Yumi Letem Tabu Spirit i Lidim Yumi, Nao Bambae Yumi Gat Laef Mo Pis

“Ol fasin ya oli stap kamtru long laef blong yumi ya, we yumi no mekem ol rabis fasin we tingting blong yumi i wantem, yumi stap mekem olsem we Tabu Spirit i wantem.”—ROM 8:4.

1, 2. (a) ?Wanem i save hapen sipos yumi draevem trak be long sem taem, yumi mekem narafala samting? (b) ?Wanem i save hapen sipos yumi letem narafala samting i pulum tingting blong yumi, i gowe long wosip we yumi mekem long Jehova?

WAN bigman blong gavman long Yunaeted Stet i tokbaot problem ya we ol man oli draevem trak, be long sem taem oli stap mekem narafala samting. Hem i talem se problem ya i stap kam mowas evri yia. Samfala oli yusum mobaelfon taem oli stap draevem trak. Plante man oli talem se oli aksiden no klosap oli aksiden, from we narafala i stap yusum mobaelfon taem i draev. Maet ol man oli ting se sipos oli yusum mobaelfon blong olgeta taem oli draevem trak, hemia i mekem se oli no westem taem. Be sipos oli mekem olsem, oli save aksiden nogud.

 ² Sipos wan man i draevem trak mo long sem taem hem i mekem narafala samting, maet hem i no luk sam samting long rod we i save mekem hem i aksiden. Wan samting olsem i save hapen long fasin fren blong yumi wetem Jehova. Sipos yumi letem ol narafala samting oli pulum tingting blong yumi, yumi save kasem trabol. Pol i talem se yumi mas lukaotgud long bilif blong yumi. Sipos yumi no lukaotgud, bilif blong yumi i save kam slak. (1 Tim. 1:18, 19) Aposol Pol i tokbaot trabol ya long leta we hem i raetem long ol brata sista long Rom. Hem i talem se: “Sipos tingting blong man i fas gud long ol rabis fasin ya we tingting blong hem nomo i wantem, bambae hem i ded from. Be sipos tingting blong man i fas gud long ol gudfala fasin ya we Tabu Spirit i wantem, bambae hem i gat laef mo pis from.” (Rom 8:6) ?Ol tok blong Pol i minim wanem? ?Yumi mas mekem wanem blong yumi no ‘fas gud long ol rabis fasin ya we tingting blong yumi nomo i wantem’? ?Mo yumi mas mekem wanem blong yumi wok had blong “fas gud long ol gudfala fasin ya we Tabu Spirit i wantem”?

‘I No Gat Man i Save Jajem Olgeta Se Oli Mas Panis’

3, 4. (a) ?Pol i talem se hem i mas faet agensem wanem samting? (b) ?From wanem yumi wantem save faet ya we Pol i mekem?

³ Long leta we Pol i raetem long ol Kristin long Rom, Pol i tokbaot wan samting long laef blong hem, we hem i mas faet agensem. Hem i talem se tingting blong hem i stap faet agens long rabis fasin we i stap long hem. (Ridim Rom 7:21-23.) Pol i no talem ol tok ya blong mekem eskius from ol samting we hem i mekem, no from we hem i sore long hem wan bakegen. Ol tok blong hem i no min se hem i no save mekem samting we i stret. Hem i bigman long ol Kristin fasin, hem i wan tabu Kristin, mo God i jusumaot hem blong i kam ‘aposol blong ol man we oli no laen blong Isrel.’ (Rom 1:1; 11:13) Sipos i olsem, ?from wanem Pol i tokbaot faet ya?

⁴ Pol i wantem mekem samting we God i talem, be hem i talem se hem i no save mekem i stret olsem we hem wan i wantem. ?From wanem? Hem i talem se: “[Ol man] evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23) Pol i sinman sem mak olsem evri pikinini blong Adam. From samting ya, i gat sam samting we hem i wantem we oli no stret. Yumi kasem save long ol tok blong Pol from we yumi tu yumi harem olsem hem. Evri dei, yumi stap faet agensem sin we i stap long yumi, mo agensem ol nogud samting we yumi wantem. Mo i gat plante samting we oli save pulum tingting blong yumi i gowe long wosip we yumi mekem long God, nao yumi lego smol rod ya we i blong go kasem laef. (Mat. 7:14) Be i gat wan samting we i mekem Pol i harem gud, mo samting ya i save givhan long yumi tu.

5. ?Wanem i givhan long Pol blong i harem gud?

