Oli Wet Long Mesaea

“Ol man oli stat harem gud tumas long tingting blong olgeta from Jon, nao oli stap talem se, ‘Ating man ya hem i Mesaea ya, we God i promes bifo finis blong sanem hem i kam blong sevem yumi.’”—LUK 3:15.

1. ?Wanem nambawan nius we wan enjel i talem long ol man blong lukaot long sipsip?

LONG naet, ol man blong lukaot long sipsip oli stap afsaed long open ples, wetem ol sipsip blong olgeta. Wantaem nomo, wan enjel blong Jehova i kamtru long olgeta mo bigfala laet i saen long olgeta. Olgeta oli fraet tumas, be oli lesin long nambawan nius we enjel ya i talem long olgeta, i se: “Yufala i no fraet. Mi mi gat wan gud nius blong talem long yufala, we i save mekem olgeta man oli harem gud tumas. Long naet ya nomo, long vilej ya blong King Deved bifo, i gat wan pikinini i jes bon, we hem bambae i sevem yufala. Hemia man ya we God i promes finis blong sanem i kam. Hem i Mesaea ya we i Masta blong yumi.” Bebi ya we enjel i tokbaot, bambae hem nao i kam Kraes no Mesaea. Enjel i talem long ol man blong lukaot long sipsip se, bebi ya i stap slip long wan bokis we ol man oli stap putum gras long hem, blong ol anamol oli kakae. Biaen, i gat fulap enjel blong heven oli stap presem God, oli singsing se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.”—Luk 2:8-14.

2. ?Tok ya “Mesaea” i minim wanem? ?Mo olsem wanem blong luksave hem?

² Ol man blong lukaot long sipsip oli save se, tok ya “Mesaea,” no “Kraes,” i minim “Man we God i Jusumaot.” (Eks. 29:5-7) ?Taswe, olsem wanem ol man blong lukaot long sipsip, oli save lanem moa mo pulum ol narafala blong oli bilivim se Jehova i jusumaot pikinini ya blong i kam Mesaea? Fastaem, oli mas stadi long ol profet tok long saed blong Mesaea, we oli stap long Hibru haf blong Baebol, mo oli mas skelem sipos ol profet tok ya oli kamtru stret long laef blong pikinini ya.

?From Wanem Ol Man Oli Stap Wet Long Mesaea?

3, 4. ?Profet tok blong Daniel 9:24, 25 i kamtru olsem wanem?

³ Plante yia biaen, Jon Baptaes i stat blong prij. Sam man oli stat blong ting se Jon i Mesaea from ol samting we hem i talem mo i mekem.  (Ridim Luk 3:15.) Be long Baebol, i gat wan profet tok we i tokbaot “seventi wik.” Profet tok ya i halpem ol man blong oli luksave stret taem we bambae Mesaea i kamtru. Profet tok ya i talem se: “Stat long taem ya we bambae toktok ya i kamtru [“toktok i goaot,” NW] blong oli bildim Jerusalem bakegen, go kasem taem we Mesaea we God i jusumaot bambae i kam, bambae i gat seven wik mo sikisti tu wik i pas.” (Dan. 9:24, 25) Ol man we oli stadi long Baebol oli kasem save se ol wik ya oli no prapa wik we i gat seven dei long hem, be hem i olsem ol yia. Taswe Baebol ya Revised Standard Version i talem se: “God i makemaot seventi wik blong yia finis.”

⁴ Tede, ol man blong Jehova oli save se ol sikisti naen wik ya we Daniel 9:25 i tokbaot, oli sem mak long 483 yia. Mo oli stat kaontem ol yia ya long 455 B.K.T. * Long yia ya nao we King Ataksekses blong Pesia i talem long Nehemaea blong i go wokem mo stanemap Jerusalem bakegen. (Neh. 2:1-8) Ol 483 yia ya, oli finis long yia 29 K.T., * taem Jisas i baptaes. Long taem ya, Jehova i makemaot hem wetem tabu spirit, mo Jisas i kam Mesaea.—Mat. 3:13-17. *

5. ?Wanem ol profet tok we bambae yumi tokbaot?

