Yumi Harem Se Yumi Sef Taem Yumi Trastem Jehova

‘Taem mi mi prea long Jehova, hem i harem mi.’—OL SAM 4:3.

1, 2. (a) ?Wanem ol hadtaem we Deved i fesem? (b) ?Wanem tufala Sam we bambae yumi tokbaot?

KING DEVED i rul long Isrel longtaem lelebet, be naoia hem i stap long wan trabol. Absalom, pikinini blong hem, i wokem wan trik blong ol man oli putumap hem i kam king. Taswe Deved i mas ronwe long Jerusalem. Mo tu, wan gudfala fren we Deved i trastem hem, hem i lego Deved. I gat sam man nomo we oli holemstrong long Deved mo oli stap folem hem taem hem i wokbaot drae leg nomo long Hil blong Tri ya Olif, mo i stap krae. Simei we i kamaot long wan famle blong King Sol, i tekem ol ston mo graon, mo i stonem Deved, mo i singaot trabol tu i kam long hem.—2 Saml. 15:30, 31; 16:5-14.

² ?Trabol ya bambae i mekem se Deved i ded we hem i sem mo i harem nogud? Nogat. Taem yumi ridim ol tok blong Sam 3 we Deved i wokem biaen long taem we hem i ronwe long Absalom, yumi luksave klia se hem i trastem Jehova. Long Sam 3, mo long Sam 4 we Deved tu i raetem, yumi luk we Deved i bilif se God i stap harem ol prea mo i stap ansa long ol prea ya. (Sam 3:4; 4:3) Tufala Sam ya oli makem long tingting blong yumi se Jehova i stap wetem ol gudfala man blong hem long dei mo long naet. Mo hem i blesem olgeta, taem hem i givhan long olgeta, i givim pis long olgeta, mo i mekem olgeta oli harem se oli sef. (Sam 3:5; 4:8) I gud yumi tingting gud long tufala Sam ya, mo yumi luk olsem wanem oli save mekem we yumi harem se yumi sef, mo olsem wanem oli halpem yumi blong trastem God.

Taem ‘Plante Tumas Man Oli Stap Agens Long Yumi’

3. ?Olsem Ol Sam 3:1, 2 i soemaot, Deved i fesem wanem trabol?

³ Wan man blong karem ol tok i kam talemaot long King Deved se: “Olgeta man blong kantri ya oli stap mekem promes long Absalom, se bambae oli man blong hem nomo.” (2 Saml. 15:13) Deved i stap tingbaot se Absalom i mekem wanem blong pulum plante man oli biaen long hem, nao hem i talem se: “Hae God. Mi mi gat plante enemi blong mi. Olgeta oli plante tumas we oli stap agens long mi. Oli tokbaot mi, oli talem se, ‘God bambae i no save givhan long hem.’” (Sam 3:1, 2) Plante man Isrel oli ting se Jehova bambae i no givhan long Deved, taem Absalom mo ol fren blong hem oli agensem hem.

4, 5. (a) ?Deved i sua long wanem samting? (b) ?Wanem mining blong tok ya, “yu stap mekem tingting blong mi i strong bakegen”?

⁴ Be Deved i harem se hem i sef, from we hem i trastem God. Hem i singsing se: “Hae God. Yu yu olsem wan sil. Oltaem yu stap blokemgud mi blong trabol i no kasem mi. Yu yu stap mekem mi mi win, mo yu stap mekem tingting blong mi i strong bakegen.” (Sam 3:3) Deved i sua se Jehova bambae i blokemgud hem olsem we wan sil i blokemgud wan soldia. Yes, King Deved, we i stap kam olfala, i mas ronwe, ale hem i kavremap hed blong hem, mo i benem hed blong hem from we hem i sem. Be God ya we i Hae Olgeta, i jenisim samting ya mo i mekem we Deved i win. Jehova i mekem we Deved i leftemap hed blong hem, mo i no moa sem. Deved i singaot i go long God from we hem i bilif strong se God bambae i ansa long prea blong hem. ?Olsem wanem? ?Yu yu soemaot long laef blong yu se yu trastem Jehova olsem Deved?

⁵ Taem Deved i talem ol tok ya se “yu stap mekem tingting blong mi i strong bakegen,” hem i soemaot we hem i sua fulwan se Jehova bambae i halpem hem. Wan buk i eksplenem tok ya, “yu mekem tingting blong mi i strong bakegen,” se taem God i mekem tingting blong wan man i strong, hem i mekem we man ya i gat gudfala tingting long saed blong fiuja mo i harem se hem i sef. I tru, tingting blong Deved i foldaon olgeta from we ol man oli ronemaot hem, i no moa king long Isrel. Be taem God i ‘mekem tingting blong Deved i strong bakegen,’ hem i stanap strong mo i no moa fraet, hem i harem se hem i sef mo i trastem Jehova fulwan.

