Yumi Mas Mekem Tingting Blong Yumi i Strong Blong Resis

“Yumi mas mekem tingting blong yumi i strong, blong yumi resis long rod ya we i stap long fes blong yumi.”—HIB. 12:1.

1, 2. ?Aposol Pol i talem se laef blong ol tru Kristin i olsem wanem samting?

EVRI yia, plante man long ol defren ples long wol, oli ron long ol longfala resis. Samfala oli ol gudfala man blong resis mo oli wantem win. Be plante man we oli ron long ol resis ya, oli save se bambae oli no win. Olgeta oli wantem nomo blong finisim resis.

² Baebol i tokbaot se laef blong ol tru Kristin i olsem wan resis. Aposol Pol i tokbaot resis ya long fas leta we hem i raetem long ol Kristin long Korin bifo. Hem i se: “Ating yufala i save finis fasin blong resis. Olgeta man oli resis, be wan man nomo i save kasem praes blong hem. Ale, yufala i mas mekem olsem we yufala i resis blong kasem praes blong yufala.”—1 Kor. 9:24.

3. ?From wanem Pol i talem se wan man nomo long resis i save win?

³ ?Olsem wanem? ?Pol i stap talem se wan Kristin nomo bambae i kasem praes blong laef mo ol narafala oli ron blong nating nomo? !Nogat! Hem i stap tokbaot risen from wanem ol man blong resis oli ron. Oli tren strong mo oli traehad blong ron gud from we oli wantem win. Pol i wantem se ol Kristin brata sista blong hem oli traehad olsem ol man ya blong resis. Hem i wantem se oli traehad blong kasem laef we i no save finis. Sipos oli mekem olsem, oli save kasem praes blong laef. Yes, olgeta Kristin we oli finisim resis ya oli save kasem praes blong laef.

4. ?Wanem sam samting we yumi mas tingbaot long saed blong resis ya we yumi stap ron long hem?

⁴ Ol tok ya oli leftemap tingting blong yumi, mo oli mekem yumi tingting long samting we yumi stap mekem long laef blong yumi. Sipos yumi laef long fasin we i mekem Jehova i glad, yumi save kasem nambawan promes ya blong laef olwe long heven no long Paradaes long wol. Be laef blong ol Kristin i olsem wan longfala resis long wan rod we i denja. I gat plante samting we oli save mekem yumi kam slak long wok blong Jehova, mo oli save mekem yumi lego wok blong hem. (Mat. 7:13, 14) Sore tumas, samting ya i hapen finis long sam man blong Jehova. ?Wanem ol trap mo ol samting we oli save mekem trabol long yumi long resis blong laef? ?Yu save blokem olgeta olsem wanem? ?Yu save mekem wanem blong yu finisim resis ya nao yu winim praes blong yu?

I Nidim Strong Tingting Blong Win

5. ?Long Hibrus 12:1, Pol i talem wanem long saed blong resis?

⁵ Pol i raetem wan leta i go long ol Hibru Kristin long Jerusalem mo Judia. Long leta ya tu, hem i tokbaot resis. (Ridim Hibrus 12:1.) Hem i tokbaot from wanem ol Kristin oli mas gohed blong resis, mo tu i tokbaot wanem samting we oli mas mekem blong finisim resis ya. Fastaem bambae yumi tokbaot from wanem Pol i raetem leta ya i go long ol Hibru, mo wanem samting we hem i wantem olgeta blong mekem. Biaen bambae yumi tokbaot samting we yumi save lanem long leta blong hem.

6. ?Ol lida blong skul oli mekem wanem long ol Kristin?

⁶ Ol fas Kristin oli laef long wan taem we i gat plante trabol. Samting ya i tru tumas long saed blong ol Kristin long Jerusalem mo Judia. Ol lida blong skul oli traem fosem ol man blong obei long olgeta. Klosap 30 yia bifo long taem ya, ol lida ya oli pulum ol man blong ting se Jisas Kraes i agensem gavman, mo hem i brekem loa. Ol lida ya oli pulum ol man blong kilim Jisas i ded, mo oli gat strong tingting blong agensem olgeta we oli talemaot Jisas long ol man. Buk blong Ol Wok, i tokbaot samting we i hapen afta long lafet blong Pentekos  long yia 33. Plante taem ol lida ya oli spolem ol Kristin blong traem mekem se oli no moa prij. Taswe ol tru Kristin oli kasem plante trabol long laef blong olgeta.—Wok 4:1-3; 5:17, 18; 6:8-12; 7:59; 8:1, 3.

7. ?Wanem i mekem se laef blong ol Kristin long Jerusalem mo Judia i strong tumas?