⁵ Long Baebol i gat plante profet tok long saed blong Mesaea. Long haf ya, bambae yumi tokbaot sam long ol profet tok ya. Ol profet tok ya oli tokbaot hem taem hem i bon, taem hem i pikinini, taem hem i kam bigman, mo taem hem i stap prij. Bambae yumi lanem olsem wanem ol profet tok ya oli kamtru long laef blong Jisas. Ol samting we yumi lanem bambae i mekem bilif blong yumi long Baebol i kam strong moa mo tu, bambae i pruvum se Jisas i Mesaea ya we ol man oli stap wet long hem.

Ol Profet Tok We Oli Tokbaot Mesaea Taem Hem i Bon

6. ?Profet tok long Jenesis 49:10 i kamtru olsem wanem?

⁶ Mesaea bambae i kamaot long laen blong Juda long Isrel. Jes bifo we Jekob i ded, hem i blesem ol boe blong hem, mo hem i talem long Juda se: “Wan long olgeta we bambae i kamaot biaen long yu bambae i kam king, i holem wokingstik blong hem, mo olgeta we bambae oli kamaot biaen long hem, oltaem bambae oli holem paoa blong rul. Olgeta ya nomo bambae oli stap kam king, gogo paoa ya i go long wan man we i gat raet blong holem [“gogo Silo i kamtru,” NW], nao olgeta man bambae oli obei long hem.” (Jen. 49:10) Ol tija we oli man Jiu, oli bilif se tok ya we Jekob i talem long Juda, i tokbaot Mesaea. ?Be tok blong Jekob i minim wanem? Yumi luk se Jekob i tokbaot wan man we i holem wan wokingstik. Hemia i min se man ya i gat raet blong stap king mo rul antap long ol man. Taswe profet tok ya i soemaot se king ya we i gat raet blong rul, bambae i kamaot long laen blong Juda. Fas man long laen blong Juda we i rul long wol ya, hemia King Deved, mo las man we i rul long laen ya, hemia Sedekaea. Be profet tok blong Jekob i tokbaot wan narafala king we i kam afta long Sedekaea. King ya bambae i king blong olwe. Baebol i kolem king ya se “Silo” we i minim “Hemia We Samting Ya i Blong Hem.” Jehova i talem long Sedekaea se king ya nao i gat raet blong rul. (Esik. 21:26, 27) Bifo we Jisas i bon, enjel Gabriel i talem long Meri se: “Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:32, 33) Jisas Kraes i wan smol bubu blong Deved, we i kamaot long laen blong Juda. Mo i gat wan man nomo long famle blong Deved we Jehova i promes long hem se bambae hem i gat raet blong king. Man ya, hemia Jisas. Taswe Jisas Kraes nao hem i Silo.—Mat. 1:1-3, 6; Luk 3:23, 31-34.

7. ?Profet tok we i tokbaot ples we Mesaea i bon long hem, i kamtru olsem wanem?

⁷ Mesaea bambae i bon long Betlehem. Profet Maeka i raetem se: “Mo yu, Betlehem Efrata, yu yu wan taon we i smol tumas, yu no save stap wetem ol taosen blong Juda. Be man ya we i mas kam rula long Isrel, bambae hem i kamaot long yu mo i kam long mi. Stamba blong man ya, hem i stat longtaem bifo, bifo we bifo olgeta.” (Maeka 5:2, NW) Mesaea bambae i bon long taon ya Betlehem. Hemia wan taon long Juda we bifo oli kolem Efrata. Meri mo Josef tufala i laef long narafala taon ya  Nasaret. Jes bifo we Jisas i bon, king blong Rom i mekem wan loa se olgeta man oli mas gobak long stret ples we oli bon long hem, blong ol man oli raetemdaon nem blong olgeta. Taswe, Josef mo Meri tufala i gobak long Betlehem, mo long ples ya nao, Meri i bonem Jisas. (Mat. 2:1, 5, 6) !Yes, samting ya i hapen stret olsem we profet tok i talem!

