Yumi Givhan Long Ol Man Blong Oli Fren Gud Wetem God
Yumi Givhan Long Ol Man Blong Oli Fren Gud Wetem God
“Stat naoia, bambae yu yu man blong pulum man [no woman].”—LUK 5:10.
1, 2. (a) ?Plante man oli mekem wanem taem oli harem Jisas i prij? (b) ?Bambae yumi lanem wanem long stadi ya?
JISAS mo ol disaepol blong hem oli mekem bigfala wok blong prij long Galili. Wan dei, oli klaem long wan bot, oli go long wan kwaet ples blong oli spel. Be plante man oli wokbaot so, oli biaen long olgeta. “Ol man nomo i kasem samting olsem faef taosen, be oli no kaontem ol woman mo ol pikinini.” (Mat. 14:21) Long wan narafala taem, plante man, woman mo pikinini oli kam long Jisas from we oli wantem se hem i mekem olgeta oli gud bakegen, mo oli wantem harem tijing blong hem. Namba blong olgeta ya i kasem “fo taosen man, be oli no kaontem ol woman mo ol pikinini.” (Mat. 15:38) Yes i no ol woman mo ol pikinini nomo we oli kam long Jisas, be ol man tu oli wantem save ol samting we hem i stap tijim. Jisas i save se plante moa man mo woman bambae oli kam long trutok. Taem hem i mekem merikel ya we i fulumap ol net blong Saemon wetem ol fis, hem i talem se: “Stat naoia, bambae yu yu man blong pulum man [no woman].” (Luk 5:10) Tok blong Jisas i min se bambae hem i givhan long ol disaepol long wok blong prij tu. Bambae hem i givhan long olgeta blong faenem plante man we oli wantem save trutok, i no ol woman nomo.
2 Tede tu, plante man oli laekem ol tok we yumi talemaot long wok blong prij. Oli glad blong stadi Baebol. (Mat. 5:3) Sam man oli stat blong stadi be oli no gohed long trutok. ?Yumi save mekem wanem blong givhan long olgeta? Taem Jisas i mekem wok blong prij, hem i tijim ol man sem mak olsem we hem i tijim ol woman. Be hem i luk se i gat sam samting we ol man oli wari moa long hem i bitim ol woman. Long stadi ya, bambae yumi lanem samting we Jisas i mekem blong givhan long ol man, mo wanem we yumi save mekem blong folem fasin blong hem. Bambae yumi tokbaot tri samting we ol man oli wari long hem: (1) taem man i wari from mane, (2) taem man i fraet long tingting blong narafala, mo (3) taem man i ting se hem i no naf.
Taem Man i Wari From Mane
3, 4. (a) ?Plante man oli ting se wanem samting i moa impoten? (b) ?From wanem sam man oli ting se mane mo wok i moa impoten i bitim we oli fren wetem God?
3 Wan man we i save gud Loa blong Moses, i talem long Jisas se: “Tija. Mi bambae mi biaen long yu, i nomata weples bambae yu yu go long hem.” Ale Jisas i talem long hem se “mi, mi Pikinini blong Man, mi no gat ples blong mi, blong go slip long hem.” Baebol i no talem sipos man ya i biaen long Jisas no nogat. Maet man ya i wari tumas se bambae hem i slip wea mo bambae hem i kakae wanem.—Mat. 8:19, 20.
4 Plante man oli ting se i moa gud oli gat mane mo gudfala wok i bitim we oli stadi Baebol mo oli obei long ol tok blong hem. Oli ting se i moa impoten we oli go long yunivesiti mo oli kasem wan wok we i givim bigfala mane. Oli mas gat mane blong pem ol samting we oli nidim evri dei. Taswe, oli ting se mane mo wok i save givhan moa long olgeta i bitim we oli stadi Baebol mo oli fren wetem God. Maet oli laekem ol tok blong Baebol. Be “oli tingting tumas from laef blong olgeta long wol ya, mo oli wantem tumas blong kam rijman.” Nao oli no moa stadi long Baebol. (Mak 4:18, 19) Jisas i givhan long ol disaepol blong hem blong oli jusumaot wanem i moa impoten. Yumi save mekem sem mak.
