Yufala i Trenem Ol Brata Blong Oli Mekem Wok
Yufala i Trenem Ol Brata Blong Oli Mekem Wok
‘Sipos man we i stap lan, hem i tren gogo i finisim trening blong hem, bambae hem i kam sem mak wetem tija blong hem.’—LUK 6:40.
1. ?Taem Jisas i stap long wol, hem i mekem wanem blong stanemap wan bigfala kongregesen?
LONG en blong buk we aposol Jon i raetem blong tokbaot laef blong Jisas, hem i talem se: “Nao i gat plante narafala samting we Jisas i mekem. Mo sipos ol man oli raetemdaon ol samting ya evriwan long ol buk, mi mi ting se bambae i no gat i naf rum long wol ya blong holem ol buk ya.” (Jon 21:25) Long smoltaem ya we Jisas i stap long wol, hem i wok had long wok blong prij. Hem i traem faenem ol man we hem i save trenem olgeta, blong oli gohed long wok ya taem hem i gobak long heven. Long yia 33, Jisas i trenem wan smol grup nomo. Be kwiktaem afta, smol grup ya i kam wan bigfala kongregesen blong plante taosen man we oli mekem wok blong prij.—Wok 2:41, 42; 4:4; 6:7.
2, 3. (a) ?From wanem i nidim moa brata blong mekem wok long ol kongregesen? (b) ?Bambae yumi tokbaot wanem long stadi ya?
2 Tede, i gat moa long seven milian man, long bitim 100,000 kongregesen long wol, oli stap talemaot gud nius. I nidim moa brata blong lukaot long ol kongregesen ya. Yes, i nidim plante moa elda. I gud tumas we ol brata oli wantem mekem wok long kongregesen, from we hemia “wan gudfala wok.”—1 Tim. 3:1.
3 Bifo we wan brata i kasem wok long kongregesen, fastaem hem i mas mekem sam samting. Nating se hem i skul gud, i gat save long laef, mo i gat gudhan long sam samting, hemia i no mekem se hem i stret blong mekem wok ya. Laef blong hem i mas laenap wetem ol samting we Baebol i talem, se ol brata oli mas mekem blong kasem wok long kongregesen. ?Yumi save mekem wanem blong givhan long ol brata blong oli gohed long trutok, mo blong oli naf blong mekem wok long kongregesen? Jisas i talem se: ‘Sipos man we i stap lan, hem i tren gogo i finisim trening blong hem, bambae hem i kam sem mak wetem tija blong hem.’ (Luk 6:40) Long stadi ya, bambae yumi tokbaot sam samting we Jisas i mekem blong trenem ol disaepol blong hem. Mo bambae yumi luk wanem we yumi save lanem long trening ya.
“Mi Mi Stap Singaot Yufala, Se Ol Fren Blong Mi”
4. ?Jisas i mekem wanem blong i fren gud wetem ol disaepol blong hem?
4 Jisas i no ting se hem i moa gud long ol disaepol blong hem. Olgeta oli ol fren blong hem. Hem i wantem kampani wetem olgeta, mo i trastem olgeta. Hem i talem long olgeta se: “Olgeta samting ya we mi mi harem long Papa blong mi, mi talemaot finis long yufala.” (Ridim Jon 15:15.) Ating ol disaepol oli glad tumas taem Jisas i ansa long kwestin we oli askem se: “?Wanem saen we bambae i soemaot we yu bambae yu kambak bakegen, mo wol ya i finis?” (Mat. 24:3, 4) Jisas i wantem se ol man blong hem oli save tingting blong hem, mo oli save se hem i harem olsem wanem. Yu traem tingbaot naet ya we ol man oli kam holem Jisas. Jisas i tekem Pita, Jemes, mo Jon, oli go long garen blong Getsemane. Hemia wan taem we Jisas i harem nogud mo hem i mas prea long Papa blong hem. Maet trifala aposol ya i no harem ol tok we Jisas i talem long prea blong hem. Be trifala i save se hem i harem nogud tumas long taem ya. (Mak 14:33-38) Long wan narafala taem, Jisas i mekem tingting blong trifala aposol ya i strong. “Stret long fes blong trifala, bodi blong Jisas i jenis, i kam narafala.” (Mak 9:2-8; 2 Pita 1:16-18) Gudfala fasin fren we Jisas i gat wetem ol disaepol blong hem, i mekem tingting blong olgeta i strong blong oli gohed long impoten wok we oli mas mekem.
