‘Yufala i Ona Gud Long Olgeta Ya We Oli Stap Wok Had Wetem Yufala’

“Yufala i ona gud long olgeta ya we oli stap wok [“had,” NW] wetem yufala. Hemia olgeta ya we Masta blong yumi i jusumaot olgeta blong oli lidim yufala, mo blong oli tijim [“stretem,” NW] yufala.”—1 TES. 5:12.

1, 2. (a) ?Taem Pol i raetem fas leta blong hem i go long kongregesen blong Tesalonaeka, ol Kristin long taon ya oli kasem wanem trabol? (b) ?Pol i pulum tingting blong olgeta blong oli mekem wanem?

YU TRAEM tingbaot se yu yu stap long taem blong ol aposol bifo, mo yu joen long kongregesen blong Tesalonaeka. Kongregesen ya i wan long ol faswan long Yurop. Aposol Pol i spenem plante taem blong mekem ol Kristin long kongregesen ya oli kam strong. Hem i putumap sam brata blong oli lidim ol wok insaed long kongregesen ya, olsem we hem i bin mekem long ol narafala kongregesen. (Wok 14:23) Be afta we kongregesen ya i stanap, ol man Jiu oli mekem wan grup blong olgeta blong sakemaot Pol mo Saelas long Tesalonaeka. Ating ol Kristin long taon ya oli harem olsem se i no moa gat wan man blong lidim olgeta, mo maet oli fraet tu.

² Taswe afta we Pol i aot long Tesalonaeka, Pol i wari long niufala kongregesen ya. Hem i traem blong gobak, be “Setan i stap blokem” rod blong hem. Ale, hem i sanem Timoti blong i go leftemap tingting blong ol Kristin long Tesalonaeka. (1 Tes. 2:18; 3:2) Gudfala nius we Timoti i karem i kambak afta we hem i visitim kongregesen blong Tesalonaeka, i pulum Pol blong raetem wan leta i go long kongregesen ya. Long leta ya, Pol i tokbaot fulap samting.  Be wan long ol samting we hem i traem pulum ol Kristin ya blong mekem, hemia blong ‘ona gud long olgeta we oli stap lidim olgeta.’—Ridim 1 Tesalonaeka 5:12, 13.

3. ?Ol Kristin long Tesalonaeka oli gat wanem risen blong ona long ol elda long kongregesen blong olgeta?

³ Ol brata we oli lidim ol wok insaed long Kristin kongregesen blong Tesalonaeka oli no gat plante save olsem Pol mo ol fren blong hem. Mo tu, oli niu nomo long trutok, i no olsem ol brata long Jerusalem we oli stap longtaem finis long trutok. !Yes, kongregesen ya i jes stanap nomo, i no bitim wan yia yet! Nating se i olsem, olgeta long kongregesen ya oli gat gudfala risen blong ona long ol elda long kongregesen blong olgeta, from we oli “wok had” mo oli stap “lidim” ol wok insaed long kongregesen mo oli stap “stretem” ol brata. Yes, oli gat gud risen blong “ona gud long [ol elda] from ol wok ya we oli stap mekem mo oli mas lavem olgeta.” Pol i talem tok ya long olgeta finis, nao hem i givim advaes ya se: “Yufala i mas joen gud, we yufala i no rao.” Sipos yu stap long Tesalonaeka long taem ya, ?bambae yu yu talem tangkiu from ol wok we ol elda oli mekem? God i yusum Kraes blong givim “ol man we oli olsem ol presen” insaed long kongregesen blong yumi. ?Yu yu tingbaot ol man ya olsem wanem?—Efes. 4:8, NW.

Oli “Wok Had”

4, 5. ?From wanem ol elda long taem blong Pol oli mas wok had blong tijim kongregesen, mo from wanem ol elda tede tu oli mas wok had olsem?

