Jehova i Stamba Blong Evri Samting Long Laef Blong Mi
Jehova i Stamba Blong Evri Samting Long Laef Blong Mi
“Bambae yufala i no save holem wan pis graon se i blong yufala, . . . bambae yufala i no save givim long ol pikinini blong yufala se i blong olgeta. Mi nao mi stamba blong evri samting long laef blong yufala.”—NAM. 18:20.
1, 2. (a) ?Taem Josua i seraot ol graon long ol laen blong Isrel, olsem wanem long ol Livaet? (b) ?Jehova i mekem wanem promes long ol Livaet?
TAEM ol man Isrel oli winim bighaf blong ol graon blong Promes Lan, Josua i sakem ol spesel ston blong faenemaot wanem laen bambae i kasem wanem graon. Taem hem i mekem samting ya, hem i wok wetem Hae Pris Eleasara mo ol lida blong ol laen blong Isrel. (Nam. 34:13-29) Ol Livaet oli no kasem graon blong olgeta olsem ol narafala laen blong Isrel. (Jos. 14:1-5) ?From wanem ol Livaet oli no kasem graon blong olgeta long Promes Lan? ?Olsem wanem? ?Jehova i fogetem olgeta?
2 Ol tok we Jehova i talem long ol Livaet i ansa long ol kwestin ya. Ol tok blong hem i soemaot se hem i no lego olgeta. Hem i se: “Bambae yufala i no save holem wan pis graon se i blong yufala, . . . bambae yufala i no save givim long ol pikinini blong yufala se i blong olgeta. Mi nao mi stamba blong evri samting long laef blong yufala.” (Nam. 18:20) Yu traem tingbaot promes ya blong Jehova: “Mi nao mi stamba blong evri samting long laef blong yufala.” !Hemia wan nambawan promes ya! ?Bambae yu yu harem olsem wanem sipos Jehova i talem samting ya long yu? Maet fas samting we yu tingbaot se, ‘Mi mi wan man nating nomo. ?Bambae Jehova i mekem wan promes olsem long mi?’ Maet yu tingting tu se, ‘?I tru se Jehova i stamba blong evri samting long laef blong ol Kristin tede, nating se oli sinman nomo?’ Ol ansa blong ol kwestin ya oli save givhan long yu mo long olgeta we yu laekem tumas. Taswe i gud yu faenemaot mining blong tok ya blong God. Samting ya bambae i givhan long yu blong kasem save olsem wanem Jehova nao i stamba blong evri samting long laef blong ol Kristin tede. Mo bambae yu luk se Jehova i save kam stamba blong evri samting long laef blong yu, nating se yu gat tingting blong laef long heven no long paradaes long wol.
Jehova i Givim Samting We Ol Livaet Oli Nidim
3. ?God i mekem wanem blong i jusumaot ol Livaet blong oli mekem wok blong hem?
3 Bifo we Jehova i givim Loa long ol man Isrel, ol hed blong famle oli mekem wok olsem ol pris. Taem God i givim Loa long ol man Isrel, hem i jusumaot ol man long laen blong Livae blong oli mekem wok blong pris fultaem, mo i jusumaot ol man blong givhan long olgeta. ?Hem i mekem samting ya olsem wanem? Taem God i kilim ol fasbon blong ol man Ijip i ded, hem i makemaot ol fasbon pikinini blong ol man Isrel se oli tabu, oli blong hem. Be biaen, Jehova i mekem wan desisen se ol laen blong Livae bambae oli ‘tekem ples blong ol fasbon ya blong ol man Isrel.’ Ol man Isrel oli mas pemaot ol fasbon ya we namba blong olgeta i antap winim namba blong ol Livaet. (Nam. 3:11-13, 41, 46, 47) Olsem nao ol Livaet oli save mekem wok blong God.
4, 5. (a) ?I minim wanem se God i stamba blong evri samting long laef blong ol Livaet? (b) ?God i mekem wanem blong givim ol samting we ol Livaet oli nidim?
