasem save moa long ol stamba tingting blong Jehova, yumi sapraes moa long ‘waes blong hem we i bigfala tumas, i bitim mak.’—Rom 11:33.

God Ya We i Mekem Stamba Tingting Blong Hem i Kamtru

4, 5. (a) ?Taem Baebol i tokbaot ‘tingting we God i gat fastaem,’ hem i stap tokbaot wanem? (b) ?Wanem eksampol i soemaot se i no gat wan rod nomo blong mekem wan stamba tingting i kamtru?

⁴ Jehova, hem i God ya we i mekem stamba tingting blong hem i kamtru. Baebol i tokbaot “tingting blong God, we hem i tingbaot fastaem.” (Efes. 3:10, 11) ?Tok ya i minim wanem? Taem Baebol i tokbaot ‘tingting we God i gat fastaem,’ hem i stap tokbaot wan samting we God i wantem mekem i kamtru. I no gat wan rod nomo blong mekem samting ya i kamtru, be maet hem i save yusum narafala rod sipos hem i luk se i gat nid.

⁵ Yumi save tingbaot wan man we i gat tingting blong bildim wan haos. Hem i save yusum plante defren fasin blong bildim haos ya, mo plante defren kaen samting blong wokem haos ya long hem. Taem hem i stap bildim haos ya, maet weta i kam nogud mo maet i no moa gat ol samting we hem i stap yusum blong wokem haos ya long hem, ale hem i mas yusum wan narafala rod. Be, nomata wanem jenis we hem i mas mekem, tingting we hem i gat fastaem bambae i kamtru taem hem i finisim haos blong hem.

6. ?Olsem wanem Jehova i jenisim rod we hem i stap folem blong mekem tingting we hem i gat fastaem i kamtru?

 ⁶ Long sem fasin, samtaem Jehova i jenisim rod we hem i stap folem, blong mekem tingting we hem i gat fastaem i kamtru. Taem Hem i mekem ol man mo ol enjel, hem i mekem we oli fri blong jusum sipos oli wantem obei long hem no nogat. From samting ya, samtaem hem i mas jenisim rod we hem i stap folem blong mekem tingting blong hem i kamtru. Bambae yumi tokbaot tingting we Jehova i gat fastaem long saed blong wan spesel Laen. Samting ya bambae i halpem yumi blong luksave olsem wanem hem i mekem tingting blong hem i kamtru. Jehova i talem long fas man mo woman se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” (Jen. 1:28) ?Olsem wanem? ?Fasin stronghed we i kamaot long garen blong Iden, i mekem se God i no moa save mekem tingting ya we hem i gat fastaem i kamtru? !Si, hem i save mekem! Wantaem nomo, Jehova i yusum wan narafala “rod” blong mekem tingting blong hem i kamtru. Hem i talemaot se bambae i gat ol ‘pikinini we oli kamaot biaen,’ mo olgeta ya nao bambae oli stretem ol trabol we ol stronghed ya oli mekem.—Jen. 3:15; Hib. 2:14-17; 1 Jon 3:8.

7. ?Ol tok blong Eksodas 3:14 we Jehova i talem long saed blong hem wan, i tijim yumi long wanem samting?

⁷ Fasin ya we God i save jenisim rod we hem i stap folem taem hem i stap mekem stamba tingting blong hem i kamtru, i stret long ol tok we hem i talem long saed blong hem wan. Taem Moses i talem sam samting we oli save blokem hem blong i no mekem wok we Jehova i givim long hem, Jehova i talem sam toktok blong mekem tingting blong hem i strong. Hem i talem se: “Mi Stap We Mi Stap.” Hem i gohed se: “Yu mas talem long olgeta [ol man Isrel] se, ‘God we i sanem mi mi kam long yufala, nem blong hem “Mi Stap We Mi Stap.”’” (Eks. 3:14) !Long lanwis we oli raetem Baebol long hem, tok ya “Mi Stap We Mi Stap” i min se Jehova i naf blong mekem enikaen samting we hem i mas mekem, blong stamba tingting blong hem i kamtru fulwan! Aposol Pol i soemaot gud samting ya long buk blong Rom japta 11. Long ples ya, hem i yusum tri ya olif olsem wan pijatok. Nating se tingting blong yumi i strong blong kasem laef long heven no long wol ya, be sipos yumi tingting gud long pijatok ya, bambae yumi kasem save moa long waes blong Jehova, we i bigfala tumas, i bitim mak.

Stamba Tingting Blong Jehova Long Saed Blong Spesel Laen Ya

8, 9. (a) ?Wanem fo samting we bambae oli givhan long yumi blong kasem save long pijatok blong tri ya olif? (b) ?Wanem kwestin we yumi mas faenem ansa blong hem? ?Ansa blong kwestin ya bambae i soemaot wanem long saed blong Jehova?

