Oli Faenem Mesaea
Oli Faenem Mesaea
“Mifala i faenem Mesaea.”—JON 1:41.
1. ?Wanem i pulum Andru blong talem se: “Mifala i faenem Mesaea”?
JON BAPTAES i stap wetem tu disaepol blong hem, Andru mo Jon. Taem Jisas i wokbaot i kam long olgeta, Jon Baptaes i talem se: “!Olgeta! !Man ya i smol sipsip blong God ya!” Ale, wantaem nomo Andru mo Jon, tufala i biaen long Jisas mo tufala i stap wetem hem blong fuldei. Biaen, Andru i glad tumas, nao i go faenem brata blong hem, Saemon Pita, mo i talem long hem se: “Mifala i faenem Mesaea.” Ale hem i tekem Pita i go long Jisas.—Jon 1:35-41.
2. ?Taem yumi stadi long ol profet tok long saed blong Mesaea, samting ya i givhan long yumi olsem wanem?
2 Taem ol yia oli pas, Andru, Pita mo ol narafala oli stadi gud long ol tok blong Baebol mo oli agri fulwan se, Jisas i Mesaea ya we God i promes blong sanem. Naoia bambae yumi stadi long sam moa profet tok long Baebol we oli pruvum se Jisas i Mesaea. Stadi ya bambae i mekem bilif blong yumi i strong moa long Baebol, mo long man ya we Jehova i jusumaot hem olsem Mesaea.
“!Yufala i Luk! King Blong Yufala i Stap Kam”
3. ?Taem Jisas i kam insaed long Jerusalem olsem wan king, hemia i mekem wanem profet tok i kamtru?
3 Mesaea bambae i kam insaed long Jerusalem olsem wan king. Profet tok blong Sekaraea i talem se: “!Ol man Saeon! Yufala i mas harem gud, yufala i glad. !Ol man Jerusalem! I gud yufala i glad we yufala i singsingaot from. !Yufala i luk! King blong yufala i stap kam long yufala. Hem i win finis, mo i glad tumas from we hem i winim ol enemi blong hem. Be tingting blong hem i stap daon, nao i stap raed long wan dongki. Hem i stap raed long wan dongki we i yangfala nomo.” (Sek. 9:9) Wan man blong raetem Sam i talem se: ‘Prea blong mifala we Hae God bambae i blesem man ya we i kam long nem blong hem.’ (Sam 118:26) Taem Jisas i kam insaed long Jerusalem, wan bigfala hip blong man oli singsingaot from we oli glad tumas. Jisas i no talem wanem we bigfala hip blong man ya i mas mekem. Be samting we oli mekem, i laenap stret olsem we profet tok i talem. Taem yu ridim ol vas blong Baebol we oli tokbaot stori ya, yu traem tingbaot se yu tu yu stap long taem ya, mo yu harem voes blong ol man we oli stap singsingaot from glad.—Ridim Matiu 21:4-9.
4. ?Ol Sam 118:22, 23 i kamtru olsem wanem?
4 Long fes blong God, Jisas i gud tumas, nating se plante man oli no agri se hem i Mesaea. Olsem ol profet tok oli talem, plante man oli no laekem Jisas mo oli ting se hem i wan man nating nomo. Ol man ya oli no gat bilif. (Aes. 53:3; Mak 9:12) Be God i pulum man blong raetem Sam blong talem se: “Pos ya we ol man blong wokem haos oli sakem finis, naoia hem i kam nambawan pos blong haos. Samting ya, Hae God i mekem.” (Sam 118:22, 23) Wan taem, Jisas i tokbaot profet tok ya taem hem i stap toktok wetem ol enemi blong hem, ol lida blong skul. Mo Pita i talem se profet tok ya hem i tokbaot Jisas, mo Kristin kongregesen. Pita i skelem kongregesen wetem wan haos. Wan haos i mas gat wan stamba “pos” blong hem. Long sem fasin, Jisas i olsem stamba pos ya blong Kristin kongregesen. Ol man we oli no bilif oli no agri se Jisas i Mesaea, be “God i jusumaot hem finis, mo long fes blong God, hem i gud tumas.”—1 Pita 2:4-6; Mak 12:10, 11; Wok 4:8-11.
Wan i Girap Agensem Hem Mo Ol Narafala Oli Lego Hem
5, 6. ?Profet tok i talem wanem long saed blong taem ya we Mesaea i go long han blong ol enemi blong hem? ?Profet tok ya i kamtru olsem wanem?
