?From Wanem Yu Mas Letem Spirit Blong God i Lidim Yu?

“Yu yu God blong mi. Spirit blong yu i gud tumas. Mi mi wantem we hem i lidim mi long rod blong stret fasin.”—SAM 143:10, NW.

1. Yu traem eksplenem olsem wanem wan paoa we man i no luk, i save lidim hem.

?YU YU yusum finis wan kampas? Wan kampas i wan smol samting we i raon mo i save givhan long man blong i save rod we hem i mas folem. Hem i gat wan ara long medel blong hem, we ara ya i soemaot ples we not i stap long hem. Wan paoa we i olsem lektrik i pulum ara ya blong i muvmuv (magnetism), be yumi no save luk paoa ya. Plante handred yia finis, ol man oli stap yusum kampas taem oli stap wokbaot i go samples, no taem oli stap long sip long bigfala open si. Kampas i givhan long olgeta blong oli no lusum rod blong olgeta.

2, 3. (a) ?Bifo we bifo olgeta, Jehova i yusum wanem paoa we i bigwan tumas? (b) ?From wanem yumi save se paoa blong God i save wok long laef blong yumi tede?

² I gat wan narafala paoa we i save lidim yumi long wan fasin we i gud moa. ?Hemia wanem? Hemia wan paoa we Baebol i tokbaot long Jenesis japta 1 vas 1 mo 2. Hem i tokbaot samting we Jehova i mekem longtaem bifo, i talem se: “Bifo we bifo olgeta, God i mekem skae mo graon wetem olgeta samting we i stap long tufala.” Yumi save se God i yusum wan paoa we i bigwan tumas blong mekem olgeta samting, from we Baebol i talem se: “Paoa blong God i stap olbaot antap long [wol].” (Jen. 1:1, 2, futnot) Paoa ya hemia tabu spirit blong God, we hem i yusum blong mekem olgeta samting. Yumi glad tumas we Jehova i yusum tabu spirit blong hem blong givim laef long yumi, mo blong mekem olgeta narafala samting.—Job 33:4; Sam 104:30.

³ Yumi save se Jehova i yusum paoa blong hem blong mekem yumi. ?Be olsem wanem? ?Paoa ya i save wok long laef blong yumi? Yes, Pikinini blong God i talem long ol man blong hem se paoa ya i save lidim olgeta. Hem i talem se tabu spirit bambae i tijim yumi long “olgeta tok we i tru.” (Jon 16:13) ?Tabu spirit hem i wanem? ?From wanem yumi mas wantem we spirit ya i lidim yumi?

?Tabu Spirit Hem i Wanem?

4, 5. (a) ?Olgeta we oli bilif long Triniti, oli ting se tabu spirit hem i wanem? (b) ?Sipos yu mas eksplenem tabu spirit long wan man, bambae yu talem se hem i wanem?

⁴ Ating sam man we yu toktok wetem olgeta long wok blong prij, oli bilif long Triniti. Oli ting se tabu spirit hem i God, i save tingting mo mekem samting sem mak olsem Papa God. Be hemia i no wanem we Baebol i tijim. (1 Kor. 8:6) I klia se tijing ya Triniti i no stret folem ol tok blong Baebol.

⁵ Ale, ?tabu spirit hem i wanem? Long Jenesis 1:2, Baebol long Bislama i tanem Hibru tok ya ruʹach i kam “Spirit.” Futnot blong vas ya i talem se narafala rod blong tanem tok ya hemia “win.” Long sam narafala vas long Baebol, oli tanem tok ya i kam “win.” No maet oli yusum wan narafala tok we i givim sem tingting. (Skelem wetem Jenesis 3:8; 8:1.) Nating se yumi no save luk win, be yumi save luk samting we win i mekem. Long sem fasin, yumi no save luk tabu spirit. Be tabu spirit i save mekem sam samting we yumi luk. Tabu spirit i no wan man mo i no wan enjel. Hem i paoa blong God. God i yusum paoa ya antap long ol man mo ol samting, blong mekem wanem we hem i wantem i kamtru. ?Olsem wanem? ?Yu no ting se bigfala paoa ya i save kamaot long God ya we i gat olgeta paoa? !Si, bigfala paoa ya i kamaot long God!—Ridim Aesea 40:12, 13.

6. ?Deved i askem wanem long Jehova?

⁶ ?Olsem wanem? ?Jehova i save yusum paoa blong hem blong lidim yumi long laef? Hem i promes long Deved se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap  lukaot gud long yu.” (Sam 32:8) ?Deved i wantem we God i lidim hem? Yes, hem i prea long Jehova se: “Plis yu tijim mi blong mekem ol samting we yu yu wantem, from we yu yu God blong mi. Spirit blong yu i gud tumas. Mi mi wantem we hem i lidim mi.” (Sam 143:10, NW) Yumi tu yumi mas wantem we spirit blong God i lidim yumi. ?From wanem? Bambae yumi tokbaot fo risen.