4 Taem Jehova i jusum ol Livaet blong mekem wok blong hem, hem i kam stamba blong evri samting long laef blong olgeta. ?Hemia i minim wanem? Hem i no givim graon long olgeta, be hem i givim wan samting we i moa gud. Hem i givim wan impoten wok long olgeta blong oli mekem. Oli “mekem wok blong ol pris blong Hae God,” mo wok ya i olsem graon blong olgeta. (Jos. 18:7) Namba japta 18 i soemaot se Jehova i givim ol samting we ol Livaet oli nidim. (Ridim Namba 18:19, 21, 24.) “Ol man blong ol narafala laen blong Isrel oli seraot olting blong olgeta i go long ten hif, nao oli givim wan hif . . . i go long ol Livaet ya. Hemia i olsem pei blong olgeta.” Olting ya we ol Livaet oli kasem hemia ol kakae blong garen mo ol anamol we oli kam plante. Ale ol Livaet oli seraot hif ya i go long ten hif, mo oli givim wan hif we hemia “ol nambawan samting” we oli kasem, i go long ol pris. Olsem nao ol pris oli gat samting we oli nidim mo oli save gohed blong mekem wok blong God. * (Nam. 18:25-29) Ol pris oli kasem “olgeta spesel presen” tu we ol narafala laen blong Isrel oli givim i go long God. Taswe olgeta we oli mekem wok blong pris oli save bilif strong se Jehova bambae i givim olgeta samting we oli nidim.
5 I luk olsem se ol man Isrel oli givim wan narafala taet tu. Oli yusum taet ya blong oli kakae mo dring mo harem gud, long ol asembli we oli mekem evri yia blong wosipim God. (Dut. 14:22-27) Oli yusum taet ya blong wan narafala samting tu. Ol man Isrel oli mekem lafet blong Sabat evri seven yia. Long en blong namba tri yia mo namba sikis yia blong Sabat ya, oli yusum taet ya blong givhan long ol puaman mo ol Livaet. ?From wanem ol Livaet oli kasem taet ya? Hemia from we olgeta oli “no gat graon blong olgeta.”—Dut. 14:28, 29.
6. ?Sipos ol Livaet oli no gat graon blong olgeta, bambae oli stap wea?
6 Maet yu stap tingting se, ‘?Sipos ol Livaet oli no gat graon blong olgeta, bambae oli stap wea? God i givim ples blong oli stap long hem. Hem i givim 48 taon wetem ol graon we i stap raonabaot long olgeta. Long ol taon ya i gat sikis we oli taon blong haed. (Nam. 35:6-8) Olsem nao, ol Livaet oli gat wan ples blong go stap long hem taem oli no mekem wok long haos blong God. Jehova i givim plante samting long ol Livaet we oli glad blong mekem wok blong hem. ?Ol Livaet oli mas mekem wanem blong soemaot se Jehova i stamba blong evri samting long laef blong olgeta? Oli mas trastem Jehova se hem i gat paoa blong givim samting we oli nidim mo hem i wantem lukaot long olgeta.
7. ?Ol Livaet oli mas mekem wanem blong Jehova i stamba blong evri samting long laef blong olgeta?
7 Loa i no putum faen long wan man Isrel we i no givim taet blong hem. Taswe taem ol man Isrel oli no moa givim taet blong olgeta, ol pris mo ol Livaet oli harem nogud from. Hemia nao samting we i hapen long taem blong Nehemaea, mekem se ol Livaet oli no moa save gohed long wok blong olgeta, oli gobak long graon blong olgeta blong wokem garen. (Ridim Nehemaea 13:10.) Sipos ol man Isrel oli no obei long Loa blong Jehova, bambae ol Livaet oli no gat ol samting we oli nidim. Antap moa, ol pris mo ol Livaet oli mas bilif long Jehova mo long rod we hem i yusum blong givim samting we oli nidim.
