?Yu Yu Mekem Jehova i Stamba Blong Evri Samting Long Laef Blong Yu?

“Yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.”—MAT. 6:33, NW.

1, 2. (a) ?Hu ya “Isrel blong God,” we Galesia 6:16 (NW) i tokbaot? (b) ?“Ol twelef laen blong Isrel” long Matiu 19:28, i minim hu?

TAEM yu ridim nem ya Isrel long Baebol, ?yu tingbaot hu? ?Yu tingbaot Jekob, pikinini boe blong Aesak, we biaen i karem nem ya Isrel? ?No yu tingbaot ol man we oli kamaot long laen blong hem, hemia neson blong Isrel? Baebol i tokbaot “Isrel blong God,” no Isrel long saed blong spirit, hemia 144,000 man we God i makemaot olgeta wetem tabu spirit blong hem. Bambae oli king mo oli pris long heven. (Gal. 6:16, NW; Rev. 7:4; 21:12) Be i gat wan narafala rod blong yusum nem ya Isrel. I gud yumi ridim Matiu 19:28 blong save moa long saed ya.

² Jisas i talem se: “Long niufala wol ya we bambae i kam, mi, mi Pikinini blong Man, bambae mi King, mi sidaon long bigfala jea blong mi. Nao long taem ya, yufala twelef ya we yufala i stap biaen long mi, bambae yufala tu i king, yufala i save sidaon long ol bigfala jea blong yufala. Nao bambae yufala i hed long ol twelef laen blong Isrel, blong rul long  olgeta.” Long vas ya, “ol twelef laen blong Isrel,” hemia olgeta we bambae oli laef olwe long Paradaes long wol. Ol 144,000 man bambae oli wok olsem ol pris mo ol jaj antap long olgeta ya.

3, 4. ?Ol tabu Kristin oli soemaot wanem gudfala eksampol?

³ Olsem ol pris mo ol Livaet bifo, ol tabu Kristin tede oli tingbaot se wok we oli mekem i wan nambawan blesing. (Nam. 18:20) Ol tabu Kristin oli no ting se bambae God i givim graon long olgeta long wol. Be Revelesen 4:10, 11 i soemaot se bambae oli gohed blong mekem wok blong Jehova taem oli stap long heven. Bambae oli king mo pris wetem Jisas Kraes.—Esik. 44:28.

⁴ Taem ol tabu Kristin oli stap long wol, laef blong olgeta i soemaot se Jehova i stamba blong evri samting long laef blong olgeta. Wok we oli mekem blong God i fas samting long laef blong olgeta. Oli bilif long sakrefaes blong Kraes mo oli biaen long hem oltaem. Long rod ya, oli ‘traehad moa oltaem blong soemaot se God i jusumaot olgeta mo i singaot olgeta blong oli man blong hem.’ (2 Pita 1:10) Laef blong olgeta i defdefren mo ol samting we oli save mekem i no sem mak. Be oli no letem eni samting i blokem olgeta long wok blong God, nao oli mekem smol nomo. Wok blong God i impoten samting long laef blong olgeta mo oli mekem bes blong olgeta long wok ya. Oli soemaot gudfala eksampol long ol man we oli wantem laef olwe long paradaes long wol.

5. ?Olgeta Kristin oli save mekem wanem blong Jehova i stamba blong evri samting long laef blong olgeta? ?Mo from wanem samting ya i no isi?

⁵ Nating se yumi gat tingting blong laef long heven no long wol, yumi mas ‘blokem ol samting we yumi nomo i wantem, nao yumi mas karem pos blong yumi, yumi biaen long Kraes.’ (Mat. 16:24) Plante milian man we oli gat tingting blong laef long Paradaes long wol, oli stap wosipim God mo oli biaen long Kraes olsem vas ya i talem. Taem oli save se oli naf blong mekem moa long wok blong God, oli no glad blong mekem smol nomo long wok ya. Plante oli mekem laef blong olgeta i no fasfas, mo oli mekem wok blong fultaem paenia. Sam narafala oli traehad blong mekem wok blong paenia sam manis evri yia. Mo samfala oli no save mekem wok blong paenia be oli traehad blong mekem moa long wok blong prij. Olgeta ya oli olsem Meri we i kafsaedem senta long bodi blong Jisas. Jisas i talem se: “Hem i mekem wan gudfala samting long mi ya. . . . Woman ya i mekem wan samting we hem i naf blong mekem.” (Mak 14:6-8) Yumi stap long wol ya we Setan i bos long hem, taswe maet i no isi blong yumi mekem samting we yumi naf blong mekem. Be nating, yumi wok strong mo yumi trastem Jehova. Bambae yumi tokbaot fo rod we yumi save mekem olsem.