⁸ Blong kasem save long pijatok blong tri ya olif, yumi mas save fo samting we oli soemaot olsem wanem stamba tingting blong Jehova long saed blong spesel laen ya i stap kamtru. Fas samting, hemia promes we Jehova i mekem wetem Ebraham, se: “Bambae mi yusum olgeta we bambae oli kamaot biaen long yu blong blesem ol man blong olgeta narafala kantri long wol.” (Wok 3:25) Seken samting se, Jehova i givim janis long neson blong Isrel we i kamaot long Ebraham, blong i kam ‘wan kingdom blong ol pris.’ (Eks. 19:5, 6, NW) Namba tri samting se, taem bighaf blong ol man Isrel oli no wantem Jisas olsem Mesaea, Jehova i yusum wan narafala rod blong stanemap ‘wan kingdom blong ol pris.’ (Mat. 21:43; Rom 9:27-29) Namba fo samting se, nating we Jisas i impoten Man long laen blong Ebraham, be i gat sam narafala tu we oli kasem blesing blong stap long laen ya.—Gal. 3:16, 29.

⁹ Antap long ol fo samting ya, buk blong Revelesen i givhan long yumi blong kasem save se fulnamba blong olgeta we bambae oli rul wetem Jisas long heven olsem ol king mo ol pris, hemia 144,000. (Rev. 14:1-4) Mo tu, Baebol i kolem olgeta ya se “laen blong Isrel.” (Rev. 7:4-8) ?Be olsem wanem? ?Ol 144,000 evriwan oli prapa man Isrel? Ansa blong kwestin ya i soemaot se Jehova i naf blong jenisim rod we hem i stap folem, blong mekem stamba tingting blong hem i kamtru. Naoia bambae yumi tokbaot leta we aposol Pol i raetem long ol Kristin long Rom, we i givhan long yumi blong faenem ansa blong kwestin ya.

 ‘Wan Kingdom Blong Ol Pris’

10. ?Jehova i givim wanem spesel janis long neson blong Isrel?

¹⁰ Olsem yumi talem finis, Jehova i givim wan spesel janis long neson blong Isrel. Wan ‘kingdom blong ol pris mo wan tabu neson’ i save kamaot long neson ya nomo. (Ridim Rom 9:4.) ?Be wanem bambae i hapen taem Laen ya we God i promes long hem, i kamtru? ?Seken haf blong Laen ya, hemia “Isrel blong God” we namba blong olgeta hem i 144,000, bambae olgeta evriwan ya oli kamaot long neson blong Isrel?—Gal 6:16, NTB.

11, 12. (a) ?Wetaem God i stat blong jusumaot olgeta we bambae oli stap long Kingdom long heven? ?Bighaf blong ol man Isrel long taem ya oli mekem wanem? (b) ?Jehova i mekem olsem wanem blong laen blong Ebraham i kasem “fulnamba” blong hem?

¹¹ Ridim Rom 11:7-10. Neson blong Isrel long taem blong Jisas, i no wantem bilif se Jisas hem i Mesaea. Ale neson ya i lusum spesel janis ya we hem i gat. Fulnamba blong laen blong Ebraham bambae i no moa kamaot long neson ya. Be long yia 33 K.T., God i stat blong jusumaot olgeta we bambae oli kam wan ‘kingdom blong ol pris’ long heven, mo hem i jusum sam prapa man Isrel tu we hat blong olgeta i stret. Oli no plante, maet sam taosen nomo. Oli wan “smol kampani” nomo, taem yumi tingbaot bigfala neson blong Isrel.—Rom 11:5.

¹² ?Jehova i mekem olsem wanem blong laen blong Ebraham i kasem “fulnamba” blong hem? (Rom 11:12, 25) Yumi luk ansa we aposol Pol i givim, se: “Mi mi no talem se tok blong God i foldaon finis, nogat. I no olgeta man we oli laen blong Isrel we oli prapa man blong God. Mo long sem fasin, i no olgeta laen [pikinini] blong Ebraham we oli prapa pikinini blong God [haf blong laen blong Ebraham]. . . . Tok ya i min se i no olgeta pikinini blong Ebraham we God i makem olgeta se oli pikinini blong hem. Be olgeta pikinini we oli bon long promes we God i mekem, olgeta ya nao oli prapa laen blong Ebraham.” (Rom 9:6-8) Taswe, blong Jehova i mekem stamba tingting blong hem i kamtru long saed blong laen blong Ebraham, hem i save yusum ol man we oli no man Isrel tu.