Sam Livaet We Oli Mekem Jehova i Stamba Blong Evri Samting Long Laef Blong Olgeta
8. Traem tokbaot from wanem Asaf i harem nogud tumas.
8 Ful laen blong Livae i mekem Jehova i stamba blong evri samting long laef blong olgeta. Mo sam long olgeta oli talem ol tok blong soemaot se Jehova i stamba blong evri samting long laef blong olgeta. Oli mekem olsem taem oli tokbaot se oli fren gud wetem God mo oli trastem hem. (Krae 3:24) I gat wan man Livae we i mekem olsem. Hem i man blong singsing mo blong wokem ol sing. Bambae yumi singaot hem se Asaf, be maet hem i wan famle blong Asaf. * Ol Sam 73 i talem se Asaf i jalus long ol rabis man. Hem i no kasem save from wanem laef blong olgeta i ron gud, nao hem i talem se: “Mi mi stap holem tingting blong mi i klin, mi no stap mekem sin, be hemia i blong nating nomo.” I luk olsem se Asaf i no moa tingbaot se wok we hem i mekem blong God i wan nambawan blesing. Hem i no moa tingbaot se Jehova i stamba blong evri samting long laef blong hem. Hem i harem nogud ‘gogo kasem we hem i go insaed long haos blong God.’—Sam 73:2, 3, 12, 13, 17.
9, 10. ?From wanem Asaf i tokbaot se bambae Jehova i stamba blong evri samting long laef blong hem gogo i no save finis?
9 Long haos blong God, Asaf i stat blong jenisim tingting blong hem. Maet wan samting olsem i hapen long yu tu. Maet yu no moa tingbaot se wok we yu mekem blong God i wan nambawan blesing, mo yu stat blong tingting tumas long ol samting long saed blong bodi we yu yu no gat. Be taem yu stadi long Tok blong God mo yu go long ol Kristin miting, yu mekem tingting blong yu i laenap wetem tingting blong Jehova. Asaf i luksave samting we bambae i hapen long ol rabis man. Hem i tingbaot ol gudfala samting we hem i gat mo hem i luksave se Jehova bambae i holem raet han blong hem mo i lidim hem. From samting ya, Asaf i save talem long Jehova se: “Yu yu God blong mi, i no moa gat wan samting long graon ya tu we mi save putum tingting blong mi i stap long hem.” (Sam 73:23, 25) Ale hem i tokbaot se Jehova i stamba blong evri samting long laef blong hem. (Ridim Ol Sam 73:26.) Nating we ‘tingting mo bodi blong hem i kam slak,’ bambae God i stamba blong evri samting long laef blong hem gogo i no save finis. Asaf i gat strong tingting se Jehova bambae i stap tingbaot hem, se i fren blong Hem. Mo Jehova bambae i no save fogetem ol gudfala wok we hem i mekem. (Pri. 7:1) !Ating Asaf i harem gud tumas! Hem i singsing se: “Taem we mi mi kam stap klosap long yu, mi harem se i gud tumas long mi. Yu yu sefples blong mi, yu yu stap blokem mi.”—Sam 73:28.
10 Taem Asaf i talem se God i stamba blong evri samting long laef blong hem, hem i no stap tokbaot ol samting ya nomo we hem i kasem from we hem i wan Livaet. Be bigfala samting we hem i stap tokbaot hemia wok we hem i mekem blong Jehova mo gudfala fasin fren blong hem wetem Hae God. (Jem. 2:21-23) Sipos Asaf i wantem se hem i fren gud wetem Jehova oltaem, hem i mas gohed blong bilif long Jehova mo trastem hem. Hem i mas gat strong tingting se Jehova bambae i blesem hem mo bambae i givim wan gudfala laef long hem sipos hem i obei long Jehova. Yu tu yu save gat strong tingting se Jehova bambae i mekem sem samting long yu.
11. ?Jeremaea i askem wanem kwestin long Jehova, mo Jehova i ansa long kwestin ya olsem wanem?
11 Profet Jeremaea i wan narafala Livaet we i tokbaot se Jehova i stamba blong evri samting long laef blong hem. I gud yumi tingbaot from wanem hem i talem tok ya. Jeremaea i stap long wan taon blong ol Livaet we nem blong hem Anatot, klosap long Jerusalem. (Jer. 1:1) I gat wan taem long laef blong Jeremaea we hem i askem long Jehova se, ?from wanem ol man nogud oli stap win oltaem, be ol man we fasin blong olgeta i stret, oli stap harem nogud? (Jer. 12:1) Taem hem i luk ol nogud samting we i stap hapen long Jerusalem mo Juda, hem i harem se hem i mas komplen long Jehova. Jeremaea i save se fasin blong Jehova i stret oltaem. Jehova i ansa long kwestin blong Jeremaea. Hem i talem long Jeremaea blong i go talemaot jajmen blong hem long ol man, mo biaen Jehova i mekem profet tok ya i kamtru. Ol man we oli obei long Jehova oli laef, be ol man nogud we oli no lesin long woning ya, oli ded.—Jer. 21:9.