Yu Mas Lukaot Kingdom Blong God Fastaem

6. (a) ?Ol man long wol oli soemaot olsem wanem se oli stap tingting long laef ya nomo? (b) ?From wanem i moa gud blong gat tingting olsem Deved?

⁶ Jisas i tijim ol man blong hem blong oli lukaot Kingdom mo stret fasin blong God fastaem. Plante man long wol oli tingbaot fastaem samting we olgeta nomo oli wantem. Oli “man blong wol ya, we oli tingting long laef ya nomo.” (Sam 17:1, 13-15, NW) Oli no tingbaot Man ya we i mekem olgeta. Oli tingbaot nomo blong gat wan gudfala laef, lukaot long famle blong olgeta, mo hivimap ol samting blong pasem long ol pikinini blong olgeta. Oli stap tingting long laef ya nomo. Be Deved i no tingting olsem. Hem i wantem gat “gud nem” long fes blong Jehova. Hemia nao samting we pikinini blong hem i talem long yumi blong mekem. (Pri. 7:1) Olsem Asaf, Deved i kasem save se samting we i impoten moa long ol narafala samting long laef hemia blong fren gud wetem Jehova. Samting ya nao i mekem hem i glad. Tede, plante Kristin oli soemaot se wok we oli mekem blong Jehova i impoten moa long ol wok we oli mekem blong winim mane.

7. ?Wanem blesing we wan brata i i kasem from we hem i lukaot Kingdom fastaem?

⁷ Jean-Claude i wan elda we i stap long Ripablik blong Sentrol Afrika. Hem i mared mo hem i gat tri pikinini. Long kantri ya i had blong kasem wok, mo plante man oli mekem eni samting blong oli no lusum wok blong olgeta. Wan dei, bos blong Jean-Claude i talem long hem se bambae i stat wok haf pas sikis long naet, seven dei long wik. Jean-Claude i eksplenem long bos blong hem se i tru we hem i mas wok blong lukaot long famle blong hem long saed blong bodi, be hem i gat wok tu blong givhan long famle blong hem blong fren gud wetem God. Mo hem i talem se hem i gat wok blong  mekem long kongregesen. ?Bos i talem wanem long Jean-Claude? Hem i se, “sipos yu yu laki blong gat wan wok, yu mas fogetem olgeta narafala samting, yu mas fogetem woman blong yu tu, ol pikinini blong yu, mo ol problem blong yu. Yu mas yusum ful laef blong yu long wok blong yu nomo. Yu mas jusum: skul blong yu no wok blong yu.” ?Sipos yu yu Jean-Claude, bambae yu mekem wanem? Jean-Claude i save se sipos hem i lusum wok blong hem, bambae Jehova i lukaot long hem. Bambae hem i gat plante wok blong mekem blong Jehova, mo Jehova bambae i givhan long hem blong i lukaot long famle blong hem long saed blong bodi. Ale, Jean-Claude i go long nekis miting long naet. Afta long miting, hem i rere blong go long wok, nating se i no save sipos hem i wok yet long ples ya. Bifo we hem i aot, telefon i ring. Kampani i sakemaot bos blong hem. Be brata blong yumi i gat wok blong hem yet.

8, 9. ?Yumi save mekem wanem blong folem fasin blong ol pris mo ol Livaet, blong Jehova i stamba blong evri samting long laef blong yumi?