8, 9. ?Profet tok i talem wanem long saed blong Mesaea taem hem i bon? ?Mo afta long taem ya, wanem bambae i hapen?

⁸ Wan yang gel bambae i bonem Mesaea. (Ridim Aesea 7:14.) Profet tok ya long Aesea 7:14, i talemaot se wan “yang gel” bambae i bonem wan pikinini boe. Taem Rebeka i no mared yet, Baebol i yusum sem tok ya “yang gel” blong tokbaot hem. (Jen. 24:16, 43) Tabu spirit blong God i pulum Matiu blong raetem se Aesea 7:14 i kamtru taem Jisas i bon. Matiu mo Luk, we tufala i raetem Gospel, tufala i talem se Meri i wan yang gel we i gat bel from paoa blong tabu spirit.—Mat. 1:18-25; Luk 1:26-35.

⁹ Afta we Mesaea i bon, bambae oli kilim i ded ol pikinini. Wan samting olsem i hapen plante handred yia bifo we Mesaea i bon. King Fero blong Ijip i putum wan loa se ol man oli mas sakem olgeta pikinini boe blong ol woman Hibru, i go long Nael Reva blong oli ded. (Eks. 1:22) Wan profet tok long Jeremaea 31:15, 16, i tokbaot ‘Rejel we i stap krae from ol pikinini blong hem,’ we ol enemi oli tekemaot olgeta. Ol man we oli stap long Rama, long teritori blong Benjamin long not blong Jerusalem, oli save harem Rejel we i stap krae we i krae. Matiu i talem se profet tok ya blong Jeremaea i kamtru, taem King Herod i givim oda se ol man oli mas kilim i ded olgeta pikinini boe we oli stap long Betlehem. (Ridim Matiu 2:16-18.) !Yu traem tingbaot bigfala soasore we ol man oli gat long taem ya!

10. ?Profet tok blong Hosea 11:1 i kamtru olsem wanem?

¹⁰ God bambae i singaot Mesaea i aot long Ijip i kam. (Hos. 11:1) Blong King Herod i no kilim Jisas i ded, wan enjel i talem long Josef mo Meri blong tufala i tekem Jisas i go long Ijip. Olgeta oli stap long Ijip go kasem we Herod i ded. Biaen, oli kambak long kantri blong Isrel. Samting we Jehova i talem long Hosea i kamtru, se: “Pikinini blong mi i stap long Ijip, nao mi singaot hem blong i kam.” (Mat. 2:13-15) I klia se ol profet tok ya oli save kamtru from paoa blong Jehova nomo.

Mesaea i Statem Wok Blong Hem

11. ?Hu i mekemrere rod blong Mesaea?

¹¹ Wan man bambae i mekemrere rod blong Mesaea. Malakae i talem se wan man bambae i kamtru fastaem, blong mekemrere rod blong Mesaea. Man ya bambae i givhan long ol man blong oli glad long Mesaea taem i kamtru. Malakae i singaot man ya se, “Profet Elaeja.” (Ridim Malakae 4:5, 6.) Jisas i talem se Jon Baptaes nao hem i olsem Elaeja. (Mat. 11:12-14) Mo Mak i talem se Jon Baptaes i mekemrere rod blong Mesaea, mo samting ya i mekem profet tok blong Aesea i kamtru. (Aes. 40:3; Mak 1:1-4) Jisas i no askem long Jon blong i mekemrere rod blong hem. God nao i wantem se ol man oli luksave se hu ya Mesaea. Taswe, hem i jusum Jon blong i mekem wan wok we i olsem wok blong Elaeja, mo blong hem i givhan long ol man blong oli wet long Mesaea.

12. ?Wanem spesel wok we God i givim long Mesaea?

