Yu Trastem Jehova, “God We i Stamba Blong Fasin Blong Givhan”

“I gud yumi stap talem tangkiu long God ya we i God mo Papa blong Jisas Kraes, Masta blong yumi. Hem i Papa blong yumi we i gat sore, hem i God we i stamba blong fasin blong givhan.”—2 KOR. 1:3.

1. ?Wanem samting we yumi evriwan i nidim?

STAT long taem we yumi bon, yumi nidim man blong givhan long yumi blong mekem yumi harem gud. Taem wan bebi i krae, hem i wantem we yumi givhan long hem. Maet hem i wantem se yumi karem hem no maet hem i wantem kakae. Taem yumi kam bigman tu, yumi nidim narafala blong givhan long yumi blong mekem yumi harem gud, speseli taem yumi kasem trabol.

2. ?Jehova i mekem wanem promes long olgeta we oli trastem hem?

² Samtaem ol famle mo ol fren oli save givhan long yumi blong harem gud. Be i gat sam trabol we oli mekem yumi harem nogud tumas, mo ol famle mo ol fren oli no naf blong givhan long yumi. Jehova nomo i save givhan long yumi blong harem gud bakegen. Baebol i promes se: “Oltaem hem i stap klosap long olgeta we oli stap krae i go long hem, . . . [mo] hem i stap harem krae blong olgeta.” (Sam 145:18, 19) Baebol i talem tu se Jehova i “stap lukluk long ol stret man, i stap lesin blong harem krae blong olgeta.” (Sam 34:15) Sipos yumi wantem se God i givhan long yumi blong mekem yumi harem gud, yumi mas trastem hem. Deved i talem se: “Hae God. Yu yu sefples blong olgeta ya we ol man oli stap spolem olgeta. Yu yu ples blong haed blong olgeta long taem blong trabol. Olgeta we oli save yu, oli trastem yu. Olgeta we oli kam long yu, yu no save lego wan long olgeta.”—Sam 9:9, 10.

3. ?Jisas i talem wanem blong soemaot se Jehova i lavem yumi tumas?

³ Jehova i tinghae long ol man blong hem. Jisas i talem se: “Ol smosmol pijin ya we man i stap salem olgeta, wan handred twanti vatu long faef, be i no gat wan long olgeta we God i fogetem samtaem. Yufala i luk. Ol hea blong hed blong yufala, be hem i kaontem evriwan. Yufala i no fraet. Long fes blong hem, yufala i gud moa, i winim plante smosmol pijin ya.” (Luk 12:6, 7) Jehova i talem long ol man Isrel se: “Mi mi lavem yufala tumas, mo oltaem, mi stap soemaot fasin ya long yufala.”—Jer. 31:3.

4. ?From wanem yumi save trastem ol promes blong Jehova?

⁴ Nating se yumi gat trabol, yumi save harem gud sipos yumi trastem Jehova mo ol promes blong hem. Yumi mas trastem God sem mak olsem we Josua i mekem. Josua i talem se: “Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” (Jos. 23:14) Yumi save gat strong tingting se, nating we yumi harem nogud naoia from sam trabol, “God i stap holem promes blong hem,” mo hem i no save lego ol gudfala man blong hem.—Ridim 1 Korin 10:13.

5. ?From wanem yumi save givhan long narafala blong i harem gud?

⁵ Aposol Pol i singaot Jehova se “God we i stamba blong fasin blong givhan.” Long lanwis Grik, tok ya we oli tanem i kam “givhan,” i save min se man i mekem tingting blong narafala we i trabol i kam kwaet, no i leftemap tingting blong narafala blong hem i harem gud bakegen. !I tru se Jehova i mekem olsem! (Ridim 2 Korin 1:3, 4.) Papa blong yumi long heven i save mekem eni samting we hem i mas mekem blong givhan long ol man we oli lavem hem. I no gat wan man no wan samting we i save blokem hem. From we God i givhan long yumi blong harem gud, yumi save givhan long ol brata blong yumi long “olgeta trabol” blong olgeta. !I no gat narafala man i save givhan long yumi blong harem gud olsem we Jehova i mekem!

