Yumi Lanem Samting Long Tok Blong God

?Wanem Ya Kingdom Blong God?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Wanem ya Kingdom blong God?

Kingdom blong God i wan gavman mo hem i stap long heven. Kingdom ya bambae i tekem ples blong ol narafala gavman, mo bambae i mekem ol samting we God i wantem oli kamaot long heven mo long wol. Ol man oli nidim wan gudfala gavman. Kingdom blong God nomo hem i gudfala gavman ya.—Ridim Daniel 2:44; Matiu 6:9, 10.

Man we i rul long kingdom hem i wan king. Jehova i jusum Pikinini blong hem, Jisas, blong hem i King long Kingdom blong Hem.—Ridim Luk 1:30-33.

2. ?From wanem Jisas nao i stret King blong Kingdom ya?

Pikinini blong God hem i King ya we i beswan. Hem i kaen gud. Oltaem hem i mekem samting we i stret. Mo hem i gat bigfala paoa we i mekem se hem i naf blong givhan long ol man. (Matiu 11:28-30) Taem Jisas i laef bakegen, hem i go long heven mo i wet long raetsaed blong Jehova. (Hibrus 10:12, 13) Hem i wet gogo God i putumap hem i kam king long heven.—Ridim Daniel 7:13, 14.

3. ?Hu bambae i rul wetem Jisas?

Baebol i talem se hemia ‘ol man blong God,’ no ol man we oli tabu we God i jusumaot olgeta. (Daniel 7:27) Faswan long olgeta ya, hemia ol aposol blong Jisas we oli holemstrong long hem. Mo kam kasem tede, Jehova i gohed blong jusum ol man mo ol woman blong oli kam ol tabu man blong hem. Taem oli ded, God i mekem olgeta oli laef bakegen wetem wan bodi we i blong laef long heven, olsem Jisas.—Ridim Jon 14:1-3; 1 Korin 15:42-45.

?Hamas man bambae oli go long heven? Jisas i talem se oli wan “smol kampani” nomo. (Luk 12:32, NW) Fulnamba blong olgeta bambae i kasem 144,000. Bambae oli joen wetem Jisas long heven blong rul long olgeta man long wol ya.—Ridim Revelesen 5:9, 10; 14:1.

  4. ?Kingdom blong God i stat rul wetaem?

Jisas i kam King long 1914. * Smoltaem biaen, hem i sakemaot Setan wetem olgeta enjel blong hem, oli aot long heven oli kamdaon long wol. (Revelesen 12:7-10, 12) Stat long taem ya, ol trabol long wol oli kam antap bigwan. I gat faet. Graon i seksek. Kakae i sot. Ol rabis sik. Fasin blong ol man i kam nogud olgeta. Olgeta samting ya oli wan saen blong soemaot se yumi stap long ol las dei. (2 Timoti 3:1-5) Ol man we oli wantem kasem ol gudgudfala samting we Kingdom blong God bambae i givim, oli mas lanem blong folem eksampol blong King ya, Jisas.—Ridim Luk 21:7, 10, 11, 31, 34, 35.

5. ?Wanem wok we Kingdom blong God i mekem?

Kingdom blong God i stap lidim wok blong prij long olgeta ples long wol, blong halpem plante milian man blong oli lanem ol fasin blong God. (Matiu 24:14) Taem Kingdom ya bambae i spolem rabis wol ya blong Setan, bambae hem i sevem “wan bigfala hip blong ol man” we oli stap obei long Jisas.—Ridim Revelesen 7:9, 10, 13-17.

Kingdom ya bambae i rulum wol blong 1,000 yia, mo sloslo wol bambae i kam wan paradaes. Biaen, bambae Jisas i givimbak Kingdom long Papa blong hem. (1 Korin 15:24-26) ?Yu yu save wan man we yu ting se bambae hem i glad blong harem nius ya long saed blong Kingdom blong God? Ale, i gud yu serem ol save ya wetem hem.—Ridim Ol Sam 37:10, 11, 29.

Blong save moa, lukluk japta 8 mo 9 blong buk ya, ?Wanem Samting We Baebol i Rili Tijim? we ol Witnes blong Jehova oli wokem.

[Futnot]