⁸ Maet wan samting olsem i hapen long yu. Yu wari from we yu no save se bambae yu mekem wanem blong lukaot long famle blong yu, sipos yu lusum wok blong yu. (1 Tim. 5:8) Nating se samting ya i hapen long yu finis no nogat, ating yu luk finis long laef blong yu se God i neva lego olgeta we oli mekem hem i stamba blong evri samting long laef blong olgeta, mo oli tinghae long wok blong hem. Taem Jisas i talem long ol disaepol blong hem se oli mas gohed blong lukaot kingdom fastaem, hem i promes tu se God bambae i ‘givim olgeta narafala samting ya long yufala.’ Ol narafala samting ya, hemia kakae, dring, mo klos.—Mat. 6:33.

⁹ Yu traem tingbaot ol Livaet. Olgeta oli no kasem graon. Oli wok fultaem blong lidim neson blong Isrel blong mekem wosip long Jehova, taswe oli mas trastem Jehova se hem bambae i givim ol samting we oli nidim long laef. Jehova i talem long olgeta se: “Mi nao mi stamba blong evri samting long laef blong yufala.” (Nam. 18:20) Nating se yumi no stap wok long prapa haos prea olsem ol pris mo ol Livaet, yumi save gat tingting olsem olgeta. Yumi save trastem Jehova se hem bambae i givim ol samting we yumi nidim. Moa we yumi kam klosap long en blong olfala wol ya, moa we yumi mas trastem God se hem bambae i lukaot long yumi.—Rev. 13:17.

Yu Mas Lukaot Stret Fasin Blong God Fastaem

10, 11. ?Samfala oli mekem wanem long saed blong wok blong olgeta blong soemaot se oli trastem God? Yu talem stori blong wan we i mekem olsem.

¹⁰ Jisas i talem long ol disaepol blong hem se oli mas ‘gohed blong lukaot stret fasin blong God fastaem.’ (Mat. 6:33) Hemia i min se yumi folem tingting blong Jehova long saed blong samting we i stret mo samting we i no stret, i bitim we yumi folem tingting blong man. (Ridim Aesea 55:8, 9.) Sam man oli planem tabak mo oli salem ol samting we oli wokem long tabak, oli trenem ol narafala blong faet no oli wokem mo salem ol tul blong faet. Biaen taem oli lanem trutok, oli jenisim wok blong olgeta mo oli kasem mak blong baptaes.—Aes. 2:4; 2 Kor. 7:1; Gal. 5:14.

¹¹ Andrew i mekem olsem. Taem hem mo woman blong hem tufala i lanem trutok long saed blong Jehova, tufala i mekem desisen blong wosipim hem. Andrew i laekem tumas wok blong hem, be nating, hem i lego wok ya. ?From wanem? From we wok blong hem i joen wetem faet. Andrew i gat strong tingting blong lukaot stret fasin blong God fastaem. Taem Andrew i lego wok, hem i gat tu pikinini mo i gat naf mane blong laef sam manis nomo. Long tingting blong man, i luk olsem se hem i no gat wan samting blong pasem long ol pikinini blong hem. Hem i trastem God mo i traem faenem wan wok. Taem hem mo famle blong hem oli tingtingbak long taem ya, oli agri se han blong Jehova i no sot. Jehova i lukaot gud long olgeta. (Aes. 59:1, NW) Andrew mo woman blong hem, tufala i mekem se laef blong tufala i no fasfas mo tufala i joen long wok blong fultaem paenia. Andrew i talem se: “Samtaem mitufala i wari long saed blong mane, haos, helt, mo from we mitufala i stap kam olfala. Be Jehova i neva lego mifala. . . . Mitufala i  save talem stret se wok blong Jehova nao i mekem man i harem gud tumas, mo i no gat wan narafala wok we i gud moa.” *—Pri. 12:13.

12. ?Wanem fasin we yu mas gat blong lukaot stret fasin blong God fastaem? Yu talem stori blong samfala long ples blong yu.