Yumi No Naf Blong Lidim Yumi

7, 8. (a) ?From wanem yumi no save lidim yumi? (b) ?Wanem eksampol i soemaot from wanem yumi mas letem God i lidim yumi long rabis wol ya?

⁷ Fas risen from wanem yumi mas wantem we spirit blong God i lidim yumi, hemia from we yumi no naf blong lidim yumi bakegen. Tok ya lidim, i min se man i soemaot long narafala stret rod blong hem i folem. Jehova i no mekem ol man oli naf blong lidim olgeta. Mo from we yumi sinman, yumi mekem plante mastik taem yumi traem lidim yumi. Profet Jeremaea i talem se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jer. 10:23) ?From wanem man i no save bos long laef blong hem? God i yusum Jeremaea blong talemaot ansa long yumi. Jehova i talem se: “?Hu man i save savegud tingting blong man? Oltaem nomo, tingting blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.”—Jer. 17:9; Mat. 15:19.

⁸ Yu traem tingbaot sipos wan man i mas wokbaot long dakbus no long draeples. Hem i no save gud ples ya mo hem i save kasem trabol. I no waes sipos hem i wokbaot long ples ya hem wan, we i no gat wan man blong lidim hem mo i no gat wan kampas. Sipos man ya i no save wanem blong mekem blong i faenem kakae mo wota, mo hem i no save faenem stret rod blong i folem, bambae hem i save ded. Long sem fasin, man we i ting se hem i save lidim hem wan long rabis wol ya, be hem i no letem God i soemaot stret rod long hem, bambae hem i kasem bigfala trabol. Yumi mas mekem olsem Deved we i prea long Jehova blong i givhan long hem. Deved i wantem se ‘oltaem hem i stap folem rod blong God, mo neva hem i lusum rod ya.’ (Sam 17:5; 23:3) ?Yumi mas mekem wanem blong God i lidim yumi?

9. ?Tabu spirit i save lidim gud yumi olsem wanem? Plis lukluk pija long pej 19.

⁹ Sipos yumi gat tingting daon mo yumi trastem Jehova, bambae hem i givim tabu spirit long yumi blong lidim yumi. ?Bambae spirit blong hem i givhan long yumi olsem wanem? Jisas i talem long ol man blong hem se: “Spirit ya blong Givhan, we hem i Tabu Spirit, we bambae Papa blong mi i save sanem i kam long nem blong mi, hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.” (Jon 14:26) Oltaem yumi mas stadi long Tok blong God mo long ol tijing blong Kraes. Yumi mas toktok wetem Jehova long prea taem yumi stap stadi. Taem yumi mekem olsem, bambae tabu spirit i givhan long yumi blong kasem save long bigfala waes blong Jehova. Nao bambae yumi save mekem ol samting we God i wantem. (1 Kor. 2:10) Mo taem ol samting we yumi no tingbaot oli hapen, spirit blong God i  save givhan long yumi blong save wanem blong mekem. Bambae spirit blong God i givhan long yumi blong tingbaot bakegen ol rul blong Baebol we yumi lanem. Bambae spirit blong God i givhan long yumi blong save wanem we yumi mas mekem blong folem gud ol rul ya.

Spirit Blong God i Lidim Jisas

10, 11. ?Jisas i save se tabu spirit bambae i mekem wanem long hem? ?Tabu spirit i givhan long hem olsem wanem?

¹⁰ Seken risen from wanem yumi mas letem tabu spirit i lidim yumi, hemia from we stret pikinini blong God i letem tabu spirit i lidim hem. Taem Jisas i stap long wol, hem i save se tabu spirit bambae i givhan long hem. Mo hem i save profet tok we i talem se: “Spirit blong Hae God bambae i stap long hem, i mekem hem i waes, mo i mekem hem i man blong save. Spirit ya bambae i givim gudfala toktok long hem, mo i mekem hem i gat paoa. Bambae hem i mekem hem i save ol samting we Hae God i wantem, mo i mekem hem i man blong ona long Hae God.” (Aes. 11:2) Jisas i no gat wan isi laef taem hem i stap long wol. !Ating hem i wantem tumas we spirit blong God i givhan long hem!