 ‘!Jehova i Stap Ansa Long Mi!’

6. ?From wanem Deved i talem se Jehova i stap long tabu hil ya, nao i stap ansa long prea blong hem?

⁶ From we Deved i trastem Jehova mo i save se Jehova i stap ansa long ol prea blong hem, hem i talem se: “Oltaem mi stap krae i kam long yu blong yu givhan long mi. Mo yu yu stap long tabu hil blong yu, nao yu stap ansa long mi.” (Sam 3:4) Deved i talem long ol man se oli mas karem bokis blong kontrak i go long Hil ya Saeon, ale oli obei long tok blong hem. Bokis ya i blong soemaot se God i stap wetem ol man blong hem. (Ridim 2 Samuel 15:23-25.) Taswe i stret nomo we Deved i talem se Jehova i stap long tabu hil ya, nao hem i ansa long prea blong hem.

7. ?From wanem Deved i no fraet?

⁷ Deved i save se prea we hem i mekem long God i no blong nating nomo, taswe hem i no fraet. Hem i singsing se: “Hae God. Long naet mi mi ledaon, mi slip gud, mo long moning mi wekap bakegen, from we yu stap lukaot gud long mi.” (Sam 3:5) Nating se long naet ol enemi oli save haed blong kam mekem faet we man i save sek from, be Deved i no fraet blong slip. Hem i save se tumora blong hem, bambae hem i wekap. Ol trabol we hem i kasem bifo, oli mekem hem i sua fulwan se sipos hem i trastem God, God bambae i no save lego hem. Yumi tu, yumi save sua long samting ya, sipos yumi ‘obei long ol loa blong God,’ mo yumi no gowe long Hem samtaem.—Ridim 2 Samuel 22:21, 22.

8. ?Ol Sam 27:1-4 i talem wanem, blong soemaot se Deved i trastem God?

⁸ Fasin ya we Deved i harem sef mo i trastem God long olgeta tingting blong hem, oli kamaot klia long wan narafala Sam. Long Sam ya, tabu spirit i pulum hem blong raetem se: “Hae God, hem i laet blong mi, mo hem i stap sevem mi. Mi bambae mi no save fraet long man, Hae God i strong ples blong haed blong mi. Bambae mi no save fraet. . . . Nating sipos wan bigfala grup blong ol soldia oli kam hivap raon long mi, be bambae mi no save fraet. . . . Mi mi askem wan samting long Hae God, wan samting nomo we mi mi wantem. Mi wantem tumas blong mi save stap long haos blong hem oltaem long laef blong mi, blong mi stap lukluk ol gudgudfala fasin blong hem, mi stap tingting gud long olgeta, mo blong mi save askem long hem blong i lidim mi oltaem.” (Sam 27:1-4) Sipos yu tu, yu gat sem tingting olsem Deved mo i no gat wan samting we i blokem yu, ale bambae yu go oltaem long ol miting blong kongregesen blong joen wetem ol man we oli wosipim Jehova.—Hib. 10:23-25.

9, 10. ?Nating se Deved i gat plante enemi olsem Ol Sam 3:6, 7 i soemaot, from wanem hem i no gat tingting ya blong givimbak?

 ⁹ Nating we Absalom i agensem Deved, mo plante narafala tu oli no moa holemstrong long hem, be Deved i singsing se: “I gat ten taosen enemi we oli hivap raon long mi, oli stap agens long mi, be mi mi no save fraet long olgeta. !Hae God, yu yu God blong mi! !Plis yu kam, yu sevem mi! Oltaem yu stap panisim ol enemi blong mi, yu stap brekemdaon paoa blong olgeta.”—Sam 3:6, 7.

¹⁰ Deved i no gat tingting blong givimbak. Sipos ol enemi blong hem oli mas kasem ‘panis,’ be God nao bambae i givim panis ya. King Deved i raetem wan kopi blong Loa finis, taswe hem i save tok we Jehova i talem long Loa ya se: “Bambae mi givimbak ol fasin ya we ol enemi ya oli mekem long yufala.” (Dut. 17:14, 15, 18; 32:35) Mo tu, God nomo i gat raet blong ‘brekemdaon paoa’ blong ol rabis man, we i min se oli no moa save spolem man. Jehova i save gud hu ya ol rabis man, from we hem i save ‘lukluk long tingting blong man.’ (1 Saml. 16:7) !Yumi talem tangkiu long God from we hem i mekem se yumi gat bilif, mo i givim paoa long yumi blong yumi save stanap strong agens long Setan we i rabis olgeta! I no longtaem bambae Setan i go kalabus long bigfala hol ya we i godaon we i godaon olgeta. Bambae hem i olsem wan laeon we i singaot bigwan be i no gat tut. !I stret nomo we hem i go lus blong olwe!—1 Pita 5:8, 9; Rev. 20:1, 2, 7-10.

