Yumi Olsem Ol “Strenja Nomo” Long Rabis Wol Ya

“Olgeta man ya oli stap bilif strong long God. . . . Olgeta oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.”—HIB. 11:13.

1. ?Jisas i talem wanem long saed blong ol tru Kristin mo wol ya?

JISAS i talem se ol man blong hem, “oli stap yet long wol ya.” Be hem i se: “Olgeta oli no man blong wol, olsem we mi mi no man blong wol.” (Jon 17:11, 14) Ol tok blong Jisas i soemaot tingting we ol tru Kristin oli mas gat long saed blong wol ya. Setan i god blong “wol ya.” (2 Kor. 4:4) Ol Kristin oli stap long wol, be oli no joen long wol. Hemia nao from wanem Baebol i talem se ol Kristin oli stap long wol ya, “olsem ol strenja nomo.” Oli olsem ‘ol man we oli no stap long hom blong olgeta.’—1 Pita 2:11.

Oli Stap Long Wol Ya, Be i “Olsem We Oli Strenja Nomo”

2, 3. ?From wanem Inok, Noa, Ebraham mo Sera, oli stap long wol ya be i “olsem we oli strenja nomo”?

² Stat bifo olgeta, ol man blong Jehova oli defren long ol man blong wol ya. Yumi save tingbaot Inok mo Noa. Baebol i talem se tufala i “fren gud wetem God.” (Jen. 5:22-24; 6:9) Tufala i no fraet  blong talemaot se Jehova bambae i spolem rabis wol blong Setan. (Ridim 2 Pita 2:5; Jud 14, 15.) Tufala i mekem samting we i stret nating se ol man raonabaot long tufala oli rabis. From samting ya, Baebol i talem se God i “glad tumas” long Inok. Mo Baebol i talem se Noa i “wan stret man, we ol man oli no save jajem hem.”—Hib. 11:5; Jen. 6:9.

³ Yumi save lanem plante samting tu long fasin blong Ebraham mo Sera. Taem God i talem long tufala blong lego gudfala haos blong tufala long taon ya Uru long Koldia, tufala i obei long hem. Tufala i glad nomo blong stap long wan narafala kantri we tufala i no gat wan haos blong tufala. (Jen. 11:27, 28; 12:1) Aposol Pol i raetem long leta blong hem se: “Ebraham i stap bilif strong long God, taswe hem i obei long God long taem ya we God i singaot hem blong go long wan narafala kantri. Kantri ya, God i promes finis long hem se bambae i givim long hem. Nao Ebraham i aot long kantri blong hem, be hem i no save se niufala kantri ya we hem i stap go long hem i stap wea. Mo from we hem i stap bilif strong long God, taswe hem i stap long kantri ya we God i mekem promes blong hem long hem bifo, be hem i wan strenja nomo. Hem wetem Aesak mo Jekob, we God i givim sem promes nomo long trifala evriwan, trifala i stap long ol haos tapolen nomo.” (Hib. 11:8, 9) Pol i gohed blong tokbaot olgeta, i se: “Olgeta man ya oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk. Nao olgeta oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.”—Hib. 11:13.

Woning We i Go Long Ol Man Isrel

4. ?Bifo we Jehova i givim graon long ol man Isrel, hem i givim wanem woning long olgeta?

⁴ Ebraham i gat plante pikinini we oli kamaot biaen long hem. God i mekem olgeta oli kam neson blong Isrel, i givim ol loa long olgeta, mo i givim graon long olgeta. (Jen. 48:4; Dut. 6:1) Ol man Isrel oli mas tingbaot se graon ya i no blong olgeta, i blong Jehova. (Lev. 25:23) Oli stap long graon ya, be oli mas obei long ol loa blong Jehova. Mo ol man Isrel oli mas tingbaot se “kakae nomo i no save mekem man i laef.” Olgeta gudfala samting we oli kasem, Jehova nao i givim long olgeta. (Dut. 8:1-3) From samting ya, bifo we Jehova i givim graon long olgeta, hem i talem long Moses blong i talemaot woning ya se: “Hae God i God blong yumi, mo kantri ya we hem bambae i givim long yufala, i gat ol gudgudfala taon oli stap long hem we yufala i no bin wokem, olsem we hem i promes finis long Ebraham, mo Aesak, mo Jekob, trifala bubu ya blong yumi bifo. Bambae yufala i  gat ol haos blong yufala we oli fulap long ol gudgudfala samting we yufala i no bin putum, mo ol wel blong wota, we yufala i no bin digim, mo ol plantesen blong grep mo ol plantesen blong olif we yufala i no bin planem. Long taem ya we hem bambae i tekem yufala i go stap long kantri ya, bambae yufala i no save sot long kakae, fulap kakae bambae i stap, mo yufala i mas lukaot gud blong yufala i no fogetem hem.”—Dut. 6:10-12.