 Ol Samting We Oli Mekem Yumi Harem Nogud

6. ?Wanem sam samting we i mekem yumi harem nogud?

⁶ Plante samting we oli hapen long laef, oli mekem se yumi nidim narafala blong givhan long yumi blong harem gud. Wan long ol samting ya we i mekem yumi harem nogud, hemia taem wan man we yumi laekem hem tumas i ded, maet man blong yumi, woman blong yumi, no pikinini blong yumi. Samfala oli harem nogud from we narafala i no laekem olgeta, mo i mekem i no stret long olgeta. Mo samfala oli harem nogud from we oli sik, oli olfala, oli pua, no from sam nogud samting we i stap hapen long wol ya.

7. (a) ?Long taem blong trabol, yumi nidim wanem? (b) ?Jehova i save mekem wanem taem yumi “harem nogud” long hat blong yumi?

⁷ Long taem blong trabol, yumi save harem nogud long plante rod. Yumi nidim narafala blong givhan long yumi from we yumi save harem nogud long hat blong yumi, long tingting blong yumi, long ol filing blong yumi, long helt blong yumi, mo tu maet bilif blong yumi i no moa strong. Yu traem tingbaot hat blong yu. Tok blong God i talem se yumi save “harem nogud” long hat blong yumi. (Sam 51:17, NW) !Jehova i save givhan long yumi long taem olsem! “Hem i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Sam 147:3) Nating se yumi kasem bigfala trabol, God i save givhan long yumi mo mekem yumi harem gud long hat blong yumi, sipos yumi prea long hem, yumi bilif long hem, mo yumi obei long ol loa blong hem.—Ridim 1 Jon 3:19-22; 5:14, 15.

8. ?Jehova i mekem wanem blong givhan long yumi taem yumi harem nogud long tingting blong yumi?

⁸ Ol defren samting oli traem yumi, taswe samtaem yumi save harem nogud long tingting blong yumi. Long taem olsem, yumi nidim narafala blong givhan long yumi. Man we i raetem Ol Sam 94:19 i talem se: “Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.” Mo Pol i talem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Fil. 4:6, 7) Taem yumi harem nogud long tingting blong yumi, yumi mas ridim Baebol mo tingting dip long ol tok blong hem. Hemia bambae i givhan long yumi bigwan blong harem gud bakegen.—2 Tim. 3:15-17.

9. ?Wanem i save givhan long yumi taem yumi harem nogud long ol filing blong yumi?

⁹ Samtaem tingting blong yumi i save foldaon bigwan, nao yumi harem nogud long ol filing blong yumi. Maet yumi ting se yumi no save mekem sam samting we Jehova i wantem yumi blong mekem. No maet yumi ting se yumi no naf blong mekem wan wok long kongregesen. Long taem ya tu, Jehova i save givhan long yumi, mo i save mekem yumi harem gud bakegen. Yu traem tingbaot samting ya: Taem Jehova i talem long Josua blong lidim ol man Isrel oli go faet agensem ol neson we oli gat bigfala paoa, Moses i talem long olgeta se: “Tingting blong yufala i mas strong, mo yufala i mas stanap strong oltaem. Bambae yufala i no mas fraet long olgeta. Hem i God blong yumi, mo hem i no save gowe long yufala samtaem. Bambae hem i no save lego yufala, oltaem bambae hem i stap wetem yufala.” (Dut. 31:6) Jehova i givhan long Josua, nao Josua i save lidim ol man blong God oli go insaed long Promes Lan mo oli winim ol enemi blong olgeta. Jehova i bin givhan long Moses tu olsem, taem Moses i lidim ol man Isrel oli gokros long Red Si.—Eks. 14:13, 14, 29-31.

10. ?Wanem i save givhan long yumi taem ol trabol oli mekem yumi gat problem long helt?