5 Wan giaman fren blong Mesaea bambae i letem Mesaea i go long han blong ol enemi blong hem. Deved i talem profet tok ya se: “Gudfala fren ya blong mi we mi trastem hem tumas, mo we mitufala i stap kakae long wan basket nomo, be hem i girap i agensem mi.” (Sam 41:9) Long taem blong Baebol, taem wan man i joen wetem narafala blong kakae haf kakae blong hem, hemia i soemaot se tufala i fren gud. (Jen. 31:54) Taswe profet tok ya i soemaot se wan fren blong Mesaea, bambae i mekem wan samting we i nogud olgeta. !Bambae hem i letem Mesaea i go long han blong ol enemi blong hem! Jisas i tokbaot man ya, i talem long ol aposol blong hem se: “Mi mi no tokbaot yufala evriwan. Mi mi savegud yufala, we mi mi jusumaot yufala. Be bambae tok ya blong Baebol i mas kamtru, we i talem se, ‘Man ya we bifo mitufala i kakae long wan plet nomo, naoia hem i tanem tingting blong hem, hem i agens long mi.’”(Jon 13:18) Jisas i stap tokbaot Judas Iskariot, we i wan fren blong hem. Taem hem i letem Jisas i go long han blong ol enemi blong hem, profet tok blong Deved i kamtru.
6 Man ya we i letem Mesaea i go long han blong ol enemi bambae i kasem toti sekel silva. !Hemia praes blong wan slef! Matiu i talem se Judas bambae i letem Jisas i go long han blong ol enemi blong hem blong 30 sekel silva mane nomo. Hemia i mekem profet tok blong Sekaraea 11:12, 13 i kamtru. Matiu i talem tu se ol samting ya oli mekem tok ya we “Profet Jeremaea i bin talemaot bifo” i kamtru. ?Sipos Sekaraea nao i talem profet tok ya, from wanem Matiu i talem Jeremaea? Long taem blong Matiu, maet nem blong Jeremaea i kamaot fastaem long ol buk blong Baebol we nem blong Sekaraea tu i stap long hem. (Skelem wetem Luk 24:44) Judas i neva yusum 30 sekel silva mane ya we oli givim long hem. Hem i sakemdaon mane ya long haos tempol mo “i go afsaed, i go hangem hem long rop, nao i ded.”—Mat. 26:14-16; 27:3-10.
7. ?Sekaraea 13:7 i kamtru olsem wanem?
7 Ol disaepol blong Mesaea bambae oli lego hem. Sekaraea i raetem se: “Yu kilim man blong lukaot long sipsip blong mi, we hem i stap mekem wok blong mi. Yu kilim hem, nao ol sipsip ya bambae oli go wanwan.” (Sek. 13:7) Long Nisan 14, long yia 33 K.T., Jisas i talem long ol disaepol blong hem se: “Long naet ya, bambae bilif blong yufala evriwan i save foldaon from mi, from we long Baebol God i talem se, ‘Bambae mi mi kilim man blong lukaot long sipsip, nao bambae ol sipsip oli go wanwan olbaot.’” Mo hemia nao samting we i hapen. Matiu i talem se olgeta man blong Jisas oli lego hem, oli ronwe.—Mat. 26:31, 56.
Bambae Oli Agensem Hem Mo Oli Kilim Hem
8. ?Aesea 53:8 i kamtru olsem wanem?
8 Bambae oli jajem Mesaea long kot mo oli kilim hem i ded. (Ridim Aesea 53:8.) Long moning blong Nisan 14, olgeta memba blong kaonsel ya Sanhedrin, oli kam tugeta, oli fasem Jisas, nao oli go putum hem long han blong Ponjes Paelat we i hed gavman blong Rom. Paelat i askem kwestin long Jisas mo i no faenem wan poen long Jisas nating. Ale taem Paelat i talem se bambae hem i letem Jisas i gofri, ol man oli singaot oli se: “!Nilim hem long pos!” Oli talem se oli wantem we Barabas, man ya we i bin kilim sam man i ded, i gofri. Blong kwaetem ol man ya mo mekem oli glad, Paelat i letem Barabas i gofri. Mo hem i talem long ol soldia blong hem blong oli wipim Jisas, nao i putum hem long han blong olgeta blong oli nilim hem long pos.—Mak 15:1-15, NW.
9. ?Ol Sam 35:11 i kamtru olsem wanem?