12, 13. (a) ?Wanem i pulum Jeremaea blong talem se Jehova i stamba blong evri samting long laef blong hem? ?Mo hem i putum tingting blong hem i stap long wanem? (b) ?From wanem olgeta laen blong Isrel oli mas putum tingting blong olgeta long God?
12 Biaen taem Jeremaea i lukluk long kantri blong hem we i kam ples nating, hem i harem se hem i stap wokbaot long tudak. I olsem se Jehova i mekem hem i “stap long tudak, olsem man we i ded bifo olgeta.” (Krae 1:1, 16; 3:6) Jeremaea i talem finis long stronghed neson ya blong oli kambak long Papa blong olgeta long heven. Be fasin blong olgeta i nogud tumas, mekem se God i mas letem ol man oli spolem Jerusalem mo Juda. Samting ya i mekem Jeremaea i harem nogud tumas, nating se i no fol blong hem. Long taem ya we hem i stap harem nogud, profet ya i tingbaot we God i gat sore. Hem i talem se: ‘Fasin blong God blong sore long man, i niuwan oltaem nomo, olsem we evri moning, niufala dei i kamtru.’ Ale Jeremaea i talem wan tok we i soemaot se Jehova i stamba blong evri samting long laef blong hem, i se: ‘Hae God nomo i stap givim laef long mi.’ Yes Jeremaea i gat wan nambawan blesing yet. Hem i gohed blong wok olsem wan profet blong Jehova.—Ridim Ol Krae 3:22-24.
13 Bambae kantri blong ol man Isrel i ples nating blong 70 yia. (Jer. 25:11) Be ol tok blong Jeremaea i soemaot we hem i trastem Jehova se bambae Jehova i sore long ol man blong hem. Ale ‘Jeremaea i putum tingting blong hem i stap strong long God,’ i wet long God blong i givhan long olgeta. Olgeta laen blong Isrel oli no moa gat graon blong olgeta, taswe oli mas gat tingting olsem profet Jeremaea. Jehova nomo i save givhan long olgeta. Taem 70 yia i pas, ol man Isrel oli gobak long kantri blong olgeta, mo oli gat blesing ya blong mekem wok blong hem bakegen long ples blong olgeta.—2 Kron. 36:20-23.
Narafala i Save Mekem Jehova i Stamba Blong Evri Samting Long Laef Blong Hem
14, 15. ?Hu man ya we i no blong laen blong Livae, we i mekem Jehova i stamba blong evri samting long laef blong hem? ?Mo from wanem hem i mekem olsem?
14 Asaf mo Jeremaea tufala i kamaot long laen blong Livae. ?Olsem wanem? ?Ol Livaet nomo oli gat nambawan blesing ya blong mekem wok blong Jehova? !Nogat! Yangfala Deved, we bambae i king blong ol man Isrel, i soemaot we hem i trastem God, i talem se: “Olgeta laef blong mi long wol ya, yu nao.” (Ridim Ol Sam 142:1, 5.) Taem Deved i stap wokem sing ya, hem i no stap long haos blong king mo hem i no stap long wan haos. Hem i stap long hol blong ston, i stap haed long ol enemi blong hem. Tu taem Deved i haed long ol hol blong ston. Wan taem hem i haed klosap long taon ya Adulam mo narawan long draeples blong Enkedi. Maet Deved i raetem sing blong Ol Sam 142, taem hem i stap long wan long tufala hol ya blong ston.
