?I Gat Wan Man We i Stamba Blong Ol Nogud Fasin?

LONG Ruwanda, i bin gat wan faet we ol man blong wan laen oli traem kilimaot ol man blong wan narafala laen. Long yia 1994, wan komanda blong ol ami blong Yunaeted Neson i luk plante rabis samting i hapen long faet ya. Hem i talem se i olsem we hem i luk Setan stret. Long taem ya, man we i givim oda long hem i talem se hem i no mas stopem faet ya. Wan narafala man we i luk plante rabis samting i hapen long taem ya i talem se: “Sipos wan man i wantem talem yet se i no gat Setan, hem i save kam wetem mi long wan gref long Ruwanda we oli berem plante bodi long hem.” ?Olsem wanem? ?I tru se ol rabis samting olsem, oli wok blong Setan?

Plante man oli no ting se ol raf fasin mo ol fasin we oli rabis olgeta, oli wok blong wan nogud enjel we yumi no save luk hem. Plante man oli ting se ol samting olsem oli hapen from nogud tingting we i stap long ol man, mo oli ting se stamba blong nogud fasin hemia ol samting nogud we yumi nomo yumi wantem. Sam narafala oli ting se i gat ol man long ol defren ples long wol, oli stap wok long wan grup long fasin we i haed. Oli ting se ol man ya oli rij mo oli gat paoa. Nao blong plante handred yia, oli stap pulum narafala blong mekem samting we oli wantem, blong oli rulum wol. Sam narafala oli ting se ol fasin we i no stret mo ol trabol we i mekem man i harem nogud, i fol blong gavman mo ol bigman blong kantri.

?Wanem tingting blong yu? ?From wanem i gat plante nogud fasin long wol, nating se ol man oli traehad blong blokem? ?From wanem man i spolem narafala man, mo man i mekem ol faet we oli rabis olgeta? ?Mo from wanem plante man oli harem nogud? Ol man oli no jenisim fasin blong olgeta be oli gohed blong spolem laef blong olgeta long wol ya. ?From wanem? ?I gat wan man we i stamba blong ol samting ya? ?Hu i rili rulum wol? Maet bambae yu sapraes long ansa blong ol kwestin ya.