¹² Jisas i talem long ol disaepol blong hem se: “Nating sipos bilif blong yufala i smol nomo, be bambae yufala i save talem long bigfala hil ya se, ‘Yu gowe,’ nao bambae hem i mas gowe. Bambae i no gat wan samting we yufala i no save mekem.” (Mat. 17:20) ?Olsem wanem? ?Bambae yu yu gohed blong lukaot stret fasin blong God fastaem, nating se yu save kasem trabol? Sipos tingting blong yu i no strong long saed ya, i gud yu toktok wetem samfala long kongregesen. Bambae oli save talem long yu olsem wanem Jehova i givhan long olgeta. Ol stori blong olgeta bambae i mekem bilif blong yu i strong moa.

Yu Mas Glad Long Ol Samting We Jehova i Givim Blong Yumi Fren Gud Wetem Hem

13. ?Sipos yumi traehad long wok blong Jehova, yumi save gat strong tingting se bambae hem i mekem wanem?

¹³ Sipos yu tinghae long nambawan blesing we yu gat blong mekem wok blong Jehova, yu save gat strong tingting se bambae hem i givim olgeta samting we yu nidim, olsem we hem i mekem long ol Livaet. Yu traem tingbaot Deved. Nating se hem i stap long hol blong ston, hem i trastem God se bambae i givhan long hem. Yumi tu yumi save trastem Jehova, nating se i no gat narafala man blong givhan long yumi. Yu traem tingbaot Asaf. Taem hem i go ‘insaed long haos blong God,’ hem i kasem save from wanem hem i harem nogud. (Sam 73:17) Olsem Asaf, yumi mas trastem Jehova se bambae hem i givim samting we oli halpem yumi blong fren gud wetem hem oltaem. Nao bambae yumi soemaot se yumi tinghae long wok blong Jehova nomata wanem samting i hapen long laef blong yumi. Bambae Jehova i stamba blong evri samting long laef blong yumi.

14, 15. ?Yu mas mekem wanem taem ol save blong Baebol i kam klia moa, mo from wanem?

¹⁴ ?Olsem wanem? ?Yu yu trastem Jehova taem hem i givhan long yu blong kasem save long ‘ol tingting blong hem we oli haed,’ we oli stap long Baebol? (1 Kor. 2:10-13) Aposol Pita i soemaot wan gudfala eksampol long saed ya. Jisas i talem long ol man we oli stap lesin long hem se: “Tru mi talem long yufala, mi mi Pikinini blong Man. Sipos yufala i no kakae mit blong bodi blong mi, mo yufala i no dring blad blong mi, bambae yufala i no gat laef long yufala.” Plante disaepol oli ting se Jisas i stap tokbaot prapa mit mo blad blong hem, nao oli talem se, “!Man! !Tok ya i strong tumas! ?Hu i save harem tok olsem?” Ale, oli ‘gowe long Jisas.’ Be Pita i talem se: “Masta. ?Bambae mifala i save go long hu? Yu nomo yu gat ol tok blong laef ya we i no save finis.”—Jon 6:53, 60, 66, 68.

¹⁵ Pita i no kasem save gud mining blong tok blong Jisas. Be nating, hem i trastem God se hem i yusum Jisas blong halpem ol man blong oli kasem save long trutok. ?Olsem wanem? Taem ol save blong Baebol i kam klia moa, ?yu yu traem kasem save from wanem yumi jenisim tingting blong yumi long sam tijing blong Baebol? (Prov. 4:18) Long taem blong ol fas Kristin, ol man Berea oli ‘wantem tumas blong harem tok blong Baebol, mo evri dei, oli stap ridimgud ol tok ya.’ (Wok 17:11) Sipos yu folem eksampol blong olgeta, bambae yu tinghae moa long wok blong Jehova, mo bambae yu glad tumas we Jehova i stamba blong evri samting long laef blong yu.

Yu Mas Mared Long Man Blong Masta Nomo

16. Folem tok blong 1 Korin 7:39, ?yumi save mekem wanem blong soemaot se God i stamba blong evri samting long laef blong yumi?