⁴ Afta we Pol mo Saelas tufala i aot long Tesalonaeka mo oli go long Berea, ?ol elda long Tesalonaeka oli “wok had” olsem wanem? Ol elda ya oli folem eksampol blong Pol. Oli yusum Baebol blong tijim kongregesen. Maet yu stap tingting se, ?Olsem wanem? ?Ol Kristin long Tesalonaeka oli glad blong harem Tok blong God? Baebol i talem se ol man Berea oli “glad moa blong tingbaot ol tok blong tufala, i winim ol man Tesalonaeka. . . . evri dei, oli stap ridimgud ol tok blong Baebol.” (Wok 17:11) Vas ya i stap tokbaot ol man Jiu we oli stap long Tesalonaeka mo ol man Jiu we oli stap long Berea. Hem i wantem soemaot se bighaf blong ol man Jiu we oli stap long Tesalonaeka oli no agri blong folem trutok. Be sam long ol man Jiu long Tesalonaeka oli kam Kristin from we taem oli harem tok blong God, oli ‘no tekem olsem we i tok blong man nomo, be oli kasemgud se hem i tok blong God stret.’ (1 Tes. 2:13) Samting ya i soemaot klia se ol elda oli wok had blong tijim gud kongregesen.

⁵ Tede, slef we i stret mo waes i stap givimaot “kakae long stret taem” long ol sipsip blong God. (Mat. 24:45) Ol elda long ol kongregesen oli folem wanem we slef we i stret mo waes i talem. Ale, ol elda oli wok had blong tijim gud ol brata sista blong olgeta insaed long kongregesen. Long ol kongregesen, i gat plante buk mo magasin we i stanap long Baebol, mo long sam lanwis, ol brata sista oli gat Watch Tower Publications Index mo Watchtower Library long CD-ROM. Blong mekem se kongregesen i harem gud long saed blong spirit, ol elda oli spenem plante aoa blong rerem ol haf blong miting, blong mekem ol tok we i givhan long kongregesen. ?Yu yu tingbaot finis, hamas taem we ol elda oli spenem blong rerem ol haf blong ol miting mo ol asembli?

6, 7. (a) ?Ol elda long Tesalonaeka oli lanem wanem long eksampol blong Pol? (b) ?From wanem maet i no isi long ol elda tede blong folem eksampol blong Pol?

⁶ Ol elda long Tesalonaeka oli tingbaot gudfala eksampol blong Pol blong lukaot long ol sipsip blong God. Oli luksave se Pol i no kam visitim olgeta from we hem i mas mekem wok blong hem nomo, be hem i kam luk olgeta from we hem i lavem mo i kaen gud long ol sipsip blong God. Olsem we yumi tokbaot finis long narafala stadi, Pol “i mekem i isi . . .  olsem wan mama we i stap lukaot long ol pikinini blong hem.” (Ridim 1 Tesalonaeka 2:7, 8.) !Hem i glad tu blong ‘lego laef blong hem’ blong givhan long olgeta! Ol elda oli mas folem eksampol blong Pol taem oli stap lukaot long ol sipsip blong God.

⁷ Ol Kristin elda tede oli folem eksampol blong Pol blong mekem i gud long ol sipsip blong God. Sam Kristin maet oli no gat kaen fasin mo i no isi long olgeta blong fren gud wetem narafala. Nating se i olsem, ol elda oli mas gat fasin luksave mo oli traem “faenem gudfala samting” long olgeta. (Prov. 16:20, NW) Yes, from we ol elda tu oli sinman yet, maet wan elda i stap traehad blong gat stret tingting long olgeta sipsip wanwan. Mo long sem taem elda ya i traem blong mekem i isi long evriwan. !I gud sipos yumi talem ol gudfala toktok long ol elda, from we oli traehad blong stap olsem ol gudfala man blong lukaot long sipsip aninit long Kraes.

8, 9. ?Wanem sam rod we ol elda tede oli yusum blong ‘lukaot gud long laef blong yumi’?

 ⁸ Yumi evriwan yumi mas “stap aninit” long ol elda. Pol i raetem se, ‘olgeta ya oli stap lukaot gud long laef blong yumi.’ (Hib. 13:17, NW) Tok ya i mekem yumi tingbaot bakegen wan man blong lukaot long sipsip we i no slip from we hem i wantem protektem gud ol sipsip blong hem. Long sem fasin, ol elda tede oli no stap slip gud samtaem, from we oli stap tingbaot ol nid blong ol brata sista we oli sik, no we oli harem nogud long filing blong olgeta, no we oli faenem i had blong folem ol rul blong Baebol. Yu traem tingbaot ol brata we oli joen long Komiti Blong Toktok Wetem Ol Dokta. Sipos wan Kristin i sik i stap long hospital, oli mas singaot ol elda ya, nating se long medel naet no long eli moning, blong oli go kwiktaem long hospital blong ansa long ol kwestin we ol dokta oli askem. !Yes, taem yumi kasem wan trabol olsem, yumi talem tangkiu tumas long ol elda ya from ol gudfala wok we oli mekem!

