I Gat Gud Nius We Olgeta Man Oli Nidim

“Gud nius ya . . . hem i paoa blong God blong sevem olgeta man.”—ROM 1:16.

1, 2. ?From wanem yu yu talemaot “gud nius” blong Kingdom? ?Wanem ol defren haf long saed blong gud nius ya we yu yu makem strong?

‘MI MI glad tumas we evri dei mi save talemaot gud nius.’ Maet hemia tingting blong yu, no maet yu yu talem tok ya. Yu we yu wan Witnes blong Jehova, yu save se i impoten tumas blong talemaot “gud nius ya, se God i King blong olgeta man [“gud nius blong Kingdom,” NW].” Maet yu yu naf blong talem baehat profet tok we Jisas i talem long saed blong wok ya.—Mat. 24:14.

² Taem yu talemaot “gud nius” blong Kingdom, yu stap mekem se wok ya we Jisas i statem, i gohed moa. (Ridim Luk 4:43.) Taem yu stap prij, maet yu makem strong poen ya se klosap nao God bambae i stretem ol trabol blong ol man. Long taem blong “bigfala trabol,” bambae hem i finisim olgeta giaman skul mo i tekemaot ol rabis fasin long wol. (Mat. 24:21) Maet yu tokbaot tu se Kingdom blong God bambae i mekem wol i kam wan Paradaes bakegen, nao olgeta man oli save laef long pis mo oli save harem gud. Blong talem stret, “gud nius” blong Kingdom i joen wetem ‘gud nius ya we God i talem long Ebraham se: “Mi bambae mi yusum yu blong blesem olgeta man long wol.”’—Gal. 3:8.

3. ?From wanem yumi save talem se Pol i makem tok ya gud nius, long buk blong Rom?

³ Be maet yumi no tokbaot tumas wan impoten haf blong gud nius we ol man oli nidim tumas. Taem Pol i raetem leta we i go long ol Kristin long Rom, hem i yusum tok ya long lanwis Grik we i minim Kingdom, wan taem nomo, be hem i yusum tok ya we i minim “gud nius” 12 taem. (Ridim Rom 14:17.) ?Wanem haf blong gud nius we Pol i tokbaot plante taem long buk blong Rom? ?From wanem haf ya blong gud nius i impoten tumas? ?Mo from wanem yumi mas tingbaot poen ya, taem yumi talemaot “gud nius blong God” long ol man raonabaot long yumi?—Mak 1:14; Rom 15:16; 1 Tes. 2:2.

Samting We Ol Man Rom Oli Nidim

4. Taem Pol i jes go kalabus long Rom, hem i tokbaot wanem long ol man we hem i prij long olgeta?

⁴ Yumi save lanem plante samting from ol tok we Pol i talem taem hem i jes go kalabus. Yumi ridim se sam man Jiu oli go visitim hem long kalabus. Mo hem i ‘stap toktok long olgeta, i talemgud long olgeta we (1) God i King [“givim witnes long olgeta long saed blong Kingdom blong God,” NW] mo hem i pulum olgeta oli kam man blong (2) Jisas.’ ?Wanem samting i kamaot from? “Sam long olgeta oli harem tok blong hem, nao oli bilif long hem, be sam narafala man oli no save bilif.” Biaen, Pol i ‘glad blong tekem olgeta we oli kam blong luk hem, oli kam long haos blong hem, hem i talemaot long olgeta (1) we God i King [“hem i talemaot Kingdom blong God,” NW] mo hem i stap tijim ol man long gud nius blong (2) Jisas Kraes, Masta blong yumi.’ (Wok 28:17, 23-31) I klia nomo we Pol i pulum tingting blong ol man i go long Kingdom blong God. ?Be wanem narafala samting we hem i makem long tingting blong ol man? Hem i makem wan samting we i impoten long saed blong Kingdom  ya, hemia wok we Jisas i mekem blong stamba tingting blong God i save kamtru.

5. ?Wanem samting we ol man oli mas save long hem, mo we Pol i tokbaot long buk blong Rom?