“Paoa Blong Sevem Man i Blong God Nomo”

11. ?From wanem yumi mas prea from ol Kristin brata sista blong yumi?

¹¹ Deved i luksave se Jehova nomo i save sevem hem, long taem ya we hem i nidim help tumas. Be Deved i no tingbaot hem wan nomo. ?Olsem wanem long grup blong ol man we Jehova i glad long olgeta? Deved i finisim Sam blong hem, i talem se: “Paoa blong sevem man i blong yu nomo. Mi wantem blong yu blesem ol man blong yu.” (Sam 3:8) I tru, Deved i gat ol bigfala trabol, be hem i tingbaot olgeta man we oli wosipim Jehova mo hem i save se God bambae i blesem olgeta. ?Olsem wanem? ?Yumi save tingbaot ol Kristin brata sista blong yumi? I gud yumi tingbaot olgeta long prea, yumi askem long Jehova blong i givim tabu spirit long olgeta blong oli stanap strong, oli no fraet, mo blong oli save wok wetem strong tingting blong talemaot gud nius.—Efes. 6:17-20.

12, 13. ?Absalom i kasem wanem trabol, mo Deved i harem olsem wanem?

¹² Absalom i ded long wan fasin we i blong sem nomo. Hemia wan woning long ol man we oli spolem ol narafala man, speseli taem oli spolem ol man we God i jusumaot olgeta, olsem Deved. (Ridim Ol Proveb 3:31-35.) I gat wan faet, nao ami blong Absalom i lus. Absalom i stap raed long wan hafkas dongki, mo hem i traem ronwe. Nao longfala hea blong hem i fas long han blong wan bigfala tri. Absalom i stap hang long han blong tri ya we hem i laef nomo, be hem i no moa save mekem wan samting. Nao Joab i tekem tri spia, i sperem Absalom long jes blong hem.—2 Saml. 18:6-17.

¹³ Taem Deved i harem se boe blong hem i ded, ?yu ting se hem i glad? Nogat. Hem i stap wokbaot i go i kam, we i stap krae mo i stap singaot bigwan se: “!Awooo, Pikinini blong mi! !Pikinini blong mi Absalom! !Absalom, pikinini blong mi! !Sipos mi nomo mi tekem ples blong yu, mi ded! !Pikinini blong mi! !Awooo, Absalom, pikinini blong mi!” (2 Saml. 18:24-33) Ol tok blong Joab nao i mekem we Deved i no moa harem nogud bitim mak. !Absalom i kasem trabol, be hemia i fol blong hem nomo from we hem i tingbaot hem tumas! !Hem i agensem stret papa blong hem we Jehova i putumap, from samting ya, hem i ded long wan fasin we i nogud olgeta!—2 Saml. 19:1-8; Prov. 12:21; 24:21, 22.

Deved i Soemaot Bakegen Se Hem i Trastem God

14. ?Yumi save talem wanem long saed blong Sam 4 we Deved i raetem?

¹⁴ Sam 4 i wan prea we Deved i mekem wetem fulhat blong hem, olsem prea ya long Sam 3. Prea ya i wan pruf bakegen se Deved i trastem Jehova. (Sam 3:4; 4:3) Maet Deved i raetem sing ya afta we Absalom i traem tekemaot jea blong king long hem. Maet hem i wantem talem tangkiu from we God i givhan long hem, mo maet tingting blong hem i stap spel naoia. No maet Deved i raetem sing ya blong ol Livaet oli singsing long hem. Nomata se hem i raetem from wanem, be sipos yumi tingting dip long hem, samting ya bambae i mekem we yumi i trastem Jehova moa.

15. ?From wanem yumi save prea long Jehova wetem strong tingting long nem blong Pikinini blong hem?