15 Sipos i olsem, King Sol i stap traem faenem Deved, blong kilim hem i ded. Deved i go stap long hol blong ston we i had blong man i faenem hem. Long ples ya, i luk olsem se Deved i no gat wan fren we i stap klosap long hem blong givhan long hem. (Sam 142:4) Long taem ya nao, hem i prea long God blong i givhan long hem.
16, 17. (a) ?From wanem Deved i harem se hem i stap hem wan nomo? (b) ?Deved i save se hu bambae i givhan long hem?
16 Maet taem Deved i wokem Ol Sam 142 hem i kasem nius finis se Hae Pris Ahimelek i ded. Pris ya i bin givhan long hem taem hem i stap ronwe long Sol. King Sol i jalus tumas long Deved, nao i kilim i ded Ahimelek wetem ol famle blong hem. (1 Saml. 22:11, 18, 19) Deved i harem se i fol blong hem we olgeta ya oli ded. I olsem se hem nao i kilim ded pris ya we i givhan long hem. ?Sipos yu yu Deved, bambae yu harem se ded blong olgeta i fol blong yu? Antap long samting ya, Deved i no spel nating from we hem i stap ronwe long Sol we i wantem kilim hem i ded.
17 I no longtaem, profet Samuel i ded. Hem nao i kafsaedem oel long hed blong Deved blong makemaot hem i kam king blong ol man Isrel. (1 Saml. 25:1) Hemia wan narafala samting we i mekem Deved i harem se hem i stap hem wan nomo, olsem se i no gat man blong givhan long hem. Be Deved i save se Jehova bambae i givhan long hem. Deved i no mekem wok olsem ol Livaet, be God i makemaot hem blong i mekem wan narafala wok we i impoten. Bambae hem i kam king blong ol man blong God. (1 Saml. 16:1, 13) Taswe Deved i talemaot olgeta tingting blong hem long Jehova, mo i gohed blong trastem Jehova. Yu tu yu save mekem God i stamba blong evri samting long laef blong yu. Yu save trastem Jehova taem yu gohed blong traehad long wok blong hem.
18. ?Ol man we yumi tokbaot olgeta long stadi ya, oli mekem wanem blong soemaot se Jehova i stamba blong evri samting long laef blong olgeta?
18 Ol man we yumi tokbaot long stadi ya, oli mekem Jehova i stamba blong evri samting long laef blong olgeta. ?Oli mekem samting ya olsem wanem? Oli mekem wok we Jehova i givim long olgeta. Mo oli trastem Jehova se hem bambae i givim ol samting we oli nidim long laef. Ol Livaet mo ol man we oli blong ol narafala laen blong Isrel, olsem Deved, oli mekem God i stamba blong evri samting long laef blong olgeta. ?Yu yu save mekem wanem blong Jehova i stamba blong evri samting long laef blong yu? Bambae yumi tokbaot samting ya long nekis stadi.
[Ol futnot]
^ par. 4 Sipos yu wantem save moa long saed blong plan we Jehova i stanemap blong lukaot long ol pris, yu save lukluk Insight on the Scriptures, Buk 2, pej 684 no Étude perspicace des Écritures Buk 2, pej 655 haf 7.
^ par. 8 Asaf i wan Livaet we i lidim kwaea long taem blong King Deved.—1 Kron. 6:31-43.
?Bambae Yu Yu Ansa Olsem Wanem?
• ?I minim wanem se Jehova i stamba blong evri samting long laef blong ol Livaet?
• ?Asaf, Jeremaea, mo Deved oli mekem wanem blong soemaot se Jehova i stamba blong evri samting long laef blong olgeta?
• ?Sipos yu wantem se God i stamba blong evri samting long laef blong yu, yu mas gat wanem fasin?
[Kwestin]
[Tok blong makem poen pej 11]
Ol Livaet oli no kasem graon blong olgeta. Be Jehova nao i stamba blong evri samting long laef blong olgeta, from we oli gat nambawan blesing ya blong mekem wok blong hem
[Tok blong pija long pej 10]
?Jehova i stamba blong evri samting long laef blong ol pris mo ol Livaet olsem wanem?
[Tok blong pija long pej 12]
?Wanem i givhan long Asaf blong hem i gohed blong mekem Jehova i stamba blong evri samting long laef blong hem?
