Wan Kwestin

?Mi mas mekem wanem taem mi gat wan kwestin long saed blong wan samting we mi ridim long Baebol, mo taem mi nidim advaes long saed blong wan problem?

Ol Proveb 2:1-5 i talem se yumi evriwan i mas “traehad blong faenem” mining blong ol strong samting mo kasem waes, olsem we yumi stap traem faenem “silva, no wan narafala samting olsem, we man i bin berem.” Vas ya i soemaot se yumi mas traehad blong faenem ansa blong ol kwestin blong yumi long saed blong Baebol, mo blong faenem rod blong winim ol problem blong yumi. ?Yumi save mekem samting ya olsem wanem?

Buk ya Benefit From Theocratic Ministry School Education, long pej 33-38, i tokbaot poen ya “How to Do Research” (“?Yu Mekem Olsem Wanem Blong Lukaot Moa Save?”). Hem i eksplenem se yumi save yusum ol tul we ‘slef we i stret mo waes’ i givim. (Mat. 24:45, NW) Pej 36 blong buk ya i tokbaot olsem wanem blong yusum Watch Tower Publications Index. Oli seraotem Index ya long tu haf. Wan haf i gat ol wod mo narafala haf i gat ol vas. Yu save lukaotem stret wod we i laenap wetem save we yu wantem faenem no yu save lukaotem stret vas we yu wantem save moa long hem. Bambae yu luk se i gat wan lis blong ol buk we yu save lukluk long olgeta. Yu mas gat longfala tingting blong faenem stret ansa blong kwestin blong yu no blong faenem save we i stret long problem blong yu. I gud yu tingbaot se i olsem we yu stap traehad blong faenem “silva, no wan narafala samting olsem, we man i berem.” Hemia i tekem taem mo bambae yu mas traehad.

I tru se i gat sam vas mo sam samting we ol buk blong yumi oli no tokbaot olgeta tumas. Mo nating se i gat sam save long saed blong wan vas blong Baebol, maet save ya i no ansa long kwestin we yumi stap tingbaot. Taem yumi ridim sam stori long Baebol, yumi gat sam kwestin from we Baebol i no talem evri samting we i hapen long ol stori ya. Taswe samtaem, yumi no save faenem ansa blong evri kwestin. Sipos i olsem, yumi no mas talemaot tingting blong yumi nomo. I nogud yumi stap askem ol kwestin we oli “blong rao nomo,” nao yumi no moa givimaot save blong God, we i joen wetem bilif blong yumi. (1 Tim. 1:4; 2 Tim. 2:23; Taet. 3:9) Olgeta long branj ofis mo long hedkwota blong ol Witnes, oli no save ansa long olgeta kwestin we yumi no faenem ansa blong olgeta long ol buk blong yumi. Yumi save glad we Baebol i givim inaf save blong lidim yumi long laef. Mo yumi glad we Baebol i no talem evri samting, mekem se yumi mas bilif strong long God ya we i givim Baebol long yumi.—Yu save lukluk buk ya Draw Close to Jehovah, pej 185 kasem pej 187.

?Olsem wanem sipos yu traehad blong lukaot save long saed blong wan problem, be yu no faenem save we i givhan long yu blong winim problem ya? Yu save harem gud blong askem help long wan Kristin brata no sista we i strong long trutok, maet long wan elda long kongregesen blong yu. Oli save gud Baebol mo oli stap long trutok longtaem finis. Oli save givim help we i stret long yu, speseli sipos yu nidim advaes long saed blong wan problem no wan desisen. Oli save gud yu, oli klosap long yu, mo oli save laef blong yu. Yu no mas foget blong prea long Jehova. Yu mas talemaot problem blong yu long hem mo yu mas askem hem blong yusum tabu spirit blong hem blong lidim tingting blong yu. Yes, Jehova ‘i save mekem man i waes mo i haremsave samting.’—Prov. 2:6; Luk 11:13.