⁹ Ol elda we oli joen long Komiti Blong Bildim Haos Wosip mo blong givhan long taem blong disasta, oli wok had blong givhan long ol brata. !Yes, ol brata ya oli nidim tumas we yu sapotem olgeta! Yu traem tingbaot taem Hariken Nargis i kilim Mianma long 2008. Ol brata long komiti blong givhan long taem blong disasta, oli sanem wan tim blong ol brata i go blong givhan long Kongregesen blong Bothingone, long maot blong reva ya Irrawaddy, hemia ples we hariken ya i spolem gud. Ol brata ya oli mas pastru long ol ples we hariken i kilim plante man i ded mo ded bodi blong man i stap olbaot long graon. Taem ol brata long kongregesen blong Bothingone oli luk ol brata we oli kam blong givhan long olgeta, we wan long ol brata ya hem i seket elda blong olgeta, oli singsingaot se: “!Yufala i luk! !Seket elda blong yumi i kam! !Jehova i sevem yumi!” ?Yu yu talem tangkiu from ol hadwok we ol elda oli stap mekem long dei mo naet? Samfala elda oli wok long spesel komiti ya we oli mas lukaot long ol problem long saed blong loa we i no isi oltaem blong stretem. Ol elda ya oli no tokflas from wok we oli mekem. Be olgeta we oli harem gud from wok we ol elda ya oli mekem, oli talem bigfala tangkiu from.—Mat. 6:2-4.

10. ?Wanem sam wok we ol elda oli mekem, we maet yumi no luksave?

¹⁰ Plante elda tede oli gat ol narafala wok blong olgeta tu blong mekem long kongregesen we maet yumi no luksave. Kodineta blong kampani blong ol elda i rerem ol program blong ol miting long wik. Sekretari blong kongregesen i kaontem ol ripot blong prij evri manis mo evri yia. Elda we i lukaot long Tiokratik skul i lukaot long ol program blong skul ya. Evri tri manis, oli jekem akaon blong kongregesen. Ol elda oli ridim ol leta we i kam long branj ofis mo oli folem ol advaes long ol leta ya. Olsem nao, ful kongregesen i kam “wan nomo” long bilif. (Efes. 4:3, 13) From we ol elda oli wok had olsem, oli mekem se olgeta samting oli stap “long fasin we i stret gud, we ol man oli glad long hem.”—1 Kor. 14:40.

“Oli Lidim Yufala”

11, 12. ?Hu i stap lidim ol wok insaed long kongregesen, mo lidim kongregesen i minim wanem?

¹¹ Pol i talem se ol elda long Tesalonaeka oli stap “lidim” ol wok insaed long kongregesen. (1 Tes. 5:12) Tok ya long Bislama we yumi talem se “lidim,” long Grik lanwis hem i save karem narafala mining ya se ‘stanap fored.’ Pol i talem se ol elda ya oli “wok had.” Pol i stap tokbaot olgeta elda long kongregesen, i no wan elda nomo. Tede, bighaf blong ol elda oli lidim ol miting blong kongregesen. Wan jenis we i kamaot i no longtaem i talem se bambae yumi no moa yusum tok ya “presiden elda”, be yumi talem “kodineta blong kampani blong ol elda.” Tok ya i halpem yumi blong tingbaot se olgeta elda oli olsem wan kampani nomo we i wok gud wanples.

¹² Be ol elda we oli “lidim” ol wok insaed long kongregesen oli no tijim kongregesen nomo. Long 1 Timoti 3:4, Pol i talem se wan elda i mas “wan man we i save lukaot gud long famle blong hem, mo i mas wan man we i save mekem ol pikinini blong hem oli harem tok blong hem, mo oli ona gud long hem.” Long vas ya, tok ya “lukaot gud” i no minim nomo se hem i tijim ol pikinini blong hem, be i min se hem i lidim famle blong hem mo hem i “mekem se ol pikinini blong hem oli harem tok blong hem.” Yes, ol elda oli lidim ol wok long kongregesen mo oli halpem ol Kristin blong oli harem tok blong Jehova mo ona long Jehova.—1 Tim. 3:5.