⁷ Wan narafala risen we i mekem laef blong ol Kristin ya i strong tumas, hemia se klosap nao Jerusalem bambae i lus. Jisas i bin talem long olgeta se God bambae i spolem Jerusalem. Hem i talem long olgeta wanem bambae i hapen bifo we samting ya i kamtru, mo hem i talem wanem samting we olgeta oli mas mekem blong oli laef. (Ridim Luk 21:20-22.) ?Oli mas mekem wanem? Jisas i talem se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap.”—Luk 21:34.

8. ?Wanem samting i mekem se sam Kristin oli kam slak long wok blong God no oli lego wok blong hem?

⁸ Pol i raetem leta blong hem long ol Hibru Kristin klosap 30 yia afta we Jisas i talem ol tok ya. ?Wanem i hapen long ol Kristin ya long 30 yia ya we i pas? Samfala oli letem ol problem mo ol samting we oli nidim long laef, i kam bigfala samting long tingting blong olgeta. Oli no gohed blong mekem fasin fren blong olgeta wetem Jehova i strong. (Hib. 5:11-14) Ating sam Kristin oli ting se laef blong olgeta bambae i moa isi sipos oli folem fasin blong ol narafala man Jiu. Maet oli ting se i no rong blong mekem olsem from we ol narafala man Jiu oli bilif long God, mo oli obei long bighaf blong Loa blong Moses. Mo sam Kristin long kongregesen oli traem fosem ol narafala blong oli obei long Loa blong Moses, mo blong oli folem ol kastom blong ol man Jiu. Pol i givhan long ol Kristin brata sista, blong oli gohed blong mekem fasin we God i glad long hem mo oli gohed long resis blong olgeta. ?Hem i talem wanem blong givhan long olgeta?

9, 10. (a) ?Long en blong Hibrus japta 10, Pol i talem wanem blong leftemap tingting blong ol Kristin? (b) ?From wanem Pol i tokbaot ol samting we ol witnes bifo oli mekem we i soemaot bilif blong olgeta?

⁹ Jehova i pulum Pol blong raetem leta ya i go long ol Hibru Kristin blong leftemap tingting blong olgeta. Long japta 10 blong leta ya, Pol i eksplenem se Loa we God i givim long Moses i “wan sado nomo blong ol gudgudfala samting, we bambae i kamtru,” mo God i yusum sakrefaes blong Jisas blong tekemaot ol sin. Long en blong japta 10, Pol i talem se: “Yufala i mas mekem tingting blong yufala i longfala [“i strong,” NW], blong yufala i save mekem ol samting we God i wantem. Nao bambae yufala i save kasem ol samting ya we hem i promes blong givim long yufala. Hemia i olsem we Baebol i talem, we God i talem se, ‘Smoltaem nomo, nao man ya we i stap kam, bambae i kamtru.’”—Hib. 10:1, 36, 37.

¹⁰ Long Hibrus japta 11, Pol i eksplenem se bilif long God i olsem wanem. Hem i tokbaot laef blong sam man mo woman we oli bilif. Eksampol blong olgeta i givhan long yumi blong kasem save moa long saed blong bilif. ?From wanem Pol i jenisim storian blong hem mo i tokbaot bilif? Hemia from we hem i wantem se ol Kristin ya oli kasem save se man we i bilif, hem i mas mekem tingting blong hem i strong mo hem i no mas fraet. Gudfala eksampol blong ol man blong Jehova bifo, bambae i mekem tingting blong ol Hibru Kristin i strong blong oli gohed blong mekem wok blong Jehova, nating se oli kasem trabol. Taswe, afta we Pol i talem ol samting we ol man blong Jehova bifo oli mekem blong soemaot bilif blong olgeta, hem i se: “Olgeta ya we oli stap bilif strong long God, mo oli witnes blong hem, olgeta oli stap raonabaot long yumi we oli plante we plante. Nao from samting ya, yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.”—Hib. 12:1.

‘Ol Witnes Oli Plante We Plante’

11. ?Eksampol blong ‘ol witnes we oli plante we plante,’ i save givhan long yumi olsem wanem?