¹⁰ Ol trabol oli save mekem yumi gat problem long helt blong yumi. Be yumi save harem gud moa taem yumi kakae ol gudfala kakae, yumi spel gud, yumi mekem eksasaes, mo yumi meksua se haos blong yumi mo bodi blong yumi i stap klin. Mo sipos yumi tingbaot ol promes blong Baebol long saed blong fiuja, hemia bambae i givhan tu long helt blong yumi. Taem yumi stap harem nogud from wan trabol no wan samting we i stap traem yumi, i gud yumi tingbaot se Pol tu i harem nogud. Mo yumi save tingbaot ol tok blong hem we i leftemap tingting blong yumi, se: “Plante taem, mifala i gat trabol, be neva tingting blong mifala i foldaon. Sam taem, mifala i no save rod, be neva mifala i lus olgeta. Nating we ol man oli stap ronem mifala, be  oltaem mifala i gat ol fren we oli stap givhan long mifala. Ol man oli stap kilim mifala, be neva mifala i ded olgeta.”—2 Kor. 4:8, 9.

11. ?Yumi save mekem wanem sipos yumi harem olsem se bilif blong yumi i stap kam slak?

¹¹ Sam samting we i traem yumi, i save mekem bilif blong yumi i no moa strong. Jehova i save givhan long yumi long saed ya tu. Baebol i promes se: “Hem i stap givhan long olgeta we oli stap long trabol, mo i stap leftemap olgeta we oli foldaon.” (Sam 145:14) Sipos yumi harem olsem se bilif blong yumi i stap kam slak, yumi mas askem ol elda blong oli givhan long yumi. (Jem. 5:14, 15) Mo sipos oltaem yumi tingbaot promes blong laef we i no save finis, samting ya i save givim paoa long yumi blong stanap strong taem ol samting oli traem bilif blong yumi.—Jon 17:3.

Samfala We God i Givhan Long Olgeta

12. ?Jehova i mekem wanem blong givhan long Ebraham blong i harem gud long tingting blong hem?

¹² Man we i raetem Ol Sam 119 i talem long Jehova se: “Mi mi man blong wok blong yu. Plis yu tingbaot ol tok blong yu we yu talem long mi, from we hem i mekem tingting blong mi i strong. Nating we mi mi harem nogud, be yu yu mekem mi mi harem gud bakegen, from we promes blong yu i mekem mi mi laef.” (Sam 119:49, 50) Tede, yumi gat ol tok blong Jehova we oli stap long Baebol. Baebol i tokbaot stori blong plante man we God i givhan long olgeta. Yu traem tingbaot Ebraham. Hem i tingting tumas taem hem i harem nius se Jehova bambae i spolem Sodom mo Gomora. Hem i askem long God se: “?Bambae yu kilim ol man nogud wetem ol stret man tu?” Jehova i givhan long Ebraham blong i harem gud long tingting blong hem. Jehova i promes se sipos i gat 50 man we fasin blong olgeta i stret oli stap long Sodom, bambae hem i no save spolem taon ya. Be Ebraham i askem faef taem bakegen long Jehova se: ?Olsem wanem sipos i gat 45 man we oli stret? ?40 man? ?30 man? ?20 man? ?10 man? Jehova i gat longfala tingting mo i kaen long Ebraham. Hem i promes long Ebraham se sipos i gat 10 man we oli stret oli stap long Sodom, bambae hem i no save spolem taon ya. Nating se i no gat 10 man we oli stret, Jehova i sevem Lot mo tufala gel blong hem.—Jen. 18:22-32; 19:15, 16, 26.

13. ?Hana i mekem wanem we i soemaot se hem i trastem Jehova?