5, 6. ?Wanem i givhan long Andru, Pita, Jemes, mo Jon, blong oli jusumaot wok i moa impoten?
5 Andru mo brata blong hem Saemon Pita, tufala i man blong pulum fis. Tufala i wok wetem Jon mo brata blong hem Jemes, mo Sebedi, we i papa blong Jon mo Jemes. Olgeta oli stap win gud long bisnes blong olgeta blong pulum fis. Mo oli pem narafala blong kam wok blong olgeta. (Mak 1:16-20) Taem Jon Baptaes i tokbaot Jisas long Andru mo Jon, tufala i save se Jisas nao i Mesaea. Andru i go stori long brata blong hem Saemon Pita, mo maet Jon i mekem sem mak long brata blong hem Jemes. (Jon 1:29, 35-41) Long ol manis biaen, Jisas i prij long ol man long Galili, Judia, mo Sameria. Fofala disaepol ya oli folem hem. Be afta, oli gobak long wok blong olgeta blong pulum fis. Oli laekem ol tok we Jisas i tijim. Be long taem ya, oli no ting se wok blong prij i moa impoten long ol narafala wok.
6 Biaen, Jisas i singaot Pita mo Andru blong tufala i biaen long hem, mo blong tufala i kam “man blong pulum man.” ?Tufala i mekem wanem? “Wantaem nomo, tufala i livim ol net blong tufala, tufala i biaen long hem.” Jemes mo Jon tufala i mekem sem mak. “Wantaem nomo, tufala i girap, tufala i livim papa blong tufala i stap long bot, nao tufala i biaen long Jisas.” (Mat. 4:18-22) ?Wanem i givhan long fofala ya, blong oli mekem desisen blong joen long wok blong prij fultaem? Oli tingting gud long desisen ya. Oli bin folem Jisas long wok blong prij blong sam manis finis, mo oli lesin long hem taem hem i stap tijim ol man. Oli luk ol merikel we hem i mekem mo oli luk we hem i gat strong tingting blong mekem fasin we i stret. Mo oli luk we hem i laekem tumas ol tok we hem i tijim long ol man. Ol samting we oli lanem i mekem bilif blong olgeta i strong long Jehova, mo i mekem se oli trastem Jehova moa.
7. ?Yumi save mekem wanem blong givhan long ol man we oli stadi Baebol, blong oli trastem Jehova?
7 ?Yumi save mekem wanem blong folem fasin blong Jisas mo givhan long ol man we oli stadi Baebol, blong oli trastem Jehova? (Prov. 3:5, 6) Fasin blong yumi blong tij i save givhan long olgeta. Yumi save tijim olgeta se Jehova i promes blong blesem yumi sipos yumi putum Kingdom long fasples long laef blong yumi. (Ridim Malakae 3:10; Matiu 6:33.) Yumi save yusum plante vas blong soemaot se oltaem Jehova i stap lukaot long ol man blong hem. Mo yumi mas tingbaot se ol man we yumi tijim, oli lanem plante samting long eksampol blong yumi. Yumi save tokbaot ol samting we Jehova i mekem blong givhan long yumi. Hemia i save givhan long olgeta blong oli trastem Jehova. Yumi save ridim sam stori we oli stap long ol buk blong yumi. *
8. (a) ?From wanem i impoten blong man we i stadi Baebol i ‘traem trastem Hae God blong i luk we hem i gud tumas’? (b) ?Yumi save mekem wanem blong givhan long man we i stadi Baebol, blong i luk we Jehova i gud tumas?