⁵ Wan samting we olgeta man oli nidim, hemia save long saed blong Jisas mo oli mas bilif long hem tu. Long buk blong Rom, Pol i tokbaot samting ya. Long stat blong buk ya, Pol i raetem se hem i ‘stap wok blong God long olgeta tingting blong hem blong talemaot gud nius ya blong Pikinini blong hem.” Hem i talem tu se: “Mi mi no sem nating long gud nius ya, from we hem i paoa blong God blong sevem olgeta man we oli bilif long hem.” Biaen, hem i talem se: “Long tok blong gud nius ya we mi mi stap talemaot, mi talemaot we . . . God bambae i yusum Jisas Kraes blong jajem ol man from ol fasin we i stap haed long tingting blong olgeta.” Mo bakegen, hem i talem se: “I stat long Jerusalem i kam kasem Ilirikam, oltaem long rod, mi mi stap talemaot gud nius blong Kraes, long fulmak blong hem.” * (Rom 1:9, 16; 2:16; 15:19) Long tingting blong yu, ?from wanem Pol i tokbaot Jisas plante taem long ol man Rom?

6, 7. ?Yumi save talem se kongregesen blong Rom i stat olsem wanem, mo hu ol man we oli stap long kongregesen ya?

⁶ Yumi no save olsem wanem kongregesen blong Rom i stat. Maet sam man Jiu mo sam man blong narafala kantri we oli folem bilif blong ol man Jiu, oli stap long Jerusalem long dei blong Pentekos long yia 33 K.T., * nao oli kam Kristin mo oli gobak long Rom. (Wok 2:10) Sipos no, maet sam Kristin oli go wokbaot long Rom no oli go mekem bisnes longwe, nao oli talemaot trutok long ples ya. Nomata se i olsem wanem, be samwe long yia 56 K.T., taem Pol i raetem buk blong Rom, kongregesen ya i stanap longtaem finis. (Rom 1:8) ?Hu ol man we oli stap long kongregesen ya?

⁷ Sam long olgeta oli ol man Jiu. Long leta blong Pol, hem i talem halo long Andronikas mo Junias mo i talem se “mitrifala i laen blong Isrel.” Akwila we i stap long Rom wetem woman blong hem Prisila, tufala tu oli man Jiu. (Rom 4:1; 9:3, 4; 16:3, 7; Wok 18:2) Be i luk olsem se plante narafala brata mo sista we Pol i talem halo long olgeta long leta blong hem, oli no laen blong Isrel. Maet samfala oli kamaot “long haos blong Sisa.” Hemia i min se maet sam oli wok slef blong Sisa mo sam oli gat wan posisen we i no hae tumas.—Fil. 4:22; Rom 1:6; 11:13.

8. ?Olgeta long Rom oli stap long wanem trabol?

⁸ Wan trabol i kasem olgeta Kristin long Rom, mo i kasem yumi tede tu. Pol i tokbaot trabol ya i se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) I klia nomo se evriwan we oli ridim leta blong Pol, oli mas luksave se oli sinman, mo oli mas bilif long rod we God i stanemap blong givhan long ol man.

Ol Man Oli Mas Luksave Se Oli Sinman

9. ?Pol i pulum tingting blong ol man i go long wanem nambawan samting we bambae i kamaot from gud nius ya?

⁹ Long stat blong leta we Pol i raetem long ol man Rom, hem i tokbaot nambawan samting we bambae i kamaot from gud nius ya we hem i stap talemaot. Hem i se: “Mi mi no sem nating long gud nius ya, from we hem i paoa blong God blong sevem olgeta man we oli bilif long hem, fastaem long mifala ol laen blong Isrel, be biaen long ol narafala man tu.” Yes, i gat rod blong God i sevem ol man ya. Be fastaem oli mas bilif. Hemia nao wanem we Pol i tokbaot long leta blong hem, i se: “Man we i stret man long fes blong God from we hem i bilif, hem bambae i kasem laef.” (Rom 1:16, 17; Gal. 3:11; Hib. 10:38) ?Gud nius ya we i save lidim ol man long rod ya blong God i sevem olgeta, i joen olsem wanem long trabol ya se “olgeta evriwan oli mekem nogud finis”?