¹² God bambae i givim wan spesel wok long Mesaea. Wan dei, Jisas i go long haos prea long Nasaret, taon ya we hem i gruap long hem, i openem buk blong Profet Aesea mo i ridim. Hem i se: “Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i save go fri,’ mo blong mi talemaot long ol man we oli blaen se, ‘Ae blong yufala i save kam gud.’ Hem i sanem mi blong mi mekem ol man we oli stap harem nogud aninit long han blong narafala man, oli go fri, mo blong mi talemaot se, ‘Taem i kam finis we Hae God bambae i sevem ol man blong hem.’” Biaen, Jisas i talem se profet tok ya i stap tokbaot hem. Hem nao i Mesaea. Taswe, hem i gat raet blong talem se: “Tede, long taem ya we yufala i stap lesin long ol tok ya blong Baebol, God i stap mekem ol samting we tok ya i talem, oli kamtru.”—Luk 4:16-21.

13. ?Profet tok i talem wanem long saed blong Mesaea taem i prij long Galili?

¹³ Mesaea bambae i prij long Galili. Aesea i talemaot profet tok long saed blong “Sebulun,” “Naftali,” mo “ol ples olbaot long Galili.” Hem i raetem se: “Hae God. Mifala i man blong yu. Fastaem, mifala i stap wokbaot long tudak, be naoia, mifala i luk wan bigfala laet. Bifo, mifala i stap long tudak we i blong ded nomo, be naoia, laet i saenaot, i kasem mifala.”  (Aes. 9:1, 2) Jisas i statem wok blong hem long taon ya Kapaneam, long Galili. Mo tu, hem i tijim ol man we oli stap long distrik blong ol laen blong Sebulun mo Naftali. Jisas i givhan long ol man ya taem hem i tijim olgeta long trutok. Trutok ya i olsem wan laet we i saenaot i kasem olgeta. (Mat. 4:12-16) Long Galili, Jisas i givim Bigfala Toktok blong hem antap long Hil, hem i jusum ol aposol blong hem, hem i mekem faswan merikel blong hem, mo hem i kamtru long samwe long 500 disaepol afta we hem i laef bakegen. (Mat. 5:1–7:27; 28:16-20; Mak 3:13, 14; Jon 2:8-11; 1 Kor. 15:6) Taem Jisas i prij long distrik blong “laen blong Sebulun” mo “laen blong Naftali,” hem i mekem profet tok blong Aesea i kamtru. Jisas i talemaot gud nius long saed blong Kingdom long ol narafala ples tu long Isrel.

Sam Narafala Profet Tok We Oli Tokbaot Mesaea

14. ?Ol Sam 78:2 i kamtru olsem wanem?

¹⁴ Mesaea bambae i yusum ol stori mo parabol blong tijim ol man. Long wan buk blong Ol Sam, Asaf i singsing se: “Bambae mi tijim yufala long ol parabol.” (Sam 78:2) Matiu i talem olsem wanem profet tok ya i kamtru. Hem i tokbaot taem ya we Jisas i yusum sid blong nambangga mo is, olsem parabol blong tijim ol man long saed blong Kingdom blong God. Hem i raetem se: “Long ol tok ya blong hem, hem i toktok long olgeta long parabol nomo. Hem i mekem olsem blong mekem tok ya i kamtru we profet i bin talemaot bifo, we God i talem se, ‘Bambae mi mi talemaot ol tok blong mi long parabol. Bambae mi talemaot ol samting ya we mi bin haedem olgeta, i stat long taem we mi stat wokem wol, i kam kasem tede.’” (Mat. 13:31-35) Ol parabol mo ol stori we Jisas i yusum, oli halpem plante man blong oli kasem save long trutok long saed blong Jehova.

15. ?Profet tok blong Aesea 53:4 i kamtru olsem wanem?