5. ?From wanem Jehova i putumaot ol man Isrel se oli no moa man blong hem? ?Hu niufala neson ya we Jehova i jusum?

⁵ Ol man Isrel oli mekem samting we Jehova i talem se oli no mas mekem. Taem oli go insaed long Promes Lan, oli stap gud long ol haos, mo oli gat plante kakae mo plante waen. Ale oli fogetem Jehova. Long taem blong Nehemaea, wan grup blong ol Livaet oli talemaot se oli sem from fasin blong ol man Isrel. Oli talem se ol man Isrel “oli stap kakae ol kakae ya olsem we oli wantem, nao oli kam fatfat gud. Oltaem oli stap harem gud long ol gudgudfala samting ya we [God i] givim long olgeta.” Be oli girap, oli agens long God. Oli kilim ol profet we God i sanem blong givim woning long olgeta. Taswe, Jehova i letem ol enemi blong olgeta oli winim olgeta. (Ridim Nehemaea 9:25-27; Hos. 13:6-9.) Biaen, taem ol man Isrel oli stap aninit long paoa blong ol man Rom, oli kilim Mesaea i ded. !Hemia man ya we God i promes longtaem finis se bambae i sanem hem i kam! From samting ya, Jehova i putumaot olgeta se oli no moa man blong hem. Mo hem i jusum wan niufala neson, hemia “Isrel blong God.”—Gal. 6:16, NW; Mat. 21:43; Wok 7:51, 52.

“Yufala i No Man Blong Wol Ya”

6, 7. (a) ?Bambae yu eksplenem samting we Jisas i talem long saed blong ol man blong hem mo wol ya olsem wanem? (b) ?Folem ol tok we Pita i talem, from wanem ol tru Kristin oli no mas man blong wol ya?

⁶ Long stat blong stadi ya, yumi lanem se Jisas we i Hed blong Kristin kongregesen, i talem se ol man blong hem oli no man blong wol blong Setan. Bifo we Jisas i ded, hem i talem long ol disaepol blong hem se: “Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.”—Jon 15:19.

⁷ Sloslo ol Kristin oli go stap long plante ples long wol we ol man Rom oli stap rulum. Ol Kristin oli mas strong blong oli no joen long wol. Oli no mas mekem ol fasin we ol man raonabaot long olgeta oli mekem. Nomata weples oli stap long hem, fasin blong olgeta i mas defren long ol narafala man. Samwe long 30 yia afta we Jisas i ded, aposol Pita i raetem wan leta long ol fas Kristin. Hem i talem long olgeta se: “Ol fren. Yufala i stap long wol ya olsem ol strenja nomo, mo olsem ol man we oli no gat hom blong olgeta. Mi mi talem strong long yufala, se bambae yufala i no mekem ol rabis fasin we tingting blong yufala i wantem. Ol fasin ya oli agensem yufala blong spolem laef blong yufala. . . . Yufala i mas mekem fasin blong yufala i stret gud long fes blong [ol man].”—1 Pita 1:1; 2:11, 12.

8. ?Wan man blong stadi long histri i talem wanem we i soemaot se ol fas Kristin oli no man blong wol?

⁸ Taem ol man Rom oli gat bigfala paoa long wol, ol Kristin oli “stap long wol ya olsem ol strenja nomo, mo olsem ol man we oli no gat hom blong olgeta.” Wan man blong stadi long histri i talem se ol man oli mekem i nogud long ol Kristin, oli agensem olgeta bigwan. Mo oli mekem olsemia plante taem. Hem i talem se ol man oli giaman se ol Kristin oli no bilif long God. Hemia from we oli no joen long ol giaman kastom blong ol jos. Oli talem se ol Kristin oli “no laekem nating ol narafala man,” from we oli no joen long ol pleplei mo ol lafet we ol narafala oli stap mekem. Ol pleplei mo ol lafet ya oli leftemap giaman wosip mo nogud fasin blong man wetem woman.

Yumi No Yusum Tumas Wol Ya

9. ?Wanem i soemaot se tingting blong ol man se yumi “no laekem nating ol narafala man,” i no tru?