8 I gud sipos man we i stadi Baebol, hem i ridim mo i harem ol stori blong ol narafala we Jehova i blesem olgeta. Be hemia i no naf blong mekem bilif blong hem i strong gud. Hem i mas luk long laef blong hem wan, se Jehova i gud tumas. Ol Sam 34:8 i talem se: “Hae God, hem i gud tumas. Yufala i traem trastem hem. Bambae yufala i faenemaot we hem i tru. Olgeta we oli go long hem blong faenem sefples, oli save harem gud.” ?Yumi save mekem wanem blong givhan long man we i stadi, blong i luk we Jehova i gud tumas? Maet hem i trabol from mane. Mo maet hem i stap traem winim wan nogud fasin blong hem, olsem fasin blong smok, plei laki, mo dring bitim mak. (Prov. 23:20, 21; 2 Kor. 7:1; 1 Tim. 6:10) Yumi save tijim hem blong i prea long God, mo i askem God blong givhan long hem blong winim nogud fasin blong hem. Taem laef blong hem i kam gud moa, bambae hem i luk we Jehova i gud tumas. Ale yumi save pulum hem blong i putum wosip we hem i mekem long Jehova long fasples long laef blong hem. Yumi save lanem hem blong i stadi long Baebol evri wik, mo blong i rerem ol miting mo i go long ol miting. Taem hem i luk we Jehova i stap blesem hem from we hem i traehad, bambae bilif blong hem i kam strong moa, mo bambae hem i no wari tumas from mane mo ol narafala samting.
Taem Man i Fraet Long Tingting Blong Narafala
9, 10. (a) ?From wanem Nikodimas mo Josef blong Aramatia, tufala i no talemaot long ol narafala se tufala i man blong Jisas? (b) ?From wanem sam man tede, oli fraet blong kam man blong Jisas?
9 Sam man oli wari long tingting we narafala i gat long olgeta, nao oli no kam man blong Jisas. Yu traem tingbaot Nikodimas mo Josef blong Aramatia. Tufala i no talemaot long ol narafala man se tufala i man blong Jisas, from we tufala i fraet se ol narafala man Jiu bambae oli tokbaot tufala mo oli mekem i nogud long tufala. (Jon 3:1, 2; 19:38) Yes tufala i fraet olsem from we tufala i save se ol lida blong skul oli no laekem Jisas nating, mo eniman we i bilif long Jisas, bambae oli putumaot hem long haos prea.—Jon 9:22.
10 Long sam ples tede, man i no soemaot se hem i intres long God, long Baebol, mo long jos. Hemia from we ol man long wok blong hem, ol fren blong hem, mo ol famle blong hem oli jikim hem mo oli spolem hem. Long sam narafala ples, man i save kasem bigfala trabol sipos hem i talem se hem i wantem jenisim jos blong hem. Mo sipos man we i joen long ami, long politik, no i gat haenem long komuniti, hem i tokbaot Baebol, ol narafala oli jikim hem. Wan man Jemani i talem se: “Ol tok we yufala ol Witnes yufala i talemaot oli tru. Be sipos mi mi kam wan Witnes tede, tumora bambae olgeta man oli save. Ol man long wok, ol man we oli stap raonabaot long mi, ol man we mi mo famle blong mi i joen wetem olgeta, ?bambae oli gat wanem tingting? No. Mi mi no wantem se olgeta oli tingting nogud long mi.”
11. ?Jisas i mekem wanem blong givhan long ol man blong hem, blong oli no fraet long tingting blong narafala?
11 Ol aposol blong Jisas oli gat strong tingting. Be samtaem oli fraet long tingting we narafala i gat long olgeta. (Mak 14:50, 66-72) ?Jisas i mekem wanem blong givhan long ol man blong hem blong oli gohed long trutok, nating se ol man oli agensem olgeta? Jisas i givhan long olgeta blong oli rere. Hem i talem se: “Mi mi Pikinini blong Man, mo sipos ol man oli luk yufala se yufala i man blong mi, nao oli stap mekem i nogud tumas long yufala, yufala i save harem gud. Sipos oli no laekem yufala, oli stap agens long yufala, no oli stap ronemaot yufala, no oli stap spolem nem blong yufala, no oli stap talem se yufala i nogud olgeta, from we yufala i man blong mi, long taem ya nao yufala i save harem gud.” (Luk 6:22) Jisas i givim woning long ol man blong hem se bambae ol man oli agens long olgeta. Hem i talem se ol man bambae oli agens long olgeta ‘from we oli man blong hem.’ Mo Jisas i mekem oli tingbaot se oltaem bambae God i lukaot long olgeta sipos oli askem long Hem blong i givhan long olgeta, mo blong i givim paoa long olgeta. (Luk 12:4-12) Jisas i singaot olgeta we oli stat blong biaen long hem, blong oli kam joen wetem ol man blong hem, mo blong oli fren wetem olgeta.—Mak 10:29, 30.
