Yumi Lanem Samting Long Tok Blong God

Ol Loa Blong God Oli Mekem i Gud Long Yumi

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?From wanem yumi mas obei long God?

Yumi mas obei long God from we hem nao i mekem yumi. Jisas i obei oltaem long God. (Jon 6:38; Revelesen 4:11) Yumi soemaot se yumi lavem God taem yumi folem ol loa blong hem.—Ridim 1 Jon 5:3.

Olgeta loa blong Jehova God oli save mekem i gud long yumi. Oli tijim yumi blong gat wan gudfala laef naoia, mo oli talem wanem we yumi mas mekem blong kasem laef we i no save finis long fiuja.—Ridim Ol Sam 19:7, 11; Aesea 48:17, 18.

2. ?Ol loa blong God oli mekem i gud long helt blong yumi olsem wanem?

God i putum tabu long fasin blong drong. Sipos yumi obei long loa ya, bambae yumi no kasem sik mo aksiden we i kilim yumi ded. Man we i dring bitim mak i kam slef blong fasin ya, nao hem i mekem ol krangke fasin. (Ol Proveb 23:20, 29, 30) Jehova i no putum tabu long strong dring. Yumi save dring, be yumi no bitim mak.—Ridim Ol Sam 104:15; 1 Korin 6:10.

Jehova i givim woning long yumi se yumi no mas jalus, yumi no mas kros, mo yumi no mas mekem ol narafala rabis fasin we i save spolem yumi. Moa we yumi folem advaes blong God, moa we bambae yumi harem gud long helt blong yumi.—Ridim Ol Proveb 14:30; 22:24, 25.

3. ?Loa blong God i lukaot gud long yumi olsem wanem?

Loa blong God i putum tabu long fasin ya we man i slip wetem woman we i no woman blong hem mo woman i slip wetem man we i no man blong hem. (Hibrus 13:4) Taem man mo woman we tufala i mared tufala i obei long loa ya, bambae tufala i harem se tufala i stap gud. Mo bambae ol pikinini blong tufala oli harem gud. Be plante man we oli no obei long loa ya, oli kasem rabis sik, oli divos, oli faet, oli harem nogud long tingting blong olgeta, mo oli lukaot long ol pikinini olgeta wan nomo.—Ridim Ol Proveb 5:1-9.

Taem yumi blokem ol samting we oli traem pulum yumi blong mekem nogud fasin, yumi stap lukaot gud long fasin fren blong yumi wetem God. Mo tu yumi no spolem ol narafala.—Ridim 1 Tesalonaeka 4:3-6.

 4. ?Taem yumi tinghae long laef, hemia i mekem i gud long yumi olsem wanem?

Laef i wan presen we God i givim. Man we i tinghae long laef i harem gud long helt blong hem. Hem i lego fasin blong smok mo sam narafala fasin we i save spolem laef blong hem. (2 Korin 7:1) God i tinghae long pikinini we i stap long bel blong mama blong hem. (Eksodas 21:22, 23, NW) Taswe yumi no mas minim blong kilim wan pikinini we i no bon yet. Mo man we i tinghae long laef i lukaot gud taem hem i stap long wok, long haos, mo long trak. (Dutronome 22:8) Mo hem i no mekem spot we i save putum laef blong hem long denja from we laef i wan presen we God i givim.—Ridim Ol Sam 36:9.

5. ?Loa blong God se blad i tabu, i mekem i gud long yumi olsem wanem?

God i talem se blad i tabu from we hem i pija blong laef blong man no laef blong anamol. (Jenesis 9:3, 4) Loa blong God se blad i save pemaot laef, i mekem i gud long yumi. ?I mekem i gud long yumi olsem wanem? Hem i openem rod blong God i fogivim ol sin blong yumi.—Ridim Levitikas 17:11-13; Hibrus 9:22.

Blad blong Jisas i givhan bigwan long yumi from we Jisas i stret gud olgeta. Jisas i givim laef blong hem blong pemaot ol man. Biaen hem i go long heven mo i givim blad blong hem, we i pija blong laef blong hem, i go long God. (Hibrus 9:12) Blad blong Jisas we i ron i mekem se yumi gat janis blong kasem laef we i no save finis.—Ridim Matiu 26:28; Jon 3:16.

Blong save moa, yu lukluk japta 12 mo 13 blong buk ya ?Wanem Samting We Baebol i Rili Tijim?, we ol Witnes blong Jehova oli wokem.