⁵ Pol i askem se, ?hu bambae i givhan long hem blong winim faet ya? Biaen hem i talem se: ‘Mi mi talem tangkiu tumas long God, we hem bambae i mekem samting ya tru long Jisas Kraes Masta blong yumi.’ (Rom 7:24, 25) Biaen Pol i toktok long ol tabu Kristin, hemia olgeta we oli “stap joen long Jisas Kraes.” (Ridim Rom 8:1, 2.) Jehova i yusum tabu spirit blong hem blong adoptem olgeta olsem ol pikinini blong hem. God i mekem se oli “joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes.” (Rom 8:14-17) Tabu spirit blong God mo bilif blong olgeta long sakrefaes blong Jisas, i givhan long olgeta blong winim faet ya we Pol i tokbaot. God i no moa jajem olgeta se oli mas panis from sin we Adam i pasem long olgeta. Naoia oli fri long “rabis fasin ya we i stap pulum olgeta blong oli mekem sin gogo, bambae oli ded from.”

6. ?From wanem olgeta man blong God oli mas kasem save long ol tok blong Pol?

⁶ I tru se Pol i stap toktok long ol tabu Kristin. Be ol tok we hem i talem long saed blong tabu spirit mo sakrefaes blong Jisas, i save givhan long olgeta man blong Jehova, nating se bambae oli laef long heven no long wol. Ol tok ya we Pol i talem oli kamaot long God. Taswe olgeta man blong God oli mas kasem save long ol tok ya, mo oli mas obei long olgeta.

‘God i Jajem Finis Sin We i Stap Wok Long Laef Blong Ol Man’

7, 8. (a) ?“Rabis fasin blong man i spolem paoa blong Loa ya” olsem wanem? (b) ?God i yusum tabu spirit blong hem mo sakrefaes blong Jisas blong mekem wanem?

⁷ Long Rom japta 7, Pol i eksplenem se ol man oli  stap aninit long paoa blong sin. Long japta 8, Pol i tokbaot paoa blong tabu spirit. Hem i talem se tabu spirit blong God i save givhan long ol Kristin, blong oli winim faet ya we oli stap mekem agensem paoa blong sin. Tabu spirit i save givhan long olgeta blong oli mekem samting we Jehova i wantem, nao Jehova i save glad long olgeta. Pol i soemaot se God i yusum tabu spirit blong hem mo sakrefaes blong Jisas blong mekem wan samting we Loa blong Moses i no save mekem.

⁸ Loa i jajem ol sinman se oli mas panis from we oli no save obei long olgeta tok blong Loa. Mo ol hae pris blong ol man Isrel oli stap aninit long Loa, be oli sinman, oli no save mekem sakrefaes we i karemaot sin blong ol man. Taswe, “rabis fasin blong man i spolem paoa blong Loa ya.” Be God i sanem Pikinini blong hem, we taem hem i kam long wol, hem i “man olsem yumi we yumi man blong mekem sin.” Sakrefaes blong Jisas i “jajem finis fasin ya blong sin we i stap wok long laef blong ol man, se fasin ya bambae i lus.” Yes, sakrefaes ya blong Jisas i naf blong sevem ol man long sin. Ol tabu Kristin oli bilif long sakrefaes blong Jisas. From samting ya, Jehova i luk olgeta se oli stret man finis. Ol tok blong Pol i pulum ol tabu Kristin blong oli ‘no mekem ol rabis fasin we tingting blong olgeta i wantem, be oli stap mekem olsem we tabu spirit i wantem.’ (Ridim Rom 8:3, 4.) Ol tabu Kristin oli mas gohed blong mekem olsem gogo laef blong olgeta long wol ya i finis. Sipos oli stap tru long God, bambae God i givim “niufala laef ya” long heven long olgeta.—Rev. 2:10.

9. ?Long Rom 8:2, NW tok ya “loa” i minim wanem?

⁹ Pol i tokbaot “loa blong tabu spirit” mo “loa ya blong sin mo ded.” (Rom 8:2, NW) ?Wanem tufala loa ya? Tok we Pol i yusum long vas ya i no blong tokbaot ol rul olsem ol rul we oli stap long Loa blong Moses. Wan buk i talem se Grik tok we long vas ya oli tanem i kam “loa,” i minim ol gudfala samting mo ol nogud samting we ol man oli mekem. Ol samting ya oli bos long olgeta olsem wan loa. Mo tok ya i save minim ol tingting we oli jusum blong folem long laef blong olgeta.

10. ?Loa blong sin mo ded, hem i bos long yumi olsem wanem?