10, 11. ?From wanem sam man oli ting se tok we i stap long Rom 3:23 i narakaen, be sam narafala man oli no tingting olsem?

¹⁰ Ol man oli mas gat bilif ya we i save sevem laef blong olgeta. Be fastaem, oli mas luksave se oli sinman. Long ol man we oli bilif long God taem oli smol i kam, mo long olgeta we oli gat smol save finis long saed blong Baebol, tingting ya se oli sinman i no narakaen. (Ridim Prija 7:20.) Nomata sipos oli agri se oli sinman no oli no agri fulwan, be oli save smol wanem we Pol i minim taem hem i talem se: “Olgeta evriwan oli mekem nogud finis.” (Rom 3:23) Nating se i olsem, maet long wok blong prij, yumi mitim plante  man we oli no kasem save long mining blong tok ya.

¹¹ Long sam kantri, ol man oli no gruap wetem tingting ya se taem oli bon, oli gat sin finis, mo se oli kasem sin ya long papa mama blong olgeta. I tru, ating olgeta oli kasem save se oli stap mekem mastik, oli gat sam slak fasin, mo maet oli mekem sam samting we i nogud. Mo oli luk se ol narafala man oli olsem tu. Be maet kantri we oli gruap long hem, i mekem se oli no kasem save from wanem olgeta, mo ol narafala tu, oli stap mestem olsem. Long sam lanwis, taem ol man oli harem tok ya ‘sinman,’ oli ting se hemia wan rabis man we i brekem loa, no i brekem sam rul. I klia se maet ol man we oli gruap wetem ol tingting olsem, oli ting se tok blong Pol long saed blong sinman, i no tru long saed blong olgeta.

12. ?From wanem plante man oli no bilif se olgeta man oli sinman?

¹² Plante man we oli laef long ol kantri we ol man oli talem se oli Kristin, olgeta tu oli no bilif se man i gat sin. ?From wanem? Nating we sam samtaem oli go long jos, be oli ting se stori blong Adam mo Iv long Baebol i wan kastom stori nomo. Sam narafala oli gruap long wan famle no long wan ples we ol man oli no bilif long God. Ale olgeta tu oli no bilif se i gat wan God i stap. From samting ya, oli no kasem save se God ya we i Hae Olgeta i putum sam loa we ol man oli mas folem, long saed blong fasin we i stret mo fasin we i no stret. Oli no kasem save se taem ol man oli no folem ol loa ya, be oli stap mekem sin. Olgeta ya oli olsem ol man bifo we Pol i tokbaot olgeta se oli “no save God nating,” mo ‘oli no save putum tingting blong olgeta i stap strong long ol promes blong hem.’—Efes. 2:12.

13, 14. (a) ?Wanem wan risen from wanem olgeta we oli no bilif se God i stap, mo we oli no bilif se oli sinman, oli no gat wan tok nating blong talem? (b) ?Plante man we oli no bilif se God i stap, oli mekem wanem fasin?

¹³ Long leta we Pol i raetem long ol man Rom, hem i tokbaot tu risen from wanem oli no mas yusum ples mo laef we oli gruap long hem, olsem wan eskius blong oli no bilif long God. Hemia i stret tu long yumi tede. Fas risen, hemia se ol samting raonabaot long yumi oli pruvum se i gat wan God we i Mekem olgeta. (Ridim Rom 1:19, 20.) Hemia i laenap wetem tok we Pol i raetem long ol Hibru Kristin taem hem i stap long Rom, i se: “Evri haos i gat man we i wokem, be God i wokem olgeta samting we i stap.” (Hib. 3:4) Ol tok blong hem oli stret long poen ya se i gat wan God i stap we i Mekem evri samting long heven mo long wol.