Pijatok Blong Tri Ya Olif

13. ?Wanem mining blong (a) tri ya olif, (b) rus blong tri ya, (c) stamba blong tri ya, mo (d) ol han blong tri ya?

¹³ Aposol Pol i gohed, i tokbaot olgeta we bambae oli kam haf blong laen blong Ebraham. Hem i talem se oli olsem ol han blong tri ya olif we man i lukaotgud long hem. * (Rom 11:21) Tri ya olif i pija blong samting we God i mekem i kamtru, folem stamba tingting blong hem long saed blong promes we hem i mekem long Ebraham. Rus blong tri ya we i tabu, i pija blong Jehova we i givim laef long Isrel blong God. (Aes. 10:20; Rom 11:16, NW) Stamba blong tri ya i pija blong Jisas,  we hem i fas haf blong laen blong Ebraham. Olgeta han blong tri ya, hemia “fulnamba” blong olgeta we oli seken haf blong laen blong Ebraham.

14, 15. ?Hu olgeta we oli olsem ol han blong olif ya we man i “katemaot”? ?Hu olgeta we oli olsem ol han blong wael olif we man i joenem long gudfala olif ya?

¹⁴ Long pijatok ya, man i “katemaot” sam han blong tri ya olif. Ol han ya, oli pija blong ol man Isrel we oli no wantem Jisas. (Rom 11:17) Olgeta ya oli lusum janis we oli gat blong kam haf blong laen blong Ebraham. ?Be hu bambae i tekem ples blong olgeta? Ol man Isrel we oli tok flas se oli kamaot long laen blong Ebraham, oli no save agri long tingting ya se ol man blong ol narafala laen bambae oli tekem ples blong olgeta. Be Jon Baptaes i givim woning long olgeta finis, se Jehova i save mekem ol ston nomo oli kam laen blong Ebraham, sipos hem i wantem olsem.—Luk 3:8.

¹⁵ ?Ale, Jehova i mekem stamba tingting blong hem i kamtru olsem wanem? Pol i talem se Hem i tekem sam han blong olif we i wael, i joenem olgeta long gudfala olif ya, blong tekem ples blong ol han we hem i katemaot. (Ridim Rom 11:17, 18.) Taswe God i yusum tabu spirit blong makemaot sam Kristin we oli no man Isrel, olsem sam long kongregesen blong Rom, nao oli kam haf blong laen blong Ebraham. Fastaem oli olsem ol han blong wael olif. Oli no gat janis blong joen long spesel promes ya we God i mekem wetem Ebraham. Be Jehova i openem rod blong oli save kam Isrel blong God.—Rom 2:28, 29.

16. ?Aposol Pita i talem wanem blong soemaot se wan niufala neson blong God i stanap?

¹⁶ Aposol Pita i eksplenem wanem i hapen, i talem se: “Long yufala ya we i bilif long hem [Isrel blong God, we bighaf blong olgeta oli ol Kristin blong ol narafala laen], pos ya [Jisas Kraes] i gud tumas. Be long olgeta we oli no bilif long hem, i olsem tok blong Baebol we i talem se, ‘Pos ya we ol man blong wokem haos oli sakem finis, naoia hem i kam nambawan pos blong haos.’ Mo bakegen, Baebol i talem se, ‘Hemia wan ston we bambae ol man oli save bangem leg blong olgeta long hem, wan ston we bambae oli save foldaon long hem.’ . . . Be yufala, God i jusumaot yufala blong yufala i laen blong hem. Yufala i pris blong King. Yufala i man blong wan kantri nomo, we yufala i tabu man blong God, mo yufala i man blong hem  nomo. Hem i mekem olsem long yufala, blong yufala i save talemaot ol gudgudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem. Fastaem yufala i no man blong God, be naoia yufala i kam man blong hem finis. Fastaem yufala i no haremsave we hem i gat sore long yufala, be naoia yufala i haremsave finis we hem i gat sore long yufala.”—1 Pita 2:7-10.

17. Folem pijatok blong tri ya olif, ?Jehova i mekem wanem we i “agens long fasin blong tri ya”?

¹⁷ Jehova i mekem wan samting we plante man oli sek long hem. Pol i talem se samting we God i mekem i olsem samting we ol man oli mekem long tri ya olif. Be samting ya i “agens long fasin blong tri ya.” (Rom 11:24) ?Hem i minim wanem? Taem man i tekem wan han blong wael olif mo i joenem long wan gudfala olif, i olsem we hem i mekem samting we i narakaen mo i agens long fasin blong tri ya. Nating se i olsem, sam man blong wokem garen long taem blong Jisas oli mekem olsem. * Jehova tu i mekem samting we i narakaen. Long tingting blong ol man Isrel, ol man blong ol narafala laen oli no save karem gudfala frut. Be Jehova i mekem se ol man blong ol narafala laen ya oli kam haf blong “wan neson” we i karem gudfala frut blong Kingdom. (Mat. 21:43, NW) Long yia 36 K.T., tabu spirit i makemaot man ya Konilias, we i no man Isrel mo i no sakomsaes. Long fasin ya, God i openem rod blong ol man blong ol narafala laen we oli no sakomsaes, oli joen long Isrel blong God. Oli olsem ol han blong wael olif we oli joen long gudfala olif ya.—Wok 10:44-48. *

18. ?Afta long yia 36 K.T., ol man Isrel oli gat wanem janis?