¹⁰ Aposol Pol i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Yumi evriwan i pikinini blong Adam. Taswe loa blong sin mo ded i bos long yumi evriwan. Sin i pulum yumi blong wantem mekem ol samting we God i no laekem. Ol samting ya oli lidim yumi blong go lus. Long leta we Pol i raetem long ol Kristin long Galesia, Pol i talem se ol fasin mo ol samting we sin i pulum yumi blong mekem, oli ‘ol rabis samting we tingting blong yumi i wantem.’ Mo hem i talem se: “Ol man we oli stap mekem ol fasin ya, bambae oli no save go insaed long niufala wol ya we God i king long hem.” (Gal. 5:19-21) Oli letem ‘ol rabis samting we tingting blong olgeta i wantem’ i lidim olgeta. Oli mekem ol samting we sin i pulum olgeta blong wantem. (Rom 8:4) Nao sin i stap lidim olgeta. Oli  stap mekem nogud fasin wetem woman, oli wosip long ol aedol, oli wok wetem ol rabis spirit mo oli mekem sam narafala bigfala sin. ?Be olsem wanem? ?Olgeta ya nomo oli stap mekem ol samting we tingting blong olgeta i wantem? Nogat. Galesia i tokbaot fasin blong jalus, kros, rao, mo fasin blong wantem kasem mak blong narafala man, olsem sam ‘rabis samting we tingting blong man i wantem.’ Plante man oli ting se hemia ol slak fasin nomo blong wanwan man. Yumi neva mas ting se yumi no nid blong faet agensem ol rabis samting we sin i pulum yumi blong wantem.

11, 12. ?Jehova i mekem wanem blong yumi fri long loa blong sin mo ded? ?Yumi mas mekem wanem blong God i glad long yumi?

¹¹ !Yumi glad tumas we Jehova i mekem rod blong yumi fri long loa blong sin mo ded! Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Sipos ol samting we yumi mekem long laef oli soemaot we yumi lavem God mo yumi bilif long sakrefaes blong Jisas, bambae God i mekem yumi fri long panis blong sin, hemia ded. (Jon 3:16-18) Bambae yumi harem olsem Pol we i talem se: ‘Mi mi talem tangkiu tumas long God, we hem bambae i mekem samting ya tru long Jisas Kraes Masta blong yumi.’

¹² Yumi olsem wan man we i sik bigwan. Man ya i save kam gud bakegen sipos hem i mekem samting we dokta i talem. Bilif blong yumi long sakrefaes blong Jisas i save mekem yumi fri long loa blong sin mo ded. Be yumi sinman yet. Sipos yumi wantem gohed blong fren gud wetem Jehova mo mekem hem i glad, yumi mas mekem wan samting. Yes, sipos yumi wantem kam gud long sik ya sin, Pol i talem se yumi mas letem tabu spirit i lidim yumi.

?Yumi Mekem Wanem Blong Letem Tabu Spirit i Lidim Yumi?

13. ?I minim wanem blong letem spirit blong God i lidim yumi?

¹³ Taem yumi stap wokbaot blong go samples, yumi mas tekem plante step nao sloslo bambae yumi kasem ples we yumi wantem go long hem. Long sem fasin, yumi mas gohed gud long trutok oltaem nao bambae tabu spirit i lidim yumi. (1 Tim. 4:15) I tru se yumi no save mekem samting ya long fasin we i stret gud olgeta. Be evri dei yumi save traehad blong letem tabu spirit i lidim yumi. Sipos “Tabu Spirit i stap lidim” yumi, bambae yumi mekem God i glad.—Gal. 5:16.

14. ?Ol man we oli stap mekem “ol fasin we tingting blong olgeta nomo i wantem,” oli olsem wanem?

¹⁴ Long leta we Pol i raetem long ol Kristin long Rom, Pol i tokbaot tu grup blong man we tufala i gat defren tingting. (Ridim Rom 8:5.) Pol i tokbaot se sin we i stap long yumi i stap faet agensem ol gudfala samting we tingting blong yumi i wantem. Pol i traehad blong faet agensem sin ya. Be plante man tede oli no traem blokem ol nogud samting we oli wantem. Oli mekem “ol rabis fasin we tingting blong olgeta nomo i wantem.” Oli no tingbaot  wanem we God i wantem olgeta blong mekem. Mo oli no askem God blong i givhan long olgeta blong oli winim faet ya. Plante taem, “oli fas gud long ol rabis fasin we tingting blong olgeta nomo i wantem,” mo oli letem ol rabis samting ya we sin i pulum olgeta blong wantem, oli bos long olgeta. Be ol man we oli stap mekem “ol gudfala fasin we Tabu Spirit i wantem,” oli letem Jehova i lidim olgeta.