12. ?Yumi save mekem wanem blong givhan long man we i stadi Baebol, blong i no fraet long tingting we narafala i gat long hem?
12 Yumi mas givhan long man we i stadi Baebol blong i no fraet long tingting we narafala i gat long hem. Wan samting we yumi save mekem, hemia se yumi givhan long hem blong save wanem we hem i mas mekem taem narafala i agens long hem. (Jon 15:19) Maet ol man long wok mo ol narafala oli no agri long ol niufala tijing we hem i folem, no maet oli wantem save bilif blong hem. Yumi save givhan long hem blong rerem sam ansa we oli isi mo we oli kamaot long Baebol. Yumi save fren wetem hem, mo yumi givhan long hem blong save ol narafala long kongregesen. Maet sam brata long kongregesen oli laekem sam samting we hem i laekem, no sam samting long laef blong olgeta i sem mak long laef blong hem. Ol brata ya oli save fren wetem hem. I impoten tumas we yumi lanem hem blong i prea oltaem, mo blong i talemaot ol samting we i stap long hat blong hem taem hem i prea. Hemia bambae i givhan long hem blong fren gud wetem Jehova. Bambae Jehova i olsem wan sefples we hem i save haed long hem. Bambae Jehova i blokem hem mo i lukaot gud long hem. Ale bambae hem i no moa fraet long tingting we narafala i gat long hem.—Ridim Ol Sam 94:21-23; Jemes 4:8.
Taem Man i Ting Se Hem i No Naf
13. ?From wanem sam man oli no mekem wok blong Jehova?
13 Sam man oli ting se oli no save mekem gud ol wok blong Jehova olsem ol narafala long kongregesen. Maet from we oli no save rid gud, mo oli no save talemaot klia ol tingting blong olgeta. Maet oli sem, mo oli no laekem blong tokbaot bilif blong olgeta long fored blong ol narafala. Ale i hadwok long olgeta blong stadi, blong givim ansa long ol miting, mo blong prij long narafala. Wan brata i talem se taem hem i yangfala, i had blong hem i joen long wok blong prij. Taem hem i go long haos blong ol man, hem i giaman nomo se hem i prestem bel long doa. Ale hem i aot, we hem i no mekem noes. Hem i no wantem se man i harem hem mo i luk hem. Hem i talem se: “Taem mi tingbaot se bambae mi go prij long ol haos wanwan, mi mi harem nogud olsem se mi sik.”
14. ?From wanem ol man blong Jisas oli no save ronemaot devel long boe ya we i sik?
14 ?Yu ting se ol disaepol blong Jisas oli harem olsem wanem taem oli no save ronemaot devel long wan boe we i sik? Ating oli harem se bambae oli neva save mekem wanem we Jisas i wantem olgeta blong mekem. Papa blong boe ya i kam luk Jisas mo i talem long hem se: “Masta. Plis yu sore long pikinini blong mi, from we i gat wan sik i stap long hem, we samtaem i stap pulum hem, i stap mekem hem i hafded. Hem i harem nogud tumas long bodi blong hem, mo plante taem hem i stap foldaon long faea mo long wota. Nao mi mi tekem hem i kam long ol man blong yu, be oli no save mekem hem i gud bakegen.” Jisas i ronemaot devel long boe ya, mo boe ya i kam gud. Biaen, ol disaepol oli kam luk Jisas mo oli askem long hem se: “?Mifala i no save ronemaot devel ya from wanem?” Jisas i ansa long olgeta se: “Yufala i no save ronemaot, from we bilif blong yufala i no strong. Tru mi talem long yufala, nating sipos bilif blong yufala i smol nomo, be bambae yufala i save talem long bigfala hil ya se, ‘Yu gowe,’ nao bambae hem i mas gowe. Bambae i no gat wan samting we yufala i no save mekem.” (Mat. 17:14-20) Yes, man we i bilif long Jehova, hem i save mekem wanem we hem i ting se hem i no naf blong mekem. Be sipos hem i trastem nomo gudhan blong hem, bambae tingting blong hem i foldaon. Mo bambae hem i harem se hem i no naf blong mekem wok blong Jehova.
15, 16. ?Sipos man we i stadi Baebol i harem se hem i no naf blong mekem wok blong Jehova, yumi save mekem wanem blong givhan long hem?