¹⁵ Mesaea bambae i mekem ol sikman oli kamgud bakegen. Aesea i talemaot profet tok ya se: “Olgeta samting we i stap mekem yumi harem nogud, hem i karem olgeta evriwan. Ol sobodi we hem i karem, hemia ol sobodi blong yumi.” (Aes. 53:4) Matiu i talem se taem mama blong woman blong Pita i sik, Jisas i mekem hem i kamgud bakegen. Afta long hemia, plante narafala man we oli sik oli kam long haos blong Pita, mo Jisas i mekem olgeta oli kamgud bakegen. Matiu i talem se ol samting ya oli blong mekem profet tok ya blong Aesea i kamtru: ‘Hem i tekem ol sik blong yumi, mo i karem ol sobodi blong yumi.’ (Mat. 8:14-17) Be i no long taem ya nomo we Jisas i mekem ol sikman oli kamgud bakegen. Baebol i tokbaot plante narafala taem we Jisas i mekem merikel ya.

16. ?Aposol Jon i talem wanem blong soemaot se Aesea 53:1 i kamtru long Jisas?

¹⁶ Plante man bambae oli no bilif se Jisas i Mesaea, nating se hem i mekem plante gudfala samting. (Ridim Aesea 53:1.) Aposol Jon i talem se profet tok ya i kamtru, i se: “Hem i mekem plante merikel finis long fes blong ol laen blong Isrel, be olgeta oli no bilif long hem. Samting ya i hapen blong mekem tok ya i kamtru we Profet Aesea i bin talem bifo, we i talem se, ‘Hae God. ?Sipos ol tok ya we naoia mifala i stap talemaot i kamaot bifo, hu i save bilif long hem? ?Hu i save luk samting ya fastaem se hemia i wok blong yu?’” (Jon 12:37, 38) Long taem blong aposol Pol tu, i no gat plante man we oli bilif se Jisas i Mesaea.—Rom 10:16, 17.

17. ?Profet tok blong Ol Sam 69:4 i kamtru olsem wanem?

¹⁷ Ol man bambae oli no laekem Mesaea, be blong nating nomo. (Sam 69:4) Jisas i talem se: “Sipos mi no mekem ol wok ya long fes blong olgeta, we i no gat narafala man i save mekem, bambae mi mi no save talem se oli mekem sin, be mi mi mekem ol wok ya finis. Mo olgeta oli luk mi finis, be oli no laekem mi mo Papa blong mi, oli stap agens long mitufala yet. Be samting ya i mas olsem blong mekem tok ya i kamtru we ol man bifo oli bin raetem long buk blong Loa blong olgeta, we i talem se, ‘Mi mi no mekem wan samting long olgeta, be olgeta oli no laekem mi nating, oli agens long mi.’” (Jon 15:24, 25) Long vas ya, “Loa” i minim olgeta tok we i stap long Baebol long taem ya. (Jon 10:34; 12:34) Taem yumi ridim ol stori long ol Gospel we oli tokbaot Jisas, yumi luksave klia se plante man oli no laekem Jisas nating, speseli ol lida blong skul blong ol man Jiu. Mo tu, Jisas i talem se: “Ol man long wol ya oli no save agens long yufala. Be oli stap agens long mi, from we mi mi stap soemaot long olgeta we fasin blong olgeta i no stret.”—Jon 7:7.

18. ?Bambae yumi tokbaot wanem long nekis stadi?

¹⁸ Ol disaepol blong Jisas bifo, oli suagud se Jisas i Mesaea. Oli save se plante profet tok long Hibru haf blong Baebol long saed blong Mesaea, oli  kamtru long Jisas. (Mat. 16:16) Long stadi ya, yumi lanem se ol profet tok we oli tokbaot taem we Jisas i bon, mo taem we hem i stap mekem wok blong hem long wol ya, oli kamtru. Be i gat plante narafala profet tok long Baebol we oli pruvum se Jisas i Mesaea. Long nekis stadi bambae yumi tokbaot ol profet tok ya. Sipos yumi tingting dip long ol profet tok ya, bambae yumi save suagud se Jisas i man ya we Jehova i jusumaot hem olsem Mesaea.

[Ol futnot]

?Bambae Yu Yu Ansa Olsem Wanem?

• ?Wanem sam long ol profet tok we oli tokbaot taem we Jisas i bon?

• ?Hu i mekemrere rod blong Mesaea?

• ?Profet tok blong Aesea japta 53 i kamtru olsem wanem?

[Kwestin]