15, 16. (a) ?Taem tingting blong yumi i fas gud long wan samting, bambae yumi wantem mekem wanem? (b) ?Plante man tede oli intres long wanem?

¹⁵ Ridim Rom 8:6. Bifo we man i mekem wan samting, tingting blong hem i fas gud long samting ya. Sipos tingting blong hem i fas gud long ol rabis samting we tingting blong hem i wantem, bambae hem i wantem mekem ol rabis samting ya. Bambae hem i tingting long olgeta, hem i intres long olgeta, mo hem i wantem olgeta.

¹⁶ ?Bighaf blong ol man tede, oli intres long wanem? Aposol Jon i talem se: “Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo.” (1 Jon 2:16) Ol samting we ol man oli wantem tumas, hemia nogud fasin blong man wetem woman, oli wantem se narafala i save olgeta mo oli wantem kasem haenem. Oli wantem plante sas samting. Ol buk, ol magasin, ol muvi, ol program long televisin, mo Intenet, oli tokbaot ol samting ya oltaem. Tingting blong ol man i fas gud long ol samting ya from we oli wantem tumas olgeta. Pol i talem se sipos “tingting blong man i fas gud long ol rabis fasin ya we tingting blong hem nomo i wantem, bambae hem i ded from.” Sipos tingting blong yumi i fas gud long ol rabis fasin ya, yumi save spolem fasin fren blong yumi wetem God, mo bambae yumi no moa save kasem laef. ?From wanem? ‘Sipos tingting blong man i fas gud long ol rabis fasin we tingting blong hem nomo i wantem, bambae hem i kam olsem enemi blong God. Bambae hem i no mekem ol samting we Loa blong God i talem. Hem i no save mekem ol samting ya. Olgeta ya we oli stap mekem ol rabis fasin we tingting blong olgeta nomo i wantem, oli no save mekem God i glad long olgeta.’—Rom 8:7, 8.

17, 18. ?Yumi mas mekem wanem blong letem spirit blong God i lidim yumi? ?Bambae yumi kasem wanem sipos yumi mekem olsem?

¹⁷ “Sipos tingting blong man i fas gud long ol gudfala fasin ya we Tabu Spirit i wantem, bambae hem i gat laef mo pis from.” Yes, bambae yumi kasem laef we i no save finis, mo naoia, bambae yumi gat pis long hat mo tingting blong yumi, mo yumi gat pis wetem God. ?Yumi mas mekem wanem blong soemaot we tingting blong yumi i fas gud long ol gudfala fasin we tabu spirit i wantem? Yumi mas folem ol advaes we i kamaot long God mo tabu spirit blong hem. Ale bambae tingting blong yumi i laenap moa wetem tingting blong God. Yumi putum tingting blong yumi long “ol samting we Loa blong God i talem.” Nao taem wan samting i traem yumi, be yumi save wanem blong mekem. Bambae yumi wantem mekem fasin we i stret. Mo bambae spirit blong God i lidim yumi long desisen we yumi mekem.

¹⁸ Tingting blong yumi i mas fas gud long ol samting we God i glad long hem. Ol samting we yumi mekem blong wosipim God, oli mas impoten moa long ol narafala samting we yumi mekem long laef blong yumi. Ol samting we oli impoten moa hemia blong prea oltaem long God, ridim Baebol mo stadi long hem, go long ol miting, mo joen long wok blong prij. (1 Pita 1:13) Yumi no mas letem ol rabis samting we sin i pulum yumi blong wantem, oli bos long yumi. Be yumi folem tingting blong God mo yumi letem spirit blong hem i lidim yumi. Sipos yumi mekem olsem, bambae yumi kasem plante blesing. Bambae yumi kasem laef we i no save finis mo bambae yumi gat pis.—Gal. 6:7, 8.

?Yu Yu Save Eksplenem?

• ?Wanem samting we Loa blong Moses i no save mekem? ?God i mekem wanem blong winim samting ya?

• ?Wanem ya “loa blong sin mo ded”? ?Yumi save kam fri long hem olsem wanem?

• ?Yumi mas mekem wanem blong “tingting blong yumi i fas gud long ol gudfala fasin we Tabu Spirit i wantem”?

[Kwestin]

[Tok blong pija long pej 16]

?Yu yu letem ol rabis fasin we tingting blong yu i wantem oli bos long yu? ?No yu letem tabu spirit i lidim yu?