5. ?Ol elda oli mekem wanem blong givhan long ol narafala?
5 Olsem Jisas, ol elda tede oli givhan long ol brata mo sista. Mo oli fren gud wetem olgeta. Ol elda oli lavem ol brata sista, mo oli soemaot long olgeta se oli wantem save olgeta. Samtaem i gat sam samting we ol elda oli no save tokbaot long ol narafala. Be oli tokbaot ol samting we oli lanem long Tok blong God. Ol elda oli trastem ol brata. Oli no ting se oli moa impoten long ol man blong givhan we oli yang moa long olgeta. Ol elda oli kasem save se ol man blong givhan we oli yangfala, oli mekem gudfala wok finis long trutok mo oli stap gohed yet. Ol elda oli save se ol yangfala brata ya oli lavem Jehova mo oli stap wok wetem olgeta blong lukaot long kongregesen.
“Mi Mi Putum Wan Eksampol Blong Yufala”
6, 7. ?Jisas i soemaot wanem gudfala eksampol long ol disaepol blong hem? ?Eksampol blong hem i givhan long olgeta olsem wanem?
6 Ol disaepol blong Jisas oli lavem Tok blong God, be samtaem oli no gat stret tingting. Samtaem oli folem tingting we oli lanem taem oli gruap mo ol kastom blong ples blong olgeta. (Mat. 19:9, 10; Luk 9:46-48; Jon 4:27) Be Jisas i neva tok nogud long olgeta mo i no kros long olgeta. Hem i no askem long olgeta blong mekem samting we i strong tumas long olgeta. Mo hem i neva askem olgeta blong oli mekem samting we hem bambae i no mekem. Gudfala eksampol blong Jisas i tijim ol disaepol long ol samting we oli mas mekem.—Ridim Jon 13:15.
7 ?Jisas i soemaot wanem eksampol long ol disaepol? (1 Pita 2:21) Laef blong Jisas i no fasfas, mekem se hem i save yusum taem blong hem blong givhan long ol narafala. (Luk 9:58) Jisas i tijim ol narafala long ol samting we hem i lanem long Jehova. Hem i no tijim olgeta long samting we i kamaot long tingting blong hem nomo. (Jon 5:19; 17:14, 17) Hem i kaen, mo ol man oli no fraet blong kam toktok long hem. Ol samting we hem i mekem oli soemaot we hem i lavem ol narafala. (Mat. 19:13-15; Jon 15:12) Gudfala eksampol blong Jisas i givhan long ol aposol blong hem. Jemes i lanem blong i no fraet mo i mekem wok blong God gogo ol man oli kilim hem i ded. (Wok 12:1, 2) Mo Jon i mekem wok blong God bitim 60 yia.—Rev. 1:1, 2, 9.
8. ?Ol elda oli save mekem wanem blong soemaot gudfala eksampol, long ol brata we oli yangfala moa, mo long ol narafala long kongregesen?
8 Ol elda oli save soemaot gudfala eksampol long ol man we oli yangfala moa long olgeta. Ol elda oli mas mekem tingting blong olgeta i stap daon, oli mas lavem narafala, mo oli mas yusum taem mo paoa blong olgeta blong givhan long narafala. (1 Pita 5:2, 3) Mo ol elda oli glad we ol brata oli save folem gudfala fasin blong olgeta, blong bilif strong long God, blong tijim narafala, blong prij, mo blong soemaot ol Kristin fasin long laef blong olgeta.—Hib. 13:7.