¹⁴ Taswe, Pol i gat gudfala risen blong talem long ol man Rom se eniman we i wosipim ol narafala god we man nomo i wokem, ‘hem i no gat wan tok nating blong talem,’ i min se hem i no save mekem eskius. Hemia i tru tu long ol man Isrel we oli laef bifo we Jisas i kam long wol. Mo yumi save talem se tok blong Pol i stret tu long ol woman we oli lego ol stret fasin blong woman wetem man, nao oli stap mekem fasin we i no stret, mo ol man we oli lego fasin blong man wetem woman, nao oli stap mekem ol fasin ya wetem ol narafala man, we i blong sem nomo. (Rom 1:22-27) Taswe biaen, Pol i talem wan samting we i stret nomo, i se: ‘Ol laen blong Isrel, mo olgeta we oli no laen blong Isrel, olgeta evriwan oli sem mak nomo, oli stap aninit long paoa blong sin.’—Rom 3:9.

Tingting Blong Olgeta i Stap Jajem Olgeta

15. ?Hu olgeta we tingting blong olgeta i stap jajem olgeta, nao oli save sipos wan samting i stret no i no stret? ?Wanem samting i kamaot from?

¹⁵ Buk blong Rom i soemaot wan narafala risen from wanem ol man oli mas luksave se oli sinman mo se oli nidim help blong oli kam fri long sin. Long saed blong ol loa we God i givim long ol man Isrel bifo, Pol i raetem se: “Olgeta laen blong Isrel oli save Loa we God i givim long Moses, mo sipos oli mekem sin, God bambae i yusum Loa ya blong jajem olgeta from sin blong olgeta.” (Rom 2:12) Pol i gohed, i soemaot se plante taem ol man blong ol narafala laen we oli no save ol loa ya blong God, “oli gohed long tingting blong olgeta nomo, nao oli stap mekem ol samting olsem we Loa ya i talem.” ?From wanem plante taem ol man olsem oli putum tabu blong man i no slip wetem wan narafala we i stret famle blong hem bakegen? ?Mo i putum tabu blong man i no kilim narafala i ded, mo  blong i no stil? Pol i talemaot risen blong samting ya se, tingting blong olgeta i stap jajem olgeta, nao oli save sipos wan samting i stret no i no stret.—Ridim Rom 2:14, 15.

16. ?Nating se tingting blong man i save jajem hem, from wanem hemia i no min se man ya bambae i stap longwe long sin?

¹⁶ Be maet yu luk se nating we tingting blong man i stap jajem hem olsem wan witnes we i stap talemaot se hem i mekem i gud no i nogud, hemia i no min se man ya bambae i lesin taem tingting blong hem i jajem hem. Stori blong ol man Isrel bifo i soemaot samting ya. Tingting blong ol man Isrel i save jajem olgeta, mo oli gat ol loa blong God we i talem stret se oli no mas stil mo oli no mas stilim woman blong narafala man. Nating se i olsem, plante taem oli mekem samting we tingting blong olgeta i stap jajem olgeta from, mo oli brekem Loa blong Jehova tu. (Rom 2:21-23) Oli dabolem rong blong olgeta, oli sinman tru from we oli stap longwe long ol loa blong God mo long samting we God i wantem. Samting ya i mekem se oli no moa fren gud wetem God ya we i Mekem olgeta.—Lev. 19:11; 20:10; Rom 3:20.

17. ?Buk blong Rom i talem wanem blong leftemap tingting blong yumi?

¹⁷ Maet ol samting we yumi tokbaot long buk blong Rom, oli soemaot se ol man oli no klin nating long fored blong God ya we i gat Olgeta Paoa. Hemia i sem mak long saed blong yumi. Be Pol i no stop long ples ya. Hem i talem bakegen ol tok blong Deved long Ol Sam 32:1, 2, i se: “Man we God i fogivim hem, mo i tekemaot ol sin blong hem, hem i save harem gud. Man we God i no makem ol sin blong hem, hem i save harem gud.” (Rom 4:7, 8) Yes, God i openem wan rod blong hem i save fogivim sin blong ol man, be long semtaem hem i folem stret fasin blong hem.

Gud Nius Long Saed Blong Jisas

18, 19. (a) ?Long buk blong Rom, Pol i pulum tingting blong yumi i go long wanem haf blong gud nius? (b) ?Wanem tu samting we yumi mas luksave, sipos yumi wantem kasem ol blesing blong Kingdom?