¹⁸ ?Olsem wanem? ?Hemia i min se stat long yia 36 K.T., ol man Isrel oli no moa gat janis blong joen long laen blong Ebraham? No, i no minim olsem. Pol i eksplenem se: “Sipos olgeta ya [ol man Isrel] oli bilif long God bakegen, bambae hem i joenem olgeta long stamba ya bakegen, from we hem i gat paoa blong mekem olsem. Yufala we i no laen blong Isrel, yufala i olsem ol han blong wael olif, be i olsem we hem i joenem yufala finis long wan gudfala olif. Hemia i agens long fasin blong tri ya. Be ol laen blong Isrel, oli olsem ol prapa han blong gudfala olif ya. Nao i isi moa blong hem i joenem olgeta ya long prapa stamba blong olgeta bakegen.”—Rom 11:23, 24.

“Bambae God i Sevem Olgeta Laen Blong Isrel”

19, 20. ?Jehova i mekem wanem, olsem pijatok blong tri ya olif i soemaot?

¹⁹ Yes, stamba tingting blong Jehova long saed blong “Isrel blong God,” i stap kamtru long nambawan fasin. (Gal. 6:16, NTB) Olsem Pol i talem, “bambae God i sevem olgeta laen blong Isrel.” (Rom 11:26) Long stret taem blong Jehova, “olgeta laen blong Isrel,” hemia fulnamba blong Isrel blong God, bambae oli mekem wok blong ol king mo ol pris long heven. !I no gat wan samting we i save blokem stamba tingting ya blong Jehova!

²⁰ Olsem Jehova i talemaot longtaem finis, laen blong Ebraham, hemia Jisas Kraes wetem ol 144,000, bambae oli karem blesing i kam long ‘ol man blong olgeta kantri blong wol.’ (Wok 3:25) Long rod ya, olgeta man blong God bambae oli kasem blesing. Yes, taem yumi tingbaot tingting we Jehova i gat fastaem mo olsem wanem hem i stap mekem tingting ya i kamtru, yumi sapraes we yumi sapraes. !Tru ya, ‘waes mo save blong hem i bigfala tumas, i bitim mak’!—Rom 11:33.

[Ol futnot]

?Yu Yu Tingbaot?

• ?Taem yumi tingbaot fasin we Jehova i folem blong mekem stamba tingting blong hem i kamtru, yumi lanem wanem long saed blong hem?

• Long Rom japta 11, wanem mining blong . . .

?tri ya olif?

?rus blong tri ya?

?stamba blong tri ya?

?ol han blong tri ya?

• ?Taem man i joenem han blong wael olif long gudfala olif, from wanem samting ya i “agens long fasin blong tri ya”?

[Kwestin]

[Bokis/Foto blong pija long pej 26]

?From Wanem Ol Man Oli Joenem Han Blong Wael Olif Long Gudfala Olif?

▪ Lucius Junius Moderatus Columella i wan soldia blong Rom we i laef klosap long taem ya we Jisas i stap long wol. Hem i wan man blong wokem garen tu. Plante man oli save hem from ol 12 buk we hem i raetem, long saed blong garen mo laef blong ol man long plantesen.

Long namba faef buk blong hem, hem i talem olfala waes tok ya se: “Man we i digimraon long stamba blong tri ya olif, hem i askem long hem blong givim frut. Man we i putum sitsit blong buluk raon long stamba blong hem, hem i plis long hem blong givim frut. Man we i katem ol han blong tri ya, hem i fosem hem blong givim frut.”

Mo tu, hem i tokbaot ol tri we oli gru gud, ol lif blong olgeta oli grin gud, be oli no stap givim frut. Hem i talem se i gud blong mekem olsem: “I gud yu yusum wan tul blong mekem wan hol long han blong tri ya, yu pusum wan han blong wael olif i go long hol ya, mo yu fasem gud. Bambae yu luk se tri ya i givim frut, from we han ya we yu joenem long hem, hem i pikinini blong wan tri we i karem plante frut.”

[Tok blong pija long pej 25]

?Yu yu kasem save long mining blong pijatok blong tri ya olif?