¹¹ Pol i talem se ol man blong Jehova we oli laef bifo long taem blong ol Kristin, ‘oli witnes, mo oli stap raonabaot long yumi we oli plante we plante.’ Olgeta ya oli gohed blong mekem wok blong Jehova kasem en blong laef blong olgeta. Eksampol blong olgeta i soemaot se ol Kristin oli save gohed  blong mekem wok blong Jehova nating se oli kasem trabol. ‘Ol witnes ya we oli plante we plante’ oli olsem ol man blong resis we oli ron gud mo oli finisim resis blong olgeta. Eksampol blong olgeta i givhan long ol narafala blong oli gohed long resis blong olgeta mo blong finisim resis ya. Taswe, ol Hibru Kristin oli mas tingbaot eksampol blong ol man blong Jehova bifo. Samting ya bambae i givhan long olgeta blong oli no fraet mo blong oli tingbaot se oli save ‘resis we tingting blong olgeta i strong,’ mo oli save finisim resis blong olgeta. Yumi tu yumi save mekem olsem.

12. ?Wanem samting long laef blong yumi we i sem mak long laef blong olgeta ya we Pol i tokbaot?

¹² Plante samting long laef blong olgeta ya we Pol i tokbaot, i sem mak long laef blong yumi. Noa i laef long taem ya we Jehova i spolem wol long bigfala wota we i ron. Yumi laef klosap long taem ya we Jehova bambae i spolem wol blong Setan. Jehova i talem long Ebraham mo Sera blong tufala i lego ples blong tufala. Hem i promes se olgeta we oli kamaot biaen long tufala bambae oli kam neson blong hem. Mo tufala i wet long Jehova blong mekem promes ya i kamtru. Jehova i talem long yumi blong yumi no moa laef blong mekem samting we yumi nomo yumi wantem, yumi laef blong mekem samting we hem i wantem. Hem i promes se sipos yumi mekem olsem, bambae hem i fren blong yumi mo i blesem yumi. Moses i wokbaot longwe long draeples blong kasem Promes Lan. Yumi laef long wol ya we i nogud, mo yumi wet long niufala wol we Jehova i promes blong mekem i kamtru. I impoten we yumi tingbaot laef blong olgeta ya. Yumi save folem ol gudfala fasin we oli mekem mo yumi no folem ol nogud fasin blong olgeta.—Rom 15:4; 1 Kor. 10:11.

?Wanem i Givhan Long Olgeta Blong Oli Win?

13. ?From wanem laef blong Noa i no isi? ?Mo wanem i givhan long hem blong mekem olgeta samting we Jehova i talem long hem?

¹³ ?Wanem i givhan long ol man ya blong Jehova blong oli gat strong tingting mo oli finisim resis blong olgeta? Yu traem tingbaot samting we Pol i talem long saed blong Noa. (Ridim Hibrus 11:7.) ‘Bigfala wota we bambae i draonem olgeta samting ya we i laef, blong spolem olgeta,’ i wan samting we Noa i neva luk bifo. (Jen. 6:17) Neva bifo i gat bigfala wota i ron. ?Be olsem wanem? ?Samting ya i mekem Noa i tingting se bigfala wota i no save ron? Nogat. ?From wanem hem i no tingting olsem? From we hem i bilif se oltaem samting we Jehova i talem i mas kamtru. Taswe Noa i no gat tingting ya se i strong tumas blong obei long Jehova. Hem i “mekem olgeta samting ya olsem we God i talem.” (Jen. 6:22) Noa i gat plante samting blong mekem. Hem i mas wokem bigfala sip, hem i mas mekem ol anamol oli kam wanples, hem i mas hivimap ol kakae blong famle blong hem mo blong ol anamol, hem i mas givim woning long ol man se bigfala wota bambae i ron, mo hem i mas givhan long famle blong hem blong oli bilif strong long Jehova. I no isi blong Noa i “mekem olgeta samting ya” we Jehova i talem long hem. Be Noa i bilif long Jehova, taswe hem i gat strong tingting blong mekem ol wok we hem i mas mekem. Nao Jehova i sevem hem mo famle blong hem, mo Jehova i blesem olgeta bigwan.

14. ?Wanem sam samting we i traem bilif blong Ebraham mo Sera? ?Mo yumi lanem wanem long fasin blong tufala?

¹⁴ Pol i tokbaot Ebraham mo Sera long lis blong ‘ol witnes we oli plante we plante.’ Laef blong tufala i jenis bigwan taem Jehova i talem long tufala blong lego haos blong tufala long Uru. Tufala i no save wanem bambae i hapen long tufala. Be tufala i bilif strong long Jehova mo tufala i obei long hem taem ol samting oli traem tufala. Baebol i talem se Ebraham i ‘stamba blong olgeta we oli bilif long God,’ from we hem i lego plante samting we hem nomo i wantem blong mekem samting we Jehova i wantem. (Rom 4:11) Ol Hibru Kristin oli save gud laef blong Ebraham mo famle blong hem. Taswe Pol i talem sam samting nomo we olgeta ya oli mekem. Be ol samting ya oli naf blong soemaot strong bilif blong Ebraham mo famle blong hem. Pol i talem se: ‘Olgeta man ya [hemia Ebraham mo famle blong hem tu] oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk. Nao olgeta oli stap talemaot we oli stap long kantri ya, be i olsem we oli strenja nomo, kantri ya i no prapa ples blong olgeta.’ (Hib. 11:13) Bilif  blong olgeta mo fasin fren blong olgeta wetem God i givhan long olgeta blong gat strong tingting blong finisim resis blong olgeta.