¹⁵ Bakegen, Deved i soemaot se hem i trastem God long olgeta tingting blong hem, mo hem i save se God i lesin long prea blong hem, mo i ansa long prea  ya. Hem i singsing se: “God, oltaem yu stap mekem mi mi kasem ol samting we mi gat raet blong kasem [“fasin blong yu i stret,” NW]. Sipos mi mi prea long yu, plis yu ansa long mi. Taem we mi mi stap long trabol, yu yu stap halpem mi. Naoia, plis yu kaen long mi, yu harem prea blong mi.” (Sam 4:1) Sipos yumi tu, yumi mekem ol fasin we oli stret long laef blong yumi, yumi save se God bambae i harem prea blong yumi. Jehova i wan ‘God we fasin blong hem i stret,’ mo i stap blesem ol man we oli mekem stret fasin. From samting ya, yumi save prea long God wetem strong tingting, long nem blong Pikinini blong hem, mo wetem bilif ya se Jisas i ded blong sevem yumi. (Jon 3:16, 36) !Samting ya i mekem tingting blong yumi i stap kwaet!

16. ?Maet tingting blong Deved i foldaon from wanem?

¹⁶ Samtaem, ating yumi fesem wan trabol, nao yumi no moa gat strong tingting. Maet samting ya i hapen long Deved tu blong smol taem, ale hem i singsing se: “Olgeta. ?Bambae yufala i stap spolem nem blong mi gogo kasem wetaem? ?Bambae yufala i stap laekem samting we i nogud gogo kasem wetaem? ?Mo bambae yufala i stap folem fasin blong giaman gogo kasem wetaem?” (Sam 4:2) Taem Deved i statem tok blong hem se, “Olgeta,” hem i yusum wan tok long lanwis blong hem we i talem se “ol pikinini blong ol man,” mo tok ya i no givim gudfala tingting long saed blong ol man. Ol enemi blong Deved oli “laekem samting we i nogud.” Baebol ya New International Version i yusum ol narafala tok long vas ya se: “?Gogo kasem wetaem bambae yufala i laekem ol giaman fasin mo yufala i lukaot ol giaman god blong wosipim olgeta?” Nating we tingting blong yumi i foldaon from samting we ol narafala oli mekem, i gud yumi gohed strong blong prea, mo yumi soemaot se yumi putum olgeta tingting blong yumi long wan God nomo we i tru.

17. ?Long wanem rod yumi soemaot se fasin blong yumi i laenap wetem Ol Sam 4:3?

¹⁷ Fasin ya we Deved i putum tingting blong hem long God, i kamaot klia long ol tok ya se: “Yufala i mas tingbaot we Hae God i bin jusumaot ol stret man oli blong hem, mo taem mi mi prea long hem, hem i stap harem mi.” (Sam 4:3) Blong yumi holemstrong long Jehova, yumi mas trastem hem long olgeta tingting blong yumi, mo yumi no mas fraet. Yu traem tingbaot. Kristin famle i mas gat ol fasin ya taem i gat wan memba blong famle we i no tanem tingting blong hem from sin we hem i mekem, nao kongregesen i mas putumaot hem. God i blesem ol man we oli holemstrong long hem mo long ol rod we hem i stanemap. Mo sipos ol man oli holemstrong long Jehova mo oli trastem hem, bambae oli glad.—Sam 84:11, 12.

18. ?Sipos wan man i talemaot ol tok we i no kaen long yumi, no i mekem i no stret long yumi, yumi save mekem wanem we i laenap wetem Ol Sam 4:4?

¹⁸ Sipos wan man i talem no i mekem samting we i mekem yumi harem nogud, ?bambae yumi mekem wanem? Yumi save stap glad sipos yumi mekem olsem Deved we i talem se: “Yufala i save kros, be i nogud yufala i mekem samting nogud. Taem yufala i stap long bed blong yufala, i gud yufala i stap kwaet, yufala i tingting gud long ol samting ya.” (Sam 4:4, lukluk futnot long Baebol long Bislama.) Sipos yumi harem nogud from we wan man i talem ol tok we i no kaen, no i mekem i no stret long yumi, i gud yumi no mekem nogud fasin ya blong givimbak long hem. (Rom 12:17-19) Yumi save tokbaot trabol ya long prea we yumi mekem taem yumi stap long bed. Sipos yumi prea long saed blong trabol ya, maet samting ya i save jenisim tingting we yumi gat fastaem, nao yumi naf blong soemaot lav mo fogivim man ya. (1 Pita 4:8) I gud blong makem advaes blong aposol Pol we i stanap long Ol Sam 4:4. Pol i talem se: “‘Sipos yufala i kros, yufala i no letem we kros ya i lidim yufala, blong yufala i mekem sin.’ Mo yufala i no stap kros, gogo kasem san i godaon. Yufala i mas no givim janis long Setan.”—Efes. 4:26, 27.

19. ?Ol Sam 4:5 i save givhan long yumi olsem wanem long saed blong wosip we yumi mekem olsem sakrefaes?