13. ?From wanem i nidim plante taem blong ol elda oli mekem wan desisen long ol miting blong olgeta?

¹³ Blong ol elda oli save lidim gud ol sipsip blong God, fastaem oli storian tugeta long ol nid long kongregesen  blong luk olsem wanem oli save givhan long kongregesen. Maet i luk olsem se i isi moa sipos wan elda nomo i mekem olgeta desisen long saed blong wan samting. Be kampani blong ol elda i folem eksampol blong hed kampani long taem blong ol fas Kristin bifo. Taem i gat nid blong kongregesen, kampani blong ol elda i kam wanples blong tokbaot nid ya. Olgeta elda wanwan oli no mas fraet blong toktok mo oli mas letem Tok blong God i lidim olgeta taem oli talemaot tingting blong olgeta. Mak blong storian blong olgeta i blong folem ol rul blong Baebol we i stret long nid blong kongregesen. Storian blong ol elda bambae i moagud taem olgeta elda wanwan oli rere gud from miting blong elda. Hemia i min se olgeta elda wanwan oli mas ridim ol vas we bambae oli tokbaot mo ol rul we i kam long slef we i stret mo waes. I tru se i nidim taem blong mekem olsem. Taem ol elda oli stap storian wanples, samtaem i save gat defdefren tingting, sem mak olsem long taem blong ol aposol, taem Hed Kampani i mas stretem bisnes long saed blong sakomsaes. Taswe i nidim moa taem blong lukaot moa save blong meksua se desisen we oli mekem i laenap gud wetem Baebol.—Wok 15:2, 6, 7, 12-14, 28.

14. ?Yu yu glad we kampani blong ol elda i wok gud wanples mo oli joen gud? ?From wanem yu harem olsem?

¹⁴ ?Wanem i save hapen sipos wan elda i strong long tingting blong hem mo i wantem we ol narafala elda oli folem tingting blong hem? ?Olsem wanem sipos wan elda i gat fasin olsem Diotrefes we i no wantem lesin long tingting blong ol narafala elda? (3 Jon 9, 10) Yes, bambae fulwan kongregesen i harem nogud. Setan i traehad blong seraotem kongregesen long taem blong ol fas Kristin. Taswe, yumi save se Setan i wantem spolem pis long kongregesen tede tu. Sipos wan man i gat fasin blong tingbaot hem nomo, ale Setan i save yusum slak fasin ya blong pulum man ya blong wantem kasem haenem. Taswe, ol elda oli mas gat tingting daon mo oli mas wok tugeta olsem wan kampani we i joen gud. !Yumi glad tumas long ol elda ya we oli gat tingting daon mo we oli wok gud wanples olsem wan kampani nomo!

 “Oli Stretem Yufala”

15. ?Wanem tingting we ol elda oli mas gat taem oli stretem wan brata no sista?

¹⁵ Pol i tokbaot wan wok we i no isi tumas blong mekem be i impoten we ol elda oli mekem. Wok ya hemia blong stretem ol sipsip blong God. Long Kristin Grik haf blong Baebol, Pol nomo i yusum Grik tok ya we long Bislama yumi talem se “stretem.” Grik tok ya i save minim strong advaes, be i no blong agensem narafala. (Wok 20:31; 2 Tes. 3:15) Pol i raet long ol Kristin long Korin se: “Mi mi stap raetem ol tok ya, be i no blong mekem yufala i sem, i blong stretem yufala, from we yufala i olsem ol pikinini blong mi, we mi mi stap lavem yufala.” (1 Kor. 4:14) Pol i talem tok ya from we hem i lavem tumas ol narafala.

16. ?Ol elda oli mas tingbaot wanem taem oli stretem narafala?