¹⁶ Wan narafala rod we ol Kristin oli soemaot se Jehova i stamba blong evri samting long laef blong olgeta, hemia blong obei long tok ya blong Baebol, blong mared ‘long man blong Masta nomo.’ (1 Kor. 7:39) Plante brata sista oli no mared, i bitim we oli brekem loa ya blong Baebol. God i lukaot gud long olgeta ya. ?Deved i mekem wanem taem hem i stap hem wan mo i harem olsem se i no gat narafala man blong givhan long hem? Hem i talem se: ‘Mi talemaot olgeta samting we i mekem mi mi harem nogud, mi talemaot olgeta trabol blong mi long God. Taem mi mi harem nogud tumas, we tingting blong mi i foldaon from, be hem i save wanem samting we bambae mi mas mekem.’ (Sam 142:1-3)  Profet Jeremaea i mekem wok blong God blong plante yia, we hem i no mared. Hem tu i harem nogud samtaem from we i stap hem wan nomo. Yu save faenemaot moa long saed blong eksampol blong Jeremaea long japta 8 blong buk ya God’s Word for Us Through Jeremiah.

17. ?Wan sista we i no mared i mekem wanem blong i no harem nogud blong stap hem wan?

¹⁷ Wan sista long Yunaeted Stet i talem se: “Mi mi no gat tingting ya blong stap olsem nomo we mi no mared. Mi wantem mared taem mi faenem wan man we i stret long mi. Mama blong mi i no wan Witnes. Hem i traem pulum mi blong mared long eni man we i askem mi. Mi askem long hem sipos i wantem se i fol blong hem we mared blong mi i brok. Be taem mama i luk we mi gat wan gudfala wok, mi lukaot gud long mi wan, mo mi glad, hem i no moa fosem mi blong mared.” Sam samtaem, sista ya i harem nogud blong stap hem wan nomo. Hem i talem se: “Long taem olsem, mi traem blong trastem Jehova. Neva hem i lego mi.” ?Wanem i givhan long sista ya blong trastem Jehova? Hem i talem se: “Prea i givhan long mi blong luksave se God i laef i stap mo neva mi stap mi wan nomo. Hae God blong heven mo wol i stap lesin long mi, mo samting ya i mekem mi mi harem gud tumas.” Hem i trastem tok blong Baebol we i talem se: “Man we i stap givim presen i go, hem i save harem gud moa, i winim man we i stap kasem presen blong hem.” Taswe hem i se: “Mi mi traehad blong givhan long ol narafala long gladhat blong mi nomo. Mi no wantem kasem wan samting long olgeta. Taem tingting blong mi i stap long narafala se, ?Bambae mi mekem wanem blong givhan long hem?, hemia i mekem mi mi glad.” (Wok 20:35) Yes, sista ya i mekem Jehova i stamba blong evri samting long laef blong hem, mo hem i harem gud long wok we hem i mekem blong Jehova.

18. ?Sipos yu mekem Jehova i stamba blong evri samting long laef blong yu, bambae hem i mekem wanem?

¹⁸ Nomata wanem samting i hapen long laef blong yu, yu save mekem Jehova i stamba blong evri samting long laef blong yu. Sipos yu mekem olsem, bambae yu save stap long medel blong ol man blong hem we oli glad. (2 Kor. 6:16, 17) Ale, bambae Jehova i lukaot gud long yu olsem we hem i mekem long ol man blong hem bifo. (Ridim Dutronome 32:9, 10.) God i jusumaot ol man Isrel blong oli kam man blong hem mo i lukaot gud long olgeta. God i save jusumaot yu tu blong yu man blong hem mo i lukaot gud long yu.—Sam 17:8.

[Futnot]

?Bambae Yu Yu Ansa Olsem Wanem?

?Yu save mekem wanem blong Jehova i stamba blong evri samting long laef blong yu,

• taem yu lukaot Kingdom blong God mo stret fasin blong hem fastaem?

• taem yu glad tumas long ol save blong Baebol?

• taem yu obei long loa blong God blong mared long man blong masta nomo?

[Kwestin]

[Tok blong pija long pej 16]

Yumi mekem Jehova i kam stamba blong evri samting long laef blong yumi taem yumi putum wok blong hem long fasples long laef blong yumi

[Tok blong pija long pej 18]

Eksampol blong Jeremaea i leftemap tingting blong yumi