¹⁹ Deved i soemaot long tok blong hem se fasin blong trastem God i impoten. Hem i singsing se:  “Yufala i mas mekem ol sakrefaes long Hae God, olsem we loa i talem [“ol sakrefaes we oli stret,” NW], mo yufala i mas trastem hem.” (Sam 4:5) God i glad blong tekem ol sakrefaes we ol man Isrel oli givim, sipos stret tingting i pusum olgeta blong givim sakrefaes ya. (Aes. 1:11-17) Sipos yumi wantem se God i glad long wosip blong yumi we i olsem sakrefaes blong yumi, stret tingting i mas pusum yumi blong mekem wosip, mo yumi mas trastem God long olgeta tingting blong yumi.—Ridim Ol Proveb 3:5, 6; Hibrus 13:15, 16.

20. ?Taem yumi trastem Jehova, yumi kasem wanem gudfala samting?

²⁰ Deved i prea se: “Hae God. I gat plante man we oli stap prea se, ‘Hae God. Plis yu givim plante gudfala samting moa long mifala. Yu luk long mifala, yu kaen long mifala.’” (Sam 4:6) From we yumi trastem Jehova, hem i agri long yumi, nao yumi glad bigwan taem yumi mekem wok blong hem wetem strong tingting.

21. ?Yumi save kasem wanem sipos yumi joen fulwan long wok blong prij?

²¹ Deved i tingbaot taem ya we God bambae i mekem ol man oli harem gud moa i winim taem ya blong tekemaot ol kakae long garen. Nao hem i singsing long Jehova se: “Taem olgeta ya oli kasem plante kakae mo plante waen, oli harem gud tumas. Be yu yu mekem mi mi glad, mi harem gud moa, i winim olgeta.” (Sam 4:7) Yumi save kasem bigfala glad sipos yumi joen fulwan long wok blong prij tede, we i olsem wok blong tekemaot ol kakae long garen. (Luk 10:2) Ol brata we tabu spirit i makemaot olgeta oli lidim wok ya, mo yumi glad tumas blong luk we namba blong ‘ol man blong tekemaot ol kakae long garen,’ i stap kam antap. (Aes. 9:3) ?Olsem wanem? ?Yu yu joen fulwan long nambawan wok ya we i givim glad, hemia blong tekemaot ol kakae long garen?

Oltaem Yu Mas Trastem God Long Olgeta Tingting Blong Yu

22. ?Folem Ol Sam 4:8, ol man Isrel oli stap olsem wanem taem oli obei long Loa blong God?

²² Deved i raetem ol las tok blong Sam ya se: “Hae God. Taem mi mi ledaon, tingting blong mi i kwaet, nao mi slip gud, from we yu nomo yu stap lukaot gud long mi, nao mi mi sef.” (Sam 4:8) Taem ol man Isrel oli obei long Loa blong Jehova, oli gat pis wetem hem mo oli harem se oli sef. Yu save tingbaot taem ya we Solomon i king, nao ‘ol man Juda mo ol man Isrel, oli stap gud,’ oli harem se oli sef. (1 King 4:25) Nating se ol neson raonabaot oli agensem olgeta, be ol man we oli trastem God, oli harem gud long pis. Olsem Deved, yumi slip gud from we God i mekem se yumi stap gud, mo yumi harem se yumi sef.

23. ?Bambae yumi kasem wanem blesing sipos yumi trastem Jehova long olgeta tingting blong yumi?

²³ I gud yumi holem strong tingting long wok blong Jehova. Mo tu, i gud yumi prea wetem bilif nao yumi harem gud long ‘pis ya we God i givim, we i bigfala moa, i bitim save blong yumi.’ (Fil. 4:6, 7) !Hemia i givim glad we i bigwan long yumi! Mo sipos yumi trastem Jehova long olgeta tingting blong yumi, bambae yumi no fraet long fiuja.

?Bambae Yu Yu Ansa Olsem Wanem?

• ?Wanem ol trabol we Absalom i mekem long Deved?

• ?Olsem wanem Sam 3 i mekem man i harem se hem i sef?

• ?Sam 4 i save givhan long yumi long wanem rod, blong yumi strong moa blong trastem Jehova?

• ?Wanem blesing we yumi save kasem taem yumi trastem God long olgeta tingting blong yumi?

[Kwestin]

[Tok blong pija long pej 29]

Taem Deved i ronwe long Absalom, long taem ya tu hem i trastem Jehova

[Tok blong pija long pej 32]

?Yu yu trastem Jehova long olgeta tingting blong yu?