15. ?From wanem Moses i lego gudfala laef blong hem long haos blong king?

¹⁵ Moses i wan narafala man blong Jehova we i stap long lis blong ‘ol witnes we oli plante we plante.’ Olsem Ebraham, Moses i lego ples blong hem. Hem i lego haenem mo ol sas samting blong haos blong king. Hem i “glad moa blong go joen long ol man blong God blong harem nogud wetem olgeta.” ?From wanem hem i mekem desisen olsem? Pol i ansa se: “Oltaem hem i stap luk long pei we God bambae i givim long hem. . . . Hem i no save tanemraon blong gobak, i stap gohed olwe nomo, olsem we i stap luk God ya we man i no save luk long ae blong hem.” (Ridim Hibrus 11:24-27.) Moses i no wantem blong i “stap hapi long fasin blong sin we i blong smoltaem nomo.” Hem i bilif se God i stap mo hem i save se ol promes blong God bambae oli kamtru. Samting ya i givhan long hem blong i no fraet mo blong i gat strong tingting taem ol samting i traem hem. Nao hem i wok had blong lidim neson blong Isrel i aot long Ijip i go long Promes Lan.

16. ?From wanem tingting blong Moses i no foldaon taem God i talem long hem se bambae hem i no save go insaed long Promes Lan?

¹⁶ Olsem Ebraham, Moses i no luk we promes blong God i kamtru. Bifo we ol man Isrel oli go insaed long Promes Lan, God i talem long Moses se: “Bambae yu yu stap longwe nomo, yu lukluk i go long kantri ya we bambae mi mi givim long olgeta, be yu bambae yu no save purumbut long hem.” Hemia from we Moses mo Eron tufala i ‘no bin ona long God long fes blong ol man Isrel taem oli stap long wota ya long Meriba.’ (Dut. 32:51, 52) ?Olsem wanem? ?Tingting blong Moses i foldaon? ?Hem i lego wok blong Jehova from we hem i no save go insaed long Promes Lan? Nogat. Hem i askem long Jehova blong blesem ol man Isrel, ale hem i talem long olgeta se: “!Ol pikinini blong mi! Naoia yufala i save harem gud. I no gat ol narafala man we i olsem yufala. Hae God i sevem yufala finis. Hem i olsem sil blong yufala blong blokem ol ara blong ol enemi blong yufala, mo hem i olsem naef blong  faet blong yufala, blong yufala i save winim olgeta.”—Dut. 33:29.

Ol Samting We Yumi Lanem

17, 18. (a) ?Yumi save lanem wanem long ‘ol witnes we oli plante we plante’? (b) ?Bambae yumi tokbaot wanem long nekis stadi?

¹⁷ Yumi tokbaot sam nomo long ‘ol witnes we oli plante we plante.’ Yumi lanem long eksampol blong olgeta se yumi mas gat strong bilif long God mo long ol promes blong hem, blong yumi finisim resis blong yumi. (Hib. 11:6) Bilif blong yumi i mas gat paoa long ol samting we yumi mekem long laef blong yumi naoia. Yumi save se God i promes blong mekem laef blong yumi i kam moa gud. Yumi save “luk God ya we man i no save luk long ae blong hem.” Taswe, yumi mas mekem tingting blong yumi i strong blong resis.—2 Kor. 5:7.

¹⁸ Resis blong ol Kristin i no isi. Be yumi save finisim resis ya. Long nekis stadi, bambae yumi tokbaot sam moa samting we bambae i givhan long yumi blong finisim resis ya.

?Yu Yu Save Eksplenem?

• ?From wanem Pol i tokbaot ol samting we ol witnes bifo oli mekem blong soemaot bilif blong olgeta?

• ?‘Ol witnes we oli stap raonabaot long yumi, we oli plante we plante,’ oli givhan olsem wanem, blong yumi gat strong tingting blong resis?

• ?Yu yu lanem wanem long ol witnes olsem Noa, Ebraham, Sera, mo Moses?

[Kwestin]

[Tok blong pija long pej 22]

Ebraham mo Sera tufala i rere blong lego gudfala laef long taon ya Uru