¹³ Hana we i woman blong Elkana, i wantem tumas blong gat pikinini. Be hem i no save karem pikinini, mo hem i harem nogud tumas from. Hem i prea long Jehova long saed ya, mo Hae Pris Ilae i talem long hem se: “Prea blong mi, we God ya blong yumi bambae i givim samting ya long yu we yu yu askem.” Ol tok ya i mekem Hana i “harem gud.” (1 Saml. 1:8, 17, 18) Hana i trastem Jehova, mo hem i putum trabol ya i stap long han blong Jehova. Nating se Hana i no save wanem bambae i hapen, be tingting blong hem i stap kwaet. Biaen, Jehova i ansa long prea blong Hana. Hem i gat bel, nao i bonem wan smol boe, mo i putum nem blong hem se Samuel.—1 Saml. 1:20.

14. ?From wanem Deved i harem nogud? ?Hem i askem hu blong i givhan long hem blong i harem gud?

 ¹⁴ King Deved blong Isrel bifo, hem i wan narafala man we God i givhan long hem blong i harem gud. Jehova i “stap lukluk long tingting” blong man. Taswe taem hem i jusum Deved blong i kam king blong Isrel, hem i save se Deved i wantem mekem samting we i stret mo i laekem tru wosip. (1 Saml. 16:7; 2 Saml. 5:10) Be biaen, Deved i mekem nogud fasin wetem Batseba mo i traem haedem sin blong hem long ol narafala. Taem hem i kasem save se sin blong hem i nogud tumas, hem i prea long Jehova i talem se: “Fasin blong yu blong gat sore long man i bigwan tumas, plis yu ravemaot ol sin blong mi. Yu wasemaot ol fasin nogud ya long laef blong mi, yu tekemaot ol sin blong mi, yu mekem mi mi klin. Mi mi luksave ol rabis fasin blong mi, oltaem mi mi savegud ol sin blong mi.” (Sam 51:1-3) Deved i tanem tingting blong hem fulwan from sin blong hem, mo Jehova i fogivim hem. Nating se i olsem, Deved i kasem ol trabol blong sin blong hem. (2 Saml. 12:9-12) Be fasin sore we Jehova i soemaot long Deved i givhan long hem blong i harem gud.

15. ?Smoltaem bifo we Jisas i ded, Jehova i givhan long Jisas olsem wanem?

¹⁵ Taem Jisas i stap long wol, plante samting oli traem bilif blong hem. God i letem ol samting ya oli traem hem. Be oltaem Jisas i stap tru long God. Hem i wan man we i stret gud olgeta mo oltaem hem i trastem Jehova mo i obei long Jehova olsem Man we i rulum hem. Smol taem bifo we Judas i salem Jisas mo ol man oli kilim Jisas i ded, hem i prea long Jehova se: “Yu no mekem olsem we mi mi wantem, yu mekem olsem we yu nomo yu wantem.” Nao wan enjel i kamtru long Jisas mo i mekem hem i strong bakegen. (Luk 22:42, 43) God i givhan long Jisas blong i harem gud, i givim paoa mo help we hem i nidim long taem ya.

16. Taem laef blong yumi i stap long denja, ?Jehova i mekem wanem blong givhan long yumi blong yumi harem gud?

¹⁶ Jehova i save givhan long yumi blong yumi stap tru long hem. Mo bambae hem i mekem olsem, nating se yumi save ded from bilif blong yumi. Promes blong laef bakegen long ded, i wan narafala samting we i save mekem yumi harem gud. !Yes, yumi stap wet long taem ya we “God bambae i winim” las enemi ya, hemia ded! (1 Kor. 15:26) Ol man blong Jehova we oli ded, mo ol narafala we oli ded, oli stap long memori blong Jehova. Bambae hem i mekem olgeta oli laef bakegen. (Jon 5:28, 29; Wok 24:15) Bilif blong yumi long promes ya blong laef bakegen i mekem yumi harem gud, mo i mekem tingting blong yumi i strong taem man i agensem yumi.