¹¹ Ol tok blong Jehova oli kamtru. Buk blong Luk i tokbaot samting we i hapen afta we Jisas i baptaes. “Nao taem Jisas i aot long Jodan Reva blong gobak long ples blong hem, Tabu Spirit i fulap long hem, mo i lidim hem i pas long draeples.” (Luk 4:1) Long draeples, Jisas i livim kakae, hem i prea, mo i tingting dip. I luk olsem se long taem ya, Jehova i talem long Jisas wanem we hem i mas mekem, mo i talemaot ol samting we bambae oli hapen long hem. Spirit blong God i wok long tingting mo hat blong Jisas. Spirit blong God i lidim tingting blong Jisas mo ol desisen we hem i mekem. From samting ya, oltaem Jisas i save wanem we Papa blong hem i wantem hem blong mekem, mo oltaem hem i mekem ol samting ya.

12. ?From wanem yumi mas askem God blong i givim spirit blong hem blong lidim yumi?

¹² Jisas i save se spirit blong God i mas wok long laef blong hem. Taswe, hem i talem long ol man blong hem se oli mas askem tabu spirit long God, mo oli mas letem tabu spirit i lidim olgeta long laef. (Ridim Luk 11:9-13.) ?From wanem yumi mas askem God blong i givim spirit blong hem blong lidim yumi? Hemia from we spirit blong hem i save jenisim tingting blong yumi, mo i save givhan long yumi blong gat “tingting blong Kraes.” (1 Kor. 2:16; Rom 12:2) Yes, taem yumi letem spirit blong God i lidim yumi long laef, yumi save tingting olsem Kraes mo yumi save folem fasin blong hem.—1 Pita 2:21.

Spirit Blong Wol i Lidim Yumi i Go Krangke

13. ?Spirit blong wol hem i wanem? ?Mo hem i pulum ol man blong mekem wanem?

¹³ Namba tri risen from wanem yumi wantem spirit blong God i lidim yumi, hemia from we sipos yumi no gat spirit blong God, bambae spirit blong wol i lidim yumi i go krangke. Tede, spirit blong wol i bos long bighaf blong ol man. Wol ya i gat bigfala paoa blong pulum ol man blong mekem samting we i defren olgeta long wanem we tabu spirit i lidim yumi blong mekem. Spirit blong wol i no givhan long ol man blong gat tingting blong Kraes. Hem i pulum ol man blong gat tingting mo fasin blong Setan we i rulum wol.  (Ridim Efesas 2:1-3; Taetas 3:3.) Sore tumas long man we i letem spirit blong wol i bos long hem, mo i ‘mekem ol rabis samting we tingting blong hem i wantem.’ Bambae hem i “no save go insaed long niufala wol ya we God i king long hem.”—Gal. 5:19-21.

14, 15. ?Yumi mas mekem wanem blong blokem spirit blong wol?

¹⁴ Jehova i givim sam samting blong givhan long yumi blong blokem spirit blong wol. Aposol Pol i talem se yumi “mas joen long Masta blong yumi, blong kasem paoa. Hem i gat olgeta paoa, mo [yumi] mas kam strong long paoa blong hem.” ?From wanem? From we ‛bambae yumi save agens long ol nogud samting long rabis dei ya (NW).’ (Efes. 6:10, 13) Jehova i givim spirit blong hem long yumi, we i mekem se yumi gat paoa blong blokem ol samting we Setan i mekem blong pulum yumi i go krangke. (Rev. 12:9) Spirit blong wol hem i strong, mo yumi no save ronwe long hem. Be yumi save blokem spirit ya. !Tabu spirit i strong moa i bitim spirit blong wol! !Mo bambae tabu spirit i givhan long yumi!

¹⁵ Aposol Pita i tokbaot sam Kristin long taem blong hem se oli lego trutok. Hem i talem se: “Oli lego stret rod nao oli go krangke.” (2 Pita 2:15) Yumi glad tumas se “Spirit ya we yumi kasem finis, hem i no wan spirit we i kamaot long wol. Hem i Spirit blong God.” (1 Kor. 2:12) Yumi mas letem tabu spirit i lidim yumi mo yumi mas yusum gud ol samting we Jehova i givim long yumi, blong yumi fren gud wetem hem oltaem. Nao bambae yumi save mekem fasin we i stret mo yumi blokem spirit blong rabis wol ya.—Gal. 5:16.

Tabu Spirit i Karem Gudfala Frut

16. ?Tabu spirit i karem wanem gudfala frut long laef blong yumi?