‘Taem Jisas i Sanemaot Olgeta, Hem i Toktok Long Olgeta Fastaem’
9. ?Yumi save olsem wanem se Jisas i trenem ol disaepol blong hem long wok blong prij?
9 Afta we Jisas i prij tu yia finis, hem i sanemaot ol 12 aposol blong hem tu oli go prij. Be fastaem hem i talem long olgeta wanem we oli mas mekem. (Mat. 10:5-14) Long wan narafala taem, bifo we Jisas i mekem merikel blong seremaot smol kakae long plante taosen man, Jisas i talem wanem we ol disaepol oli mas mekem. Hem i talem se oli mas mekem ol man oli sidaon long ol grup, blong evriwan i save kakae. (Luk 9:12-17) Jisas i trenem ol disaepol blong hem. Hem i talem klia long olgeta wanem we oli mas mekem, mo olsem wanem blong mekem samting ya. From we Jisas i trenem gud ol aposol mo tabu spirit i givhan long olgeta, oli save lukaot long wok blong prij we i stat blong kam bigwan long yia 33.
10, 11. ?Ol elda mo ol narafala oli save mekem wanem blong trenem ol man blong oli mekem wok long kongregesen?
10 Yumi stat blong tijim wan man, taem yumi stadi Baebol wetem hem. Samtaem yumi mas givhan long hem blong i lanem blong rid. Taem yumi gohed blong stadi wetem hem, yumi givhan long hem long sam narafala rod tu. Taem hem i stat blong kam long ol miting, bambae hem i lanem se hem i mas joen long Tiokratik Skul mo hem i mas kam wan pablisa we i no baptaes yet. Afta we hem i baptaes, ol brata bambae oli trenem hem. Oli save trenem hem blong lukaot long Haos Kingdom. Mo ol elda oli save givhan long hem blong save wanem we hem i mas mekem blong i kam man blong givhan.
11 Taem ol elda oli givim wok long wan brata we i baptaes, oli wantem se hem i mekem gud wok ya. Oli eksplenem gud long hem olsem wanem ol brata long ol kongregesen oli mekem wok ya, mo oli soem long hem wanem we hem i mas mekem. Sipos wok ya i had blong hem i mekem, ol elda oli no mas kwik blong mekem desisen se hem i no save mekem wok ya. Be oli mas toktok long hem long kaen fasin mo oli eksplenem bakegen wanem we hem i mas mekem, mo olsem wanem blong mekem wok ya. Ol elda oli harem gud blong givhan long wan brata blong i mekem gud wok blong hem, from we oli save se wok ya blong givhan long ol narafala long kongregesen bambae i givim glad long hem.—Wok 20:35.
‘Man We i Waes i Lesin Long Ol Advaes Blong Narafala’
12. ?From wanem advaes blong Jisas i givhan long ol disaepol blong hem?
12 Wan narafala samting we Jisas i mekem blong trenem ol disaepol blong hem, hemia se hem i givim advaes we oli nidim long stret taem. Yu traem tingbaot taem Jemes mo Jon tufala i wantem singaot faea i aot long heven, i kamdaon, i kakae sam man Sameria. Jisas i talem long tufala se i no stret we tufala i wantem mekem olsem. (Luk 9:52-55) Long wan narafala taem, mama blong Jemes mo Jon i askem long Jisas blong givim hae nem long Kingdom long tufala pikinini blong hem. Be Jisas i save se hemia samting we Jemes mo Jon i wantem. Taswe hem i talem long tufala se: “Man we bambae i sidaon long raet saed blong mi mo man we bambae i sidaon long lef saed blong mi, mi mi no gat raet blong jusumaot tufala. Ples ya, Papa blong mi i makemaot tu man blong hem longtaem finis.” (Mat. 20:20-23) Oltaem Jisas i givim advaes we i klia. Hem i wantem givhan long ol man blong oli save wanem blong mekem long ol defren samting we i hapen long laef. Oltaem advaes we hem i talem i kamaot long Tok blong God. Hem i wantem se tingting blong ol disaepol blong hem mo ol samting we oli mekem i stret folem Tok blong God. (Mat. 17:24-27) Jisas i save se ol disaepol blong hem oli no stret gud, mo hem i save se i gat sam samting we oli no naf blong mekem. Hem i givim advaes long olgeta from we hem lavem olgeta tumas.—Jon 13:1.