9 Bambae i gat ol giaman tok we man i talem agens long Mesaea. Long wan Sam we Deved i raetem, hem i talem se: “Ol man nogud oli tok agens long mi, mo oli talemaot se mi mi mekem ol trabol, be mi mi no save ol samting ya nating.” (Sam 35:11) Profet tok i talemaot klia se: “Ol jif pris wetem olgeta memba blong Kaonsel oli stap lukaot sam man we oli save giaman, blong talem sam poen agens long Jisas, blong oli save kilim hem from.” (Mat. 26:59) Baebol i talem se: “Tru i gat plante man oli girap oli stap mekem ol giaman poen agens long hem, be tok blong olgeta i no sem mak.” (Mak 14:56) Ol enemi blong Jisas oli no kea se ol man ya oli stap giaman. Oli wantem nomo se Jisas i ded.
10. ?Aesea 53:7 i kamtru olsem wanem?
10 Bambae Mesaea i no talem wan tok nating long ol man we oli agensem hem. Aesea i talemaot se: “Olgeta oli mekem i strong tumas long hem, be hem i mekem tingting blong hem i stap daon, nao i karem ol samting ya. Hem i no talem wan tok nating. Hem i olsem smol sipsip nomo we oli stap tekem i go blong kilim blong kakae, no bigfala sipsip we oli stap katemaot hea blong hem, be i no save krae. Hem i no talem wan samting nating.” (Aes. 53:7) Taem “ol jif pris mo ol elda oli talemaot plante poen we oli faenem long hem, hem i no talem wan samting nating long olgeta. Nao Paelat i talem long hem se: ‘?Olsem wanem? ?Yu no harem ol tok blong olgeta? Oli talemaot plante poen agens long yu.’ Be long ol poen ya we oli talem, Jisas i no talem wan samting nating long olgeta. Nao Paelat i sapraes tumas long hem.” (Mat. 27:12-14) Yes, Jisas i no tok nogud long ol man we oli agensem hem.—Rom 12:17-21; 1 Pita 2:23.
11. ?Aesea 50:6 mo Maeka 5:1 i kamtru olsem wanem?
11 Aesea i talemaot se bambae oli wipim Mesaea. Profet Aesea i talem se: “Taem ol man oli kam blong wipim mi, mi mi tekemaot sot blong mi, mo taem oli kam tok nogud long mi, mo oli stap pulpulumaot mustas blong mi, mo oli stap spet long fes blong mi, mi mi no blokem olgeta.” (Aes. 50:6) Profet Maeka i talemaot se: “Bambae oli tekem wan stik, oli kilim jaj blong Isrel long fes blong hem.” (Maeka 5:1, NW) Mak i soemaot se ol profet tok ya oli long saed blong Jisas. Mak i raetem se: “Sam long olgeta oli girap, oli spet long hem. Mo sam oli fasem ae blong hem, nao oli faetem hem, oli talem se, ‘!Ei, profet! !Yu traem talem! ?Hu nao i faetem yu?’ Mo ol man blong hae pris tu oli tekem hem, oli stap slavem hem.” Mak i talem se ol soldia oli “stap kilim hed blong hem long stik, oli stap spet long hem, mo oli stap nildaon long fes blong hem olsem we oli ona long hem.” (Mak 14:65; 15:19)I no gat risen nating blong ol man ya oli spolem Jisas olsemia.
Hem i Holemstrong Long God Go Kasem We Hem i Ded
12. ?Ol Sam 22:16 mo Aesea 53:12 i kamtru olsem wanem?
12 Bambae oli hangem Mesaea long wan pos. Deved i raetem se: “Ol man nogud oli kam hivap, oli stap raon long mi, olsem hip blong ol dog, we oli kam blong kakae mi. Olgeta oli stikim leg blong mi mo han blong mi.” (Sam 22:16) Ol man we oli ridim Baebol oli save gud stori ya mo Mak i raetem long Gospel blong hem se profet tok ya i kamtru. Hem i talem se: “Long naen klok long moning, oli nilim hem long kros [“pos,” NW].” (Mak 15:25) Wan narafala profet tok i talem se bambae oli kaontem Mesaea wetem ol man nogud. Aesea i talemaot se: “Hem i glad nomo blong letem laef blong hem gogo i ded. Hem i kasem panis ya we i blong ol man nogud. Oli kaontem hem wetem ol man nogud.” (Aes. 53:12) Profet tok ya i kamtru taem oli “tekem tu man blong stil mo blong kilim man, oli nilim tufala long kros [“pos,” NW] olsem Jisas. Nao oli putum wan long raet saed blong hem, narawan long lef saed blong hem.”—Mat. 27:38.
13. ?Ol Sam 22:7, 8 i kamtru olsem wanem?