¹⁸ Taem yu tingbaot rod ya we Jehova i stanemap, maet yu talem se: “!Hemia i wan gud nius ya!” I tru, hemia i wan gud nius, mo samting ya i mekem yumi tingbaot haf blong gud nius ya we Pol i soemaot long buk blong Rom. Pol i raetem se: “Mi mi no sem nating long gud nius ya, from we hem i paoa blong God blong sevem olgeta man.”—Rom 1:15, 16.

¹⁹ Gud nius ya, hem i long saed blong wok we Jisas i mekem, blong stamba tingting blong God i save kamtru. Pol i wantem tumas blong luk ‘dei ya we God bambae i yusum Jisas Kraes blong jajem ol man from ol fasin we i stap haed long tingting blong olgeta.’ (Rom 2:16) Pol i no stap talem se ‘kingdom blong Kraes mo God’ i no impoten, mo hem i no stap daonem wok we Kingdom ya bambae i mekem, nogat. (Efes. 5:5, NW) Be hem i soemaot se sipos yumi wantem stap laef mo harem gud long ol blesing we Kingdom blong God bambae i givim, yumi mas luksave tu samting, (1) yumi sinman nomo long fes blong God mo (2) from wanem yumi mas bilif long Jisas Kraes blong God i save fogivim ol sin blong yumi. Hemia ol save we oli joen wetem stamba tingting blong God. Taem wan man i kasem save long ol samting ya, i agri long olgeta, mo i luk olsem wanem ol samting ya oli openem rod blong hem i save gat wan gudfala laef long fiuja, man ya i save talem stret se: “!Yes, hemia i wan gud nius ya!”

20, 21. ?Long wok blong prij, from wanem yumi mas tingbaot oltaem gud nius ya we buk blong Rom i tokbaot? ?Wanem samting i save kamaot from?

²⁰ Hemia wan haf blong gud nius we yumi mas tingbaot oltaem, taem yumi stap mekem wok blong prij. Pol i talem bakegen tok blong Aesea we i tokbaot Jisas, i se: “Olgeta we oli bilif long hem, bambae oli no save sem.” (Rom 10:11; Aes. 28:16) Maet sam man we oli save smol long tok we Baebol i talem long saed blong sin, oli no harem se gud nius long saed blong Jisas i narakaen. Be blong ol narafala, gud nius ya i wan niufala samting long olgeta, wan samting we oli no save mo we ol man raonabaot long olgeta oli no bilif long hem. Taem ol man olsem oli stat blong bilif long God mo oli trastem Baebol, yumi mas eksplenem long olgeta wanem wok we Jisas i mekem. Buk blong Rom japta 5 i tokbaot moa long saed blong haf ya blong gud nius, mo hemia nao wanem we bambae yumi tokbaot long nekis stadi. Bambae yu luk se stadi ya i givhan long yu long wok blong prij.

 ²¹ Yumi kasem gudfala frut taem yumi givhan long ol man we hat blong olgeta i stret, blong oli kasem save long gud nius ya we buk blong Rom i tokbaot plante taem. Gud nius ya “hem i paoa blong God blong sevem olgeta man we oli bilif long hem.” (Rom 1:16) Antap long ol gudfala frut ya we yumi kasem, bambae yumi luk we plante narafala oli agri wetem tok we Pol i talem long Rom 10:15, we i se: “Samting ya i gud tumas, we ol man oli wokbaot i kam blong talemaot gud nius long yumi.”—Aes. 52:7.

[Ol futnot]

?Yu Yu Tingbaot?

• ?Buk blong Rom i tokbaot wanem haf blong gud nius?

• ?Yumi mas givhan long ol narafala blong oli kasem save long wanem impoten samting?

• ?Long wanem rod, “gud nius long saed blong Kraes” i karem blesing long yumi mo long ol narafala?

[Kwestin]

[Tok blong makem poen long pej 12]

Gud nius ya we buk blong Rom i tokbaot, hem i long saed blong impoten wok we Jisas i mekem, blong stamba tingting blong God i save kamtru

[Tok blong pija long pej 13]

!Yumi evriwan i bon wetem wan bigfala trabol, hemia sin!