13, 14. (a) ?Hu i nidim advaes? (b) ?Wanem sam samting we i mekem se ol elda oli mas givim advaes long wan brata?
13 Olgeta brata we oli wantem mekem wok long kongregesen, samtaem bambae oli nidim advaes. Ol Proveb 12:15 i talem se: “Man we i waes i stap lesin long ol advaes blong ol narafala man.” Wan yang brata i talem se hem i bin harem se hem i no naf blong mekem wok long kongregesen. Hem i talem se wan elda i givhan long hem blong kasem save se hem i no mas stret gud olgeta, blong i mekem wok long kongregesen.
14 Sipos ol elda oli luk se fasin blong wan brata i stap blokem hem blong gohed long trutok, bambae oli traem givhan long hem kwiktaem. Oli mekem olsem “long kwaet fasin.” Oli wantem se hem i save mekem wok long kongregesen blong givhan long ol narafala. (Gal. 6:1) Samtaem, ol elda oli mas givim advaes long wan brata, blong i stretem tingting blong hem. Maet ol elda oli luk se wan brata i no traehad olsem we hem i naf blong mekem. Oli save pulum hem blong tingbaot eksampol blong Jisas. Jisas i wok had long wok blong prij, mo i talem long ol disaepol blong hem blong oli mekem sem mak. (Mat. 28:19, 20; Luk 8:1) Maet wan brata i wantem kam hae moa long ol narafala. Ol elda oli save eksplenem long hem se Jisas i tijim ol disaepol blong hem blong oli stap daon long ol narafala. (Luk 22:24-27) Maet i had long wan brata blong i fogivim ol narafala. Ol elda oli save pulum hem blong tingbaot parabol ya blong slef we i no fogivim ol narafala, nating se ol narafala oli fogivim hem from bigfala kaon blong hem. (Mat. 18:21-35) Taem ol elda oli mas givim advaes, oli mas mekem kwiktaem.—Ridim Ol Proveb 27:9.
“Yu Mas Traehad Oltaem”
15. ?Famle blong brata i save mekem wanem blong givhan long hem blong i mekem wok long kongregesen?
15 Ol elda oli traehad blong trenem ol brata blong oli mekem wok long kongregesen. Ol narafala tu oli save givhan. Famle blong brata i save givhan long hem. Sipos wan brata i elda finis, woman blong hem mo ol pikinini blong hem oli save givhan long hem blong i mekem gud wok blong hem long kongregesen. Oli kasem save se hem i mas yusum taem mo paoa blong hem blong givhan long ol narafala. Hem i glad taem famle blong hem i rere blong lego sam samting we olgeta oli wantem, blong hem i save mekem gud wok blong hem. Yumi talem tangkiu tumas long ol famle ya we oli mekem olsem.—Prov. 15:20; 31:10, 23.
16. (a) ?Hu i mas soemaot se hem i wantem mekem wok long kongregesen? (b) ?Brata i mas mekem wanem sipos hem i wantem kam man blong givhan no elda?
