Yumi Lanem Samting Long Tok Blong God

?Ol Dedman Oli Gat Wan Fiuja?

Haf ya i tokbaot sam kwestin we maet yu yu bin askem, mo i soemaot weples long Baebol yu save faenem ansa blong olgeta. Ol Witnes blong Jehova bambae oli glad blong tokbaot ol ansa ya wetem yu.

1. ?Wanem fiuja blong ol dedman?

Taem Jisas i kasem taon ya Betani we i stap klosap long Jerusalem, fren blong hem Lasaros i ded fo dei finis. Jisas i go wetem tufala sista blong Lasaros, Mata mo Meri, long ples we oli berem Lasaros long hem. Kwiktaem nomo, ol man oli kam hivap long ples ya. Yu traem tingbaot bigfala glad ya we Mata mo Meri tufala i kasem, taem Jisas i mekem Lasaros i laef bakegen.—Ridim Jon 11:20-24, 38-44.

Mata i bilif se ol dedman bambae oli laef bakegen. Ol gudfala man blong Jehova bifo oli save finis se long fiuja, God bambae i mekem ol dedman oli girap bakegen blong stap long wol ya.—Ridim Job 14:14, 15.

2. ?Wanem i hapen long man taem hem i ded?

Ol man mo ol anamol oli stap laef from we oli gat paoa blong laef, no ‘spirit.’ Be hemia i no min se ol spirit oli laef insaed long bodi blong man. (Prija 3:19; Jenesis 7:21, 22) God i mekem ol man long graon mo i mekem olgeta blong oli laef long wol. (Jenesis 2:7; 3:19) Taem bren blong yumi i ded, yumi no moa save tingting. Taswe, taem Lasaros i laef bakegen, hem i no tokbaot wan samting we i hapen long hem taem hem i ded, from we ol dedman oli no moa save wan samting.—Ridim Ol Sam 146:4; Prija 9:5, 10.

I klia se ol dedman oli no save harem nogud. Taswe, tijing ya se God i stap panisim ol man afta we oli ded, i giaman nomo. Tijing ya i spolem nem blong God. God i no laekem nating tingting ya blong panisim man long faea.—Ridim Jeremaea 7:31.

  3. ?Yumi save toktok wetem ol dedman?

Ol dedman oli no save toktok. (Ol Sam 115:17) Be taem ol rabis enjel oli toktok long wan man, oli save giaman long hem se olgeta nao oli spirit blong man we i ded. (2 Pita 2:4) Jehova i talem se yumi no mas toktok wetem ol dedman.—Ridim Dutronome 18:10, 11.

4. ?Hu olgeta we bambae oli laef bakegen?

Long niufala wol we i stap kam, plante milian man we oli stap long beregraon, bambae oli laef bakegen. Olgeta we oli bin mekem ol nogud samting from we oli no save Jehova, olgeta tu bambae oli laef bakegen.—Ridim Luk 23:43, NW; Ol Wok 24:15.

Ol man we oli laef bakegen, bambae oli save lanem trutok long saed blong God, mo sipos oli obei long Jisas, bambae oli soemaot se oli bilif long hem. (Revelesen 20:11-13) Olgeta we oli laef bakegen mo we oli mekem ol gudfala samting, bambae oli save harem gud blong laef olwe long wol. Be sam man we oli laef bakegen, bambae oli gohed nomo blong mekem ol nogud samting. Olgeta ya oli laef bakegen blong “pas long bigfala kot,” blong God i jajem olgeta.—Ridim Jon 5:28, 29.

5. ?Promes ya blong laef bakegen, i soemaot wanem long saed blong Jehova?

Ol dedman oli save laef bakegen from we God i sanem Pikinini blong hem i kam, blong i givim laef blong hem blong sevem yumi. Taswe, promes ya blong laef bakegen i kamaot from we Jehova i lavem yumi, mo from we i givim presen long gladhat blong hem.—Ridim Jon 3:16; Rom 6:23.

Blong kasem moa save, yu save lukluk japta 6 mo 7 blong buk ya, ?Wanem Samting We Baebol i Rili Tijim?, we ol Witnes blong Jehova oli wokem.

[Tok blong pija long pej 20]

God i mekem Adam long graon