15 Sipos man we i stadi Baebol i harem se hem i no naf blong mekem gud wok blong Jehova, yumi save pulum hem blong tingbaot samting we Jehova i save mekem blong givhan long hem. Hem i mas trastem Jehova blong i givhan long hem i bitim we hem i tingbaot samting we hem nomo i save mekem. Pita i raetem long leta blong hem se: “God i gat paoa, mo yufala i mas putum yufala i stap daon, aninit long han blong hem. Nao long taem we hem i luk se i stret, hem bambae i leftemap yufala. Yufala we i stap wari tumas, yufala i mas putum ol trabol blong yufala long han blong hem.” (1 Pita 5:6, 7) Yumi mas givhan long man we i stadi Baebol blong i lavem Jehova mo blong i wantem se Jehova i lidim hem. Hemia i min se hem i mas laekem ol samting we hem i lanem long Baebol mo i mas soemaot ol fasin blong “frut blong spirit” long laef blong hem. (Gal. 5:22, 23, NW) Prea i mas wan samting we hem i tinghevi long hem. (Fil. 4:6, 7) Mo hem i mas kasem save se God nao bambae i mekem hem i no fraet, mo i givim paoa long hem blong mekem ol samting we God i wantem.—Ridim 2 Timoti 1:7, 8.
16 Sam man we oli stadi Baebol oli nidim help blong kam gud moa long fasin blong olgeta blong rid mo toktok long fored blong narafala. Samfala oli harem se oli no naf blong mekem wok blong Jehova from we oli mekem sam nogud samting, bifo we oli save hem. Yumi save givhan long olgeta sipos yumi lavem olgeta mo yumi gat longfala tingting. Jisas i talem se: “Man we i no sik, hem i no nidim dokta, be man we i sik, yes, hem i nidim dokta.”—Mat. 9:12.
Yumi Traehad Blong ‘Pulum’ Moa Man
17, 18. (a) ?Yumi save mekem wanem blong toktok wetem ol man taem yumi prij, i no ol woman nomo? (b) ?Bambae yumi tokbaot wanem long nekis stadi?
17 Ol tok blong Baebol nomo oli save mekem man i glad. Taswe, yumi wantem givhan long moa man blong oli folem ol tok ya, i no ol woman nomo. (2 Tim. 3:16, 17) ?Olsem wanem blong faenem moa man taem yumi prij? Yumi save prij long sapa, long ol aftenun blong wiken, mo long ol dei we man i spel. Maet yumi save askem blong toktok wetem hed blong famle. Taem yumi luk se i stret, yumi save tekem janis blong prij long ol man long wok. Sam sista long kongregesen oli mared long ol man we oli no Witnes. Yumi save traem pulum ol man ya blong oli intres long trutok.
18 Yumi wantem givhan long moa man mo woman blong oli lanem trutok. Olgeta we oli wantem save trutok bambae oli lesin long ol tok we yumi talemaot taem yumi prij long olgeta. Yumi mas gat longfala tingting mo yumi mas gohed blong givhan long olgeta evriwan we oli wantem save trutok. ?Be wanem i save givhan long ol man we oli baptaes finis, blong oli wantem mekem wok long kongregesen? Nekis stadi bambae i ansa long kwestin ya.
[Futnot]
^ par. 7 Plis lukluk ol Yearbook of Jehovah’s Witnesses mo ol laef stori we oli stap long ol Wajtaoa mo Wekap!
?Bambae Yu Yu Ansa Olsem Wanem?
• ?Yumi save mekem wanem blong givhan long ol man blong oli tingbaot se wok blong Jehova i impoten moa long ol narafala wok?
• ?Yumi save mekem wanem blong givhan long man we i stadi Baebol, blong i no fraet long tingting we narafala i gat long hem?
• ?Wanem i save givhan long man we i harem se hem i no naf blong mekem wok blong Jehova?
[Kwestin]
[Tok blong pija long pej 25]
?Yu yu talemaot gud nius long ol man tu, i no ol woman nomo?
[Tok blong pija long pej 26]
?Yu save mekem wanem blong givhan long man we i stadi Baebol, blong i rere blong stanap strong taem narafala i agensem hem?