¹⁶ I impoten we ol elda oli mas tingbaot fasin we oli mekem taem oli stretem narafala. Oli mas folem fasin blong Pol. Oli mas kaen, oli mas lavem narafala, mo oli mas halpem narafala. (Ridim 1 Tesalonaeka 2:11, 12.) I tru se ol elda oli mas ‘holemstrong tok ya we oli putum tingting blong olgeta i stap long hem blong bambae oli save tijim ol man long ol stret tok.’—Taet. 1:5-9.

17, 18. ?Yu mas tingbaot wanem taem wan elda i givim advaes long yu blong stretem yu?

¹⁷ I tru, ol elda oli sinman mo samtaem oli talem sam samting we biaen, oli harem nogud from. (1 King 8:46; Jem. 3:8) Mo tu, ol elda oli save se Kristin brata mo sista we i kasem fasin stretem, bambae i no ‘harem gud be bambae i harem nogud.’ (Hib. 12:11) Taswe, taem wan elda i givim advaes blong stretem wan brata no sista, yumi save se hem i bin tingting plante fastaem mo i bin prea tu long saed ya. ?Taem wan elda i givim advaes blong stretem yu, yu yu talem tangkiu from lav we hem i soemaot long yu?

¹⁸ Yu traem tingbaot se yu gat wan problem long helt blong yu mo yu no save stret se wanem nao sik blong yu. Nao wan dokta i faenemaot sik blong yu, be taem yu harem se yu gat sik ya, yu harem nogud tumas. ?Olsem wanem? ?Bambae yu yu kros long dokta? Nogat. Nating sipos dokta i talem se bambae hem i katem yu, ating bambae yu yu agri nomo from we yu save se sipos hem i katem yu bambae yu harem gud biaen. Maet yu yu harem nogud from fasin blong dokta blong eksplenem sik blong yu long yu. ?Be olsem wanem? ?Bambae yu yu letem samting ya i blokem yu blong tekem wan desisen? Nogat. Long sem fasin, yu no mas letem fasin blong elda we i toktok blong stretem yu, i blokem yu blong lesin long ol elda. Yes, Jehova mo Jisas oli yusum ol elda blong oli halpem yu mo blong oli lukaot gud long fasin fren blong yu wetem Jehova.

Yu Mas Glad Long Presen Ya We God i Givim, Hemia Ol Elda

19, 20. ?Yu save mekem wanem blong talem tangkiu from “ol man we oli olsem presen”?

¹⁹ ?Yu yu harem olsem wanem taem wan man i givim wan presen long yu? Ating bambae yu talem tangkiu from presen ya mo bambae yu yusum. Jehova i yusum Jisas blong givim “ol man we oli olsem presen” long yumi. Wan rod blong talem tangkiu from ol presen ya, hemia taem yumi lesin gud long ol tok we ol elda oli givim mo yumi traehad blong mekem ol poen long ol tok ya oli wok long laef blong yumi. Yu save soemaot tu se yu glad, hemia taem yu givim ol gudfala ansa long ol miting. Yu mas sapotem ol plan we ol elda oli stanemap long saed blong wok blong prij. Sipos advaes blong wan elda i mekem yu yu harem gud, i gud yu talem long elda ya. Antap long samting ya, i gud blong soemaot se yu glad long famle blong elda ya. Yu mas tingbaot se, blong wan elda i save wok had long kongregesen, famle blong hem i lego taem we oli wantem spenem wetem hem.

²⁰ Yes, i gat plante gudfala risen from wanem yumi mas talem tangkiu long ol elda, we oli wok had, oli lidim yumi mo oli stretem yumi. Jehova i soemaot se hem i lavem yumi taem hem i givim “ol man ya we oli olsem presen.”

?Yu Yu Rimemba?

• ?From wanem risen ol Kristin long Tesalonaeka oli mas harem gud long wok we ol elda oli stap mekem blong lidim olgeta?

• ?Ol elda long kongregesen blong yu oli wok had olsem wanem blong givhan long yu?

• ?Wanem gudfala samting we yu yu kasem taem ol elda oli lidim yu?

• ?Yu yu mas gat wanem tingting taem wan elda i givim advaes blong stretem yu?

[Kwestin]

[Tok blong pija long pej 31]

?Yu yu glad long ol defren wok we ol elda oli mekem blong lukaot gud long kongregesen?