13 Deved i talemaot se ol man bambae oli tok nogud long Mesaea. (Ridim Ol Sam 22:7, 8.) Taem Jisas i stap hang long pos, ol man oli tok nogud long hem. Matiu i talemaot samting ya i se: “Ol man we oli stap wokbaot long rod oli stap tok nogud long hem, oli stap saksakem hed blong olgeta. Oli stap talem se, ‘Yu yu man blong brekemdaon haos blong God, mo blong stanemap bakegen long tri dei nomo, ale, yu sevem laef blong yu naoia. Sipos yu yu Pikinini blong God tru, yu aot long kros [“pos,” NW] ya, yu kamdaon.’” Mo ol jif pris, ol tija blong Loa mo ol elda oli stap laf long hem, oli stap talem se: “Hem i sevem plante narafala man finis, be i no naf blong sevem hem. !Hem i King blong ol laen blong Isrel ya! I gud hem i kamdaon long kros [“pos,” NW] naoia, nao bambae yumi bilif long hem. Man ya i bilif long God. Sipos God i lavem hem, i gud hem i sevem hem naoia, from we man ya i stap talem se, ‘Mi mi Pikinini blong God.’” (Mat. 27:39-43) Yes, Jisas i safa bigwan be hem i stap kwaet nomo, hem i no talem wan nogud samting nating. !Hemia wan gudfala eksampol we yumi mas folem!
14, 15. Sam profet tok oli tokbaot klos blong Mesaea mo waen we i konkon. ?Ol profet tok ya oli kamtru olsem wanem?
14 Oli sakem daes blong luk se hu bambae i tekem klos blong Mesaea. Man blong raetem Sam i talem se: “Oli tekemaot ol klos blong mi oli seraot long olgeta, mo oli sakem daes blong luk se hu bambae i tekem kot blong mi.” (Sam 22:18) Samting ya i hapen stret olsem we Sam ya i talem. Baebol i talem se afta we ol soldia blong Rom oli nilim hem long pos, oli sakem daes blong faenemaot se hu bambae i tekem klos blong hem.—Mat. 27:35; ridim Jon 19:23, 24.
15 Bambae oli givim waen we i blad blong wan tri mo waen we i konkon long Mesaea. Man blong raetem Sam i talem se: “Taem mi mi hanggri, olgeta oli givim posen long mi, mo taem mi tosta, oli givim waen we i konkon long mi.” (Sam 69:21) Yumi save se profet tok ya i kamtru, from we Matiu i talem se: “Oli givim waen long Jisas we i gat blad blong wan tri long hem, we i olsem meresin blong kilim bodi blong i no soa. Be taem hem i testem samting ya, hem i no wantem dring.” Baebol i talem se, samtaem biaen, “wan long olgeta i resis i go, i tekem koten, i kafsaedem waen we i konkon i go long hem, nao i putum koten ya long wan longfala stik, i pusum i go antap long Jisas blong hem i dring.”—Mat. 27:34, 48.
16. ?Ol Sam 22:1 i kamtru olsem wanem?
16 Bambae i luk olsem se God i lego Mesaea. (Ridim Sam 22:1.) Folem profet tok ya, Mak i talem se: “Long tri klok, Jisas i singaot bigwan se, ‘Eloe, Eloe. ?Lama Sabaktani?’ we i min se ‘God blong mi, God blong mi. ?From wanem yu lego mi mi stap olsem ya?’” (Mak 15:34) Jisas i no talem tok ya from we hem i no moa bilif long papa blong hem, nogat. Hem i save se God bambae i no protektem hem long ol enemi blong hem, taem bambae hem i ded. Hemia wan janis blong Jisas blong soemaot se bambae hem i holemstrong long God oltaem nomo. Taem Jisas i singaot bigwan olsem, hem i mekem profet tok blong Ol Sam 22:1 i kamtru.
17. ?Sekaraea 12:10 mo Ol Sam 34:20 oli kamtru olsem wanem?
17 Bambae oli sperem Mesaea, be bambae oli no brekem bun blong hem. Sekaraea i talem se ol man Jerusalem bambae oli luk man ya we olgeta nomo oli sperem hem. (Sek. 12:10) Mo Ol Sam 34:20 i talem se: “Hae God i save lukaot gud long hem, we bambae i no gat wan bun blong hem nating i brok.” Aposol Jon i talem se profet tok ya i kamtru i se: ‘Wan long ol soldia i sperem saed blong Jisas long spia blong hem. Nao blad mo wota i kamaot wantaem, i ron i godaon. Mo i gat wan man [Jon] i stap we hem i luk samting ya long ae blong hem, nao hem i talemaot blong yufala tu i save bilif long hem. Mo ol tok blong man ya i tru. Ol samting ya oli kamaot blong mekem tok ya blong Baebol i kamtru we i talem se, “Bambae i no gat wan bun blong hem nating i brok.” Mo long narafala ples, Baebol i talem se, “Bambae olgeta oli save lukluk man ya we oli sperem hem.”’—Jon 19:33-37.
