?From Wanem Yumi Mas Save Ansa?

“Mi mi gat ten yia taem mi stat blong frenem ol boe. Fastaem, mitufala i holholem han blong mitufala mo kisim mitufala. Be i no longtaem biaen, mitufala i tajem ol tabu haf blong bodi blong mitufala mo mitufala i traem ol doti fasin blong man wetem woman. Taem mi gat 15 yia, mi mi statem wok. Ol man we mi wok wetem olgeta, oli wantem se mi slip wetem olgeta. Mi mi no fraet, mo mi wantem mekem evri samting we ol fren blong mi long wok oli stap mekem. Mi wantem se ol fren blong mi oli glad long mi. Ale, mi mi mekem plante doti fasin blong man mo woman.”—SARAH, * OSTRELIA.

ATING bambae yu sapraes blong save se Sarah i gruap long famle we i strong blong mekem wosip long God. Papa mama blong hem tufala i traem tijim hem blong i folem ol klin fasin we Baebol i tokbaot. Be Sarah i no mekem wanem we Baebol i talem.

Plante man oli ting se desisen blong Sarah i gud nomo. Oli ting se ol tok blong Baebol oli no stret long taem blong yumi. Sam narafala oli talem se oli strong long jos, be oli mekem enikaen fasin blong man wetem woman. Oli ting se hemia i oraet nomo.

I tru se Baebol i tokbaot fasin blong man wetem woman. ?Be olsem wanem? ?Yu mas save wanem we Baebol i talem, mo yu mas folem ol tok blong hem? Ol tok blong Baebol “oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok.” (2 Timoti 3:16) Sipos yu bilif se God i mekem ol man, mo yu bilif se Baebol i Tok blong God, i impoten we yu save wanem we Baebol i tijim long saed ya.

Sore tumas, tingting blong plante man i fasfas. Oli no save ol loa blong Baebol we man mo woman tufala i mas folem. Ol tijing blong ol lida blong jos oli no sem mak, mo oli talem se ol tijing ya evriwan oli stret long ol tok blong Baebol. Plante jos oli seraot from ol tijing ya.

I gud yu spenem smol taem blong faenemaot wanem we Baebol i talem, i bitim we yu folem tingting blong ol narafala. Nekis haf i tokbaot ten kwestin we plante man oli askem. Oli askem ol kwestin ya from we oli wantem save ol loa blong Baebol we man mo woman tufala i mas folem. Bambae yu luk se ol ansa blong ol kwestin ya, oli soemaot wanem we Baebol i rili tijim. Las haf we i tokbaot ol loa ya, i soemaot from wanem ol desisen we yumi mekem oli mas waes.

[Futnot]