⁹ Olsem ol fas Kristin, yumi tu yumi no joen long “fasin blong wol ya we i nogud olgeta.” (Gal. 1:4) From samting ya, plante man oli no kasem save long ol samting we yumi mekem long laef blong yumi. Mo sam man oli no laekem yumi nating. Samfala oli ting se yumi “no laekem nating ol narafala man,” be yumi no olsem. Yumi  soemaot we yumi lavem ol man taem yumi go long ol haos wanwan, blong talemaot gud nius blong Kingdom. (Mat. 22:39; 24:14) Yumi talemaot Kingdom blong Jehova, from we yumi bilif strong se Kingdom ya bambae i spolem olgeta gavman blong man. Kingdom ya we Kraes i King blong hem, bambae i mekem wan niufala wol blong stret fasin, i kamtru.—Dan. 2:44; 2 Pita 3:13.

10, 11. (a) ?Yumi yusum wol ya olsem wanem? (b) ?Long wanem rod ol Kristin oli no yusum tumas wol ya?

¹⁰ I no longtaem bambae wol blong Setan i lus. Taswe yumi save se i no taem blong yumi traem kasem wan gudfala laef. Aposol Pol i talem se: “Taem we i stap yet i sot nomo.” Hem i talem se olgeta we oli stap pem ol samting “oli mas kam olsem olgeta we oli no gat wan samting. Mo olgeta we oli stap yusum wol, oli mas kam olsem olgeta we oli no stap yusum tumas wol ya. From we fasin blong wol ya i stap jenis.” (1 Kor. 7:29-31, NW) ?Yumi yusum wol ya olsem wanem? Yumi yusum ol niufala samting olsem mobaelfon, kompiuta, televisin, mo Intenet, blong tijim Baebol long ol man long olgeta ples long wol, long plante defren lanwis. Yumi wok mo kasem mane we yumi nidim. Mo yumi pem ol samting we yumi nidim evri dei. Be yumi no yusum tumas wol ya. Hemia i min se mane, ol samting we yumi gat, mo wok blong yumi, oli no ol samting we oli stap fasples long laef blong yumi.—Ridim 1 Timoti 6:9, 10.

¹¹ Wan narafala rod we ol Kristin oli no yusum tumas wol ya, hemia se oli no tinghevi tumas long edukesen we wol ya i givim. Plante man long wol oli ting se oli mas go long yunivesiti, kasem wan gudfala wok, mo winim plante mane. Be yumi no tingting olsem. Yumi stap long wol ya olsem ol strenja nomo. Yumi no traehad blong kasem “gudfala laef” long wol ya. (Jer. 45:5; Rom 12:16, NW) Yumi obei long woning we Jisas i givim long yumi, hemia se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) Yufala ol yangfala Kristin. Yufala i mas tingbaot se samting we i moa impoten long ol narafala samting, hemia wok blong Jehova. Yufala i mas skul blong gat save we i naf blong givhan long yufala, blong lukaot long yufala wanwan. Olsem nao, bambae yufala i save mekem wok blong Jehova long olgeta hat, laef, paoa, mo tingting blong yufala. (Luk 10:27) Sipos yufala i mekem olsem, bambae yufala i kam ‘rijman long fes blong God.’—Luk 12:21; ridim Matiu 6:19-21.

Yumi No Mas Tingting Tumas Long Ol Samting Blong Laef

12, 13. ?From wanem yumi defren long ol man long wol, taem yumi obei long ol tok blong Jisas long Matiu 6:31-33?

¹² Narafala samting we i mekem se yumi defren long ol man long wol, hemia tingting we yumi gat long ol samting blong laef. Jisas i talem se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya. Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Mat. 6:31-33) Ating plante long yumi i luk se ol tok ya blong Jisas oli tru. Papa blong yumi long heven, oltaem hem i stap givim ol samting we yumi nidim.

¹³ I gud we yumi glad long wanem samting we yumi gat. (1 Tim. 6:6) Hemia i defren long tingting blong ol man long wol. Taem ol yangfala oli mared, plante long olgeta oli wantem gat evri samting wantaem nomo. Oli wantem gat wan haos, ol samting blong putum long haos, wan naes trak, mo ol niufala samting olsem mobaelfon, ol smol masin blong lesin long miusik no wajem muvi. Be ol Kristin we oli stap long wol ya olsem ol strenja nomo, oli bos long tingting blong olgeta. Oli pem ol samting nomo we oli naf blong pem. Yumi glad we plante Kristin oli no spenem taem mo mane blong pem olgeta samting ya. Nao oli gat moa taem mo paoa blong yusum long wok blong Jehova. Samfala oli mekem wok blong paenia, wok long Betel, wok blong seket elda no distrik elda, no wok blong misinari. Yumi talem tangkiu tumas  long ol brata mo sista from ol wok we oli mekem, taem oli wosipim Jehova long olgeta hat blong olgeta.