18. ?Profet tok ya se bambae oli berem Jisas wetem ol rijman i kamtru olsem wanem?
18 Bambae oli berem Mesaea wetem ol rijman. (Ridim Aesea 53:5, 8, 9.) Long naet blong Nisan 14, “wan man Aramatia i stap, we hem i rijman, nem blong hem Josef.” Hem i askem long Paelat sipos hem i save tekem bodi blong Jisas blong go berem hem, mo Paelat i letem. Matiu i talem se “Josef i tekem bodi blong Jisas, i kavremap long gudfala kaliko ya linen, we i niuwan. Josef ya i gat wan niufala hol long ston we hem i jes katem rere we i blong hem wetem ol famle blong hem, nao hem i tekem bodi blong Jisas, i go putum long hol ya. Nao hem i rolem wan bigfala ston i go long maot blong hol ya blong blokem, nao hem i gowe.”—Mat. 27:57-60.
!Yumi Presem Mesaea, King Blong Yumi!
19. ?Profet tok blong Ol Sam 16:10 i kamtru olsem wanem?
19 Jehova bambae i mekem Mesaea i laef bakegen. Deved i raetem se: “Yu no save letem mi mi go long Hom blong ol Dedman.” (Sam 16:10) Long Nisan 16, sam woman oli go long ples we oli berem Jisas long hem. !Ating olgeta oli sapraes tumas taem oli luk wan enjel i stap sidaon insaed long ples ya! Enjel ya i talem long olgeta se: “Yufala i no fraet. Mi mi save we yufala i stap lukaot Jisas, man Nasaret ya we oli nilim hem long kros [“pos,” NW]. Be hem i no stap long ples ya. Hem i laef bakegen finis. Yufala i kam luk. Hemia ples ya we oli putum hem long hem.” (Mak 16:6) Biaen, long dei blong Pentekos long yia 33 K.T., aposol Pita i toktok long wan bigfala hip man long Jerusalem, i talemaot profet tok blong Deved long Ol Sam 16 i se: “King Deved i luksave samting ya we God bambae i mekem i kamtru long fiuja, nao hem i tok. Taem hem i talem se, ‘God i no livim hem i stap long Hom blong ol Dedman, bodi blong hem i no roten blong i sting,’ hem i stap tokbaot Mesaea ya, we i laef bakegen.” (Wok 2:29-31) God i no letem bodi blong gudfala Pikinini ya blong hem i roten. Antap long hemia, Jehova i mekem wan nambawan samting: Hem i mekem Jisas i girap bakegen blong i go laef long heven.—1 Pita 3:18.
20. ?Ol profet tok oli talem wanem long saed blong rul blong Mesaea?
20 God bambae i talemaot se Jisas i Pikinini blong hem. (Ridim Ol Sam 2:7; Matiu 3:17.) Taem Jisas i kam insaed long Jerusalem, ol man oli presem hem mo Kingdom blong hem. Tede, yumi tu yumi presem Jisas. Yumi glad blong tokbaot hem mo Kingdom blong hem long ol man. (Mak 11:7-10) I no longtaem, Kraes bambae i finisim ol enemi blong hem. Bambae hem i mekem olsem, taem hem i ‘raed long hos blong hem blong faet from trutok, stret fasin,’ mo tingting daon. (Sam 2:8, 9; 45:1-6) Nao biaen, bambae hem i rul long olgeta ples long wol. Olgeta man bambae oli stap long pis mo oli gat ol samting we oli nidim. (Sam 72:1, 3, 12, 16; Aes. 9:6, 7) Pikinini blong Jehova, Jisas Kraes, i rul finis olsem King long heven. !Hemia i wan bigfala blesing long yumi blong stap olsem ol Witnes blong Jehova, mo talemaot trutok ya long ol man!
?Bambae Yu Yu Ansa Olsem Wanem?
• ?Ol profet tok ya se wan man bambae i girap agensem Jisas, mo se ol man blong hem bambae oli lego hem, oli kamtru olsem wanem?
• ?Ol profet tok ya we oli tokbaot ded blong Jisas, oli kamtru olsem wanem?
• ?From wanem yu yu sua se Jisas i Mesaea?
[Kwestin]
[Tok blong pija long pej 15]
?Taem Jisas i kam insaed long Jerusalem olsem wan king, hemia i mekem wanem profet tok i kamtru?
[Tok blong pija long pej 17]
Jisas i ded blong tekemaot ol sin blong yumi. Naoia hem i rul olsem King long Kingdom blong Mesaea