¹⁶ Namba fo risen from wanem yumi wantem se spirit blong God i lidim yumi, hemia from we spirit blong God i save karem nambawan frut long laef blong yumi. Hemia i min se tabu spirit i givhan long yumi blong soemaot ol gudfala fasin. (Ridim Galesia 5:22, 23.) * Yumi evriwan i wantem se yumi lavem moa ol man, yumi glad, mo yumi gat pis. Yumi wantem soemaot moa longfala tingting, kaen fasin, mo gud fasin. Yumi evriwan i wantem se bilif blong yumi i strong moa, yumi kamgud moa long kwaet fasin mo yumi bos long tingting blong yumi. Ol gudfala fasin ya oli mekem i gud long yumi, long famle blong yumi, mo long kongregesen blong yumi. I no gat wan stret mak we i soemaot se yumi kam gud fulwan long ol fasin ya we oli frut blong spirit. Taswe oltaem yumi mas wok had blong kam gud moa long ol gudfala fasin ya we oli frut blong spirit.

17. ?Yumi save mekem wanem blong traehad moa blong soemaot frut blong spirit?

¹⁷ I waes blong yumi tingbaot samting ya: ?Ol toktok mo ol fasin blong yumi, oli soemaot se tabu spirit i stap lidim yumi? ?Mo oli soemaot se yumi gat ol gudfala fasin we oli frut blong spirit? (2 Kor. 13:5a; Gal. 5:25) ?Olsem wanem sipos yumi luk se yumi mas kam gud moa long sam fasin we oli frut blong spirit? Yumi mas traehad moa blong letem tabu spirit i givhan long yumi. Yumi save mekem olsem, taem yumi stadi long ol fasin ya wanwan. Yumi save yusum Baebol mo ol buk blong ogenaesesen blong stadi long ol fasin ya. Olsem nao yumi save tingbaot ol samting we yumi save mekem blong soemaot frut blong spirit evri dei long laef blong yumi, mo biaen yumi mas wok had blong soemaot ol fasin ya. * Taem yumi luk gudfala frut blong tabu spirit long laef blong yumi, mo long laef blong ol Kristin brata sista blong yumi, bambae yumi kasem save se i gud tumas blong letem tabu spirit i lidim yumi.

?Yu Yu Stap Letem Spirit Blong God i Lidim Yu?

18. ?Yumi lanem wanem long eksampol blong Jisas we hem i letem spirit blong God i lidim hem?

¹⁸ Taem God i mekem heven mo wol, Jisas i “nambawan man blong wok blong hem.” Taswe Jisas i save gud paoa ya (magnetism) we i olsem  lektrik, we i pulum ara blong kampas blong i soemaot stret rod blong man i folem. (Prov. 8:30, NW; Jon 1:3) Baebol i no talem se taem Jisas i stap long wol, hem i yusum paoa ya (magnetism) blong lidim hem. Be Baebol i talem se tabu spirit blong God i gat bigfala paoa long laef blong Jisas. Hem i wantem we spirit blong God i lidim hem. Taem spirit blong God i soemaot long Jisas wanem samting we hem i mas mekem, hem i glad mo hem i mekem samting ya. (Mak 1:12, 13; Luk 4:14) ?Olsem wanem? ?Yu yu mekem olsem Jisas? ?Yu letem spirit blong God i lidim yu?

19. ?Yumi mas mekem wanem blong tabu spirit i lidim yumi?

¹⁹ Tede tu, spirit blong God i wok long tingting mo long hat blong olgeta we oli wantem se spirit ya i lidim olgeta. ?Yu save mekem wanem blong letem spirit blong God i lidim yu long stret rod? Oltaem yu mas prea long Jehova blong i givim spirit blong hem long yu, mo i givhan long yu blong yu glad blong letem spirit blong hem i lidim yu. (Ridim Efesas 3:14-16.) Yu mas soemaot we yu wantem se spirit blong God i lidim yu. Yu save mekem olsem taem yu stadi long Baebol. God i yusum tabu spirit blong hem blong givim Baebol long ol man. (2 Tim. 3:16, 17) Mo yu mas obei long ol waestok we i stap long Baebol. Yu mas glad blong mekem ol samting we tabu spirit i soemaot se i stret blong yu mekem. Ale, bambae yu soemaot we yu bilif long Jehova se hem i save lidim yu long rod we i beswan long rabis wol ya.

[Ol futnot]

?Yu Yu Tingbaot Ol Bigfala Poen?

• ?Tabu spirit i save wok long laef blong yumi olsem wanem?

• ?Wanem fo risen from wanem yumi mas wantem se spirit blong God i lidim yumi?

• ?Yumi mas mekem wanem blong letem tabu spirit i lidim yumi long stret rod?

[Kwestin]

[Tok blong pija long pej 17]

Spirit blong God i gat bigfala paoa long laef blong Jisas

[Tok blong pija long pej 19]

Spirit blong God i wok long tingting mo hat blong yumi blong lidim yumi long laef