17. Taem wan man we yumi lavem hem i ded, ?wanem i save givhan long yumi blong yumi harem gud bakegen?

¹⁷ Yumi harem gud tumas blong save se olgeta we oli ded, we yumi lavem olgeta tumas, bambae oli laef bakegen long niufala wol we i nambawan. Bambae i no moa gat wan samting we i save mekem yumi harem nogud. Bambae “bigfala hip blong ol man” blong Jehova oli gotru long en blong olfala wol ya. Long niufala wol, bambae ol man ya oli gat nambawan blesing blong talem halo long olgeta we oli laef bakegen, mo blong tijim olgeta.—Rev. 7:9, 10.

Hem i Holemgud Yumi, We Han Blong Hem i No Save Kam Slak

18, 19. ?Taem ol man blong Jehova oli kasem fasin agens, Jehova i givhan long olgeta olsem wanem?

¹⁸ Profet Moses i raetem wan singsing i go long ol man Isrel, we i mekem tingting blong olgeta i strong mo i mekem olgeta oli harem gud. Hem i talem se: “I stat bifo olgeta, [God] i stap lukaot gud long yumi. Oltaem hem i stap blokem yumi, blong ol enemi blong yumi oli no kam spolem yumi, mo i stap holemgud yumi, we han blong hem bambae i no save kam slak samtaem.” (Dut. 33:27) Biaen profet Samuel i talem long ol man Isrel se: “Yufala i no mas gowe long Hae God. Yufala i mas biaen long hem long olgeta tingting blong yufala. . . . Hem bambae i no save lego yufala. Hem i talem finis se yufala i man blong hem.” (1 Saml. 12:20-22) Sipos yumi gohed blong mekem wok blong Jehova we yumi stap tru  long hem, bambae hem i neva lego yumi. Oltaem bambae hem i givhan long yumi.

¹⁹ Long ol lasdei ya we laef i strong tumas, God i stap givhan long ol man blong hem mo i mekem olgeta oli harem gud. Long ol yia we oli pas, ol man oli agensem ol brata sista blong yumi long ol defren ples long wol, from we oli mekem wok blong Jehova. Mo oli sakem olgeta long kalabus. Stori blong olgeta ya i soemaot se Jehova i stap givhan long ol man blong hem, taem oli kasem trabol. Wan brata long Soviet Yunion i mas stap long kalabus blong 23 yia, from we hem i obei long Jehova. Be nating se hem i stap long kalabus, hem i kasem ol buk long saed blong Baebol we oli mekem bilif blong hem i strong, mo oli mekem hem i harem gud. Hem i talem se: “Long ol yia ya, mi lanem blong trastem Jehova mo hem i givim paoa long mi blong mi stanap strong.”—Ridim 1 Pita 5:6, 7.

20. ?From wanem yumi save se Jehova bambae i no save lego yumi?

²⁰ Nomata wanem trabol i kasem yumi, i gud yumi tingbaot ol tok we i save givhan long yumi, hemia se: “Hae God bambae i no save lego yumi ya we yumi ol man blong hem.” (Sam 94:14) Yumi evriwan i nidim narafala blong givhan long yumi blong yumi harem gud. Be yumi tu yumi save givhan long narafala blong i harem gud. Long nekis stadi, bambae yumi lanem wanem we yumi save mekem blong givhan long olgeta we oli stap harem nogud long wol ya we i gat plante trabol long hem.

?Bambae Yu Yu Ansa Olsem Wanem?

• ?Wanem sam samting we oli mekem yumi harem nogud?

• ?Jehova i mekem wanem blong givhan long ol man blong hem, blong oli harem gud?

• ?Sipos laef blong yumi i stap long denja, wanem i save givhan long yumi blong yumi harem gud?

[Kwestin]

[Bokis/Tok blong pija long pej 23]

SAMTING WE YU SAVE MEKEM TAEM YU HAREM NOGUD LONG . . .

▪ hat Sam 147:3; 1 Jon 3:19-22; 5:14, 15

▪ tingting Sam 94:19; Fil. 4:6, 7

▪ filing Eks. 14:13, 14; Dut. 31:6

▪ helt 2 Kor. 4:8, 9

▪ bilif blong yu Sam 145:14; Jem. 5:14, 15