16 Nating se ol narafala oli givhan long wan brata, be hem i mas soemaot se hem i wantem mekem wok long kongregesen. (Ridim Galesia 6:5.) I tru se brata i no nid blong kam man blong givhan no elda, blong i givhan long ol narafala mo blong i traehad long wok blong prij. Be sipos brata i wantem kam man blong givhan no elda, hem i mas traehad blong gat ol fasin we Baebol i talem, blong hem i naf blong mekem wok ya. (1 Tim. 3:1-13; Taet. 1:5-9; 1 Pita 5:1-3) Taswe sipos brata i wantem mekem wok blong man blong givhan no elda, be hem i no kasem wok ya yet, hem i mas tingbaot sam samting we hem i save mekem blong hem i naf blong mekem wok ya. ?Wanem i save givhan long hem? Oltaem hem i mas ridim mo stadi Baebol. Hem i mas tingting dip mo prea. Mo hem i mas traehad long wok blong prij. Sipos hem i mekem ol samting ya, hem i stap folem advaes we Pol i givim long Timoti, se: “Yu mas traehad oltaem blong mekem ol fasin we God i wantem.”—1 Tim. 4:7.
17, 18. ?Sipos wan brata i harem se hem i no naf mo i no wantem mekem wok long kongregesen, hem i save mekem wanem?
17 ?Olsem wanem sipos wan brata i harem se hem i no naf blong kam man blong givhan no elda? I gud we hem i tingbaot se Jehova mo Jisas tufala i givhan long yumi bigwan. Jehova i promes se “evri dei, hem i stap karem ol hevi samting blong yumi.” (Sam 68:19) Taswe Jehova i save givhan long wan brata, blong i mekem wok long kongregesen. Sipos wan brata i no man blong givhan no elda, i gud we hem i tingbaot se i nidim moa brata blong lukaot long ol kongregesen. Mo i gud hem i prea long Jehova blong i givim tabu spirit long hem. Tabu spirit bambae i givhan long hem blong i gat pis mo i bos long tingting blong hem. Mo tabu spirit i save givhan long hem blong i no moa harem olsem se hem i no naf. (Luk 11:13; Gal. 5:22, 23) Yumi save gat strong tingting se bambae Jehova i blesem ol brata we oli lego samting we olgeta nomo oli wantem, blong oli givhan long ol narafala.
18 Maet wan brata i no wantem mekem wok long kongregesen. ?Wanem i save givhan long hem? Aposol Pol i talem se: “Oltaem God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem.” (Fil. 2:13) Yes, God i save givhan long wan brata, blong i wantem mekem wok long kongregesen mo blong i mekem wanem we God i wantem. God i save givim paoa long hem blong mekem ol wok ya. (Fil. 4:13, NW) Ol Kristin oli save prea long God blong i givhan long olgeta blong mekem samting we i stret.—Sam 25:4, 5.
19. ?I minim wanem se Jehova bambae i stanemap “seven man blong lukaot long ol sipsip, yes, eit haeman”?
19 Jehova i blesem ol elda we oli traehad blong trenem ol narafala. Mo hem i blesem ol brata we oli wantem mekem wok long kongregesen. Baebol i promes se bambae i gat naf brata blong lukaot long ol kongregesen. Hem i talem se Jehova bambae i stanemap “seven man blong lukaot long ol sipsip, yes, eit haeman.” (Maeka 5:5, NW) Tede, plante brata oli gat tingting daon mo oli wantem mekem wok blong givhan long narafala. Olgeta ya oli stap kasem trening blong lukaot long ol kongregesen. Oli presem Jehova mo oli karem plante blesing i kam long yumi.
?Bambae Yu Yu Ansa Olsem Wanem?
• ?Wanem sam samting we Jisas i mekem blong trenem ol disaepol blong hem?
• ?Olsem Jisas, ol elda oli save mekem wanem blong givhan long ol brata blong oli mekem wok long kongregesen?
• ?Famle blong brata i save mekem wanem blong givhan long hem blong i mekem wok long kongregesen?
• ?Brata i mas mekem wanem sipos hem i wantem mekem wok long kongregesen?
[Kwestin]
[Tok blong pija long pej 31]
?Taem man we i stadi Baebol i traehad blong gohed gud, yu save mekem wanem blong trenem hem?
[Tok blong pija long pej 32]
?Ol brata oli mas mekem wanem sipos oli wantem kasem wok long kongregesen?