14. ?Yumi lanem wanem long parabol blong Jisas?

¹⁴ Long wan parabol, Jisas i talem se sipos yumi ‘tingting tumas from laef blong yumi long wol ya, mo yumi wantem tumas blong kam rijman,’ bambae yumi no moa wok strong long wok blong God. (Mat. 13:22) Yumi save blokem trabol ya sipos yumi glad blong stap long wol ya olsem ol strenja nomo. Bambae yumi meksua se ae blong yumi i “klia gud.” Hemia i min se tingting blong yumi i stap long wok blong God fulwan, mo oltaem yumi putum Kingdom i stap long fasples long laef blong yumi.—Mat. 6:22, Nyutesteman wetem Ol Sam long Bislama.

‘Wol Ya i Stap Lus’

15. ?Jon i talem wanem long saed blong wol ya?

¹⁵ Wan impoten risen from wanem ol tru Kristin oli stap long wol blong Setan “olsem ol strenja nomo, mo olsem ol man we oli no gat hom blong olgeta,” hemia from we oli bilif se wol ya bambae i lus i no longtaem. (1 Pita 2:11; 2 Pita 3:7) Ol desisen blong yumi, ol samting we yumi wantem, ol mak we yumi wantem kasem, mo ol narafala samting we yumi mekem long laef, oli soemaot we yumi bilif se wol ya bambae i lus. Aposol Jon i talem long ol Kristin se oli no mas laekem ol fasin blong wol mo ol samting we i stap long hem, from we “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:15-17.

16. ?Yumi save mekem wanem blong soemaot se yumi defren long ol man long wol?

¹⁶ Jehova i talem long ol man Isrel se sipos oli obei long hem, bambae oli ‘nambawan man blong hem, i winim ol narafala man long wol.’ (Eks. 19:5) Taem ol man Isrel oli obei long God, wosip we oli mekem long God mo ol samting we oli mekem long laef blong olgeta, i defren long ol narafala neson. Tede tu, ol man blong Jehova oli defren long ol man long wol blong Setan. Baebol i talem long yumi se taem yumi stap wet long nambawan promes blong God blong i kamtru, “yumi mas livim olgeta fasin we oli no stret long fes blong hem. Yumi no mas wantem tumas ol samting blong wol ya, mo yumi mas blokem ol samting we yumi nomo i wantem. Naoia yumi mas mekem ol fasin we i stret, we God i stap harem gud long hem. Jisas Kraes, hem i givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi evriwan i kam wan famle, we laef blong yumi i klin, yumi man blong hem nomo, mo yumi strong blong mekem ol gudfala samting.” (Taet. 2:11-14) ‘Ol man we oli blong hem nomo,’ hemia ol tabu Kristin mo plante milian “narafala sipsip” we oli stap givhan long olgeta.—Jon 10:16.

17. ?From wanem bambae ol tabu Kristin mo ol narafala sipsip, oli no sore we oli stap olsem ol strenja nomo long rabis wol ya?

¹⁷ Nambawan promes we ol tabu Kristin oli stap wet long hem, hemia blong rul wetem Kraes long heven. (Rev. 5:10) Promes we ol narafala sipsip oli stap wet blong kasem, hemia laef olwe long wol. Taem promes ya i kamtru, bambae ol narafala sipsip oli no moa stap olsem ol strenja long wan rabis wol. Bambae oli gat ol haos we oli naes tumas mo bambae oli gat plante gudfala samting blong kakae mo dring. (Sam 37:10, 11; Aes. 25:6; 65:21, 22) Bambae oli no fogetem Jehova olsem ol man Isrel oli mekem. Oltaem bambae oli tingbaot se Jehova, God ya we i “stap rul long olgeta ples long wol,” hem nao i stap givim olgeta samting long olgeta. (Aes. 54:5) Ol tabu Kristin mo ol narafala sipsip bambae oli no sore we oli stap olsem ol strenja nomo long rabis wol ya.

?Bambae Yu Yu Ansa Olsem Wanem?

• ?Ol man blong God bifo, oli mekem olsem wanem blong oli stap olsem ol strenja nomo long wol?

• ?Ol fas Kristin oli gat wanem tingting long saed blong wol?

• ?Ol tru Kristin oli no yusum tumas wol ya olsem wanem?

• ?From wanem bambae yumi no sore we yumi stap olsem ol strenja nomo long rabis wol ya?

[Kwestin]

[Tok blong pija long pej 20]

Ol fas Kristin oli no joen long ol pleplei we i leftemap raf fasin mo nogud fasin blong man wetem woman